1. Nĩ ũndũ ũrĩkũ wa mwanya ũtũmaga tũkene?

NĨ TŨKENAGA mũno rĩrĩa tweiguĩra ũrĩa andũ a Jehova marongerereka. Mwaka ũcio ũrathirire, tũrerutire Bibilia na andũ makĩria ma 10,000,000. Ũndũ ũcio nĩ ũronania wega atĩ nĩ tũrareka ũtheri witũ ũtheragĩre andũ. Ningĩ ta wĩcirie ũhoro wa andũ milioni nyingĩ arĩa twanyitire ũgeni moke Kĩririkano, na makĩĩruta ũhoro wa wendo ũrĩa Ngai onanirie rĩrĩa aarutire Jesu arĩ igongona.—1 Joh. 4:9.

2, 3. (a) Nĩ ũndũ ũrĩkũ ũtagiragia tũhenie “ta ũtheri thĩinĩ wa thĩ ĩno”? (b) Kũringana na ciugo iria Jesu aagwetire thĩinĩ wa Mathayo 5:14-16, nĩ ũndũ ũrĩkũ tũkwarĩrĩria?

² Aira a Jehova thĩinĩ wa thĩ yothe maragia thiomi itiganĩte. O na kũrĩ ũguo, gũkorũo tũkĩaria thiomi ngũrani gũtigiragia tũgooce Jehova Ithe witũ tũrĩ na ũrũmwe. (Kũg. 7:9) Gũtekũmakania twaragia rũthiomi rũrĩkũ kana tũikaraga kũ, no tũhote kũhenia “ta ũtheri thĩinĩ wa thĩ ĩno.”—Afil. 2:15.

³ Wongerereku ũrĩa tũreyonera, ũrũmwe ũrĩa tũkoragwo naguo, na ũrĩa tũikaraga twĩiguĩte, nĩ maũndũ magoocithagia Jehova. Thĩinĩ wa gĩcunjĩ gĩkĩ tũkwarĩrĩria ũrĩa tũngĩreka ũtheri witũ ũtherere andũ.—Thoma Mathayo 5:14-16.

4, 5. (a) Makĩria ma kũhunjia-rĩ, nĩ atĩa ũngĩ tũngĩka nĩguo ũtheri witũ ũtherere andũ? (b) Mĩtugo itũ mĩega ĩngĩkorũo na moimĩrĩro marĩkũ? (Rora mbica kĩambĩrĩria-inĩ gĩa gĩcunjĩ gĩkĩ.)

⁴ Gĩcunjĩ kĩarĩ na kĩongo “Ũtheri Nduma-inĩ,” thĩinĩ wa ngathĩti ya Mũrangĩri ya Juni 1, 1925 kĩoigĩte ũũ: “Gũtirĩ mũndũ ũngĩkorũo arĩ mwĩhokeku harĩ Mwathani matukũ-inĩ maya matigarĩte . . . o tiga akorirũo nĩ arareka ũtheri wake ũtheragĩre andũ.” Gĩcunjĩ kĩu gĩacokire gĩgĩtaarĩria ũũ: “Mũndũ no mũhaka eke ũguo na njĩra ya kũhunjĩria andũ ũhoro ũrĩa mwega, na gũtũũra kũringana na njĩra cia ũtheri.” Nĩ ma, njĩra ĩmwe tũrekaga ũtheri witũ ũtherere andũ nayo nĩ kũhunjia ũhoro ũrĩa mwega na gũtua andũ arutwo. (Mat. 28:19, 20) Makĩria ma ũguo, nĩ tũgoocithagia Jehova kũgerera mĩtugo itũ mĩega. Andũ nĩ monaga mĩtugo itũ rĩrĩa tũrahunjia. Rĩrĩa mona tũcanjamũkĩte na tũkamageithia tũkenete, ũndũ ũcio nĩ ũmateithagia kũgĩa na mawoni mega gũtwerekera na kwerekera Ngai ũrĩa tũthathayagia.

⁵ Jesu eerire arutwo ake ũũ: “Mwaingĩra nyũmba, geithiai ene kuo.” (Mat. 10:12) Kũrĩa Jesu na arutwo ake maahunjagia kaingĩ, warĩ ũndũ wa ndũire harĩ andũ kũnyita andũ matoĩ ũgeni mĩciĩ-inĩ yao. No kũndũ kũingĩ ũmũthĩ tiguo kũhaana. O na kũrĩ ũguo, gũtaarĩria mũndũ ũrĩa tũrahunjĩria tũcanjamũkĩte kĩrĩa gĩatũma tũmũceerere, no kũnine guoya ũrĩa angĩkorũo naguo kana kũnyihanyihie marakara marĩa angĩkorũo namo. Njĩra ĩrĩa njega biũ ya kwambĩrĩria kũhunjĩria mũndũ nĩ gũkorũo tũrĩ acanjamũku. O na aarĩ na ariũ a Ithe witũ makĩhunjia na gakari nĩ meyoneire atĩ ũguo nĩguo kũrĩ. Ũngĩkorũo ũkĩhunjia na gakari ũrĩ mũcanjamũku na ũkageithia andũ ũkenete, ũndũ ũcio no ũtũme moke moe mabuku na ũgũteithie kwambĩrĩria ndeereti nao.

6. Mũrũ wa Ithe witũ ũmwe mũkũrũ marĩ na mũtumia wake mekaga atĩa nĩguo mathiĩ na mbere kũhunjia?

⁶ Mũrũ wa Ithe witũ ũmwe mũkũrũ na mũtumia wake kuuma Ngeretha matihotaga kũhunjia nyũmba kwa nyũmba ta ũrĩa meekaga mbere nĩ ũndũ wa mathĩna ma mwĩrĩ. O na kũrĩ ũguo, nĩ marekaga ũtheri wao ũtherere andũ marĩ o kwao mũciĩ. Maigaga kametha ka mabuku hakuhĩ na mũciĩ wao mathaa marĩa aciari mokaga kũgĩra ciana ciao ikiuma cukuru ĩrĩ hau hakuhĩ. Andũ nĩ mendaga kũmenya nĩ kĩĩ kĩu maigĩte hau, na ũndũ ũcio nĩ ũtũmĩte andũ aingĩ moe Maswali Ambayo Vijana Huuliza—Majibu Yafanyayo Kazi, mbuku ya 1 na ya 2, na broshua itiganĩte. Mwarĩ wa Ithe witũ ũmwe painia wa kĩũngano kĩao nĩ amanyitaga mbaru. Mũciari ũmwe nĩ eetĩkĩrire kwĩruta Bibilia nĩ ũndũ wa kuona atĩ mwarĩ wa Ithe witũ ũcio nĩ endete andũ na kuona kĩyo kĩa mũrũ na mwarĩ wa Ithe witũ acio akũrũ.

7. Ũngĩteithia andũ arĩa mathamĩire gĩcigo-inĩ kĩanyu atĩa?

⁷ Mĩaka-inĩ ya ica ikuhĩ andũ aingĩ nĩ moimĩte kwao makorĩra mabũrũri-inĩ mangĩ. Ũngĩka atĩa nĩguo ũteithie andũ ta acio mamenye Jehova na muoroto wake? Ũndũ ũmwe ũngĩka nĩ kwĩruta ngeithi cia rũthiomi rwa andũ arĩa mathamĩire kwanyu. Kĩndũ kĩmwe kĩngĩgũteithia gwĩka ũguo nĩ programu ya JW Language. Makĩria ma ũguo, no wĩrute ciugo cigana ũna ũngĩhũthĩra kwaranĩria nao, ũndũ ũrĩa ũngĩtũma mende gũgũthikĩrĩria. Gwĩka ũguo no gũtũme ũhote kũmatwara thĩinĩ wa jw.org na ũmonie video itiganĩte o hamwe na mabuku marĩa marĩ ho ma rũthiomi rwao.—Gũcok. 10:19.

8, 9. (a) Mũcemanio wa Ũtũũro na Ũtungata ũtũteithagia atĩa? (b) Aciari mangĩteithia ciana ciao atĩa kwagagĩria ũrĩa icokagia ciũria mĩcemanio-inĩ?

⁸ Jehova nĩ atwendete na nĩkĩo ahaarĩirie Mũcemanio wa Ũtũũro na Ũtungata nĩgetha ũtũteithie kwagagĩria ũtungata witũ. Maũndũ  marĩa tũrutagwo mũcemanio-inĩ ũcio, nĩ matũteithagia gũcokera andũ na kũmaruta Bibilia.

⁹ Ageni aingĩ moka mĩcemanio nĩ monaga atĩ ciana citũ nĩ icokagia ciũria. Aciari, teithiai ciana cianyu ireke ũtheri wacio ũtheragĩre andũ na njĩra ya gũciruta gũcokia ikĩhũthĩra ciugo ciacio. Andũ amwe nĩ mokĩte ũthathaiya-inĩ wa ma nĩ ũndũ wa kũigua ũrĩa ciana icokagia mĩcemanio-inĩ kuuma ngoro.—1 Kor. 14:25.

10. Ũthathaiya wa famĩlĩ ũteithagia atĩa kũrehe ũrũmwe thĩinĩ wa famĩlĩ?

¹⁰ Njĩra ĩngĩ ũngĩreka ũtheri waku ũtherere andũ nayo nĩ kũnyitanĩra harĩ kũrehe ũrũmwe thĩinĩ wa mĩciĩ na thĩinĩ wa kĩũngano. Ũndũ ũmwe ũngĩteithia aciari gwĩka ũguo nĩ gũkorũo na mũbango mwega wa Ũthathaiya wa Famĩlĩ ũtaratĩĩrĩrio. Famĩlĩ nyingĩ nĩ ciĩroragĩra JW Broadcasting o mweri, magacoka makarĩrĩria ũrĩa mangĩhũthĩra maũndũ marĩa meruta. Mũciari agĩtongoria ũthathaiya wa famĩlĩ agĩrĩirũo kũririkana atĩ maũndũ marĩa mwana mũnini angĩbatara nĩ ngũrani na marĩa tinĩnja angĩbatara. Ĩka ũrĩa wothe ũngĩhota gũteithia o mũndũ thĩinĩ wa famĩlĩ agunĩke nĩ ũthathaiya wa famĩlĩ.—Thab. 148:12, 13.

11-13. Andũ othe mangĩteithia kĩũngano atĩa gũkorũo na ũrũmwe na mateithie arĩa angĩ kũreka ũtheri wao ware?

¹¹ Andũ ethĩ no mateithie kĩũngano gĩkorũo na ũrũmwe na ũndũ ũcio wĩkĩre arĩa angĩ ngoro mareke ũtheri wao ũtheragĩre andũ. Mangĩka ũguo atĩa? Angĩkorũo ũrĩ mũndũ mwĩthĩ-rĩ, na githĩ to wĩigĩre muoroto wa gũthondeka ũrata na andũ akũrũ? No ũmorie magũtaarĩrie maũndũ marĩa meyoneire ũtungata-inĩ wao wa ihinda iraihu. Weka ũguo nĩ ũkwĩruta maũndũ maingĩ, na inyuothe nĩ mũgwĩkĩrũo ngoro o na makĩria gũthiĩ na mbere kũreka ũtheri wa ũhoro wa ma ũtherere andũ. Ningĩ ithuothe no twĩrutanĩrie gũtũmaga arĩa moka mĩcemanio maigue marĩ mũciĩ. Gwĩka ũguo nĩ gũgũtũma kĩũngano gĩkorũo na ũrũmwe na gũtũme arĩa ageni merirĩrie kũnyitanĩra na ithuĩ harĩ kũreka ũtheri wao warĩre andũ. Ũndũ ũmwe ũngĩka nĩ kũgeithia ageni ũcanjamũkĩte na kũmonia harĩa megũikara. Mamenyithanie na andũ arĩa angĩ nĩguo maigue maiganĩire.

¹² Ũngĩheo mweke wa gũtongoria mũcemanio wa gũthiĩ kũhunjia, nĩ harĩ maũndũ maingĩ ũngĩka nĩguo ũteithĩrĩrie andũ arĩa akũrũ mahote kũhunjia. Hihi marĩ na gĩcigo gĩa kũhunjia kĩrĩa kĩmagĩrĩire? No ũgae mũndũ mũkũrũ na mũndũ mwĩthĩ wa kũmũteithĩrĩria maũndũ-inĩ matiganĩte. Ningĩ no  ũteithĩrĩrie arĩa marĩ na mathĩna ma mwĩrĩ na arĩa maũndũ mao matangĩmetĩkĩria kũhingia maũndũ maingĩ. Gũkorũo ũgĩtaũkĩrũo nĩ mathĩna ma andũ na kũmeciria no gũteithie andũ arĩa ethĩ na arĩa akũrũ, arĩa matungatĩire Jehova ihinda iraihu o na arĩa mamũtungatĩire ihinda inini, mahunjie ũhoro ũrĩa mwega marĩ na kĩyo.—Alaw. 19:32.

¹³ Mwandĩki wa Thaburi oigire ũũ: “Nĩ ũhoro mwega atĩa, o na wĩ gĩkeno atĩa, andũ arĩa marĩ amwe gũikaranagia o maiguaine!” (Thoma Thaburi 133:1, 2.) Aisiraeli nĩ maagunĩkaga mũno nĩ ũndũ wa gũthathaiya Jehova marĩ hamwe. Aaringithanirie ũndũ ũcio na maguta marĩa andũ maaitagĩrĩrio, tondũ maatũmaga ngothi ĩrure na nĩ maanungaga wega. O na ithuĩ no tũhaane ta maguta macio tũngĩkaga maũndũ marĩa mangĩtũma kĩũngano gĩkorũo na ũrũmwe. Angĩkorũo nĩ wĩkaga ũguo, nĩ wĩkaga wega. No githĩ to ‘ũhingũre ngoro yaku biũ,’ na ũguo nĩ kuuga wĩke ũguo na gĩkĩro kĩnenanene na ũtegũtigithĩria?—2 Kor. 6:11-13.

14. Ũngĩka atĩa nĩguo ũtheri waku ũtheragĩre andũ kũrĩa ũikaraga?

¹⁴ Ningĩ no ũreke ũtheri waku wa ũhoro wa ma ũtheragĩre andũ kũrĩa ũikaraga. Ũngĩka ũguo atĩa? Ciugo na ciĩko ciaku no igucĩrĩrie andũ ũhoro-inĩ wa ma. Wĩyũrie ũũ: ‘Andũ a itũũra ritũ manyonaga atĩa? Hihi nĩ njigaga mũciĩ na indo ciakwa irĩ theru ũndũ andũ mangĩgucĩrĩrio? Hihi nĩ ndeithagia andũ arĩa marabatara ũteithio itũũra-inĩ?’ Mũkĩaria na aarĩ na ariũ a Ithe witũ arĩa angĩ-rĩ, na githĩ to ũmeere magũtaarĩrie ũrĩa ũtugi wao na mĩtugo yao mĩega ĩhutĩtie andũ a famĩlĩ ciao, andũ a itũũra rĩao, arĩa marutaga wĩra nao kana arĩa mathomaga nao? Wahota kwĩiguĩra maũndũ ma gwĩkĩra ngoro marĩa meyoneire.—Ef. 5:9.

15. Gũikara twĩiguĩte nĩ kwa bata nĩkĩ?

¹⁵ Angĩkorũo nĩ tũkwenda ũtheri witũ ũthiĩ na mbere kwarĩra andũ, nĩ twagĩrĩirũo kũmenya tũraikara mahinda marĩkũ. Jesu eerire arutwo ake maita maigana ũna ũũ: “Ikaragai mwĩiguĩte.” (Mat. 24:42; 25:13; 26:41) Ũrĩa kũrĩ nĩ atĩ, angĩkorũo tuonaga “thĩna mũnene” ũrĩ kũraihu ũũ atĩ ũgoka ithuĩ tũtarĩ muoyo, no twage kĩyo wĩra-inĩ wa kũhunjia. (Mat. 24:21) Tũngĩkorũo na mwerekera ta ũcio, handũ ha ũtheri witũ ũtheragĩre andũ itũũra-inĩ, ũgũthiĩ ũnyihĩte na mũthia-inĩ o na no ũthire.

16, 17. Ũngĩka atĩa nĩguo ũikarage wĩiguĩte hĩndĩ ciothe?

¹⁶ O ũrĩa matukũ maya ma kũrigĩrĩria marathiĩ mathũkĩte, noguo ithuothe tũrabatara gũikara twĩiguĩte. Tũtikoragwo na nganja o na hanini atĩ Jehova akarehe mũico hĩndĩ ĩrĩa yagĩrĩire. (Mat. 24:42-44) No kwa ihinda rĩrĩ, tũrabatara gũkorũo tũrĩ na wetereri na hingo ciothe tũikarage twĩiguĩte. Thomaga Kiugo kĩa Ngai o mũthenya na waragie na Jehova kaingĩ kũgerera mahoya. (1 Pet. 4:7) Wĩrute kuumana na kĩonereria kĩa aarĩ na ariũ a Ithe witũ arĩa makoretwo na gĩkeno nĩ ũndũ wa gũikara meiguĩte na kũreka ũtheri wao warĩre andũ. Kwa ngerekano, no ũthome rũgano rwa ũtũũro rwarĩ na kĩongo: “Miaka Sabini ya Kushikilia Upindo wa Nguo ya Mtu Aliye Myahudi” thĩinĩ wa Mnara wa Mlinzi wa Ĩpuro 15, 2012, karatathi ga 18-21.

¹⁷ Koragwo na maũndũ maingĩ ma gwĩka ũtungata-inĩ wa Jehova na ũhũthagĩre mahinda hamwe na aarĩ na ariũ a Ithe witũ. Gwĩka ũguo gũgũtũma ũkorũo na gĩkeno kĩnene na ũrĩonaga mahinda magĩthiĩ na ihenya. (Ef. 5:16) Mĩaka igana mĩhĩtũku aarĩ na ariũ a Ithe witũ maarĩ na kĩyo na nĩ maahingirie maũndũ maingĩ. No matukũ-inĩ maya nĩ tũrahingia maũndũ maingĩ o na makĩria tũgĩteithio nĩ Jehova. Ũtheri witũ nĩ ũratherera andũ na njĩra nene o na gũkĩra ũrĩa tũngĩecirĩirie.

18, 19. Athuri a kĩũngano mangĩtũteithia atĩa gũikara twĩiguĩte na tũrĩ na kĩyo? Heana ngerekano.

 ¹⁸ Kũmenya atĩ Jehova nĩ etĩkagĩra tũmũtungatĩre o na gũtuĩka tũtirĩ akinyanĩru nĩ ũndũ wĩkagĩra wĩtĩkio witũ hinya. Nĩ ũndũ ũcio, tũbatiĩ gũcokagĩria Jehova ngatho nĩ ũndũ wa gũtũhe “arũme marĩ iheo,” na nĩo athuri a kĩũngano. (Thoma Aefeso 4:8, 11, 12.) Kwoguo rĩrĩa athuri magagũceerera, ũgaatigĩrĩra atĩ nĩ wahũthĩra mweke ũcio wega biũ nĩguo ũgunĩke kuumana na ũũgĩ wao na ũtaaro ũrĩa magakũhe.

¹⁹ Mũthuri ũmwe na mũtumia wake bũrũri-inĩ wa Ngeretha maarĩ na mathĩna kĩhiko-inĩ kĩao, na kwoguo makĩũria athuri erĩ a kĩũngano mamateithie. Mwarĩ wa Ithe witũ onaga atĩ mũthuri wake ndoyaga maũndũ ma kĩĩroho na ũritũ. Mũthuri oigire atĩ ndakoragwo na ũhoti mwega wa kũrutana na agĩtĩkĩra atĩ ndabangaga ũthathaiya wa famĩlĩ ũtaratĩĩrĩrio. Athuri acio a kĩũngano nĩ maateithirie mũthuri ũcio na mũtumia wake gwĩciria ũhoro wa kĩonereria kĩa Jesu. Jesu nĩ aamenyagĩrĩra arutwo ake na akarũmbũyia mabataro mao. Athuri nĩ mekĩrire mũrũ wa Ithe witũ ũcio ngoro egerekanie na Jesu. Nake mũtumia wake makĩmũũria agĩe na ũkirĩrĩria. Ningĩ nĩ maagweteire famĩlĩ ĩyo maũndũ mangĩka nĩguo magakoragwo na ũthathaiya wa famĩlĩ marĩ hamwe na ciana ciao igĩrĩ. (Ef. 5:21-29) Thutha-inĩ athuri a kĩũngano nĩ maacokeirie mũrũ wa Ithe witũ ũcio ngatho nĩ ũndũ wa kwĩrutanĩria gũtongoria famĩlĩ yake ũrĩa kwagĩrĩire. Ningĩ nĩ maamwĩkĩrire ngoro athiĩ na mbere kwĩrutanĩria na kwĩhoka roho wa Jehova ũmũteithie gũtongoria famĩlĩ maũndũ-inĩ ma kĩĩroho. Wendo na ũteithio wa athuri acio nĩ watũmire famĩlĩ ĩyo ĩhote kũreka ũtheri wayo ũtherere andũ.

20. Moimĩrĩro marĩkoragwo marĩ marĩkũ wareka ũtheri waku ũtherere andũ?

²⁰ Mwandĩki wa Thaburi ainire ũũ: “Gũkena-rĩ, nĩ mũndũ o wothe mwĩtigĩri Jehova, o ũrĩa ũgeraga njĩra ciake.” (Thab. 128:1) Gĩkeno gĩaku nĩ gĩkuongerereka angĩkorũo nĩ ũkũreka ũtheri waku ũtherere andũ na njĩra ya gũteithia arĩa angĩ mathathaiye Jehova, kũnyitanĩra harĩ kũrehe ũrũmwe, na gũikaraga wĩiguĩte. Ningĩ andũ nĩ marĩonaga ciĩko ciaku njega na makagooca Ithe witũ wa igũrũ.—Mat. 5:16.