Ina Ũkenete!
“Kũgooca Ngai witũ na rũĩmbo nĩ ũndũ mwega.”—THAB. 147:1.
1. Kũina gũtũteithagia kũhingia ũndũ ũrĩkũ?
MWANDĨKI ũmwe wa nyĩmbo ũĩkaine oigire ũũ: “Ciugo itũmaga mũndũ ecirie ũndũ mũna. Naruo rwĩmbo rũgatũma aigue kana one ũndũ mũna. No kũina gũtũmaga ahutio ngoro.” Hihi nĩ kũrĩ maũndũ mega tũngĩĩciria ma “kũhutia ngoro” gũkĩra kũgooca Ithe witũ wa igũrũ, Jehova, na kũmuonia wendo? Kũina nĩ ũndũ wa bata mũno ũthathaiya-inĩ wa ma, gũtekũmakania mũndũ arĩ wiki kana arĩ kĩũngano-inĩ kĩa andũ a Ngai.
2, 3. (a) Andũ amwe monaga atĩa kũina manĩrĩire marĩ kĩũngano-inĩ? (b) Tũkwarĩrĩria ciũria irĩkũ?
2 O na kũrĩ ũguo-rĩ, hihi ũiguaga atĩa rĩrĩa ũraina hamwe na kĩũngano? Nĩ ũconokaga? Ũndũire-inĩ ũmwe, arũme matiguaga maiganĩire makĩina handũ harĩ na andũ aingĩ. Ũndũ ũcio no ũhutie kĩũngano gĩothe, na makĩria angĩkorũo arĩa maratongoria nĩ megwĩka ũguo kana meingĩrie maũndũ-inĩ mangĩ rĩrĩa kĩũngano kĩraina.—Thab. 30:12.
3 Angĩkorũo nĩ tuonaga kũina kũrĩ gĩcunjĩ kĩa ũthathaiya witũ, tũtiriumaga nja kana tũkaga gũkorũo ho gĩcunjĩ-inĩ kĩu kĩa mũcemanio. Kwoguo, o ũmwe witũ agĩrĩirũo kwĩyũria ũũ: ‘Ngoragwo na muonere ũrĩkũ rĩrĩa kũrainwo mĩcemanio-inĩ itũ? Ingĩhota atĩa gũtooria guoya ũrĩa ũngĩtũma nemwo kũina ngenete? Na ingĩka atĩa nĩguo nyonanie biũ ũrĩa ndĩrahutio nĩ nyĩmbo iria tũinaga?’
KŨINA NĨ GĨCUNJĨ KĨA BATA MŨNO ŨTHATHAIYA-INĨ WA MA
4, 5. Mĩbango ya kũina yahaanaga atĩa Isiraeli-inĩ ya tene?
4 Ndungata njĩhokeku cia Jehova nĩ ikoretwo ikĩhũthĩra nyĩmbo kũmũgooca. Nĩ ũndũ wa bata kũmenya atĩ rĩrĩa Aisiraeli a tene maatungataga Jehova marĩ ehokeku, kũina kwarĩ gĩcunjĩ kĩa bata harĩ ũthathaiya wao. Kwa ngerekano, makĩhaarĩria kũruta wĩra hekarũ-inĩ, Mũthamaki Daudi nĩ aabangire Alawii 4,000 nĩguo maine nyĩmbo cia kũgooca. Harĩ acio, andũ 288, nĩ ‘maarutĩtwo kũinĩra Jehova, nao othe nĩmaakorirũo mohĩgĩrĩire wĩra-inĩ ũcio.’—1 Maũ. 23:5; 25:7.
5 Rĩrĩa hekarũ yaamũragwo, mĩgambo na nyĩmbo nĩ ciarĩ na itemi rĩa bata mũno. Tũthomaga ũũ: “Gũgĩgĩkinya atĩrĩ, atĩ ahuhi tũrumbeta o na aini maaiguithania mĩgambo yao o ta mũndũ ũmwe, makĩina na mũgambo wa kũiguwo ta arĩ o ũmwe makĩgooca Jehova, o na makĩmũgatha; o na hĩndĩ ĩrĩa maanagĩrĩra na mĩgambo yao, hamwe na tũrumbeta tũkĩhuhwo, o na thani icio ikĩhũrithanio ikagamba, o na inanda ikĩhũrũo, o na makĩgooca Jehova, . . . riri wa Jehova nĩwaiyũire nyũmba ĩo ya Ngai.” Na githĩ rĩtiarĩ igongona rĩa gwĩkĩra wĩtĩkio hinya mũno!—2 Maũ. 5:13, 14; 7:6.
6. Taarĩria ũrĩa kwainirũo na njĩra ya mwanya rĩrĩa Nehemia aarĩ ngavana wa Jerusalemu.
6 Hĩndĩ ĩrĩa Nehemia aatongoririe Aisiraeli arĩa maarĩ ehokeku gwaka thingo cia Jerusalemu, nĩ aacokire akĩbanga Alawii arĩa mainaga marĩ na indo ciothe cia kũina. Rĩrĩa thingo icio ciamũragwo, nyĩmbo nĩ ciatũmire kũgĩe na gĩkeno igongona-inĩ rĩu. Ihinda-inĩ rĩu, nĩ kwarĩ na “ikundi igĩrĩ nene cia andũ a gũcokagĩria Ngai ngatho.” Aini acio maathire na mĩena ĩtiganĩte, na magĩcemania rũthingo-inĩ hakuhĩ na hekarũ nĩguo maine hamwe na kayũ kangĩaiguĩkire kũndũ kũraihu mũno. (Neh. 12:27, 28, 31, 38, 40, 43) Jehova nĩ aakenire mũno nĩ ũndũ wa athathaiya acio ake kũmũgooca na nyĩmbo makenete.
7. Jesu onanirie atĩa bata wa kũina ũthathaiya-inĩ wa Gĩkristiano?
7 Thutha wa kĩũngano gĩa Gĩkristiano kwambĩrĩria, nyĩmbo nĩ ciathire na mbere gũkorũo irĩ gĩcunjĩ kĩa bata ũthathaiya-inĩ wa ma. Ũtukũ wa mũthenya ũrĩa wa bata mũno historĩ-inĩ ya andũ, Jesu me na arutwo ake nĩ maainire hamwe thutha wa kwambĩrĩria gĩkũngũĩro kĩa Irio cia Hwaĩ-inĩ cia Mwathani.—Thoma Mathayo 26:30.
8. Akristiano a mahinda ma atũmwo maaigire kĩonereria kĩrĩkũ gĩa kũgooca Ngai na nyĩmbo?
8 Akristiano a mahinda ma atũmwo nĩ maatũigĩire kĩonereria gĩa kũgooca Ngai na nyĩmbo tũrĩ hamwe. O na gũtuĩka kaingĩ maacemanagia mĩciĩ-inĩ ya andũ mataarĩ a kĩrathi kĩa igũrũ, ũndũ ũcio ndwatũmaga manyihie kĩyo kĩao gĩa kũinĩra Jehova. Mũtũmwo Paulo atongoretio nĩ roho eerire Akristiano ũũ: “Thiĩi na mbere kũrutana na gwĩkĩrana hinya na thaburi, mũkĩgoocaga Ngai, na nyĩmbo cia kĩĩroho iria ciinagwo na ngatho, mũkĩinagĩra Jehova ngoro-inĩ cianyu.” (Kol. 3:16) Nyĩmbo iria irĩ ibuku-inĩ ritũ rĩa nyĩmbo nĩ cia ‘kĩĩroho na ciagĩrĩire kũinwo na ngatho.’ Nĩ gĩcunjĩ kĩa irio cia kĩĩroho iria tũheagwo nĩ “ngombo ĩrĩa njĩhokeku na njũgĩ.”—Mat. 24:45.
GŨTOORIA GUOYA WA KŨINA
9. (a) Nĩ kĩĩ kĩngĩgirĩrĩria andũ amwe kũina macanjamũkĩte rĩrĩa marĩ mĩcemanio-inĩ kana igomano? (b) Twagĩrĩirũo kũinĩra Jehova atĩa, na nĩa magĩrĩirũo gũkorũo marĩ mũhari-inĩ wa mbere? (Rora mbica kĩambĩrĩria-inĩ gĩa gĩcunjĩ gĩkĩ.)
9 Ĩ angĩkorũo famĩlĩ-inĩ yanyu, ũndũire-inĩ wa kwanyu, kana kũrĩa mũikaraga gũtinagwo? Nĩ ũndũ wa tekinolonjĩ ya kĩĩrĩu, no ũkenere gũthikĩrĩria aini marĩ gatũ. O na kũrĩ ũguo, no ũconoke kana ũigue ũkuĩte ngoro waringithania mũgambo waku na wa aini acio. No ũndũ ũcio ndwagĩrĩire gũkũgirĩrĩria ũinĩre Jehova. Handũ ha ũguo, oya ibuku rĩaku rĩa nyĩmbo na igũrũ, ũtiire mũtwe, ũcoke ũine kuuma ngoro! (Ezar. 3:11; thoma Thaburi 147:1.) Ũmũthĩ, nyũmba-inĩ nyingĩ cia Ũthamaki, ciugo cia nyĩmbo nĩ cionanagio na TV kana projector, na ũndũ ũcio nĩ ũteithagia kũina na mũgambo mwega. Ningĩ nĩ ũndũ wa gwĩkĩra ngoro kuona nyĩmbo cia Ũthamaki nĩ ituĩtwo gĩcunjĩ kĩa mũtaratara wa Cukuru ya Ũtungata wa Ũthamaki ya athuri a ciũngano. Ũndũ ũcio ũronania bata wa athuri gũkorũo marĩ mũhari wa mbere harĩ kũina mĩcemanio-inĩ.
10. Twagĩrĩirũo kũririkana ũndũ ũrĩkũ angĩkorũo tũrĩ na guoya wa kũina?
10 Guoya nĩ ũndũ ũmwe ũtũmaga andũ aingĩ matikaine manĩrĩire. No makorũo nĩ gwĩtigĩra matikoneke makĩina kana hihi matikaiguĩke ta matarĩ na mũgambo mwega. O na kũrĩ ũguo, twagĩrĩirũo kũririkana atĩ “nĩ tũhĩngagwo maita maingĩ” rĩrĩa tũraria. (Jak. 3:2) No ũndũ ũcio ndũgiragia twarie. Kwoguo-rĩ, nĩ kĩĩ kĩngĩgĩtũma tũreke mĩgambo itũ ĩtarĩ mĩkinyanĩru ya kũina ĩtũgirĩrĩrie tũgooce Jehova na nyĩmbo?
11, 12. Nĩ maũndũ marĩkũ tũngĩka nĩguo twagagĩrie mũinĩre witũ?
11 Hihi no gũkorũo twĩtigagĩra kũina tondũ tũtiũĩ ũrĩa kũinagwo. No no twagagĩrie ũrĩa tũinaga tũngĩhũthĩra maũndũ mamwe maheanĩtwo. *
12 No wĩrute kũina wega na mũgambo ũrĩa wagĩrĩire na njĩra ya kũhuhia wega. O ta ũrĩa thitima ĩtũmaga ngirobu yone, no taguo kũhuhia wega gwĩkĩraga mũgambo waku hinya rĩrĩa ũraria kana rĩrĩa ũraina. Wagĩrĩirũo kũina na mũgambo mũnene ta ũrĩa waragia naguo kana na mũgambo mũnene gũkĩra ũcio. (Rora ũhoro ũrĩa ũrĩ thĩinĩ wa ibuku rĩa Gunĩka nĩ Cukuru ya Ũtungata wa Gĩtheokrasi, karatathi ka 181 nginya 184, rungu rwa kĩongo kĩnini, “Hihia Biũ Ũrĩa Kwagĩrĩire.”) Bibilia ĩkĩaria ũhoro wa kũinĩra Jehova, rĩmwe ĩraga ndungata ciake ‘ikũngũiye na kayũ kanene.’—Thab. 81:1.
13. Taarĩria ũrĩa tũngĩgĩa na ũmĩrĩru rĩrĩa tũraina.
13 Geria gwĩka ũũ hĩndĩ ya ũthathaiya wa famĩlĩ kana ũrĩ wiki: Thuura rwĩmbo rũmwe harĩ iria wendete mũno kuuma ibuku-inĩ ritũ rĩa nyĩmbo. Thoma ciugo na mũgambo mwega, na wĩke ũguo ũrĩ na ũmĩrĩru. Thutha ũcio, gweta ciugo thĩinĩ wa mũhari wa rwĩmbo na mũgambo ũcio o rĩmwe. Ũcoke ũine mũhari ũcio na mũgambo oro ũcio. (Isa. 24:14) Mũgambo waku nĩ ũkwagĩra na ũcio ũgũkorũo ũrĩ ũndũ mwega. Ndũkareke mũgambo waku ũkũgirĩrĩrie kana ũtũme ũconoke!
14. (a) Gwathamia kanua makĩria ma ũrĩa twĩkaga tũkĩaria kũngĩtũteithia atĩa rĩrĩa tũraina? (Rora gathandũkũ “ Ũrĩa Ũngĩagagĩria Mũinĩre Waku.”) (b) Nĩ maũndũ marĩkũ megiĩ gũtooria mathĩna ma mũgambo ũrona ta ũngĩhũthĩra?
14 Ndũngĩhota kũruta mũgambo mwega wa kũina angĩkorũo ndũgwathamia kanua wega. Kwoguo, ũndũ ũngĩ ũngĩka nĩ gwathamia kanua makĩria ma ũrĩa wĩkaga ũkĩaria. Ũngĩka atĩa angĩkorũo wonaga ta ũtarĩ na mũgambo mwega kana angĩkorũo wonaga ta mũgambo waku ũrĩ wa igũrũ mũno? No wone maũndũ ũngĩka megiĩ mathĩna ta macio thĩinĩ wa ibuku rĩa Gunĩka nĩ Cukuru ya Ũtungata wa Gĩtheokrasi, karatathi ka 184, gathandũkũ-inĩ karĩ na kĩongo “Gũtooria Mathĩna Maya.”
INA KUUMA NGORO
15. (a) Nĩ kĩmenyithia kĩrĩkũ kĩarutirũo hĩndĩ ya mũcemanio wa o mwaka wa 2016? (b) Nĩ kĩĩ gĩatũmire tũrutĩrũo ibuku rĩerũ rĩa nyĩmbo?
15 Kwarĩ na gĩkeno kĩnene mũcemanio-inĩ wa o mwaka wa Watch Tower Bible and Tract Society of Pennsylvania wa 2016, rĩrĩa Mũrũ wa Ithe Witũ Stephen Lett wa Kĩama Kĩrĩa Gĩtongoragia aanĩrĩire atĩ ibuku rĩerũ rĩa Inĩrai Jehova Mũkenete, nĩ rĩngĩambĩrĩirie kũhũthĩrũo mĩcemanio-inĩ itũ. Aatarĩirie atĩ muoroto ũmwe wa gwĩka ibuku rĩu mogarũrũku nĩ gũtũma nyĩmbo itwarane na Bibilia ĩrĩa njerũ ya New World Translation of the Holy Scriptures ya 2013. Ũndũ ũcio wahutĩtie kweheria kana kũgarũrĩra ciugo imwe iria itahũthĩrĩtwo rĩngĩ thĩinĩ wa Bibilia ĩyo ya New World Translation. Makĩria ma ũguo, nyĩmbo njerũ ciĩgiĩ wĩra witũ wa kũhunjia na iria ironania ngatho nĩ ũndũ wa igongona rĩa Jesu nĩ ciongereirũo. Ningĩ, tondũ kũina nĩ gĩcunjĩ kĩa bata mũno kĩa ũthathaiya witũ, Kĩama Kĩrĩa Gĩtongoragia nĩ kĩeendaga kũruta ibuku rĩega rĩrĩ na ngothi ĩhanaine na Bibilia ĩyo.
16, 17. Nĩ mogarũrũku marĩkũ meekirũo ibuku-inĩ rĩerũ rĩa nyĩmbo?
16 Nĩguo ibuku rĩa Inĩrai Jehova Mũkenete rĩkorũo rĩrĩ ihũthũ kũhũthĩra, nyĩmbo ciothe ibangĩtwo kũringana na kĩrĩa ciarĩrĩirie. Kwa ngerekano, nyĩmbo cia mbere 12 ciarĩrĩirie ũhoro wa Jehova, nacio icio ingĩ 8 irũmĩrĩire ikaarĩrĩria Jesu na igongona rĩrĩa aarutire, na icio ingĩ ciothe ikarũmĩrĩra mũtaratara o ũcio. Nĩ harĩ ũhoro wa gwathĩrĩra ũrĩa ũrĩtũteithagia, ta rĩrĩa mũndũ arathuura rwĩmbo rwa kũhũthĩrũo hĩndĩ ya mĩario ya andũ othe.
17 Nĩguo andũ othe mahote kũina kuuma ngoro, ciugo imwe nĩ icenjetio nĩguo itaũkĩke wega, nacio iria itahũthagĩrũo rĩu ikeherio. Ciugo imwe nĩ cieheretio na hagekĩrũo iria ihũthĩkaga kaingĩ na hũthũ gũtaũkĩrũo nĩcio. Kĩongo kĩa rwĩmbo “Gũkirĩrĩria” nĩ gĩcenjetio gĩgatuĩka “Gĩai na Wetereri,” na ciugo o nacio nĩ icenjetio nĩguo iringane na kĩongo kĩu. Gũcenjio gwa kĩongo “Gitagĩra Ngoro Yaku” gĩgatuĩka “Nĩ Tũgitagĩre Ngoro Citũ,” nĩ ũndũ weciririo na njĩra ndikĩru. Nĩkĩ? Tondũ mbere ĩyo, mũndũ akĩina rwĩmbo rũu arakoragwo akĩĩra arĩa angĩ ũrĩa megwĩka. Ahunjia arĩa matabatithĩtio na arĩa marabatithirio ica ikuhĩ, ciana, na aarĩ a Ithe witũ, arĩa marĩ mĩcemanio itũ, igomano cia mũthiũrũrũko na cia thikũ ithatũ, no mage kũigua maiganĩire magĩka ũguo. Kwoguo kĩongo na ciugo nĩ ciacenjirio.
Mwĩmenyeragiei nyĩmbo hĩndĩ ya ũthathaiya wa famĩlĩ (Rora kĩbungo gĩa 18)
18. Twagĩrĩirũo kwĩmenyeria nyĩmbo iria irĩ ibuku-inĩ ritũ rĩerũ nĩkĩ? (Rora kohoro ka magũrũ-inĩ.)
18 Nyĩmbo nyingĩ thĩinĩ wa ibuku rĩa Inĩrai Jehova Mũkenete ihaana mahoya. Kũgerera nyĩmbo icio, no ũitũrũrĩre Jehova ũrĩa ũraigua. Ingĩ nacio no itũteithie gwĩkĩrana “hinya harĩ kwendana na mawĩra mega.” (Ahib. 10:24) Hatarĩ nganja, no twende kũmenya mĩgambo, ciugo, na ũrĩa nyĩmbo citũ cinagwo. Ũngĩĩmenyeria kũina nyĩmbo icio ũrĩ mũciĩ, no ũhote gũciina kuuma ngoro ũrĩ na ũmĩrĩru. *
19. Nĩ na njĩra ĩrĩkũ andũ othe thĩinĩ wa kĩũngano mangĩnyitanĩra ĩmwe kwa ĩmwe harĩ kũgooca Jehova?
19 Ririkana atĩ kũina nĩ gĩcunjĩ kĩa bata mũno ũthathaiya-inĩ witũ. Nĩ njĩra njega ya kuonania wendo na ngatho citũ harĩ Jehova. (Thoma Isaia 12:5.) Ningĩ rĩrĩa waina ũkenete, nĩ ũrĩkĩraga arĩa angĩ ngoro maine marĩ na ũmĩrĩru. Andũ othe thĩinĩ wa kĩũngano, marĩ ethĩ, akũrũ, kana arĩa marakenio nĩ ũhoro, nĩ marĩnyitanagĩra harĩ njĩra ĩno ya kũgooca Jehova ĩmwe kwa ĩmwe. Kwoguo, ndũkaage kũgooca Jehova kũgerera nyĩmbo. Handũ ha ũguo, athĩkĩra ciugo cia mwandĩki wa Thaburi ũrĩa watongoririo nĩ roho wa Jehova kwandĩka ũũ: “Itĩkai kũinĩra Jehova!” Rekei tũinage tũkenete!—Thab. 96:1.
^ kĩb. 11 Nĩ ũndũ wa ũhoro makĩria wĩgiĩ ũrĩa tũngĩagagĩria ũrĩa tũinaga, rora programu ya Gĩthũngũ ya Dicemba 2014 thĩinĩ wa JW Broadcasting (gĩcunjĩ kĩa video rungu rwa KUUMA STUDIO CITŨ).
^ kĩb. 18 Nĩguo tũteithio kũingĩria meciria maitũ harĩ kũina, mahinda ma rũcinĩ kana ma mĩaraho ma kĩgomano kĩa mũthiũrũrũko kana gĩa thikũ ithatũ, mambagĩrĩria na tũrwĩmbo twa kĩnanda kwa ihinda rĩa ndagĩka ikũmi. Nyĩmbo icio ikoragwo ibangĩtwo na njĩra ĩkũhaarĩria ngoro na meciria maitũ nĩ ũndũ wa programu ĩrĩa ĩrũmagĩrĩra. Kwoguo tũrekĩrũo ngoro tũkoragwo tũikarĩte thĩ nyĩmbo icio ikĩambĩrĩria na tũcithikagĩrĩrie tũkindĩirie.
