Ũrĩa Thĩ Ĩno Ĩgaakinya Mũthia
Ũrĩa Thĩ Ĩno Ĩgaakinya Mũthia
‘Mũtirĩ nduma-inĩ, atĩ mũthenya ũcio ũmũkorerere o ta mũici.’—1 THES. 5:4.
NO ŨHOTE GŨTAARĨRIA?
Nĩ maũndũ marĩkũ matarĩ maroneka marĩrĩirio maandĩko-inĩ maya?
1. Nĩ kĩĩ gĩgũtũteithia gũikaraga twĩhũgĩte na kũhiũrania na magerio?
MAŨNDŨ ma gũtua nda nĩ megwĩkĩka ica ikuhĩ. Kũhinga kwa morathi ma Bibilia nĩ kũronania ũguo, kwoguo nĩ tũrabatara gũikaraga twĩhũgĩte. Nĩ kĩĩ gĩgũtũteithia gwĩka ũguo? Mũtũmwo Paulo aratũhatĩrĩria ‘tũcũthagĩrĩrie maũndũ marĩa matonekaga.’ Ĩĩ-ni, nĩ tũbatiĩ kũiga ngerenwa itũ ya muoyo wa tene na tene meciria-inĩ, o na kũngĩtuĩka tũgaatũũra igũrũ kana gũkũ thĩ. O ta ũrĩa ũhoro ũrĩa ũthiũrũrũkĩirie ciugo icio ũronania, Paulo aandĩkire ciugo icio nĩguo ekĩre ngoro Akristiano arĩa angĩ meciragie mũno igũrũ rĩgiĩ moimĩrĩro mega ma wĩhokeku wao. Gwĩka ũguo ningĩ nĩ kũngĩamateithirie kũhiũrania na magerio na mĩnyamaro.—2 Kor. 4:8, 9, 16-18; 5:7.
2. (a) Nĩguo kĩĩrĩgĩrĩro gitũ gĩikare kĩrĩ kĩrũmu, twagĩrĩirũo gwĩka atĩa? (b) Nĩ maũndũ marĩkũ tũkwarĩrĩria gĩcunjĩ-inĩ gĩkĩ na kĩrĩa kĩrũmĩrĩire?
2 Ũtaaro wa Paulo ũrĩ na ũrutani wa bata: Nĩguo kĩĩrĩgĩrĩro gitũ gĩikare kĩrĩ kĩrũmu, no mũhaka tũrore maũndũ marĩa maitho maitũ matangĩhota kuona. Nĩ tũrabatara gwĩciria mũno igũrũ rĩgiĩ maũndũ ma bata marĩa matarĩ maroneka. (Ahib. 11:1; 12:1, 2) Nĩ ũndũ ũcio, rekei twarĩrĩrie maũndũ ikũmi marĩa marĩĩkĩka na makuruhanĩte mũno na kĩĩrĩgĩrĩro gitũ kĩa muoyo wa tene na tene. a
NĨ MAŨNDŨ MARĨKŨ MARĨĨKĨKA KAHINDA KANINI MBERE YA MŨTHIA?
3. (a) Nĩ ũndũ ũrĩkũ ũrĩĩkĩka ũgwetetwo thĩinĩ wa 1 Athesalonike 5:2, 3? (b) Atongoria a gĩũteti mageeka atĩa, na kwahoteka nĩ a makaanyitanĩra nao?
3 Ũndũ ũmwe ũrĩa ũrĩĩkĩka nĩ ũgwetetwo nĩ Paulo marũa-inĩ make kũrĩ Athesalonike. (Thoma 1 Athesalonike 5:2, 3.) Paulo nĩ aarĩrĩirie ‘mũthenya wa Jehova.’ Kũringana na ũrĩa ciugo ‘mũthenya wa Jehova’ ihũthĩrĩtwo haha, rĩu nĩ ihinda rĩrĩa rĩkaambĩrĩria na kũniinwo kwa ndini cia maheeni rĩrĩkĩrĩre na mbaara ya Hari-Magedoni. No kahinda kanini mbere ya mũthenya ũcio wa Jehova kwambĩrĩria, athamaki a thĩ magaakorũo makiuga ‘Nĩ kũrĩ thayũ, na gũtirĩ mburuga!’ Ciugo icio no ikorũo ikĩonania ũndũ ũmwe kana maingĩ marũmanĩrĩire. Ndũrĩrĩ ciahota gũgeeciria atĩ irĩ hakuhĩ kũniina mamwe ma mathĩna ma cio marĩa manene. Ĩ nao atongoria a ndini? O nĩ gĩcunjĩ gĩa thĩ, kwoguo no kũhoteke nĩ makaanyitanĩra na atongoria a gĩũteti. (Kũg. 17:1, 2) Na njĩra ĩyo, atongoria a ndini magaakorũo magĩĩka ta anabii a maheeni a Juda ya tene. Jehova oigire ũũ igũrũ rĩmegiĩ: “Moigaga, ‘Gwĩ thayũ! Gwĩ thayũ!’ na nĩ hĩndĩ ĩrĩa gũtarĩ thayũ.”—Jer. 6:14; 23:16, 17.
4. Nĩ ũndũ ũrĩkũ tũtaũkagĩrũo nĩguo ũtoĩo nĩ andũ arĩa angĩ?
4 O na kana nĩ a makoiga ‘Nĩ kũrĩ thayũ na gũtirĩ mburuga!’ ũndũ ũcio nĩ ũkonania atĩ mũthenya wa Jehova ũkiriĩ kwambĩrĩria. Nĩkĩo Paulo oigire ũũ: ‘Ariũ a Ithe witũ, mũtirĩ nduma-inĩ, atĩ mũthenya ũcio ũmũkorerere ta mũici, nĩ gũkorũo inyuothe mũrĩ ciana cia ũtheri.’ (1 Thes. 5:4, 5) Ngũrani na andũ arĩa angĩ, ithuĩ nĩ tũtaũkagĩrũo nĩ gĩtũmi gĩa Kĩmaandĩko kĩa maũndũ marĩa marekĩka. Hihi ũrathi ũcio wĩgiĩ kuuga ‘Nĩ kũrĩ thayũ na gũtirĩ mburuga!’ ũkaahingio atĩa? No mũhaka tweterere tuone. Nĩ ũndũ ũcio, nĩ twĩhotorei ‘gũikaraga twĩiguĩte na tũterigĩtwo.’—1 Thes. 5:6; Zef. 3:8.
“MŨTHAMAKI” ŨKORETWO AKĨĨHEENIA
5. (a) ‘Mĩnyamaro ĩrĩa mĩnene’ ĩkaambĩrĩria atĩa? (b) Nĩ “mũthamaki” ũrĩkũ ũgaakorũo akĩĩheenia atĩ nĩ ekũhonoka?
5 Nĩ ũndũ ũrĩkũ ũngĩ ũtarĩ ũroneka ũrĩcoka wĩkĩke? Paulo oigire ũũ: “Hĩndĩ ĩrĩa andũ makoiga atĩ, ‘Nĩ kũrĩ thayũ, na gũtirĩ mburuga-rĩ,’ o hĩndĩ ĩo nĩrĩo makahobanĩrio nĩ kwanangwo kwa narua.” Gĩcunjĩ kĩa mbere gĩa ‘kwanangwo kũu kwa narua’ nĩ gũtharĩkĩrũo kwa ‘Babuloni ũrĩa Mũnene,’ ndini ciothe cia maheeni thĩinĩ wa thĩ, o cio ciĩtagwo “mũmaraya.” (Kũg. 17:5, 6, 15) Tharĩkĩro ĩyo harĩ ndini ciothe cia maheeni, nginya iria ciĩĩtaga cia Gĩkristiano, nĩyo ĩgaakorũo ĩrĩ kĩambĩrĩria kĩa ‘mĩnyamaro ĩrĩa mĩnene.’ (Mat. 24:21; 2 Thes. 2:8) Andũ aingĩ matigaakorũo magĩtanya ũndũ ũcio. Nĩkĩ? Tondũ gũkinyĩria hĩndĩ ĩyo, mũmaraya ũcio agaakorũo akĩĩona arĩ “mũthamaki” ũtarĩ hĩndĩ ‘akarĩo nĩ kĩeha.’ No o rĩmwe nĩ akaamenya atĩ nĩ kwĩheenia areheenia atĩ nĩ ekũhonoka. Akaaninwo na ihenya, o ta arĩ ‘mũthenya ũmwe.’—Kũg. 18:7, 8.
6. Nĩ a makaniina ndini cia maheeni?
6 Kiugo kĩa Ngai kĩonanagia atĩ mũmaraya ũcio agaatharĩkĩrũo nĩ “nyamũ” ĩrĩa ya “hĩa ikũmi.” Ũthuthuria wa ibuku rĩa Kũguũrĩrio wonanagia atĩ nyamũ ĩyo ĩrũgamagĩrĩra kĩama kĩa Ũrũmwe wa Mabũrũri (UN). ‘Hĩa icio ikũmi’ irũgamĩrĩire thirikari ciothe cia gĩũteti iria inyitaga mbaru ‘nyamũ ĩyo ndune.’ b (Kũg. 17:3, 5, 11, 12) Tharĩkĩro ĩyo ĩgaakorũo na moimĩrĩro marĩkũ? Mabũrũri marĩa marĩ thĩinĩ wa kĩama kĩa Ũrũmwe wa Mabũrũri nĩ makeyoera indo ciothe cia mũmaraya ũcio, moimbũranie ũrĩa ahaana kũna, mamũtambure, na ‘mamũcine athire.’ Akaaninwo biũ.—Thoma Kũguũrĩrio 17:16.
7. Nĩ kĩĩ gĩgaatũma “nyamũ” ĩyo yambĩrĩrie tharĩkĩro?
7 Ũrathi wa Bibilia ningĩ nĩ wonanagia kĩrĩa gĩgaatũma tharĩkĩro ĩyo yambĩrĩrie. Jehova nĩ agekĩra ũndũ ũcio ngoro-inĩ cia atongoria a gĩũteti “meke ũrĩa we atuĩte,” naguo nĩ kũniina mũmaraya ũcio. (Kũg. 17:17) Ndini nĩ ĩhũrithanagia andũ na ĩgatũma kũgĩe mathĩna maingĩ thĩinĩ wa thĩ; nĩ ũndũ ũcio, mabũrũri no mecirie atĩ kũniina mũmaraya ũcio no gũteithie. Ti itherũ, rĩrĩa athamaki makamũtharĩkĩra, magaakorũo magĩĩciria atĩ mareka kũringana na “karĩko” kao. No rĩrĩ, ma nĩ atĩ, magaakorũo makĩhũthĩrũo nĩ Ngai kũniina biũ ndini ciothe cia maheeni. Kwoguo, maũndũ makaagarũrũka o rĩmwe, gĩcunjĩ kĩmwe kĩa mũtabarĩre wa Shaitani gĩtharĩkĩre kĩrĩa kĩngĩ, na Shaitani ndagakorũo na ũhoti wa kũgirĩrĩria ũndũ ũcio.—Mat. 12:25, 26.
GŨTHARĨKĨRŨO KWA ANDŨ A NGAI
8. Tharĩkĩro ya “Gogu wa bũrũri wa Magogu” nĩ ndũũ?
8 Thutha wa ndini ya maheeni kũniinwo-rĩ, ndungata cia Jehova igaakorũo o ‘ikĩĩgangara’ na ‘itairigĩirũo.’ (Ezek. 38:11, 14) Nĩ kĩĩ gĩgeekĩka harĩ gĩkundi kĩu kĩa andũ arĩa mathathaiyagia Jehova kĩrĩa gĩkoneka ta gĩtarĩ na ũgitĩri? Kũroneka atĩ nĩ magaatharĩkĩrũo nĩ “ndũrĩrĩ nyingĩ.” Kiugo kĩa Ngai gĩĩtaga ũndũ ũcio tharĩkĩro ya “Gogu wa bũrũri wa Magogu.” (Thoma Ezekieli 38:2, 15, 16.) Twagĩrĩirũo kuona tharĩkĩro ĩyo atĩa?
9. (a) Ũndũ ũrĩa Mũkristiano atangĩkagĩra mũno nĩ ũrĩkũ? (b) Nĩ makinya marĩkũ twagĩrĩirũo kuoya rĩu nĩguo twĩkĩre wĩtĩkio witũ hinya?
9 Kũmenya kabere ũhoro wĩgiĩ tharĩkĩro ĩyo harĩ andũ a Ngai gũtitũmaga tũtangĩke. Handũ ha ũguo, ũndũ ũrĩa tũtangĩkagĩra ti ũrĩa tũkaahonoka, ĩndĩ nĩ gũtherio kwa rĩĩtwa rĩa Jehova na gũteterũo kwa ũnene wake. Ti itherũ, Jehova oigire ũũ makĩria ma maita 60: ‘Nĩ mũkaamenya atĩ niĩ nĩ niĩ Jehova.’ (Ezek. 6:7) Nĩ ũndũ ũcio, nĩ twĩriragĩria mũno kuona gĩcunjĩ kĩu kĩa bata kĩa ũrathi wa Ezekieli gĩkĩhinga, twĩhokete atĩ “Mwathani [Jehova] nĩoĩ kũhonokia andũ arĩa mamwĩamũrĩire moime magerio-inĩ.” (2 Pet. 2:9) Ihinda-inĩ rĩrĩ, tũngĩenda kũhũthĩra mweke o wothe gwĩkĩra wĩtĩkio witũ hinya nĩguo tũkaahota gũtũũria wĩkindĩru witũ harĩ Jehova o na tũngĩgacemania na magerio marĩkũ. Twagĩrĩirũo gwĩka atĩa? Twagĩrĩirũo kũhoya, kwĩruta Kiugo kĩa Ngai na gwĩcũrania igũrũ rĩakĩo, na kũhunjĩria andũ arĩa angĩ ndũmĩrĩri ya Ũthamaki. Tweka ũguo, nĩ tũrĩigaga kĩĩrĩgĩrĩro gitũ kĩa muoyo wa tene na tene gĩ kĩrũmu ta “nanga.”—Ahib. 6:19; Thab. 25:21.
NDŨRĨRĨ NO MŨHAKA IKAAMENYA JEHOVA
10, 11. Nĩ kĩĩ gĩkonania atĩ Hari-Magedoni ĩkiriĩ kwambĩrĩria, na nĩ ũndũ ũrĩkũ ũgeekĩka ihinda-inĩ rĩu?
10 Nĩ ũndũ ũrĩkũ wa gũtua nda ũgeekĩka ndungata cia Jehova ciatharĩkĩrũo? Jehova, akĩhũthĩra Jesu na mbũtũ cia igũrũ, nĩ akaingĩrĩra nĩguo ateithie andũ Ake. (Kũg. 19:11-16) Ĩyo ĩgaakorũo ĩrĩ “mbaara ya mũthenya ũrĩa mũnene wa Ngai, Mwene-Hinya-Wothe”—Hari-Magedoni.—Kũg. 16:14, 16.
11 Akĩaria igũrũ rĩgiĩ mbaara ĩyo, Jehova oigire ũũ kũgerera Ezekieli: ‘Nĩ ngacomorithia hiũ cia njora itemenganĩre irĩma-inĩ ciakwa ciothe, naruo rũhiũ rwa mũndũ o mũndũ rũtemenge mũrũ wa ithe, ũguo nĩguo Mwathani Jehova oigĩte.’ Marĩ na guoya, arĩa manyitaga Shaitani mbaru nĩ magaatukanĩrũo na mokanĩrĩre o ene—mũndũ okĩrĩre ũrĩa ũngĩ. Ĩndĩ, Shaitani o nake nĩ akona ũũru. Jehova oigĩte ũũ: ‘Gogu we mwene na itungati ciake cia ita, o na ndũrĩrĩ iria nyingĩ mũno igaakorũo irĩ hamwe nake, nĩ ngamoirithĩria mbura nene ya mwaki, o na ũbiriti.’ (Ezek. 38:21, 22) Moimĩrĩro magaakorũo marĩ marĩkũ Ngai eka ũguo?
12. Nĩ ũndũ ũrĩkũ arĩ o mũhaka ndũrĩrĩ ikaamenya?
12 No mũhaka ndũrĩrĩ ikaamenya atĩ kwanangwo gwacio kuumanĩte na uuge wa Jehova we mwene. Hĩndĩ ĩyo, o ta Amisiri arĩa maarũmĩrĩire Aisiraeli Iria-inĩ Itune nĩguo mamatharĩkĩre, no kũhoteke mbũtũ cia Shaitani ikaanĩrĩra ũũ irĩ na kĩeha: “Jehova nĩwe ũramorĩria”! (Tham. 14:25) Ĩĩ-ni, ndũrĩrĩ no mũhaka ikaamenya Jehova. (Thoma Ezekieli 38:23.) Maũndũ macio matigĩtie haigana atĩa mambĩrĩrie?
GŨTIRĨ THIRIKARI ĨNGĨ NENE YA THĨ ĨRIUMĨRA
13. Nĩ ũndũ ũrĩkũ tũũĩ wĩgiĩ gĩcunjĩ gĩa gatano kĩa mũhianano ũrĩa Danieli aataarĩirie?
13 Ũrathi ũmwe thĩinĩ wa ibuku rĩa Danieli nĩ ũtũteithagia kũmenya harĩa tũrĩ kũringana na mahinda. Danieli aataarĩirie mũhianano ũtariĩ ta mũndũ ũthondeketwo na cuma cia mĩthemba ĩtiganĩte. (Dan. 2:28, 31-33) Mũhianano ũcio ũrũgamĩrĩire thirikari nene cia thĩ iria cianakorũo na ũhoti igũrũ rĩa andũ a Ngai a tene na a mahinda maya, ta ũrĩa irũmanĩrĩire. Nacio nĩ Babuloni, Media na Perisia, Ũyunani, Roma—na ya mũthia nĩ thirikari ĩngĩ nene ya thĩ ya mahinda maya. Ũthuthuria wa ũrathi wa Danieli wonanagia atĩ thirikari ĩyo ya mũthia ĩrũgamĩrĩirũo nĩ magũrũ ma mũhianano ũcio. Hĩndĩ ya Mbaara ya 1 ya Thĩ, Ngeretha na Amerika (U.S.) nĩ ciathondekire ngwatanĩro ya mwanya. Hatirĩ nganja, gĩcunjĩ gĩa gatano kĩa mũhianano ũrĩa Danieli onire nĩ Thirikari ya Thĩ ya Ngeretha na Amerika (U.S.) Magũrũ nĩmo gĩcunjĩ kĩa mũthia kĩa mũhianano ũcio, kuonania atĩ gũtirĩ thirikari ĩngĩ nene ya andũ ĩriumĩra thĩinĩ wa thĩ. Magũrũ gũkorũo mathondeketwo na kĩgera gĩtukanĩtio na rĩũmba kũronania ũrĩa Thirikari ĩyo ya Thĩ ya Ngeretha na Amerika U.S. yagithĩtio hinya.
14. Nĩ thirikari ĩrĩkũ ya thĩ ĩgaakorũo ĩrĩ nene rĩrĩa Hari-Magedoni ĩgoka?
14 Ũrathi ũcio ningĩ nĩ wonanagia atĩ Ũthamaki wa Ngai, ũrĩa ũrũgamĩrĩirũo nĩ ihiga inene, nĩ wenjirũo kuuma kĩrĩma-inĩ kĩa wathani wa Jehova mwaka wa 1914. Ihiga rĩu rĩharũrũkĩte rĩerekeire harĩ magũrũ ma mũhianano ũcio. Mbaara-inĩ ya Hari-Magedoni, mũhianano ũcio wothe, hamwe na magũrũ ma guo nĩ ũkaamemendwo. (Thoma Danieli 2:44, 45.) Kwoguo, Thirikari ya Thĩ ya Ngeretha na Amerika U.S. nĩyo ĩgaakorũo ĩrĩ thirikari ĩrĩa nene rĩrĩa Hari-Magedoni ĩgoka. Githĩ tũtigaacanjamũka mũno kwĩyonera ũrathi ũcio ũkĩhinga biũ! c No hihi nĩ ũndũ ũrĩkũ Jehova abangĩte gũgeeka Shaitani?
ŨRĨA THŨ ĨRĨA NENE YA NGAI ĨGEEKWO
15. Thutha wa Hari-Magedoni-rĩ, Shaitani na ndaimono ciake mageekwo atĩa?
15 Mbere ndaya, no mũhaka Shaitani akeyonera kuuma kĩambĩrĩria nginya mũthia ithondeka rĩake rĩothe rĩa gũkũ thĩ rĩkĩanangwo kaimana. Thutha ũcio, Shaitani we mwene acoke erekerũo. Mũtũmwo Johana nĩ ataarĩirie ũndũ ũrĩa ũgacoka wĩkĩke. (Thoma Kũguũrĩrio 20:1-3.) Jesu Kristo—‘mũraika ũrĩa wĩ na kĩhingũro kĩa irima rĩrĩa rĩtarĩ gĩturi’—nĩ akaanyita Shaitani na ndaimono ciake, amaikie irima-inĩ rĩu, amahingĩre kuo mĩaka ngiri ĩmwe. (Luk. 8:30, 31; 1 Joh. 3:8) Ũndũ ũcio ũgaakorũo ũrĩ kĩambĩrĩria gĩa kũgũthwo kwa mũtwe wa nyoka. d—Kĩam. 3:15.
16. Gũgaatuĩka atĩa harĩ Shaitani rĩrĩa agaikio thĩinĩ wa “irima rĩtarĩ gĩturi”?
16 “Irima rĩtarĩ gĩturi” rĩrĩa Shaitani na ndaimono magaikio nĩ kĩĩ? Nĩ handũ hatangĩkinyĩrĩka nĩ mũndũ ũngĩ tiga Jehova na mũraika ũrĩa athuurĩte ũrĩa wĩ na “kĩhingũro kĩa irima rĩtarĩ gĩturi.” Arĩ kũu, Shaitani akaahaana ta akuĩte, ndagakorũo na ũhoti wa gwĩka ũndũ o na ũrĩkũ “ndagacoke kũhĩtithia ndũrĩrĩ.” Hatarĩ nganja, ‘mũrũthi ũcio ũraramaga’ nĩ ũgaakirio!—1 Pet. 5:8.
MAŨNDŨ MARĨA MAGATONGORIA HARĨ IHINDA RĨA THAYŨ
17, 18. (a) Nĩ maũndũ marĩkũ marĩa matarĩ maroneka twarĩkia gũthuthuria? (b) Thutha wa maũndũ macio gwĩkĩka, nĩ ihinda rĩrĩkũ tũgaakenera?
17 Maũndũ ma bata na ma gũtua nda nĩ marĩĩkĩka. Nĩ twetereire kuona nĩ na njĩra ĩrĩkũ uuge ũrĩa wa ‘Nĩ kũrĩ thayũ na gũtirĩ mburuga!’ ũkaahinga. Tũcoke twĩyonere Babuloni ũrĩa Mũnene akĩniinwo, tharĩkĩro ya Gogu wa bũrũri wa Magogu, mbaara ya Hari-Magedoni, na gũikio kwa Shaitani na ndaimono ciake irima-inĩ rĩtarĩ gĩturi. Thutha wa maũndũ macio gwĩkĩka, rĩrĩa waganu wothe ũgaakorũo ũthirĩte, nĩ tũkaingĩra ihinda-inĩ rĩerũ—Wathani wa Kristo wa Mĩaka Ngiri Ĩmwe, rĩrĩa tũgaakenera “kũingĩhĩrũo nĩ thayũ.”—Thab. 37:10, 11.
18 Hamwe na maũndũ macio matano twarĩkia gũthuthuria, nĩ harĩ maũndũ mangĩ “matonekaga” marĩa tũrabatara ‘gũikara tũcũthĩrĩirie.’ Maũndũ macio nĩ marĩrĩirio gĩcunjĩ-inĩ kĩrĩa kĩrũmĩrĩire.
[Ũhoro wa magũrũ-inĩ]
a Maũndũ macio ikũmi marĩrĩirio gĩcunjĩ-inĩ gĩkĩ na kĩrĩa kĩrũmĩrĩire.
b Rora Ufunuo Upeo Wao Mtukufu U Karibu! karatathi ka 251-258.
c Ciugo ‘kũniina biũ mothamaki macio mangĩ’ thĩinĩ wa Danieli 2:44 ciarĩrĩirie mothamaki, kana thirikari cia thĩ, iria irũgamĩrĩirũo nĩ icunjĩ cia mũhianano ũcio. O na kũrĩ ũguo, ũrathi ũngĩ wa Bibilia ũringaine na ũcio ũronania atĩ “athamaki a mabũrũri mothe” nĩ makongana mokĩrĩre Jehova hĩndĩ ya “mũthenya ũrĩa mũnene wa Ngai, Mwene-Hinya-Wothe.” (Kũg. 16:14; 19:19-21) Kwoguo, to mothamaki marĩa marũgamĩrĩirũo nĩ mũhianano ũcio makaanangwo mbaara-inĩ ya Hari-Magedoni, no nĩ nginya mothamaki marĩa mangĩ mothe ma thĩ.
d Kũhehenjwo biũ kwa mũtwe wa nyoka gũgeekĩka thutha wa mĩaka ngiri gũthira rĩrĩa Shaitani na ndaimono ciake magaikio thĩinĩ wa “iria rĩrĩa rĩa mwaki na ũbiriti.”—Kũg. 20:7-10; Mat. 25:41.
[Ciũria cia wĩruti]
[Mbica karatathi ga 4,5]
MAŨNDŨ MATANO MARĨKĨKA:
1 Kwanĩrĩrũo kwa ‘Nĩ kũrĩ thayũ na gũtirĩ mburuga!’
2 Ndũrĩrĩ gũtharĩkĩra na kũniina ‘Babuloni ũrĩa Mũnene’
3 Gũtharĩkĩrũo kwa andũ a Jehova
4 Mbaara ya Hari-Magedoni
5 Shaitani na ndaimono ciake gũikio irima-inĩ rĩtarĩ gĩturi
