“Ndĩ Hamwe na Inyuĩ Mĩthenya Yothe”
“Ndĩ Hamwe na Inyuĩ Mĩthenya Yothe”
“Na atĩrĩrĩ, niĩ ndĩ hamwe na inyuĩ mĩthenya yothe, o nginya ithirĩro rĩa mahinda maya.”—MATT. 28:20.
CARIA MACOKIO MA CIŨRIA ICI:
Nĩ kĩĩ kĩngĩtũma twĩtĩkie atĩ, kuuma hĩndĩ ya karine ya mbere nginyagia ũmũthĩ, nĩ gũkoretwo na Akristiano aitĩrĩrie maguta gũkũ thĩ?
Nĩ ũthuthuria ũrĩkũ Jesu aambĩrĩirie mwaka wa 1914?
Nĩ maũndũ marĩkũ thĩinĩ wa ngerekano ya Jesu ĩgiĩ ngano na thawani matarĩ marahinga?
1. (a) Taarĩria na njĩra nguhĩ ngerekano ya ngano na thawani. (b) Jesu oigire yonanagia ũndũ ũrĩkũ?
THĨINĨ wa ngerekano ĩmwe yake ĩgiĩ Ũthamaki, Jesu ataarĩirie ũhoro wa mũrĩmi wahandire mbeũ njega cia ngano nayo thũ ĩkĩhanda itindiĩ kana thawani gatagatĩ-inĩ ka mbeũ icio njega. Thawani ĩkĩneneha ĩkĩhobanĩria ngano, ĩndĩ mũrĩmi ũcio akĩĩra ngombo ciake, ‘ireke ikũranĩre hamwe cierĩ nginya hĩndĩ ya magetha.’ Ihinda rĩa magetha rĩakinya, thawani ĩgĩcinwo nayo ngano ĩkĩigwo ikũmbĩ. Jesu nĩ aacokire agĩtaarĩria ngerekano ĩyo. (Thoma Mathayo 13:24-30, 37-43.) Ngerekano ĩyo yonanagia ũndũ ũrĩkũ? (Rora mbica ĩrĩa ĩrĩ na kĩongo “Ngano na Thawani.”)
2. (a) Nĩ kĩĩ kĩonanagio nĩ maũndũ marĩa meekĩkire mũgũnda-inĩ wa mũrĩmi? (b) Nĩ gĩcunjĩ kĩrĩkũ kĩa ngerekano ĩyo tũkwarĩrĩria?
2 Maũndũ marĩa meekĩkire mũgũnda-inĩ wa mũrĩmi ũcio monanagia ũrĩa, na rĩrĩa, Jesu angĩgaacokanĩrĩria Akristiano othe aitĩrĩrie maguta arĩa magaathamaka hamwe nake Ũthamaki-inĩ wake, arĩa marũgamagĩrĩrũo nĩ ngano. Mbeũ ciambĩrĩirie kũhandwo hĩndĩ ya Bendegothito mwaka wa 33. Wĩra ũcio wa gũcokanĩrĩria ũkaarĩka rĩrĩa Akristiano aitĩrĩrie maguta arĩa magaakorũo gũkũ thĩ mũico-inĩ wa mũtabarĩre ũyũ magekĩrũo rũũri macoke mathiĩ igũrũ. (Mat. 24:31; Kũg. 7:1-4) O ta ũrĩa mũndũ ũrũgamĩte kĩrĩma-igũrũ ahotaga kuona kũndũ kũraya, noguo ngerekano ĩno ĩtũhotithĩtie kuona maũndũ marĩa mekĩkĩte ihinda rĩa mĩaka ta 2,000. Ihinda-inĩ rĩrĩ nĩ maũndũ marĩkũ makonainie na Ũthamaki tũrataũkĩrũo nĩmo? Ngerekano ĩyo nĩ yarĩtie ũhoro wa ihinda rĩa kũhanda, gũkũra na rĩa magetha. Gĩcunjĩ gĩkĩ gĩkwarĩrĩria makĩria ihinda rĩa magetha. *
MAKORETWO MAKĨGITĨRŨO NĨ JESU
3. (a) Gwathire atĩa kĩambĩrĩria-inĩ gĩa karine ya kerĩ? (b) Kũringana na Mathayo 13:28, nĩ kĩũria kĩrĩkũ kĩoririo, na kĩoririo nũ? (Ningĩ rora ũhoro mũico-inĩ wa gĩcunjĩ.)
3 Kĩambĩrĩria-inĩ gĩa karine ya kerĩ, ‘itindiĩ kana thawani nĩ yonekanire’ rĩrĩa Akristiano a maheeni maambĩrĩirie kuoneka wega thĩinĩ wa thĩ. (Mat. 13:26) Gũkinyĩria karine ya kana, Akristiano a mũhaano wa thawani nĩ maingĩhĩte mũno gũkĩra Akristiano arĩa maarĩ aitĩrĩrie maguta. Ririkana atĩ thĩinĩ wa ngerekano ĩyo, ngombo nĩ ciorĩtie mwathi wacio kana imunye thawani. * (Mat. 13:28) Hihi mwathi wacio aciĩrire atĩa?
4. (a) Nĩ ũndũ ũrĩkũ ũguũragio nĩ macokio ma Jesu? (b) Nĩ hĩndĩ ĩrĩkũ Akristiano a mũhaano wa ngano maambĩrĩirie kuoneka?
4 Jesu akĩaria ũhoro wa ngano na thawani oigire, “Rekei ikũranĩre hamwe o cierĩ nginya hĩndĩ ya magetha.” Watho ũcio wake wonanagia atĩ kuuma o karine ya mbere nginyagia ũmũthĩ, nĩ gũkoretwo na Akristiano aitĩrĩrie maguta arĩa a itari rĩa ngano gũkũ thĩ. Ũndũ ũcio nĩ wacokire ũgĩkĩrũo mũkonde nĩ ciugo iria Jesu eerire arutwo ake: ‘Niĩ ndĩ hamwe na inyuĩ mĩthenya yothe, o nginya ithirĩro rĩa mahinda maya.’ (Mat. 28:20) Kwoguo Jesu nĩ angĩagitĩrire Akristiano aitĩrĩrie maguta mĩthenya yothe gũthiĩ na mbere nginya matukũ-inĩ ma kũrigĩrĩria. O na kũrĩ ũguo-rĩ, tondũ Akristiano a mũhaano wa thawani nĩ maaingĩhĩte mũno gũkĩra a mũhaano wa ngano, tũtiũĩ biũ nĩa maarĩ a mũhaano wa ngano ihinda-inĩ rĩu iraya. Ĩndĩ, mĩaka mĩingĩ mbere ya ihinda rĩa magetha kwambĩrĩria, Akristiano a mũhaano wa ngano nĩ maambĩrĩirie kuoneka. Ũndũ ũcio wahotekire atĩa?
‘MŨREKIO ŨRĨA WATHONDEKIRE NJĨRA’
5. Ũrathi wa Malaki wahingire atĩa hĩndĩ ya karine ya mbere?
5 Mĩaka mĩingĩ mbere ya Jesu kũheana ngerekano ya ngano na thawani, Jehova nĩ eerĩte mũnabii wake Malaki arathe maũndũ marĩa maacokire kuonanio nĩ ngerekano ĩyo ya Jesu. (Thoma Malaki 3:1-4.) Johana Mũbatithania nĩwe warĩ ‘mũrekio ũrĩa wathondekire njĩra.’ (Mat. 11:10, 11) Rĩrĩa okire mwaka wa 29, ihinda rĩa gũtuĩrũo kwa rũrĩrĩ rwa Isiraeli nĩ rĩakuhĩrĩirie. Jesu nĩwe warĩ mũrekio wa kerĩ. Kĩambĩrĩria-inĩ na mũico-inĩ wa ũtungata wake gũkũ thĩ nĩ aatheririe hekarũ ĩrĩa yarĩ Jerusalemu. (Mat. 21:12, 13; Joh. 2:14-17) Kwoguo, wĩra wa Jesu wa gũtheria hekarũ nĩ woire ihinda.
6. (a) Ũrathi wa Malaki wahingire na njĩra nene atĩa? (b) Nĩ ihinda-inĩ rĩrĩkũ Jesu aathuthuririe hekarũ ya kĩĩroho? (Ningĩ rora ũhoro mũico-inĩ wa gĩcunjĩ.)
6 Ũrathi wa Malaki wahingire na njĩra nene atĩa? Mbere ya 1914, C. T. Russell na arĩa maanyitanagĩra nao meekire o ta Johana Mũbatithania. Ũndũ ũmwe meekire nĩ kũguũria ma cia Bibilia. Arutwo acio a Bibilia nĩ maarutanire ma ĩgiĩ igongona rĩa ũkũũri rĩa Kristo, makĩonania atĩ ũrutani wa mwaki wa tene na tene nĩ wa maheeni, na makĩonania atĩ Mahinda ma Ndũrĩrĩ maarĩ hakuhĩ gũthira. O na kũrĩ ũguo-rĩ, no kwarĩ na ikundi nyingĩ cia kĩĩndini cieĩtaga arũmĩrĩri a Kristo. Nĩ ũndũ ũcio, kĩũria gĩkĩ kĩa bata nĩ kĩabataraga macokio: Gatagatĩ ga ikundi icio nĩ kĩrĩkũ kĩarĩ mũhaano wa ngano? Nĩguo ũndũ ũcio ũmenyeke, Jesu nĩ aambĩrĩirie gũthuthuria hekarũ ya kĩĩroho mwaka wa 1914. Wĩra ũcio wa gũthuthuria na gũtheria hekarũ nĩ woire ihinda, kuuma mwaka wa 1914 nginya kĩambĩrĩria kĩa mwaka wa 1919. *
IHINDA RĨA GŨTHUTHURIO NA GŨTHERIO
7. Nĩ ũndũ ũrĩkũ Jesu aakorire mwaka 1914, rĩrĩa aambĩrĩirie gũthuthuria?
7 Nĩ ũndũ ũrĩkũ Jesu aakorire rĩrĩa aambĩrĩirie gũthuthuria? Aakorire gĩkundi kĩnyinyi kĩa arutwo a Bibilia maarĩ na kĩyo, arĩa kwa ihinda rĩa mĩaka makĩria ma 30 maakoretwo makĩhũthĩra hinya wao na indo ciao gũtwarithia na mbere wĩra wa kũhunjia. * No mũhaka akorũo Jesu o hamwe na araika nĩ maakenire mũno, rĩrĩa maakorire Akristiano acio anyinyi a mũhaano wa ngano, mehandĩte wega na matathũkĩtio nĩ thawani ya Shaitani! O na kũrĩ ũguo, no kwarĩ na bata wa ‘gũtheria ariũ a Lawii,” nĩo Akristiano aitĩrĩrie maguta. (Mal. 3:2, 3; 1 Pet. 4:17) Nĩkĩ?
8. Nĩ maũndũ marĩkũ meekĩkire thutha wa mwaka wa 1914?
8 Mwaka wa 1914 ũgĩthiĩ gũthira, Arutwo amwe a Bibilia nĩ maakuĩte ngoro mũno tondũ matiathiĩte igũrũ. Mwaka-inĩ 1915 na 1916, nĩ maagondereire wĩra-inĩ wa kũhunjia nĩ ũndũ wa gũũkĩrĩrũo nĩ arĩa maarĩ nja ya ithondeka rĩa Jehova. Gũthũkia mũno, thutha wa mũrũ wa Ithe witũ Russell gũkua mweri wa Oktomba 1916, nĩ kwagĩire na mathĩna ithondeka-inĩ. Ariũ a Ithe witũ ana harĩ arĩa mũgwanja maatongoragia Watch Tower Bible and Tract Society nĩ maareganire na itua rĩa gũthuurũo kwa mũrũ wa Ithe witũ Rutherford atongorie. Nĩ maageririe kũhanda thogothogo gatagatĩ ka ariũ a Ithe witũ, ĩndĩ kũrĩ Agosti 1917, nĩ mooimire Betheli. Hatarĩ nganja kũu kwarĩ gũtherio kũnene! Ningĩ, Arutwo amwe a Bibilia nĩ maagũire mũtego-inĩ wa gwĩtigĩra andũ. O na kũrĩ ũguo, Arutwo a Bibilia arĩa aingĩ nĩ meetĩkĩrire gũtherio na magĩka mogarũrũku marĩa maabataranagia. Nĩ ũndũ ũcio, Jesu nĩ aametĩkĩrire marĩ Akristiano a ma a mũhaano wa ngano, ĩndĩ akĩrega arĩa meetuaga Akristiano, o hamwe na arĩa othe maarĩ thĩinĩ wa ndini iria cieĩtaga cia Gĩkristiano. (Mal. 3:5; 2 Tim. 2:19) Gwacokire gũgĩthiĩ atĩa? Nĩguo tũmenye, rekei twĩcirie rĩngĩ ũhoro wa ngerekano ya ngano na thawani.
IHINDA RĨA MAGETHA RĨAMBĨRĨRIA
9, 10. (a) Nĩ maũndũ marĩkũ tũkwarĩrĩria megiĩ ihinda rĩa magetha? (b) Nĩ ũndũ ũrĩkũ wambire gwĩkĩka ihinda rĩa magetha rĩambĩrĩria?
9 Jesu oigire atĩ, ‘hĩndĩ ya magetha, nĩ ithirĩro-inĩ rĩa mahinda maya.’ (Mat. 13:39) Ihinda rĩu rĩa magetha rĩambĩrĩirie 1914. Nĩ tũkwarĩrĩria maũndũ matano marĩa Jesu aarathĩte atĩ nĩ mangĩgekĩka ihinda-inĩ rĩu.
10 Wa mbere nĩ gũcokanĩrĩria itindiĩ kana thawani. Jesu oigire ũũ: “Hĩndĩ ĩo ya magetha nĩngera agethi, Ambai mũmunye itindiĩ mũricokererie hamwe, mũrĩohe itĩa.” Thutha wa mwaka wa 1914 araika nĩ maambĩrĩirie ‘gũcokanĩrĩria’ Akristiano a mũhaano wa thawani na njĩra ya kũmaamũrania na Akristiano aitĩrĩrie maguta, “ciana iria cia ũthamaki.”—Mat. 13:30, 38, 41.
11. Nĩ ũndũ ũrĩkũ ũkoretwo ũgĩtũma Akristiano a ma makũrĩkane?
11 O ũrĩa wĩra ũcio wa gũcokanĩrĩria wathiaga na mbere, noguo ikundi icio cierĩ ciathiaga igĩkũrĩkanaga wega. (Kũg. 18:1, 4) Gũkinyĩria mwaka wa 1919, nĩ kuonekire wega atĩ Babuloni ũrĩa Mũnene nĩ aarĩkĩtie kũgũa. Nĩ kĩĩ makĩria gĩatũmaga Akristiano a ma makũrĩkane? Nĩ wĩra wao wa kũhunjia. Arĩa maatongoragia thĩinĩ wa kĩũngano nĩ maambĩrĩirie gũtĩtĩrithia bata wa o mũndũ kũhunjia ũhoro wa Ũthamaki. Kwa ngerekano, mwaka wa 1919 nĩ gwacabirũo kabuku getagwo To Whom the Work Is Entrusted, karĩa geekĩraga ngoro Akristiano othe aitĩrĩrie maguta mahunjagie nyũmba kwa nyũmba. Koigĩte ũũ: “Wĩra ũyũ ũroneka ũrĩ mũingĩ mũno, ĩndĩ tondũ nĩ wa Mwathani, nĩ egũtũhe hinya wa kũũruta. Nĩ gĩtĩo gũkorũo ũkĩũruta.” Hihi maaiyũkirie ũndũ ũcio atĩa? Ngathĩti ya The Watch Tower ya 1922, yoigire atĩ kuuma hĩndĩ ĩo Arutwo a Bibilia nĩ mongereire kĩyo kĩao gĩa kũhunjia. Thutha wa kahinda kanini, kũhunjia nyũmba kwa nyũmba gũgĩtuĩka rũũri rwa Akristiano acio ehokeku na noguo kũrĩ nginya ũmũthĩ.
12. Arĩa a mũhaano wa ngano maambĩrĩirie gũcokanĩrĩrio rĩ?
12 Wa kerĩ nĩ gũcokanĩrĩria ngano. Jesu eerire araika ũũ: ‘Cokereriai ngano ikũmbĩ rĩakwa.’ (Mat. 13:30) Kuuma 1919, Akristiano aitĩrĩrie maguta makoretwo magĩcokanĩrĩrio thĩinĩ wa kĩũngano gĩa Gĩkristiano. Akristiano aitĩrĩrie maguta arĩa magaakorũo marĩ gũkũ thĩ mũico-inĩ wa mũtabarĩre ũyũ, magaacokanĩrĩrio rĩa mũico rĩrĩa makaamũkĩra igai rĩao rĩa gũthiĩ igũrũ.— Dan. 7:18, 22, 27.
13. Kũguũrĩrio 18:7 yonanagia atĩa mwerekera wa mahinda maya wa mũmaraya kana Babuloni ũrĩa Mũnene, na ndini iria ciĩĩtaga cia Gĩkristiano?
13 Ũndũ wa gatatũ nĩ kĩrĩro, na kũhagarania magego. Gũgaathiĩ atĩa thutha wa araika kuoha thawani itĩa? Jesu akĩaria ũhoro wa arĩa a mũhaano wa thawani oigire ũũ: “Kũu nĩkuo gũkagĩa kĩrĩro, na kũhagarania magego.” (Mat. 13:42) Hihi ũndũ ũcio nĩ ũrekĩka mahinda-inĩ maya? Aca. Mahinda-inĩ maya mũmaraya, ũrĩa gĩcunjĩ kĩmwe gĩake nĩ ndini iria ciĩtaga cia Gĩkristiano aroiga ũũ: “Njikaire ndĩ mũthamaki; ndirĩ wa ndigwa niĩ, niĩ ndirĩ hingo ngarĩo nĩ kĩeha.” (Kũg. 18:7) Hatarĩ nganja, ndini iria ciĩtaga cia Gĩkristiano no ciĩiguaga irĩ na ũhoti mũnene, nginya cigetuaga cikaire ta mũthamaki igũrũ rĩa atongoria a gĩũteti. Ihinda-inĩ rĩrĩ, arĩa a mũhaano wa thawani matirĩ na kĩrĩro ĩndĩ no mwĩgatho. O na kũrĩ ũguo, ũndũ ũcio ũrĩ hakuhĩ gũcenjia.
14. (a) Nĩrĩ na nĩkĩ gĩgatũma Akristiano a maheeni ‘mahagaranie magego’? (b) Ũtaũku witũ mwerũ wĩgiĩ Mathayo 13:42 ũratwarana atĩa na ũndũ ũrĩa ũrĩ thĩinĩ wa Thaburi 112:10? (Rora ũhoro mũico-inĩ wa gĩcunjĩ.)
14 Thutha wa ndini ciothe kũniinwo hĩndĩ ya thĩna ũrĩa mũnene-rĩ, arĩa maracirũmagĩrĩra nĩ magacaria gwa kũũrĩra, ĩndĩ matikoona. (Luk. 23:30; Kũg. 6:15-17) Mamenya atĩ matirĩ na gwa kũũrĩra nĩguo matikaninwo, nĩ makarĩra mũno na ‘mahagaranie magego’ marĩ na mathũgũta. O ta ũrĩa Jesu oigĩte akĩaria ũhoro wa thĩna ũrĩa mũnene, hĩndĩ ĩyo ya ruo rũnene nĩ ‘makaagĩa na kĩeha.’ *
15. Thawani ĩgekwo atĩa, na ũndũ ũcio ũgeekĩka rĩ?
15 Ũndũ wa kana nĩ gũikio icua-inĩ rĩa mwaki. Itĩa cia thawani igekwo atĩa? Araika ‘magaacikia icua-inĩ rĩa mwaki.’ (Mat. 13:42) Ũguo nĩ kuuga makaaninwo biũ. Kwoguo, arũmĩrĩri acio a ndini cia maheeni makaaninwo hĩndĩ ya Hari–Magedoni, gĩcunjĩ kĩa mũico gĩa thĩna ũrĩa mũnene.—Mal. 4:1.
16, 17. (a) Nĩ ũndũ ũrĩkũ wa mũico ũgeekĩka ũgwetetwo nĩ Jesu ngerekano-inĩ yake? (b) Nĩ kĩĩ kĩratũma twĩtĩkie atĩ kũhinga kwa ũndũ ũcio nĩ kwa hĩndĩ ĩroka?
16 Ũndũ wa gatano nĩ kwara o ta riũa. Jesu agĩtiriha ũrathi wake oigire atĩ, ‘hĩndĩ ĩyo arĩa athingu makaara o ta riũa wathani-inĩ wa Ithe wao.’ (Mat. 13:43) Ũndũ ũcio ũgeekĩka hĩndĩ ĩrĩkũ na ũgeekĩka kũ? Ũrathi ũcio ũkaahinga hĩndĩ ĩroka. Jesu aaragia ũhoro wa ũndũ ũgeekĩka kũrĩa igũrũ hĩndĩ ĩroka no ti ũndũ ũrekĩka gũkũ thĩ mahinda-inĩ maya. * Rekei twarĩrĩrie maũndũ merĩ marĩa maratũma twĩtĩkie ũguo.
17 Wa mbere-rĩ, ũndũ ũcio ũgeekĩka rĩ? Jesu oigire atĩ, ‘hĩndĩ ĩyo arĩa athingu makaara o ta riũa.’ Hatarĩ nganja ciugo ‘hĩndĩ ĩyo’ ikonainie na ũndũ ũrĩa Jesu aakoretwo agweta wĩgiĩ ‘gũikia itindiĩ kana thawani icua-inĩ rĩa mwaki.’ Ũndũ ũcio ũgeekĩka gĩcunjĩ-inĩ kĩa mũico gĩa thĩna ũrĩa mũnene. Nĩ ũndũ ũcio, ‘kwara ta riũa’ kwa Akristiano aitĩrĩrie maguta o nakuo gũgeekĩka hĩndĩ ĩroka. Wakerĩ-rĩ, ũndũ ũcio ũgeekĩka kũ? Jesu oigire atĩ arĩa athingu ‘makaara o ta riũa wathani-inĩ kana thĩinĩ wa ũthamaki.’ Ũguo nĩ kuuga atĩa? Akristiano othe aitĩrĩrie maguta ehokeku arĩa magaakorũo gũkũ thĩ thutha wa gĩcunjĩ kĩa mbere gĩa thĩna ũrĩa mũnene kũhĩtũka nĩ magaakorũo meekĩrĩtwo rũũri rwa mũthia. Macoke mambate igũrũ o ta ũrĩa Jesu aagwetire thĩinĩ wa ũrathi wake wĩgiĩ thĩna ũrĩa mũnene. (Mat. 24:31) Kũu nĩkuo makaara o ta riũa ‘thĩinĩ wa wathani kana ũthamaki wa Ithe wao.’ Kahinda kanini thutha wa mbaara ya Hari–Magedoni, nĩ makaanyitanĩra marĩ na gĩkeno ‘kĩhikanio-inĩ gĩa Gatũrũme’ marĩ mũhiki wa Jesu.
TŨRAGUNĨKA ATĨA?
18, 19. Tũragunĩka atĩa kuumana na ũtaũku wĩgiĩ ngerekano ya Jesu ya ngano na thawani?
18 Tũragunĩka atĩa kuumana na maũndũ marĩa tweruta megiĩ ngerekano ĩno? Wĩcirie ũhoro wa moguni matatũ. Wa mbere, nĩ yarikĩria ũtaũku witũ. Nĩ yonania kĩrĩa gĩtũmĩte Jehova arekererie waganu. Nĩ ‘akirĩrĩirie andũ arĩa matariĩ ta nyũngũ kana indo cia kũrakarĩrũo’ nĩguo athagathage ‘nyũngũ kana indo iria njiguĩre tha,’ nĩo arĩa a mũhaano wa ngano. * (Rom. 9:22-24) Wa kerĩ, nĩ yatũmĩrĩria mũno. O ũrĩa mũico ũrakuhĩrĩria, noguo thũ citũ igũtũkĩrĩra mũno, ‘no itigũtũtoria.’ (Thoma Jeremia 1:19.) O ta ũrĩa Jehova akoretwo akĩgitĩra arĩa a mũhaano wa ngano, noguo kũgerera kũrĩ Jesu na araika egũkorũo hamwe na ithuĩ ‘mĩthenya yothe’ ĩrĩa ĩroka.—Mat. 28:20.
19 Ũguni wa gatatũ nĩ atĩ, ngerekano ĩyo nĩ yatũteithia gũkũũrana arĩa a mũhaano wa ngano. Nĩkĩ ũndũ ũcio nĩ wa bata mũno? Kũmenya Akristiano a mũhaano wa ngano nĩ arĩkũ nĩ gũgũtũteithia kuona macokio ma kĩũria kĩoririo nĩ Jesu thĩinĩ wa ũrathi wake wĩgiĩ matukũ ma mũico. Oririe ũũ: “Ngombo ĩrĩa ĩĩhokekete na njũgĩ nĩ ĩrĩkũ?” (Mat. 24:45) Icunjĩ igĩrĩ iria irũmĩrĩire nĩ cigũtũteithia kũgĩa na macokio mega ma kĩũria kĩu.
ŨHORO MŨICO-INĨ WA GĨCUNJĨ: (Ũthomwo ta ũrĩa kohoro ka magũrũ-inĩ gathomagwo.)
^ kib. 2 Kĩbungo gĩa 2: [1] Nĩguo wĩririkanie maũndũ mangĩ megiĩ ngerekano ĩno, ũrekĩrũo ngoro ũthome gĩcunjĩ kĩrĩ na kĩongo “Waadilifu Watang’aa kwa Uangavu Kama Jua” thĩinĩ wa ngathĩti ya Mnara wa Mlinzi ya Machi 15, 2010.
^ kib. 3 Kĩbungo gĩa 3: [2] Tondũ atũmwo a Jesu nĩ maakuĩte, na Akristiano aitĩrĩrie maguta arĩa maatigarĩte thĩinĩ wa thĩ maarũgamĩrĩirũo nĩ ngano no ti ngombo-rĩ, ngombo icio irũgamĩrĩire araika. Ngerekano ĩyo nĩ ĩcokete ĩkonania atĩ acokereria a thawani nĩ araika.—Mat. 13:39.
^ kib. 6 Kĩbungo gĩa 6: [3] Ũyũ nĩ ũtaũku mwerũ. Hau mbere tũreciragia atĩ Jesu aathuthuririe hekarũ ya kĩĩroho mwaka wa 1918.
^ kib. 7 Kĩbungo kĩa 7: [4] Kuuma 1910 nginya 1914 Arutwo a Bibilia maaheanire mabuku hakuhĩ 4,000,000 na makĩria ma trakti hamwe na tũbuku 200,000,000.
^ kib. 14 Kĩbungo gĩa 14: [5] Ũyũ nĩ ũtaũku mwerũ wĩgiĩ Mathayo 13:42. Mbere ĩyo mabuku maitũ marataragĩria atĩ mĩaka mĩingĩ Akristiano a maheeni makoretwo ‘makĩrĩra na kũhagarania magego,’ magĩcakayaga atĩ tondũ “ciana iria cia ũthamaki” nĩ imoimbũranagia atĩ nĩo “ciana cia ũrĩa mũũru.” (Mat. 13:38) O na kũrĩ ũguo, Bibilia ĩkĩaria ũhoro wa kũhagarania magego ĩkoragwo ĩkĩaria ũhoro wa kũniinwo.—Thab. 112:10.
^ kib. 16 Kĩbungo gĩa 16: [6] Danieli 12:3 yugaga atĩ ‘arĩa ogĩ [Akristiano aitĩrĩrie maguta] nĩ magacangarara ta ũtheri wa matu-inĩ.’ Rĩrĩa rĩothe marĩ gũkũ thĩ mekaga ũguo na njĩra ya kũhunjia. O na kũrĩ ũguo, Mathayo 13:43 yaragia ũhoro wa rĩrĩa magacangarara mũno Ũthamaki-inĩ wa igũrũ. Hau kabere tũreciragia atĩ maandĩko macio merĩ maragia ũhoro wa kũhunjia.
^ kib. 18 Kĩbungo gĩa 18: [7] Rora ibuku rĩa Mkaribie Yehova karatathi ka 288-289.
[Ciũria cia wĩruti]
1. (a) Taarĩria na njĩra nguhĩ ngerekano ya ngano na thawani. (b) Jesu oigire yonanagia ũndũ ũrĩkũ?
2. (a) Nĩ kĩĩ kĩonanagio nĩ maũndũ marĩa meekĩkire mũgũnda-inĩ wa mũrĩmi? (b) Nĩ gĩcunjĩ kĩrĩkũ kĩa ngerekano ĩyo tũkwarĩrĩria?
3. (a) Gwathire atĩa kĩambĩrĩria-inĩ gĩa karine ya kerĩ? (b) Kũringana na Mathayo 13:28, nĩ kĩũria kĩrĩkũ kĩoririo, na kĩoririo nũ? (Ningĩ rora ũhoro mũico-inĩ wa gĩcunjĩ.)
4. (a) Nĩ ũndũ ũrĩkũ ũguũragio nĩ macokio ma Jesu? (b) Nĩ hĩndĩ ĩrĩkũ Akristiano a mũhaano wa ngano maambĩrĩirie kuoneka?
5. Ũrathi wa Malaki wahingire atĩa hĩndĩ ya karine ya mbere?
6. (a) Ũrathi wa Malaki wahingire na njĩra nene atĩa? (b) Nĩ ihinda-inĩ rĩrĩkũ Jesu aathuthuririe hekarũ ya kĩĩroho? (Ningĩ rora ũhoro mũico-inĩ wa gĩcunjĩ.)
7. Nĩ ũndũ ũrĩkũ Jesu aakorire mwaka 1914, rĩrĩa aambĩrĩirie gũthuthuria?
8. Nĩ maũndũ marĩkũ meekĩkire thutha wa mwaka wa 1914?
9, 10. (a) Nĩ maũndũ marĩkũ tũkwarĩrĩria megiĩ ihinda rĩa magetha? (b) Nĩ ũndũ ũrĩkũ wambire gwĩkĩka ihinda rĩa magetha rĩambĩrĩria?
11. Nĩ ũndũ ũrĩkũ ũkoretwo ũgĩtũma Akristiano a ma makũrĩkane?
12. Arĩa a mũhaano wa ngano maambĩrĩirie gũcokanĩrĩrio rĩ?
13. Kũguũrĩrio 18:7 yonanagia atĩa mwerekera wa mahinda maya wa mũmaraya kana Babuloni ũrĩa Mũnene, na ndini iria ciĩĩtaga cia Gĩkristiano?
14. (a) Nĩrĩ na nĩkĩ gĩgatũma Akristiano a maheeni ‘mahagaranie magego’? (b) Ũtaũku witũ mwerũ wĩgiĩ Mathayo 13:42 ũratwarana atĩa na ũndũ ũrĩa ũrĩ thĩinĩ wa Thaburi 112:10? (Rora ũhoro mũico-inĩ wa gĩcunjĩ.)
15. Thawani ĩgekwo atĩa, na ũndũ ũcio ũgeekĩka rĩ?
16, 17. (a) Nĩ ũndũ ũrĩkũ wa mũico ũgeekĩka ũgwetetwo nĩ Jesu ngerekano-inĩ yake? (b) Nĩ kĩĩ kĩratũma twĩtĩkie atĩ kũhinga kwa ũndũ ũcio nĩ kwa hĩndĩ ĩroka?
18, 19. Tũragunĩka atĩa kuumana na ũtaũku wĩgiĩ ngerekano ya Jesu ya ngano na thawani?
[Mbica karatathi ka 9]
[Mbica karatathi ka 10, 11]
NGANO NA THAWANI
MWAKA WA 33 MAHANDA KWAMBĨRĨRIA
MŨHAANDI: Jesu
MBEŨ IRIA NJEGA KŨHANDWO: Gũitĩrĩrio roho mũtheru
MŨGŨNDA: Andũ thĩinĩ wa thĩ
‘Mũndũ wahandire mbeũ njega mũgũnda-inĩ wake’ (Mat. 13:24)
THŨ: Mũcukani
ANDŨ MARĨ TORO: Gĩkuũ kĩa atũmwo
‘Andũ marĩ toro, thũ ĩgĩũka ĩkĩhanda itindiĩ kana thawani’ (Mat. 13:25)
NGANO: Akristiano aitĩrĩrie maguta
THAWANI: Akristiano a maheeni
‘Cierĩ igakũranĩra hamwe nginya hĩndĩ ya magetha’ (Mat. 13:30)
1914 MAGETHA KWAMBĨRĨRIA
NGOMBO/ AGETHI: Araika
Akristiano a mũhaano wa thawani kwamũranio na Akristiano aitĩrĩrie maguta “ciana iria cia ũthamaki”
Thawani gũcokanĩrĩrio na kuohwo itĩa (Mat. 13:30)
(Rora kĩbungo gĩa 10, 11)
1919 GŨCOKANĨRĨRIA IKŨMBĨ-INĨ: Gũcokanĩrĩrio kwa Akristiano aitĩrĩrie maguta thĩinĩ wa kĩũngano
IHINDA RĨA MAGETHA
‘Gũcokanĩrĩria ngano ikũmbĩ-inĩ’ (Mat. 13:30)
(Rora kĩbungo gĩa 12)
HARI–MAGEDONI
Hĩndĩ ya Hari–Magedoni thawani ĩgaikio mwaki-inĩ
KWARA TA RIŨA
Kahinda kanini mbere ya Hari–Magedoni, Akristiano aitĩrĩrie maguta arĩa magaakorũo matigarĩte gũkũ thĩ nĩ magathiĩ igũrũ
Arĩa athingu makaara ta riũa thĩinĩ wa Ũthamaki (Mat. 13:43) (Rora kĩbungo gĩa 16, 17)
Thawani ĩgaaikio icua-inĩ rĩa mwaki (Mat. 13:42) (Rora kĩbungo gĩa 15)
[Mbica]
[Mbica]
[Mbica]
[Mbica]
[Mbica]
[Mbica]
[Mbica]
[Mbica]
[Mbica]
[Mbica]
[Mbica karatathi ka 13]
Ica ikuhĩ ũrata wa atongoria a gĩũteti na ndini iria ciĩĩtaga cia Gĩkristiano nĩ ũgũkinya mũico
(Rora kĩbungo gĩa 13)
