“Ngombo Ĩrĩa Ĩĩhokekete na Njũgĩ nĩ Ĩrĩkũ?”
“Ngombo Ĩrĩa Ĩĩhokekete na Njũgĩ nĩ Ĩrĩkũ?”
‘Ngombo ĩrĩa ĩĩhokekete na njũgĩ nĩ ĩrĩkũ, ĩrĩa yatuirũo nĩ mwathani wayo mũramati wa andũ a nyũmba yake?’—MAT. 24:45.
HIHI NO ŨHOTE GŨCOKIA?
Ngombo ĩrĩa ĩĩhokekete na njũgĩ nĩ ĩrĩkũ?
Andũ a nyũmba ya mwathani nĩa, na Jesu aatuire ngombo ĩrĩa ĩĩhokekete mũramati wao rĩ?
Kristo akaahe ngombo ĩrĩa ĩĩhokekete wĩra wa kũramata indo ciake ciothe rĩ, na indo ciake ciothe nĩ irĩkũ?
1, 2. Jesu arahũthĩra njĩra ĩrĩkũ gũtũhe irio ũmũthĩ, na nĩkĩ harĩ bata mũno tũtaũkĩrũo nĩ njĩra ĩyo?
MWARĨ WA ITHE WITŨ ũmwe agĩcokeria ariũ a Ithe witũ arĩa marutaga wĩra wabici-inĩ nene ya thĩ ya Aira a Jehova ngatho, aandĩkire ũũ: “Maita marĩa ndaanamũkĩra ngathĩti kuuma kũrĩ inyuĩ irĩ na ũhoro o ũrĩa ndĩrabatara ihinda rĩrĩa ndĩraũbatara mũno, matingĩtarĩka.” Hihi wee mwene nĩ ũrĩ waigua ta ũguo? Aingĩ aitũ twanaigua ũguo. Ũndũ ũcio ndwagĩrĩirũo nĩ gũtũgegia o na hanini. Nĩkĩ?
2 Irio cia kĩĩroho iria twamũkagĩra o ihinda rĩrĩa rĩagĩire nĩ ũira wa atĩ Jesu, arĩ we Mũtwe wa kĩũngano nĩ arahingia kĩĩranĩro gĩake gĩa gũtũhe irio. Ahũthagĩra njĩra ĩrĩkũ gwĩka ũguo? Akĩheana kĩmenyithia gĩa gũcoka gwake, Jesu oigire atĩ angĩkaahũthĩra “ngombo ĩrĩa ĩĩhokekete na njũgĩ” kũhe andũ a nyũmba yake “irio hĩndĩ ĩrĩa yagĩrĩire.” * (Thoma Mathayo 24:45-47.) Ngombo ĩyo ĩĩhokekete nĩyo njĩra ĩrĩa Jesu arahũthĩra kũhe arũmĩrĩri ake a ma irio mahinda-inĩ maya ma mũico. Kwoguo, harĩ bata mũno tũtaũkĩrũo nĩ ngombo ĩyo. Maũndũ maitũ ma kĩĩroho na ũrata witũ na Ngai ciĩhocetie harĩ njĩra ĩyo Jesu arahũthĩra.—Mat. 4:4; Joh. 17:3.
3. Mabuku maitũ makoretwo magĩtaarĩria atĩa ngerekano ya ngombo ĩrĩa ĩĩhokekete?
3 Nĩ ũndũ ũcio-rĩ, twagĩrĩirũo gũtaũkĩrũo atĩa nĩ ngerekano ya Jesu ĩgiĩ ngombo ĩrĩa ĩĩhokekete? Mahinda marĩa mahĩtũku mabuku maitũ makoretwo magĩtaarĩria atĩ hĩndĩ ya Bendegothito mwaka wa 33, Jesu nĩ aamũrire ngombo ĩrĩa ĩĩhokekete ĩramatage andũ a nyũmba yake na atĩ kuuma mwaka ũcio, Akristiano othe aitĩrĩrie maguta marĩ gĩkundi rĩrĩa marĩ gũkũ thĩ, nĩo ngombo ĩyo. Ningĩ atĩ andũ a nyũmba yake nĩ Akristiano o acio aitĩrĩrie maguta marĩ mũndũ ũmwe ũmwe. Ningĩ nĩ makoretwo magĩtaarĩria atĩ mwaka wa 1919, Jesu nĩ aamũrire ngombo ĩyo ĩĩhokekete ĩtuĩke “mũramati wa indo ciake ciothe,” na atĩ indo ciake ciothe nĩ maũndũ mothe marĩa makonainie na Ũthamaki wake gũkũ thĩ. O na kũrĩ ũguo, thutha wa gũthuthuria makĩria na gwĩcũrania na njĩra ya mahoya, kũroneka atĩ ũtaũku witũ wĩgiĩ ciugo cia Jesu ciĩgiĩ ngombo ĩyo ĩĩhokekete na njũgĩ nĩ ũrabatara kũrũngwo. (Thim. 4:18) O na angĩkorũo kĩĩrĩgĩrĩro gitũ nĩ gĩa gũthiĩ igũrũ kana gĩa gũtũũra gũkũ thĩ-rĩ, rekei tũthuthurie ngerekano ĩyo na tuone ũrĩa ĩratũhutia.
NGEREKANO ĨYO YAAMBĨRĨIRIE KŨHINGA RĨ?
4-6. Nĩkĩ no tuuge atĩ ngerekano ya Jesu ĩgiĩ ngombo ĩrĩa ĩĩhokekete yambĩrĩirie kũhinga mwaka wa 1914?
4 Maũndũ marĩa mathiũrũrũkĩirie ngerekano ĩyo, monanagia atĩ yambĩrĩirie kũhinga mahinda-inĩ maya ma kũrigĩrĩria, ĩndĩ ti hĩndĩ ya Bendegothito mwaka wa 33. Rekei tuone ũrĩa Maandĩko megũtũteithia gũtaũkĩrũo nĩ ũndũ ũcio.
5 Ngerekano ya ngombo ĩrĩa ĩĩhokekete nĩ gĩcunjĩ kĩa ũrathi wa Jesu wĩgiĩ ‘kĩmenyithia kĩa rĩrĩa agoka kana agakorũo kuo, o na gĩa ithirĩro rĩa mahinda maya.’ (Mat. 24:3) Gĩcunjĩ kĩa mbere kĩa ũrathi ũcio kĩrĩa kĩrĩ thĩinĩ wa Mathayo 24:4-22, kĩahingire rĩa mbere kuuma mwaka wa 33 nginya wa 70, narĩo rĩa kerĩ kĩrahinga na njĩra nene makĩria matukũ-inĩ maya maitũ. Hihi ũguo nĩ kuuga atĩ ciugo cia Jesu ciĩgiĩ ngombo ĩrĩa ĩĩhokekete o nacio ciarĩ ihinge maita merĩ? Aca.
6 Kwambĩrĩria na ciugo iria irĩ thĩinĩ wa Mathayo 24:29, Jesu aarĩrĩirie tu maũndũ marĩa mangĩgekĩka mahinda-inĩ maya maitũ. (Thoma Mathayo 24:30, 42, 44.) Akĩaria ũrĩa gũgekĩka hĩndĩ ya thĩna ũrĩa mũnene, oigire atĩ iruka cia andũ ‘nĩ ikoona Mũrũ wa mũndũ agĩũka arĩ igũrũ rĩa matu ma igũrũ.’ Ningĩ akĩaria ũhoro wa arĩa magaakorũo magĩtũũra matukũ-inĩ ma kũrigĩrĩria, aahũthĩrire ciugo ici kũmekĩra ngoro maikarage meiguĩte: ‘Mũtiũĩ mũthenya ũrĩa Mwathani wanyu agoka’ ningĩ, akiuga atĩ ‘Mũrũ wa mũndũ agoka thaa ĩrĩa mũterĩgĩrĩire.’ * O hĩndĩ ĩyo Jesu akĩaria ũhoro wa maũndũ marĩa mageekĩka matukũ-inĩ ma kũrigĩrĩria, norĩo aataarĩirie ũhoro wa ngerekano ya ngombo ĩrĩa ĩĩhokekete. Nĩ ũndũ ũcio, no tuuge atĩ ciugo ciake ciĩgiĩ ngombo ĩrĩa ĩĩhokekete ciambĩrĩirie kũhinga mwaka wa 1914 thutha wa matukũ ma kũrigĩrĩria kwambĩrĩria. Kũrĩ na gĩtũmi kĩega gĩa gwĩtĩkia ũndũ ũcio. Nĩ kĩrĩkũ?
7. Nĩ kĩũria kĩrĩkũ kĩa bata mũno kĩeyumĩririe kĩambĩrĩria-inĩ kĩa ihinda rĩa magetha, na nĩkĩ?
7 Ta wĩcirie hanini ũhoro wa kĩũria gĩkĩ: ‘Ngombo ĩrĩa ĩĩhokekete na njũgĩ nĩ ĩrĩkũ?’ Hĩndĩ ya atũmwo andũ matingĩoririe kĩũria ta kĩu. Ta ũrĩa tũronire thĩinĩ wa gĩcunjĩ kĩrĩa kĩhĩtũku, atũmwo nĩ maaringaga ciama, na magateithia andũ angĩ kũgĩa na iheo cia roho. Ũndũ ũcio wonanagia atĩ maahũthagĩrũo nĩ Ngai. (Atũm. 5:12) Nĩ ũndũ ũcio gũtirĩ mũndũ ũngĩoririe nũ wahũthagĩrũo nĩ Jesu gũtongoria Akristiano. Ĩndĩ, mwaka wa 1914 maũndũ marĩ ngũrani mũno. Ihinda rĩa magetha rĩambĩrĩirie mwaka ũcio. Ihinda rĩarĩ ikinyu rĩa kwamũrania ngano na thawani. (Mat. 13:36-43) Thutha wa ihinda rĩu rĩa magetha kwambĩrĩria, kĩũria gĩkĩ kĩa bata mũno nĩ kĩeyumĩririe: Tondũ wa gũkorũo kwarĩ na andũ aingĩ mooigaga atĩ nĩo arũmĩrĩri a ma a Jesu-rĩ, Akristiano arĩa aitĩrĩrie maguta, arĩa marũgamagĩrĩrũo nĩ ngano mangĩakũrĩkanire atĩa? Ngerekano ya ngombo ĩrĩa ĩĩhokekete nĩ yacokirie kĩũria kĩu. Arũmĩrĩri a Kristo aitĩrĩrie maguta nĩ andũ arĩa maaheagwo irio iria ciagĩrĩire cia kĩĩroho.
NGOMBO ĨRĨA ĨĨHOKEKETE NA NJŨGĨ NĨ ĨRĨKŨ?
8. Nĩkĩ no mũhaka akorũo ngombo ĩrĩa ĩĩhokekete nĩ Akristiano aitĩrĩrie maguta?
8 No mũhaka akorũo ngombo ĩrĩa ĩĩhokekete nĩ Akristiano aitĩrĩrie maguta arĩa marĩ gũkũ thĩ. Akristiano acio metagwo, “thiritũ ya athĩnjĩri-Ngai ya nyũmba ya mũthamaki,” na nĩo mahetwo wĩra wa ‘kũhunjia mawega make, o we wametire moime nduma-inĩ matonye ũtheri-inĩ wake wa magegania.’ (1 Pet. 2:9) Akristiano acio a “thiritũ ya athĩnjĩri-Ngai ya nyũmba ya mũthamaki,” nĩo makoragwo na itemi rĩa ĩmwe kwa ĩmwe rĩa kũruta Akristiano arĩa angĩ ma cia Bibilia.—Mal. 2:7; Kũg. 12:17.
9. Hihi Akristiano othe aitĩrĩrie maguta nĩo ngombo ĩrĩa ĩĩhokekete? Taarĩria.
9 Hihi Akristiano othe aitĩrĩrie maguta arĩa marĩ gũkũ thĩ nĩo ngombo ĩrĩa ĩĩhokekete? Aca. Ma nĩ atĩ, ti Akristiano othe aitĩrĩrie maguta makoragwo na itemi rĩa kũhe Akristiano arĩa angĩ thĩinĩ wa thĩ yothe irio cia kĩĩroho. Akristiano amwe aitĩrĩrie maguta matungataga marĩ ateithĩrĩria a ũtungata kana athuri thĩinĩ wa ciũngano cia kwao. Mahunjagia nyũmba kwa nyũmba na makarutana ciũngano-inĩ ciao, ningĩ nĩ manyitaga mbaru ũtongoria ũrĩa uumaga wabici-inĩ nene ya thĩ yothe ya Aira Jehova. Ĩndĩ, matikoragwo na itemi rĩa kũhe Akristiano thĩinĩ wa thĩ yothe irio cia kĩĩroho. Ningĩ Akristiano amwe aitĩrĩrie maguta nĩ aarĩ a Ithe witũ, arĩa gũtarĩ hingo mangĩtuĩka arutani thĩinĩ wa kĩũngano.—1 Kor. 11:3; 14:34.
10. Ngombo ĩrĩa ĩĩhokekete na njũgĩ nĩ ĩrĩkũ?
10 Gũkĩrĩ ũguo-rĩ, ngombo ĩrĩa ĩĩhokekete na njũgĩ nĩ ĩrĩkũ? Kũringana na njĩra ĩrĩa Jesu akoretwo akĩhũthĩra ya kũhe andũ aingĩ irio akĩhũthĩra o andũ anini, ngombo ĩyo nĩ gakundi kanini ka ariũ a Ithe witũ aitĩrĩrie maguta, arĩa makoragwo na itemi rĩa kũhaarĩria na kũheana irio cia kĩĩroho mahinda-inĩ maya ma kũrigĩrĩria. Kuuma rĩrĩa matukũ ma kũrigĩrĩria maambĩrĩirie, ariũ a Ithe witũ aitĩrĩrie maguta arĩa a ngombo ĩrĩa ĩĩhokekete, matungataga marĩ hamwe wabici-inĩ nene ya thĩ ya Aira a Jehova. Mĩaka-inĩ ya ica ikuhĩ, ngombo ĩyo ĩkoretwo ĩgĩĩtanio mũno na Kĩama Kĩrĩa Gĩtongoragia kĩa Aira a Jehova. O na kũrĩ ũguo, kiugo “ngombo ĩrĩa” thĩinĩ wa ngerekano ĩyo ya Jesu kĩonanĩtie ta ngombo ĩyo arĩ mũndũ ũmwe, kuonania atĩ arĩa a ngombo ĩyo marutithanagia wĩra marĩ hamwe. Nĩ ũndũ ũcio, arĩa a Kĩama Kĩrĩa Gĩtongoragia matuaga matua marĩ hamwe.
ANDŨ A NYŨMBA YAKE NĨ ARĨKŨ?
11, 12. (a) Nĩ mawĩra marĩkũ merĩ ngombo ĩrĩa ĩĩhokekete na njũgĩ ĩraheo? (b) Jesu aatuire ngombo ĩrĩa ĩĩhokekete mũramati wa andũ nyũmba yake rĩ, na nĩa aathurire?
11 Thĩinĩ wa ngerekano ĩyo ya Jesu, ngombo ĩrĩa ĩĩhokekete na njũgĩ ĩraheo mawĩra merĩ ngũrani. Wa mbere nĩ wa kũramata andũ a nyũmba ya mwathani wayo, naguo wa kerĩ nĩ wa kũramata indo ciake ciothe. Tondũ ngerekano ĩyo ĩrahinga tu matukũ-inĩ maya ma kũrigĩrĩria, ngombo ĩyo ĩngĩaheirũo mawĩra macio merĩ kuuma Jesu atuĩka Mũthamaki mwaka wa 1914.
12 Jesu aatuire ngombo ĩrĩa ĩĩhokekete mũramati wa andũ nyũmba yake rĩ? Nĩguo tuone macokio, tũkũbatara gũcokia meciria maitũ thutha mwaka wa 1914 rĩrĩa wĩra wa magetha wambĩrĩirie. O ta ũrĩa tũkuonete hau kabere, hĩndĩ ĩyo kwarĩ na ikundi nyingĩ cieĩtaga cia Gĩkristiano. Hihi Jesu angĩathurire ngombo ĩrĩa ĩĩhokekete kuuma gĩkundi-inĩ kĩrĩkũ? Ũndũ ũcio wamenyekire rĩrĩa Jesu na Ithe mookire gũthuthuria Hekarũ ya kĩĩroho kuuma mwaka wa 1914 nginya kĩambĩrĩria-inĩ kĩa 1919. * (Mal. 3:1) Nĩ maakenire nĩ kuona atĩ kwarĩ na gĩkundi kĩnini kĩa Arutwo a Bibilia ehokeku arĩa moonanagia atĩ nĩ mendete Jehova na Kiugo gĩake. O na kũrĩ ũguo, nĩ maabataraga gũtherio, ĩndĩ marĩ na wĩnyihia nĩ meetĩkĩrire gũtherio, ihinda-inĩ rĩu inyinyi rĩa magerio. (Mal. 3:2-4) Arutwo acio a Bibilia ehokeku, hatarĩ nganja, nĩ moonekire nĩo maarĩ Akristiano a ma arĩa marũgamagĩrĩrũo nĩ ngano. Mwaka wa 1919, Jesu nĩ aathurire kuuma kũrĩ gĩkundi kĩu ariũ a Ithe witũ aitĩrĩrie maguta arĩa maarĩ na ũhoti mwega matuĩke ngombo ĩrĩa ĩĩhokekete na njũgĩ na akĩmatua a kũramataga andũ a nyũmba yake.
13. Andũ a nyũmba ya mwathani nĩ arĩkũ, na nĩkĩ?
13 Ĩ nao andũ a nyũmba yake nĩa? Na njĩra nguhĩ, nĩ arĩa maheagwo irio cia kĩĩroho. Kĩambĩrĩria-inĩ kĩa matukũ maya ma kũrigĩrĩria, andũ a nyũmba yake othe maarĩ Akristiano aitĩrĩrie maguta. Thutha ũcio, kĩrĩndĩ kĩnene kĩa arĩa a ng’ondu ingĩ o nakĩo gĩgĩtuĩka andũ a nyũmba yake. Mahinda-inĩ maya arĩa a ng’ondu ingĩ nĩo aingĩ makĩria thĩinĩ wa “rũũru rũmwe” rũrĩa rũratongorio nĩ Kristo. (Joh. 10:16) Ikundi icio cierĩ, irĩaga irio o imwe cia kĩĩroho cia ihinda rĩrĩa rĩagĩrĩire iria ihaaragĩrio nĩ ngombo ĩrĩa ĩĩhokekete. Ĩ nao ariũ a Ithe witũ a Kĩama Kĩrĩa Gĩtongoragia kĩa Aira a Jehova arĩa mahinda-inĩ maya nĩo ngombo ĩrĩa ĩĩhokekete na njũgĩ? O nao nĩ mabataraga kũheo irio cia kĩĩroho. Nĩ ũndũ ũcio, marĩ na wĩnyihia nĩ mamenyaga atĩ marĩ mũndũ ũmwe ũmwe nĩ andũ a nyũmba ya mwathani ota arũmĩrĩri arĩa angĩ othe a Jesu.
14. (a) Ngombo ĩrĩa ĩĩhokekete ĩhokeirũo wĩra ũrĩkũ, na wĩra ũcio ũhutĩtie maũndũ marĩkũ? (b) Jesu aaheire ngombo ĩrĩa ĩĩhokekete na njũgĩ mũkaana ũrĩkũ? (Rora ithandũkũ “Ngombo Ĩrĩa Njũru Ĩngĩkorũo . . .”)
14 Jesu nĩ eehokeire ngombo ĩrĩa ĩĩhokekete na njũgĩ wĩra wa bata mũno. Hĩndĩ ya tene, ngombo ya kwĩhokeka yakoragwo ĩrĩ mũramati wa nyũmba ya mwathi wayo. (Luk. 12:42) Kwoguo, ngombo ĩrĩa ĩĩhokekete na njũgĩ nĩyo ĩtuĩtwo mũramati wa nyũmba ya arĩa metĩkĩtie. Ũramati ũcio nĩ hamwe na kũrora indo cia gũtwarithia na mbere maũndũ ma ũthamaki, wĩra wa kũhunjia, tabarĩra cia igomano na irũrũngano, na ũcabi wa mabuku marĩa mahũthagĩrũo harĩ wĩruti wa mũndũ kĩũmbe, ciũngano-inĩ na wĩra-inĩ wa kũhunjia. Andũ a nyũmba ya mwathani mehokaga irio ciothe cia kĩĩroho iria ihaaragĩrio nĩ ngombo ĩyo.
AKAAMĨTUA MŨRAMATI WA INDO CIAKE CIOTHE RĨ?
15, 16. Jesu akaahe ngombo ĩrĩa ĩĩhokekete wĩra wa kũramata indo ciake ciothe rĩ?
15 Jesu akaahe ngombo ĩyo wĩra ũrĩa wa kerĩ wa ‘kũramata indo ciake’ ciothe rĩ? Oigire ũũ: “Gũkena-rĩ, nĩ ngombo ĩo rĩrĩa mwathani wayo agoka kana agaakinya amĩkore ĩgĩĩkaga o ũguo! Ngũmwĩra atĩrĩ na ma, atĩ nĩakamĩtua mũramati wa indo ciake ciothe.” (Mat. 24:46, 47) Ũngĩrora nĩ ũkuona atĩ, Jesu arahe ngombo ĩyo wĩra wa kerĩ thutha wake gũkinya na kũmĩkora “ĩgĩĩkaga o ũguo,” ũguo nĩ kuuga ĩkĩheana irio cia kĩĩroho ĩrĩ na wĩhokeku. Nĩ ũndũ ũcio, no mũhaka ihinda rĩambe rĩhĩtũke kuuma yaheo wĩra wa mbere ĩgĩcoka kũheo wĩra wa kerĩ. Nĩguo tũtaũkĩrũo nĩ ũrĩa, na rĩrĩa Jesu akaahe ngombo ĩyo wĩra wa kũramata indo ciake ciothe, nĩ tũkũbatara kũmenya maũndũ merĩ: Rĩrĩa agaakinya na indo icio ciake nĩ irĩkũ.
16 Jesu agaakinya rĩ? Macokio ma kĩũria kĩu mehocetie harĩ mĩhari ĩrĩa ĩrĩ mbere ya rĩandĩko rĩu. Nĩ wega kũririkana atĩ, rĩrĩa mĩhari ĩyo ĩraaria ũhoro wa ‘gũka’ kwa Jesu, yaragia ũhoro wa ihinda rĩrĩa agooka gũtuanĩra na kũhingia matuĩro make mũico-inĩ wa mũtabarĩre ũyũ. * (Mat. 24:30, 42, 44) Nĩ ũndũ ũcio, ‘gũka kana gũkinya’ kwa Jesu kũrĩa kũgwetetwo ngerekano-inĩ ya ngombo ĩrĩa ĩĩhokekete gũgekĩka hĩndĩ ya thĩna ũrĩa mũnene.
17. Indo cia Jesu nĩ irĩkũ?
17 ‘Indo ciothe cia Jesu’ nĩ irĩkũ? Jesu ndoigire atĩ indo ciake “ciothe” no iria irĩ gũkũ thĩ. Jesu aheetwo ũnene nginya wa igũrũ. Oigire ũũ: “Nĩ’heetwo wathani wothe wa na Igũrũ na wa gũkũ thĩ.” (Mat. 28:18; Ef. 1:20-23) Kwoguo, indo ciake nĩ hamwe na Ũthamaki wa Kristo, ũrĩa aaheirũo mwaka wa 1914 na magaathamaka hamwe na arũmĩrĩri ake arĩa aitĩrĩrie maguta.—Kũg. 11:15.
18. Nĩ kĩĩ gĩgaatũma Jesu akene agĩtua ngombo ĩrĩa ĩĩhokekete mũramati wa indo ciake ciothe?
18 Kũringana na maũndũ macio twarĩrĩria-rĩ, tũngiuga atĩa? Rĩrĩa Jesu agooka kũniina mũtabarĩre ũyũ hĩndĩ ya thĩna ũrĩa mũnene, nĩ agaakora atĩ ngombo ĩrĩa ĩĩhokekete nĩ ĩkoretwo ĩkĩhe andũ a nyũmba yake irio cia kĩĩroho ihinda rĩrĩa rĩagĩrĩire ĩrĩ na wĩhokeku. Nĩ ũndũ ũcio, Jesu nĩ agaakena na amĩhe wĩra ũrĩa wa kerĩ wa kũramata indo ciake ciothe. Arĩa a ngombo ĩrĩa ĩĩhokekete makaaheo wĩra ũcio marĩkia kũgwata igai rĩao rĩa igũrũ, matuĩke athamaki hamwe na Kristo.
19. Hihi ngombo ĩrĩa ĩĩhokekete ĩkaaheo igai inene gũkĩra Akristiano arĩa angĩ aitĩrĩrie maguta? Taarĩria.
19 Hihi ũguo nĩ kuuga atĩ ngombo ĩrĩa ĩĩhokekete ĩkaaheo igai inene gũkĩra Akristiano arĩa angĩ aitĩrĩrie maguta? Aca. Kũrĩ hĩndĩ gakundi kanini ka andũ kangĩrĩrũo kĩndũ, no thutha-inĩ kĩndũ kĩu gĩkaaguna nginya andũ mataarĩ ho gĩkĩranĩrũo. Kwa ngerekano, ta wĩcirie ũrĩa Jesu eerire atũmwo ake arĩa 11 ehokeku ũtukũ wa mũico atanakua. (Thoma Luka 22:28-30.) Jesu eerĩire gakundi kau kanini atĩ nĩ akaamahe igai nĩ ũndũ wa wĩhokeku wao. Aamerire atĩ nĩ magaikarĩra itĩ cia ũnene Ũthamaki-inĩ wake. Ĩndĩ mĩaka mĩingĩ thutha ũcio, nĩ onanirie atĩ Akristiano othe arĩa aitĩrĩrie maguta 144,000, nĩ magaaikarĩra itĩ cia ũnene mathamakage hamwe nake. (Kũg. 1:1; 3:21) O ũndũ ũmwe na ũcio-rĩ, thĩinĩ wa Mathayo 24:47, Jesu eerĩire gakundi kanini ka ariũ a Ithe witũ aitĩrĩrie maguta arĩa a ngombo ĩrĩa ĩĩhokekete atĩ nĩ akaamatua aramati a indo ciake ciothe. Hatarĩ nganja, othe 144,000 nĩ magaathamaka hamwe na Kristo Ũthamaki-inĩ wake wa igũrũ.—Kũg. 20:4, 6.
20. Jesu aamũrire ngombo ĩrĩa ĩĩhokekete nĩkĩ, na watua itua rĩa gwĩka atĩa?
20 Kũgerera ngombo ĩrĩa ĩĩhokekete na njũgĩ, Jesu arũmagĩrĩra njĩra ĩrĩa aambĩrĩirie hĩndĩ ya atũmwo, ya kũhe andũ aingĩ irio akĩhũthĩra o andũ anini. Jesu aamũrire ngombo ĩyo njĩhokeku nĩguo atigĩrĩre atĩ arũmĩrĩri ake a ma, arĩa aitĩrĩrie maguta kana a ng’ondu ingĩ, gũtirĩ hingo makaga irio cia kĩĩroho ihinda rĩrĩa rĩagĩrĩire, matukũ-inĩ mothe ma kũrigĩrĩria. Rekei tũtue itua rĩa gũthiĩ na mbere kuonania ngatho citũ na njĩra ya kũnyita mbaru ariũ a Ithe witũ acio aitĩrĩrie maguta a ngombo ĩrĩa ĩĩhokekete na njũgĩ.—Ahib. 13:7, 17.
ŨHORO MŨICO-INĨ WA GĨCUNJĨ: (Ũthomwo ta ũrĩa kohoro ka magũrũ-inĩ gathomagwo.)
^ kib. 2 Kĩbungo gĩa 2: [1] Mbere ĩyo akĩheana ngerekano ĩngĩ ota ĩyo, Jesu oigĩte atĩ “ngombo ĩo” nĩyo “mũrori indo” nayo “nyũmba yake” nĩ ‘andũ a nyũmba yake yothe.’—Luk. 12:42-44.
^ kib. 6 Kĩbungo gĩa 6: [2] ‘Gũka’ gwa Kristo (Kĩngiriki, er′kho·mai) nĩ ngũrani na ‘gũkorũo kuo gwa kristo’ (pa·rou·si′a). Ona gũtuĩka Kristo ndarĩ aroka kũniina arĩa oru-rĩ, akoretwo kuo na njĩra tũtangĩona na maitho.
^ kib. 12 Kĩbungo gĩa 12: [3] Rora gĩcunjĩ kĩrĩ na kĩongo: “Ndĩ Hamwe na Inyuĩ Mĩthenya Yothe,” ngathĩti-inĩ ĩno, karatathi-inĩ ga 10-12, kĩbungo-inĩ kĩa 5-8.
^ kib. 16 Kĩbungo gĩa 16: [4] Rora gĩcunjĩ kĩrĩ na kĩongo: “Twĩre, Rĩrĩa Maũndũ Macio Magakinya Nĩ Rĩ?” ngathĩti-inĩ ĩno, karatathi-inĩ ka 7-8, kĩbungo-inĩ kĩa 14-18.
[Ciũria cia wĩruti]
1, 2. Jesu arahũthĩra njĩra ĩrĩkũ gũtũhe irio ũmũthĩ, na nĩkĩ harĩ bata mũno tũtaũkĩrũo nĩ njĩra ĩyo?
3. Mabuku maitũ makoretwo magĩtaarĩria atĩa ngerekano ya ngombo ĩrĩa ĩĩhokekete?
4-6. Nĩkĩ no tuuge atĩ ngerekano ya Jesu ĩgiĩ ngombo ĩrĩa ĩĩhokekete yambĩrĩirie kũhinga mwaka wa 1914?
7. Nĩ kĩũria kĩrĩkũ kĩa bata mũno kĩeyumĩririe kĩambĩrĩria-inĩ kĩa ihinda rĩa magetha, na nĩkĩ?
8. Nĩkĩ no mũhaka akorũo ngombo ĩrĩa ĩĩhokekete nĩ Akristiano aitĩrĩrie maguta?
9. Hihi Akristiano othe aitĩrĩrie maguta nĩo ngombo ĩrĩa ĩĩhokekete? Taarĩria.
10. Ngombo ĩrĩa ĩĩhokekete na njũgĩ nĩ ĩrĩkũ?
11, 12. (a) Nĩ mawĩra marĩkũ merĩ ngombo ĩrĩa ĩĩhokekete na njũgĩ ĩraheo? (b) Jesu aatuire ngombo ĩrĩa ĩĩhokekete mũramati wa andũ nyũmba yake rĩ, na nĩa aathurire?
13. Andũ a nyũmba ya mwathani nĩ arĩkũ, na nĩkĩ?
14. (a) Ngombo ĩrĩa ĩĩhokekete ĩhokeirũo wĩra ũrĩkũ, na wĩra ũcio ũhutĩtie maũndũ marĩkũ? (b) Jesu aaheire ngombo ĩrĩa ĩĩhokekete na njũgĩ mũkaana ũrĩkũ? (Rora ithandũkũ “Ngombo Ĩrĩa Njũru Ĩngĩkorũo . . .”)
15, 16. Jesu akaahe ngombo ĩrĩa ĩĩhokekete wĩra wa kũramata indo ciake ciothe rĩ?
17. Indo cia Jesu nĩ irĩkũ?
18. Nĩ kĩĩ gĩgaatũma Jesu akene agĩtua ngombo ĩrĩa ĩĩhokekete mũramati wa indo ciake ciothe?
19. Hihi ngombo ĩrĩa ĩĩhokekete ĩkaaheo igai inene gũkĩra Akristiano arĩa angĩ aitĩrĩrie maguta? Taarĩria.
20. Jesu aamũrire ngombo ĩrĩa ĩĩhokekete nĩkĩ, na watua itua rĩa gwĩka atĩa?
[Mbica karatathi ka 20]
[Ithandũkũ Karatathi-ini ka 22]
HIHI NĨ WANYITA?
“Ngombo ĩrĩa ĩĩhokekete na njũgĩ”: Nĩ gakundi kanini ka ariũ a Ithe witũ aitĩrĩrie maguta arĩa makoragwo na itemi rĩa ĩmwe kwa ĩmwe rĩa kũhaarĩria na kũheana irio cia kĩĩroho mahinda-inĩ maya ma kũrigĩrĩria. Ariũ acio a Ithe witũ aitĩrĩrie maguta ũmũthĩ nĩo Kĩama Kĩrĩa Gĩtongoragia
‘Andũ a nyũmba yake’: Nĩ arĩa othe maheagwo irio cia kĩĩroho, marĩ aitĩrĩrie maguta kana marĩ a ng’ondu ingĩ
‘Mũramati wa andũ a nyũmba yake’: Mwaka wa 1919, Jesu nĩ aathurire ariũ a Ithe witũ aitĩrĩrie maguta matuĩke ngombo yake ĩrĩa ĩĩhokekete na njũgĩ
“Nĩakamĩtua mũramati wa indo ciake ciothe”: Arĩa a ngombo ĩrĩa ĩĩhokekete na njũgĩ makaaheo wĩra ũyũ rĩrĩa magathiĩ igũrũ. Marĩ hamwe na Akristiano arĩa angĩ othe aitĩrĩrie maguta, nĩ makaanyitanĩra na Kristo ũthamaki-inĩ wake wa igũrũ
[Mbica karatathi ka 22, 23]
Ona angĩkorũo kĩrĩgĩrĩro gitũ nĩ kĩa igũrũ kana gĩa thĩ-rĩ, ithuothe tũrĩ andũ a nyũmba ya mwathani na nĩ tũbataraga irio ihanaine cia kĩĩroho ihinda rĩrĩa rĩagĩrĩire
[Ithandũkũ Karatathi-ini ka 24]
“NGOMBO ĨRĨA NJŨRU ĨNGĨKORŨO. . .”
Jesu nĩ ahete ngombo ĩrĩa ĩĩhokekete na njũgĩ wĩra wa bata mũno wa kũramata andũ a nyũmba yake na kũheana irio cia kĩĩroho ihinda rĩrĩa rĩagĩrĩire. Jesu nĩ aamenyaga atĩ arĩa mehokeirũo maũndũ maingĩ noguo makorio maũndũ maingĩ. (Luk. 12:48) Nĩ ũndũ ũcio, agĩtiriha ngerekano yake ĩgiĩ ngombo ĩrĩa ĩĩhokekete na njũgĩ nĩ aaheanire mũkaana mũrũmu.
Jesu nĩ aaririe ũhoro wa ngombo njũru ĩrĩa yeĩrire na ngoro atĩ mwathani wayo ndegũka na ihenya na ĩkĩambĩrĩria kũhũũra ndungata iria ingĩ. Oigire atĩ rĩrĩa mwathani wayo agooka, “nĩakamĩhũra mũno.”—Thoma Mathayo 24:48-51.
Hihi Jesu eendaga kuonania atĩ nĩ kũngĩgaakorũo na ngombo njũru matukũ-inĩ ma kũrigĩrĩria? Aca. Hatarĩ nganja, kũrĩ andũ amwe monanĩtie mwerekera ta wa ngombo ĩyo njũru yagwetirũo nĩ Jesu. Kana nĩ aitĩrĩrie maguta kana nĩ a “kĩrĩndĩ kĩingĩ” andũ ta acio nĩ aregenyũki. (Kũg. 7:9) Ĩndĩ, ti kuuga atĩ o nĩ gĩkundi kĩngĩtwo ngombo ĩrĩa njũru. Jesu ndoigire atĩ nĩ angĩkaamũra ngombo njũru. Ciugo ciake ciarongoreirio gũteithia ngombo ĩrĩa ĩĩhokekete na njũgĩ.
Ta rora wone atĩ ciugo-inĩ cia Jesu cia kwambĩrĩria aahũthĩrire kiugo ‘ĩngĩkorũo.’ Kiugo kĩu kĩonanagia atĩ Jesu ndoigire no mũhaka kũngĩgaathiĩ ũguo. Nĩ ta oigaga ũũ: ‘Ngombo ĩrĩa ĩĩhokekete na njũgĩ ĩngĩkaahũra ndungata icio ingĩ, mwathani wayo nĩ angĩkaamĩhũra mũno.’ (Ningĩ rora Luka 12:45.) Ngombo ĩrĩa ĩĩhokekete na njũgĩ ĩrĩ gĩkundi ĩkoretwo ĩgĩthiĩ na mbere kũheana irio cia kĩĩroho na ĩgaikara ĩiguĩte.
Ariũ a Ithe witũ aitĩrĩrie maguta a ngombo ĩrĩa ĩĩhokekete na njũgĩ nĩ moĩ Mwathani wao erĩgagĩrĩra maramatage andũ a nyũmba yake wega. Ariũ a Ithe witũ acio nĩ makoragwo na wendi mũnene wa kũruta wĩra ũcio mehokeirũo nĩguo rĩrĩa Mwathani wao agooka, akaamera ‘nĩ mwĩkĩte wega.’
[Mbica karatathi ka 25]
Akristiano othe aitĩrĩrie maguta 144,000 nĩ magathamaka hamwe na Jesu igũrũ
(Rora kĩbungo gĩa 19)
