Hĩndĩ ĩmwe bũrũri-inĩ wa Kenya, rĩrĩa mapainia eerĩ maaingĩrire nyũmba-inĩ ĩmwe, nĩ maagegire nĩ kuona mũndũ warĩ na kamwĩrĩ kanini wakomete ũrĩrĩ-inĩ. Mwĩrĩ wake kuuma njohero nginya ciande-inĩ warĩ mũnini mũno, na aarĩ na tuoko tũkuhĩ. Nĩ aacanjamũkire mũno rĩrĩa maaririe nake ũhoro wa kĩĩranĩro kĩa Ngai atĩ “mũndũ ũrĩa ũthuaga agacimbicaga o ta thwariga.”—Isa. 35:6.

Mapainia acio maacokire kũmenya atĩ Onesmus, ũrĩa rĩu ũrĩ hakuhĩ mĩaka 40, aaciarĩtwo arĩ na mũrimũ wa gũkorũo na mahĩndĩ mahũthũ mũno. Mahĩndĩ make matiarĩ na hinya o na hanini ũũ atĩ o na kahinya kanini nĩ gaatũmaga moinĩke. Tondũ mũrimũ ũcio ndũrĩ ndawa, Onesmus eerĩgagĩrĩra atĩ egũtũũra na ruo ũtũũro wake wothe atekuuma gakaari-inĩ gake ga gũtiindĩkwo.

Onesmus nĩ eetĩkĩrire kũrutwo Bibilia, ĩndĩ nyina nĩ aagiririe athiage mĩcemanio ya kĩũngano akiuga atĩ gwĩka ũguo kwahota gũtũma agurario kana agĩe na ruo makĩria. Nĩ ũndũ ũcio, ariũ a Ithe witũ maarekondaga mĩcemanio, Onesmus agathikĩrĩria arĩ mũciĩ. Thutha wa kwĩruta Bibilia mĩeri ĩtano, nĩ aatuire itua rĩa gũthiaga mĩcemanio o na akĩmenyaga mogwati marĩa maarĩ ho.

Hihi gũthiĩ mĩcemanio ya kĩũngano nĩ gwatũmire ruo rwa Onesmus ruongerereke? Moimĩrĩro maarĩ ngũrani biũ. Onesmus oigaga ũũ: “Ruo rũrĩa ndaakoragwo naruo rwahanaga ta rwanyihanyiha rĩrĩa ndĩ mĩcemanio-inĩ.” Eeciririe atĩ wĩtĩkio wake mwerũ nĩguo watũmĩte aambĩrĩrie kũigua wega. Nyina nĩ aakenire mũno nĩ kuona ũrĩa Onesmus aagĩte na gĩkeno nginya o nake agĩĩtĩkĩra kũrutwo Bibilia. Kaingĩ ooigaga: “Gũtungatĩra Ngai nĩyo ndawa ya mwana wakwa.”

Thutha wa ihinda, Onesmus nĩ aatuĩkire mũhunjia ũtarĩ mũbatithie na thutha-inĩ akĩbatithio, na rĩu aratungata arĩ mũteithĩrĩria wa ũtungata kĩũngano-inĩ. O na gũtuĩka ndahotaga kũhũthĩra magũrũ na guoko gwake kũmwe-rĩ, wendi wake warĩ gwĩka o ũrĩa wothe angĩhota ũtungata-inĩ wa Jehova. Nĩ eendaga gũtuĩka painia wa gũteithĩrĩria ĩndĩ agetigĩra kũiyũria fomu. Nĩkĩ? Nĩ aamenyaga atĩ no mũhaka angĩabatarire mũndũ wa kũmũtindĩkaga arĩ gakaari-inĩ gake. Rĩrĩa eerire aarĩ na ariũ a Ithe witũ wendi wake, makĩmwĩra atĩ nĩ marĩmũteithagĩrĩria. Na ũguo noguo meekire, na nĩ ũndũ ũcio makĩmũteithĩrĩria gũtungatĩra arĩ painia wa gũteithĩrĩria.

Ningĩ rĩrĩa eendire gũtuĩka painia wa hĩndĩ ciothe no aatangĩkagĩra nũũ ũrĩmũteithagĩrĩria. O na kũrĩ ũguo, hĩndĩ ĩmwe rĩandĩko rĩa o mũthenya nĩ rĩamwĩkĩrire ngoro. Rĩarĩ rĩa Thaburi 34:8 rĩrĩa riugaga ũũ: “Ĩ camai muone atĩ Jehova nĩ mwega.” Thutha wa gwĩcũrania rĩandĩko rĩu, Onesmus agĩtua atĩ nĩ egũtuĩka painia wa hĩndĩ ciothe. Rĩu ahunjagia mĩthenya ĩna o kiumia na nĩ areruta Bibilia na andũ maigana ũna na nĩ marathiĩ na mbere kĩĩroho. Mwaka wa 2010, nĩ aathiire Cukuru ya Ũtungata wa Ũpainia. Nĩ aakenire mũno tondũ mũrũ wa Ithe witũ ũmwe ũrĩa wamarutaga cukuru-inĩ ĩyo, aarĩ ũmwe wa mapainia arĩa maamũhunjĩirie mũthenya wa mbere.

Aciari a Onesmus nĩ maakuire, ĩndĩ aarĩ na ariũ a Ithe witũ nĩ marũmbũyagia mabataro make ma o mũthenya. Nĩ akenagĩra mũno irathimo iria arĩ nacio mahinda-inĩ maya, na nĩ etereire na wendi mũnene hĩndĩ ĩrĩa ‘mũndũ ũrĩa ũtũũraga bũrũri ũcio atarĩ hingo agacoka kuuga ũũ: Ndĩ mũrũaru.’—Isa. 33:24.