1. Mũtũmwo Johana eekĩrire Akristiano ngoro meciragie ũhoro wa kĩĩ, na nĩkĩ?

THĨINĨ wa rĩandĩko rĩa 1 Johana 3:1, mũtũmwo Johana nĩ aatwĩkĩrire ngoro twĩciragie na njĩra ndikĩru ũhoro wa wendo mũnene ũrĩa Jehova atwendete naguo. Johana oigire, ‘onei ũrĩa wendani ũkĩnenehete, ũrĩa Ithe witũ atwendete naguo.’ Rĩrĩa twecũrania ũrĩa Jehova atwendete na ũrĩa atuonagia wendo wake, nĩ tũmũkuhagĩrĩria na tũkamwenda makĩria.

2. Andũ amwe monaga ũrĩ ũndũ mũritũ gwĩtĩkia atĩ Jehova nĩ amendete nĩkĩ?

² O na kũrĩ ũguo, nĩ kũrĩ andũ monaga arĩ ũritũ gwĩtĩkia atĩ Ngai nĩ amendete. Andũ ta acio meciragia atĩ Ngai ndarũmbũyanagia nao. No makorũo metĩkĩtie atĩ Ngai athondekaga o mawatho tu na akaherithia arĩa maaga kũmwathĩkĩra. Angĩ nao, metĩkĩtie atĩ wendo wa Ngai ndũrĩ mĩhaka na atĩ nĩ amendete gũtekũmakania maũndũ marĩa mekaga . O ũrĩa wathiire ũkĩĩrutaga Bibilia, nĩ wamenyire atĩ wendo nĩyo ngumo ĩrĩa nene ya Jehova na atĩ wendo wake nĩguo wamũtindĩkire kũruta Mũrũ wake arĩ ũkũũri nĩ ũndũ witũ. (Joh. 3:16; 1 Joh. 4:8) O na kũrĩ ũguo, nĩ ũndũ wa maũndũ marĩa ũcemanĩtie namo ũtũũro-inĩ  no ũremwo nĩ gũtaũkĩrũo wega nĩ ũrĩa Jehova atwendete.

3. Nĩ ũndũ ũrĩkũ ũngĩtũteithia gũtaũkĩrũo nĩ wendo ũrĩa Jehova atwendete naguo?

³ Nĩ na njĩra irĩkũ Jehova onanagia wendo wake gũtwerekera? Nĩguo tuone macokio ma kĩũria kĩu, tũrabatara gũtaũkĩrũo atĩ Jehova nĩwe watũmbire, na agĩtũhe muoyo. (Thoma Thaburi 100:3-5.) Nĩkĩo Bibilia ĩtaga Adamu mũrũ “wa Ngai,” nake Jesu nĩ aarutire arũmĩrĩri ake metage Ngai “Ithe witũ wĩ Igũrũ.” (Luk. 3:38; Mat. 6:9) Tondũ nĩwe mũheani muoyo, Jehova nĩ Ithe witũ na nĩ atwendete o ta ũrĩa mũciari wĩ wendo endete ciana ciake.

4. (a) Jehova onaga ciana ciake atĩa? (b) Tũkwarĩrĩria maũndũ marĩkũ gĩcunjĩ-inĩ gĩkĩ na kĩrĩa kĩrũmĩrĩire?

⁴ Athuri no makorũo mendete ciana ciao. Ĩndĩ gũtirĩ mũthuri o na ũmwe mũkinyanĩru. O na mangĩgeria atĩa matingĩhota biũ kuonia ciana ciao wendo ta wa Ithe witũ wa igũrũ. Andũ amwe nĩ makoragwo na mathĩna maingĩ ma kĩĩmeciria nĩ ũndũ wa kũrerũo magĩkagwo maũndũ moru nĩ maithe mao. Ũcio nĩ ũndũ wa kĩeha mũno. Ngũrani na ũguo, Jehova ndangĩka ciana ciake maũndũ moru. (Thab. 27:10) Gũtaũkĩrũo nĩ ũrĩa Jehova atwendete na ũrĩa atũrũmbũyagia nĩ kũrĩtũmaga tũmũkuhĩrĩrie makĩria. (Jak. 4:8) Gĩcunjĩ-inĩ gĩkĩ tũkwarĩrĩria njĩra inya ciĩgiĩ ũrĩa Jehova atuonagia wendo wake. Nakĩo gĩcunjĩ-inĩ kĩrĩa kĩrũmĩrĩire tũkaarĩrĩria njĩra inya ciĩgiĩ ũrĩa ithuĩ tũngĩonania wendo witũ harĩ Jehova.

5. Mũtũmwo Paulo eerire andũ a Athene atĩa ũhoro wĩgiĩ Ngai?

⁵ Rĩrĩa mũtũmwo Paulo aarĩ Athene thĩinĩ wa Ngiriki nĩ onire atĩ itũũra rĩu rĩaiyũrĩte ngai cia mĩhianano. Andũ a kũu meetĩkĩtie atĩ ngai icio nĩcio ciamahete muoyo na nĩcio ciamaheaga mabataro mao. Nĩ ũndũ ũcio akĩmeera ũũ: “Ngai ũrĩa wombire thĩ o na indo ciothe iria irĩ kuo, . . . nĩwe ũheaga andũ othe muoyo, o na hinya wa kũheeha, o na indo ciothe. . . . Nĩ thĩinĩ wake we tũtũũraga muoyo, na tũkagĩa na hinya wa gwĩtwara, na wa gũikaraga tũrĩ o ho.” (Atũm. 17:24, 25, 28) Nĩ ũndũ wa wendo wake, Jehova nĩwe ũtũheaga “indo ciothe” iria tũbataraga nĩguo tũtũũre muoyo. Ta wĩcirie indo imwe iria atũheaga.

6. Thĩ itũ yonanagia atĩa atĩ Ngai nĩ atwendete? (Rora mbica kĩambĩrĩria-inĩ gĩa gĩcunjĩ gĩkĩ.)

⁶ Kwa ngerekano Jehova nĩ “aheete ciana cia kĩrĩndĩ” thĩ thaka mũno nĩguo cimĩtũũrage. (Thab. 115:15, 16) Andũ arĩa mathuthuragia maũndũ ma sayanisi nĩ mahũthĩrĩte mbeca nyingĩ mũno makĩgeria gũtuĩria kana nĩ kũrĩ thĩ ingĩ ingĩtũũrũo. O na gũtuĩka nĩ magundũrĩte thĩ ingĩ nyingĩ, gũtirĩ o na ĩmwe yacio ĩkoragwo na indo iria ibataranagia harĩ ũtũũro wa andũ. Thĩ ĩno itũ nĩ ya mwanya mũno ĩringithanĩtio na indo iria ingĩ Ngai ombire. Jehova ombire thĩ ĩrĩ kũndũ kwega na gũthaka gwa gũtũũrũo nĩ andũ, ngũrani na thĩ iria ingĩ ombire. (Isa. 45:18) Ũndũ ũcio wonanagia atĩ Jehova nĩ atwendete mũno.—Thoma Ayubu 38:4, 7; Thaburi 8:3-5.

7. Njĩra ĩrĩa Jehova atũũmbĩte nayo yonanagia atĩa atĩ nĩ atwendete mũno?

⁷ O na gũtuĩka Jehova ombire thĩ itũ ĩrĩ kũndũ kwega mũno gwa gũtũũra, nĩoĩ atĩ nĩ harĩ maũndũ mangĩ tũbataraga nĩguo tũkorũo na gĩkeno. Kaana nĩ kaiguaga kaiganĩire mũno kamenya atĩ aciari ako nĩ makendete na nĩ makarũmbũyagia. Jehova aatũmbire tũrĩ na ũhoti wa kwĩgerekania nake. Ũguo nĩ kuuga atĩ, no tũhote  gũtaũkĩrũo atĩ nĩ atwendete na no tũhote kũmwenda. (Kĩam. 1:27) Makĩria ma ũguo, Jesu oigire ũũ: “Gũkena-rĩ, nĩ arĩa mahũtagĩra maũndũ marĩa ma ũthingu, na makamanyotera.” (Mat. 5:6) Arĩ Ithe witũ ũtwendete, Jehova nĩwe “ũtũheaga indo ciothe [cia kĩĩmwĩrĩ na cia kĩĩroho] agĩtũtanahagĩra, nĩ getha tũcihũthagĩre na gĩkeno.”—1 Tim. 6:17; Thab. 145:16.

8. Nĩkĩ Jehova nĩwe wagĩrĩirũo nĩ gũtũruta?

⁸ Athuri nĩ mendete ciana ciao na nĩ macigitagĩra nĩguo itikahĩtithio. O na kũrĩ ũguo, aciari aingĩ matihotaga gũtongoria ciana ciao na njĩra ĩrĩa yagĩrĩire tondũ o ene matiathĩkagĩra Kiugo kĩa Ngai. Kaingĩ moimĩrĩro makoragwo arĩ mĩtangĩko na kwaga gĩkeno. (Thim. 14:12) Ngũrani na ũguo, Jehova aheaga ciana ciake ũtongoria ũrĩa mwega biũ tondũ nĩwe “Mũrungu ũrĩa wa ma.” (Thab. 31:5) Tondũ tũrĩ ciana ciake, Jehova nĩ atwendete na nĩ akenagĩra gũtũruta ũhoro ũrĩa wa ma nĩguo ũtũtongoragie maũndũ-inĩ mothe, na makĩria marĩa megiĩ ũthathaiya wake. (Thoma Thaburi 43:3.) Nĩ ma irĩkũ Jehova atũguũrĩirie, na ũndũ ũcio wonanagia atĩa atĩ nĩ atwendete?

9, 10. (a) Jehova atũguũrĩirie ũhoro ũmwĩgiĩ nĩkĩ? (b) Nĩ ũndũ ũrĩkũ Jehova atũguũrĩirie wĩgiĩ muoroto wake harĩ ithuĩ?

⁹ Wa mbere, Jehova nĩ atũguũrĩirie ũhoro ũmwĩgiĩ. Nĩ atũmenyithĩtie rĩĩtwa rĩake rĩrĩa rĩonekaga thĩinĩ wa Bibilia maita maingĩ gũkĩra rĩĩtwa rĩngĩ o rĩothe. Na njĩra ĩyo Jehova nĩ atũkuhagĩrĩria, akareka tũmũmenye. (Jak. 4:8) Ningĩ Jehova nĩ atũguũrĩirie ngumo ciake. Kũgerera ũũmbi wake nĩ atũguũrĩirie hinya na ũũgĩ wake na kũgerera Maandĩko agatũguũrĩria kĩhooto na wendo wake mũingĩ. (Rom. 1:20) Nĩ ũndũ wa ngumo icio ciake njega, nĩ ũkoragwo ũrĩ ũndũ mũhũthũ tũrĩ ciana ciake kũgĩa na ũkuruhanu wa hakuhĩ hamwe nake.

¹⁰ Ningĩ Jehova nĩ atũguũrĩirie muoroto wake. Nĩ atũteithĩtie kũmenya atĩ tũrĩ a famĩlĩ yake. Ningĩ nĩ atũmenyithĩtie maũndũ marĩa erĩgagĩrĩra twĩke nĩguo tũikaranagie tũrĩ na thayũ na ũrũmwe thĩinĩ wa famĩlĩ yake. Bibilia yonanagia atĩ Ngai ndaatũmbĩte twĩyathage, ĩndĩ aatũmbĩte twathagwo nĩwe. (Jer. 10:23) Jehova nĩwe ũĩ maũndũ marĩa mangĩtũguna biũ. Gwathĩkĩra ũtongoria wake nokuo tu kũngĩtũrehera thayũ na gĩkeno. Jehova atũrutĩte ma ĩyo ya bata tondũ nĩ atwendete.

11. Nĩ kĩĩranĩro kĩrĩkũ kĩa Jehova kĩonanagia atĩ nĩ atwendete na nĩ atũrũmbũyagia?

¹¹ Mũthuri wendete ciana ciake nĩ eciragia mũno ũhoro wa ũtũũro wacio wa mahinda marĩa maroka. Nĩ endaga ikorũo na ũtũũro mwega. No ũndũ wa kĩeha nĩ atĩ, andũ aingĩ matimenyaga ũhoro wa mahinda marĩa maroka. Mahũthagĩra ũtũũro wao gũthingata maũndũ matarĩ na ũguni. (Thab. 90:10) Ithuĩ ciana cia Ngai nĩ tũiguaga twendetwo mũno nĩwe tondũ nĩ atwĩrĩire mahinda mega maroka. Ũndũ ũcio nĩ ũtũmaga tũkorũo na ũtũũro ũrĩ na muoroto.

12. Ũtaaro wa Jehova harĩ Kaini na harĩ Baruku wonanagia atĩa atĩ nĩ aamendete?

¹² Rĩrĩa Jehova onire atĩ Kaini aarĩ hakuhĩ gwĩka ũndũ mũru mũno, nĩ aageririe kũmũteithia. Aamũririe ũũ: “Warakara nĩkĩ? Na ningĩ watuka gĩthiithi nĩkĩ? Githĩ ũngĩĩka wega, ndũngĩĩtĩkĩrũo o nawe?” (Kĩam. 4:6, 7) Ũcio warĩ ũtaaro mwega na wa ihinda rĩrĩa rĩagĩrĩire. Ũndũ wa kĩeha nĩ atĩ, Kaini  ndaigana gwĩtĩkĩra ũtaaro ũcio na nĩ ũndũ ũcio akĩingĩra mehia-inĩ. (Kĩam. 4:11-13) Rĩrĩa Jehova onire Baruku akuĩte ngoro nĩ ũndũ wa gũkorũo na mwerekera ũtarĩ mwega, nĩ aamũteithirie kũgĩa na mwerekera ũrĩa wagĩrĩire. Ngũrani na Kaini, Baruku nĩ eetĩkĩrire ũtaaro wa Jehova na akĩhonokia muoyo wake.—Jer. 45:2-5.

13. Ndungata njĩhokeku cia Jehova ciagunĩkire atĩa hĩndĩ ya moritũ?

¹³ Mũtũmwo Paulo aandĩkire ũũ: “Ũrĩa Mwathani endete, nĩwe aherithagia, na akahũra mwana o wothe ũrĩa etĩkagĩra.” (Ahib. 12:6) O na kũrĩ ũguo, Jehova to kũherithia aherithagia arĩa endete ĩndĩ nginya nĩ amamenyagĩria. Thĩinĩ wa Bibilia nĩ tũthomaga ũhoro wa ndungata imwe cia Jehova iria aamenyeririe igĩtuĩka andũ a bata mũno. Kwa ngerekano, Jusufu, Musa, na Daudi nĩ maagereire maũndũ maritũ mũno. Hĩndĩ ĩrĩa maacemanagia na moritũ macio Jehova nĩ aakoragwo hamwe nao. Na maũndũ marĩa meerutire hĩndĩ ya moritũ macio nĩ maamateithirie thutha-inĩ hĩndĩ ĩrĩa Jehova ameehokeire mawĩra maritũ. Rĩrĩa tũrathoma thĩinĩ wa Bibilia ũrĩa Jehova atongoragia na akamenyeria andũ ake nĩ tuonaga atĩ kũna nĩ atwendete.—Thoma Thimo 3:11, 12.

14. Jehova atuonagia wendo atĩa rĩrĩa twĩhĩtie?

¹⁴ Kũherithio kana kũrũngwo nĩ Jehova nĩ gũtũteithagia kuona atĩ nĩ atwendete. Rĩrĩa Jehova arũnga mũndũ wĩkĩte mehia na onania atĩ nĩ erirĩte ‘nĩakĩragĩrĩria kũmuohera.’ (Isa. 55:7) Ũndũ ũcio wonanagia atĩa? Akĩaria ũhoro wa wohanĩri wa Jehova, Daudi oigire ũũ: “We ũkuohagĩra waganu waku wothe; ndũari ciaku ciothe o  nacio nowe mũkũhonia; O we mũkũũri muoyo waku harĩ irima rĩa gĩkuũ, na nowe mũgwĩki maũndũ ma ũtugi na ma matha maigũ, ta arĩ thũmbĩ aragwĩkĩra ya ũnene; O ta ũrĩa irathĩro kũraihanĩrĩirie na ithũĩro, no taguo atũthengeirie mehia maitũ matũraihĩrĩrie.” (Thab. 103:3, 4, 12) Nĩ ũndũ ũcio rekei twĩtĩkagĩre gũtaarũo na kũrũngwo nĩ Jehova tondũ atũtaaraga na agatũrũnga nĩ ũndũ wa wendo wake mũnene harĩ ithuĩ.—Thab. 30:5.

15. Nĩ kĩĩ kĩonanagia atĩ andũ a Jehova nĩ a bata mũno harĩ we?

¹⁵ Mũthuri wendete ciana ciake nĩ agitagĩra famĩlĩ yake kuumana na ũgwati o wothe. Ũguo noguo Ithe witũ Jehova atwĩkagĩra. Mwandĩki wa thaburi oigire ũũ: “[Jehova] nĩagitagĩra mĩoyo yao; gũteithũra nĩamateithũraga moko-inĩ ma arĩa aaganu.” (Thab. 97:10) Ta wĩcirie ũndũ ũyũ: Tondũ maitho maku nĩ ma bata mũno harĩ we-rĩ, nĩ ũmagitagĩra mũno! Ũguo noguo Jehova agitagĩra andũ ake tondũ nĩ a bata mũno harĩ we.—Thoma Zekaria 2:8.

16, 17. Jehova aagitagĩra andũ ake atĩa tene, na mahinda-inĩ maya?

¹⁶ Jehova nĩ ahũthagĩra araika ake kũgitĩra andũ ake. (Thab. 91:11) Mũraika ũmwe nĩ aahonokirie andũ a Jerusalemu kuumana na tharĩkĩro ya Aashuri, akĩniina mbũtũ ya thigari 185,000 ũtukũ ũmwe tu. (2 Ath. 19:35) Mũtũmwo Petero na Paulo o hamwe na andũ angĩ o nao nĩ maahonokirio nĩ araika kuuma njera. (Atũm. 5:18-20; 12:6-11) O na mahinda-inĩ maya Jehova no ahonokagia ndungata ciake. Kahinda gatarĩ kũraihu nĩ kwĩrĩga gũkorũo na mbaara nene mũno bũrũri-inĩ ũmwe wa Afrika. Bũrũri ũcio wathũkĩte mũno nĩ ũndũ wa ngũĩ, ũici, njũragano, na andũ kũnyitwo kĩa hinya. O na gũtuĩka aingĩ nĩ moorirũo nĩ indo ciao ciothe, gũtirĩ mũrũ kana mwarĩ wa Ithe witũ o na ũmwe wakuire. Rĩrĩa maacereirũo nĩ mũrũ wa Ithe witũ ũmwe kuuma wabici nene ya Aira a Jehova, aamoria ũrĩa maũndũ maatariĩ, maamũcokeirie ũũ makenete: “Maũndũ nĩ mega, Jehova nĩ atũteithĩtie mũno!” Nĩ meeyoneire ũrĩa Jehova amendete.

¹⁷ Kũrĩ hĩndĩ Jehova anetĩkĩria thũ ciake ciũrage ndungata ciake njĩhokeku, ta ũrĩa eekire harĩ Stefano. O na kũrĩ ũguo, nĩ agitagĩra andũ ake marĩ gĩkundi na njĩra ya kũmahe mĩkaana ya ihinda rĩrĩa rĩagĩrĩire ĩgiĩ mawaara ma Shaitani. (Ef. 6:10-12) Kũgerera Kiugo gĩake na mabuku marĩa macabagwo nĩ ithondeka rĩake, Jehova nĩ atũteithagia kuona ũgwati wa maheeni ma ũtonga, maũndũ ma gwĩkenia marĩ na waganu na ũhinya, kũhũthĩra Intaneti ũũru, na maũndũ mangĩ ta macio. Ithe witũ ũtwendete Jehova, nĩ agitagĩra na akarũmbũyia andũ ake.

18. Ũiguaga atĩa igũrũ rĩgiĩ wendo wa Jehova gũkwerekera?

¹⁸ Twathuthuria o maũndũ manini marĩa matuonagia ũrĩa Jehova atwendete. Ũndũ ũcio ũratũma tũigue o ta ũrĩa Musa aaiguire. Agĩĩcũrania ũhoro wĩgiĩ ũtũũro wake ũtungata-inĩ wa Jehova oigire ũũ: “Rũcinĩ ũroke gũtũhũnia ũtugi waku; nĩguo tũtũũre tũkũngũyagia o tũgĩkenaga matukũ maitũ mothe.” (Thab. 90:14) Nĩ kĩrathimo gũtaũkĩrũo nĩ ũrĩa Jehova atwendete. Na githĩ ti gĩtĩo kĩnene mũno harĩ ithuĩ kwendwo nĩ Jehova! Tũiguaga o ta mũtũmwo Johana ũrĩa woigire: ‘Onei ũrĩa wendani ũkĩnenehete, ũrĩa Ithe witũ atwendete naguo.’—1 Joh. 3:1.