KŨRĨ Njumatano rũcinĩ Janũarĩ 24, 2018, famĩlĩ cia Betheli cia Amerika (US) na Canada nĩ ciakenire kũigua kĩmenyithia gĩkĩ kĩa mwanya: Mũrũ wa Ithe witũ Kenneth Cook, Jr., nĩ amũrĩtwo gũtungata thĩinĩ wa Kĩama Kĩrĩa Gĩtongoragia kĩa Aira a Jehova.

Mũrũ wa Ithe witũ Cook aaciarirũo na akĩrererũo Pennsylvania, Amerika (US). Eerutire ũhoro wa ma kuuma kũrĩ mũrutwo maathomaga nake marĩ hakuhĩ kũrĩkia sekondarĩ na akĩbatithio Juni 7, 1980. Aambĩrĩirie gũtungata arĩ painia wa hĩndĩ ciothe Septemba 1, 1982. Thutha wa gũtungata arĩ painia mĩaka ĩĩrĩ, nĩ eetirũo Betheli, na akĩambĩrĩria ũtungata wake wa Betheli Wallkill, New York, Oktomba 12, 1984.

Mĩaka 25 ĩrĩa yarũmĩrĩire, Mũrũ wa Ithe witũ Cook aarutaga mawĩra matiganĩte thĩinĩ wa kĩganda gĩa gũcaba mabuku na wabici ĩrĩa ĩtabanagia maũndũ ma Betheli. Maahikanirie na mũtumia wake Jamie mwaka wa 1996, na makĩambĩrĩria gũtungata hamwe kũu Betheli ya Wallkill. Kũrĩ Dicemba 2009, Mũrũ na Mwarĩ wa Ithe witũ Cook nĩ maathamirio magĩtwarũo Watchtower Educational Center ĩrĩa ĩkoragwo Patterson, New York, kũrĩa Mũrũ wa Ithe witũ Cook eehokeirũo wĩra Rũhonge-inĩ rwa Gũcokia Ciũria cia Athomi. Kũrĩ Ĩpuro 2016, thutha wa gũcoka kwa ihinda inini Betheli ya Wallkill, Mũrũ na Mwarĩ wa Ithe witũ Cook nĩ maathamirio magĩtwarũo Brooklyn, New York. Mĩeri ĩtano thutha ũcio, magĩthamĩra wabici-inĩ nene ya Aira a Jehova Warwick, New York. Janũarĩ 2017, Mũrũ wa Ithe witũ Cook nĩ aamũrirũo gũtungata arĩ mũteithĩrĩria wa Kamĩtĩ ya Wandĩki ya Kĩama Kĩrĩa Gĩtongoragia.