1, 2. Nĩ ciũria irĩkũ ciĩyumĩragia nĩ ũndũ wa ciugo iria Jesu oigire thĩinĩ wa Mathayo 24:14?

GŨTEKŨMAKANIA kana andũ nĩ metĩkanagia na ithuĩ kana nĩ matũkararagia, aingĩ nĩ metĩkagĩra atĩ Aira a Jehova nĩ moĩkaine wega nĩ ũndũ wa wĩra wao wa kũhunjia. Kwahoteka wanacemania na andũ ũtungata-inĩ moigaga atĩ o na gũtuĩka matiĩtĩkanĩtie na wĩtĩkio witũ, nĩ matũheete gĩtĩo nĩ ũndũ wa wĩra ũrĩa tũrutaga. O ta ũrĩa tũĩ, Jesu aarathĩte atĩ ũhoro ũrĩa mwega wa Ũthamaki nĩ ũngĩkahunjio thĩ yothe. (Mat. 24:14) No tũmenyaga atĩa atĩ wĩra ũrĩa tũrutaga nĩ ũhingagia ũrathi wa Jesu? Hihi no tũkorũo tũhĩtĩtie tũngĩciria atĩ nĩ ithuĩ tũraruta wĩra ũcio?

² Ndini nyingĩ nĩ cionaga ta ihunjagia ũhoro ũrĩa mwega. Ĩndĩ no ũira wao ene marutaga, makahunjia kanitha-inĩ kana kũhĩtũkĩra TV, Intaneti na indo ingĩ ta icio. Angĩ nao moigaga mahunjagia na njĩra ya kũheana ũteithio wa kĩĩmwĩrĩ kana kũgerera wĩrutĩri wao harĩ ũrigitani na gĩthomo. Hihi maũndũ  macio nĩ maringaine na ũrĩa Jesu aathire arutwo ake mekage?

3. Kũringana na Mathayo 28:19, 20, nĩ maũndũ marĩkũ mana arũmĩrĩri a Jesu magĩrĩire gwĩka?

³ Hihi Jesu endaga arũmĩrĩri ake meterere andũ mokage kũrĩ o? Aca! Thutha wa Jesu kũbatithio, eerire arũmĩrĩri ake ũũ: “Thiĩi mũgatue andũ a ndũrĩrĩ ciothe arutwo akwa, mũkĩmabatithagia . . . , mũkĩmarutaga kũrũmia maũndũ marĩa mothe ndĩmwathĩte.” (Mat. 28:19, 20) Nĩ ũndũ ũcio, mũndũ arabatara kũhingia maũndũ maya mana. No mũhaka tũtue andũ arutwo, tũmabatithie, na tũmarute. No hihi nĩ ũndũ ũrĩkũ tũrabatara gwĩka mbere? Jesu oigire ũũ: “Thiĩi”! Mũthomi ũmwe wa Bibilia akĩaria ũhoro wa watho ũcio, oigire ũũ: “‘Gũthiĩ’ nĩ wĩra wa mũndũ wothe wĩtĩkĩtie, akorũo aragerera barabara-inĩ kana gũtuĩkanĩria iria-inĩ.”—Mat. 10:7; Luk. 10:3.

4. Gũtuĩka “ategi a andũ” kũhutĩtie ũndũ ũrĩkũ?

⁴ Jesu eerĩgagĩrĩra kĩĩ kuuma kũrĩ arutwo ake? Hihi eendaga o mũndũ ahunjie arĩ wiki kana marĩ gĩkundi? Tondũ mũndũ ũmwe ndangĩahotire gũthiĩ kũrĩ “ndũrĩrĩ ciothe,” wĩra ũcio nĩ ũngĩabatarire kũrutwo nĩ andũ aingĩ. Jesu nĩ onanirie ũguo rĩrĩa eerire arutwo ake matuĩke “ategi a andũ.” (Thoma Mathayo 4:18-22.) Gũtega kũrĩa Jesu aaragĩrĩria ti kũrĩa mũndũ ahũthagĩra rũrigi na ndwano etereire nginya rĩrĩa thamaki ĩrĩũka. Ĩndĩ aaragia ũhoro wa kũhũthĩra neti, wĩra warĩ mũritũ na rĩmwe wabataraga kũnyitanĩrũo nĩ andũ aingĩ.—Luk. 5:1-11.

5. Nĩ ciũria irĩkũ inya irabatara gũcokio, na nĩkĩ?

⁵ Nĩguo tũmenye arĩa marahingia ũrathi wa Jesu wa kũhunjia ũhoro ũrĩa mwega ũmũthĩ, tũrabatara gũcokia ciũria ici inya:

• Nĩ ndũmĩrĩri ĩrĩkũ yagĩrĩirũo gũkorũo ĩkĩhunjio?

• Twagĩrĩirũo kũruta wĩra ũcio tũrĩ na muoroto ũrĩkũ?

• Nĩ njĩra irĩkũ ciagĩrĩire kũhũthĩrũo?

• Twagĩrĩirũo kũhunjia kũ na nĩ nginya rĩ?

Macokio ma ciũria icio nĩ megũtũteithia kũmenya arĩa mararuta wĩra ũcio wa kũhonokia mĩoyo na ningĩ tuongererũo hinya wa gũthiĩ na mbere kũhunjia.—1 Tim. 4:16.

6. Nĩkĩ kĩngĩtũma ũkorũo na ma atĩ Aira a Jehova mahunjagia ndũmĩrĩri ĩrĩa yagĩrĩire?

⁶ Thoma Luka 4:43. Jesu aahunjagia “ũhoro ũrĩa mwega wa Ũthamaki” na erĩgagĩrĩra arutwo ake meke o ũguo. Hihi nĩ andũ arĩkũ mahunjagia ũhoro ũcio kũrĩ “ndũrĩrĩ ciothe”? Hatarĩ nganja nĩ Aira a Jehova. O na andũ amwe arĩa matũkararagia nĩ metĩkagĩra ũndũ ũcio. Kwa ngerekano, kũrĩ hĩndĩ mũtongoria ũmwe wa ndini mũmishonarĩ eerire Mũira wa Jehova atĩ nĩ aikarĩte mabũrũri-inĩ maingĩ ngũrani na nĩ oragia Aira a Jehova mabũrũri-inĩ macio ndũmĩrĩri ĩrĩa mahunjagia. Nĩ macokio marĩkũ aaheagwo? Mũtongoria ũcio oigire ũũ: “Andũ acio maarĩ akĩgu ũũ atĩ maaheaga macokio mamwe, makoiga ũũ: ‘Ũhoro ũrĩa mwega wa Ũthamaki.’” Aira acio a Jehova ti “gũkĩĩga” maarĩ akĩgu no nĩ kwaria maaragia marĩ na ũrũmwe ta ũrĩa Akristiano a ma magĩrĩire. (1 Kor. 1:10) Moonanirie ũũma wa ndũmĩrĩri ĩrĩa ĩkoragwo thĩinĩ wa Ngathĩti ya Mũrangĩri ĩrĩa Yanagĩrĩra Ũthamaki wa Jehova. Ngathĩti ĩno yonekaga na thiomi 254, na ĩkarutwo kobĩ hakuhĩ milioni 59  harĩ o riuma, na ĩgakorũo nĩyo ngathĩti ĩrĩa ĩkinyagĩra andũ aingĩ mũno thĩinĩ wa thĩ.

7. Tũmenyaga atĩa atĩ atongoria a ndini iria ciĩĩtaga cia Gĩkristiano matihunjagia ndũmĩrĩri ĩrĩa yagĩrĩire?

⁷ Atongoria a ndini iria ciĩĩtaga cia Gĩkristiano matihunjagia ũhoro wĩgiĩ Ũthamaki wa Ngai. Mangĩtua kwaria ũhoro waguo, aingĩ ao moigaga atĩ Ũthamaki nĩ ũndũ ũkoragwo ngoro-inĩ ya Mũkristiano. (Luk. 17:21) Matiteithagia andũ mataũkĩrũo atĩ Ũthamaki wa Ngai nĩ thirikari ya igũrũ na Jesu Kristo nĩwe Mũthamaki wayo, na atĩ nĩyo ĩkehereria andũ mathĩna mothe na ica ikuhĩ nĩ ĩkweheria waganu wothe thĩinĩ wa thĩ. (Kũg. 19:11-21) Handũ ha ũguo, maririkanaga Jesu hĩndĩ ya Krismasi na ya Ista. Matikoragwo makĩmenya maũndũ marĩa Jesu akaahingia agĩathana gũkũ thĩ. Tondũ matitaũkagĩrũo nĩ ndũmĩrĩri ĩrĩa magĩrĩire kũhunjia, na githĩ ũguo ti kuuga atĩ o na matitaũkagĩrũo nĩ muoroto wa wĩra ũcio?

8. Nĩ muoroto ũrĩkũ ũtarĩ mwega wa kũhunjia?

⁸ Twagĩrĩirũo kũruta wĩra wa kũhunjia tũrĩ na muoroto ũrĩkũ? Ndwagĩrĩire gũkorũo ũrĩ kũngania mbeca na gwaka manyũmba manene. Jesu eerire arutwo ake ũũ: “Mũheetwo tũhũ, heanagai tũhũ.” (Mat. 10:8) Tũtiagĩrĩirũo kũhũũra biashara na Kiugo kĩa Ngai. (2 Kor. 2:17) Arĩa mahunjagia ndũmĩrĩri ĩyo matiagĩrĩire gũcaria ũrĩa mangĩĩguna na wĩra ũcio. (Thoma Atũmwo 20:33-35.) O na Jesu aheanĩte ũtongoria ũcio wa ĩmwe kwa ĩmwe, makanitha maingĩ nĩ monganagia mbeca nĩguo matwarithie na mbere kanitha ciao na marĩhe atongoria ao a ndini na andũ angĩ mandĩkĩte. Nĩ ũndũ ũcio, atongoria a ndini iria ciĩĩtaga cia Gĩkristiano nĩ matongete mũno.—Kũg. 17:4, 5.

9. Aira a Jehova monanagia atĩa atĩ mahunjagia marĩ na muoroto mwega?

⁹ Aira a Jehova makoretwo magĩka atĩa ũhoro-inĩ wĩgiĩ mbeca? Wĩra wao ũteithagĩrĩrio nĩ mĩhothi ya kwĩyendera. (2 Kor. 9:7) Gũtiũnganagio mbeca nyũmba-inĩ ciao cia Ũthamaki kana igomano-inĩ. Ĩndĩ, mwaka ũcio ũrathirire Aira a Jehova marahũthĩrire mathaa bilioni 1.93 makĩhunjia ũhoro ũrĩa mwega na makĩruta andũ makĩria ma milioni kenda Bibilia o mweri hatarĩ marĩhi. Na ũndũ wa kũgegania nĩ atĩ matirĩhagwo no mahũthagĩra mbeca ciao kũruta wĩra ũcio. Mũthuthuria ũmwe akĩaria ũhoro wĩgiĩ wĩra wa Aira a Jehova oigire ũũ: “Muoroto wao mũnene nĩ kũhunjia na kũrutana. . . . Matikoragwo na atongoria, ũndũ ũrĩa ũnyihagia mahũthĩro ma mbeca na njĩra nene.” Gũkĩrĩ ũguo-rĩ, muoroto witũ ũkoragwo ũrĩ ũrĩkũ tũkĩruta wĩra ũcio? Tũrutaga wĩra ũcio na kwĩyendera tondũ nĩ twendete Jehova na andũ arĩa angĩ. Roho ũcio wa kwĩrutĩra ũhingagia ũrathi ũrĩa ũrĩ thĩinĩ wa Thaburi 110:3. (Thoma.)

10. Nĩ njĩra irĩkũ Jesu na arutwo ake maahũthagĩra makĩhunjia?

¹⁰ Nĩ njĩra irikũ Jesu na arutwo ake maahũthagĩra makĩhunjia ũhoro ũrĩa mwega? Maathiaga kũrĩa guothe gwakoragwo na andũ ta kũndũ kwa mũingĩ. Ningĩ nĩ maahunjagia nyũmba kwa nyũmba magĩcaria arĩa maarĩ na ngoro njega.  (Mat. 10:11; Luk. 8:1; Atũm. 5:42; 20:20) Njĩra ĩyo ya kũhunjia nyũmba kwa nyũmba nĩ yateithagia gũkinyĩra andũ a mĩthemba yothe.

11, 12. Hakoragwo na ngũrani ĩrĩkũ gatagatĩ ka ndini iria ciĩĩtaga cia Gĩkristiano na Aira a Jehova ũndũ-inĩ wĩgiĩ kũhunjia ũhoro ũrĩa mwega?

¹¹ Hihi ndini iria ciĩĩtaga cia Gĩkristiano nĩ ihunjagia ũhoro ũrĩa mwega ta ũrĩa Jesu eekaga? Kaingĩ atongoria a ndini nĩo marutaga wĩra wa kũhunjĩria arũmĩrĩri ao. Handũ ha gũtuĩka “ategi a andũ,” atongoria acio monekaga makĩĩrutanĩria gũtũũria arũmĩrĩri arĩa marĩ nao. Nĩ ma, nĩ kũrĩ hĩndĩ atongoria acio mageragia gwĩkĩra arũmĩrĩri ao ngoro mathiĩ makahunjie. Kwa ngerekano, kĩambĩrĩria kĩa mwaka wa 2001, mũtongoria wa ndini ya Gatoreki John Paul II nĩ eeraga arũmĩrĩri a kanitha ũcio atĩ magĩrĩirũo kũhunjia ũhoro ũrĩa mwega, na makorũo na kĩyo ta kĩrĩa kĩarĩ na mũtũmwo Paulo ũrĩa woigire ũũ: “Kaĩ ndĩ na haaro ingĩaga kũhunjia ũhoro ũrĩa mwega-ĩ!” Aacokire akĩmeera atĩ wĩra ũcio wa kũhunjia ndwagĩrĩirũo kũrutwo nĩ andũ amwe no nĩ wa arũmĩrĩri othe. No nĩ aigana mekĩte ũguo?

¹² Ĩ nao Aira a Jehova? No o tu mahunjagia atĩ Jesu akoretwo agĩathana kuuma mwaka wa 1914. Nĩ merutanagĩria mũno wĩra-inĩ wa kũhunjia o ta ũrĩa Jesu aathanire. (Mar. 13:10) Ibuku rĩtagwo Pillars of Faith—American Congregations and Their Partners riugaga ũũ: “Wĩra wa kũhunjia nĩguo wa bata makĩria harĩ Aira a Jehova.” Mwandĩki wa ibuku rĩu akĩgweta ũhoro waririo nĩ Mũira wa Jehova oigire ũũ: “Rĩrĩa mona andũ angĩ marĩ na ng’aragu, ihooru, na mĩrimũ nĩ mageragia gũteithia, . . . no matiriganagĩrũo atĩ wĩra ũrĩa wa bata nĩ kũhunjia ndũmĩrĩri ĩgiĩ ithirĩro rĩa thĩ na kĩrĩa kĩendekaga nĩguo mũndũ akaahonoka.” Aira a Jehova mathiaga na mbere kũhunjia ndũmĩrĩri ĩyo makĩhũthĩra njĩra iria Jesu na arutwo ake maahũthagĩra.

13. Ũhoro mwega ũbatiĩ kũhunjio kũ?

¹³ Jesu nĩ onanirie atĩ ũhoro mwega ũngĩkaahunjio “thĩ yothe.” (Mat. 24:14) Arutwo moimaga kũrĩ “andũ a ndũrĩrĩ ciothe.” (Mat. 28:19, 20) Ũguo nĩ kuuga atĩ ũhoro ũcio mwega ũbatiĩ kũhunjio thĩ yothe.

14, 15. Nĩ kĩĩ kĩonanagia atĩ Aira a Jehova nĩ mahingĩtie ũrathi wa Jesu wĩgiĩ kũrĩa kũbatiĩ kũhunjio? (Rora mbica kĩambĩrĩria-inĩ gĩa gĩcunjĩ gĩkĩ.)

¹⁴ Nĩguo tũtaũkĩrũo ũrĩa Aira a Jehova mahingĩtie ũrathi wa Jesu wĩgiĩ kũrĩa mahunjagia ũhoro mwega, rekei tũthuthurie maũndũ maigana ũna. Gũkoragwo na atongoria a ndini ta 600,000 thĩinĩ wa ndini iria ikoragwo Amerika (US), nao Aira a Jehova makoragwo marĩ ta 1,200,000 bũrũri-inĩ ũcio. Thĩinĩ wa thĩ yothe, atongoria a Kanitha wa Gatoreki  makoragwo marĩ ta 400,000. Ta wĩcirie mũigana wa Aira a Jehova arĩa mahunjagia ũhoro wĩgiĩ Ũthamaki. Thĩ yothe makoragwo marĩ makĩria ma milioni inyanya na merutagĩra kũhunjia thĩinĩ wa mabũrũri 240. Wĩra ũcio wa magegania ũrehagĩra Jehova rũgooco rũnene.—Thab. 34:1; 51:15.

¹⁵ Twendaga gũkinyĩria andũ othe ũhoro mwega mbere ya mũico ũkinyĩte. Nĩ ũndũ ũcio, tũkoragwo tũrĩ ngũrani harĩ wĩra wa gũtaũra na gũcaba mabuku mararĩrĩria Bibilia. Mabuku milioni nyingĩ, ngathĩti, trakti, na tũratathi twa kũnyita andũ ũgeni igomano-inĩ na Kĩririkano-inĩ nĩ tũheanĩtwo hatarĩ marĩhi. Nĩ tũrutĩte mabuku matiganĩte na thiomi makĩria ma 700. Makĩria ma kobĩ milioni 200 cia New World Translation of the Holy Scriptures nĩ icabĩtwo na thiomi makĩria ma 130. Mwaka ũcio ũrathirire tũracabire mabuku ta bilioni 4.5 mararĩrĩria Bibilia. Ũhoro ũrĩa ũrĩ thĩinĩ wa Website itũ wonekaga na thiomi makĩria ma 750. Nĩ andũ arĩkũ angĩ marutaga wĩra ta ũcio?

16. Tũmenyaga atĩa atĩ Aira a Jehova nĩ makoragwo na roho wa Ngai?

¹⁶ Wĩra wa kũhunjia ũngĩkaarutwo nginya rĩ? Jesu oigire atĩ wĩra ũcio wa thĩ yothe ũngĩgathiĩ na mbere nginya matukũ ma kũrigĩrĩria, “na hĩndĩ ĩyo nĩrĩo mũico ũgaakinya.” Nĩ ndini ĩrĩkũ ĩngĩ ĩthiĩte na mbere kũhunjia ũhoro ũrĩa mwega matukũ-inĩ maya ma kũrigĩrĩria? Andũ amwe arĩa tũkoraga ũtungata-inĩ no moige atĩ marĩ na roho mũtheru ĩndĩ moige nĩ ithuĩ tũrutaga wĩra ũcio. Na githĩ gũthiĩ na mbere wĩra-inĩ wa kũhunjia gũtionanagia atĩ tũrĩ na roho wa Ngai? (Atũm. 1:8; 1 Pet. 4:14) Rĩmwe na rĩmwe, ndini imwe nĩ igeragia kũruta wĩra ũrĩa Aira a Jehova marutaga, no ikaremwo. Amwe nao nĩ merutagĩra kũhunjia, ĩndĩ no kwa ihinda inini. Angĩ nao nĩ mageragia gũthiĩ nyũmba kwa nyũmba, no hihi mahunjagia ndũmĩrĩri ĩrĩkũ? Macokio ma kĩũria kĩu monanagia wega atĩ matirutaga wĩra ũrĩa Kristo aambĩrĩirie.

17, 18. (a) Nĩ kĩĩ kĩngĩtũma tũkorũo na ma biũ atĩ Aira a Jehova nĩo marahunjia ũhoro ũrĩa mwega wa Ũthamaki? (b) Tũhotaga atĩa gũthiĩ na mbere kũruta wĩra ũcio?

¹⁷ Kwoguo-rĩ, nĩa mahunjagia ũhoro ũrĩa mwega wa Ũthamaki ũmũthĩ? No tuuge ũũ tũrĩ na ma biũ: “Nĩ Aira a Jehova!” Nĩ kĩĩ kĩngĩtũma tũkorũo na ma ũguo? Tondũ tũhunjagia ndũmĩrĩri ĩrĩa yagĩrĩire ya ũhoro ũrĩa mwega wa Ũthamaki. Ningĩ tũhũthagĩra njĩra iria ciagĩrĩire tondũ tũthiaga kũrĩ andũ. Tũrutaga wĩra wa kũhunjia tũrĩ na muoroto mwega wa wendo no ti wa kwĩguna. Tũhunjagia thĩ yothe tũgakinyĩra andũ a ndũrĩrĩ na thiomi ciothe. Na tũgũthiĩ na mbere kũruta wĩra ũcio tũtegũtigithĩria nginya mũico ũkinye.

¹⁸ Nĩ tũgegagio mũno nĩ wĩra ũrĩa andũ a Ngai marahingia matukũ-inĩ maya tũratũũra. No mahotaga atĩa kũhingia wĩra ũcio? Mũtũmwo Paulo aacokirie ũũ marũa-inĩ make kũrĩ Afilipi: “Nĩ gũkorũo Ngai, nĩ ũndũ wa wendi wake, nĩwe ũmuongagĩrĩra hinya, akamũhe wendi o hamwe na ũhoti wa gwĩka maũndũ mothe marĩa endaga.” (Afil. 2:13) Nĩ tũgĩthiĩi na mbere kuongererũo hinya nĩ Ithe witũ ũrĩ wendo o tũgĩkaga ũrĩa wothe tũngĩhota kũhingia ũtungata witũ.—2 Tim. 4:5.