Wĩrute Kuumana na Kiugo Kĩa Ngai

Twagĩrĩirũo Kũririkana Gĩkuũ kĩa Jesu Atĩa?

Gĩcunjĩ gĩkĩ kĩrĩ na ciũria hihi wanoria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Gĩkuũ kĩa Jesu kĩagĩrĩirũo kũririkanwo atĩa?

Jesu eerire arũmĩrĩri ake maririkanage gĩkuũ gĩake makĩhũthĩra mũgate na ndibei irĩ irio cia mũhaano. Mũgate ũrũgamĩrĩire mwĩrĩ wa Jesu, nayo ndibei, thakame yake.—Thoma Luka 22:19, 20.

Mũgate ũrĩa Jesu aahũthĩrire ndwarĩ mũimbie, kana ũgekĩrũo ndawa. Kaingĩ Bibilia, ĩhũthagĩra ndawa ya kũimbia kũrũgamĩrĩra mehia. Kwoguo mũgate nĩ waagĩrĩire kũrũgamĩrĩra mwĩrĩ mũkinyanĩru wa Jesu. Aarutire mwĩrĩ wake ũrĩ igongona, rĩrĩa rĩaniinire magongona ma nyamũ marĩa maathanĩtwo Watho-inĩ wa Musa. (Ahibirania 10:5, 9, 10) Ndibei yarũgamĩrĩire thakame ya goro ya Jesu ĩrĩa yaitirũo ĩrĩ igongona rĩa mehia maitũ.—Thoma 1 Petero 1:19; 2:24; 3:18.

2. Nĩ rĩ twagĩrĩirũo kũririkana gĩkuũ kĩa Jesu?

Jesu aakuire Bathaka ya Nisani 14. Mũthenya wa Kĩyahudi wambagĩrĩria riũa rĩathũa. Hwaĩ-inĩ ũrĩa warĩ mbere ya gĩkuũ gĩake, Jesu nĩ aarĩanĩire Bathaka na atũmwo ake, agĩcoka akĩambĩrĩria irio cia kĩririkano kĩerũ gĩa gũkũngũĩra gĩkuũ gĩake. —Thoma Luka 22:14, 15.

Ũmũthĩ, andũ a Ngai nĩ makũngũyagĩra ũndũ ũrĩa Ngai aatũheire kũgerera Jesu nĩguo akũũre thĩ yothe harĩ mehia na gĩkuũ. (Thama 12:5-7, 13, 17) O ta ũrĩa Bathaka yakũngũyagĩrũo riita rĩmwe mwaka, noguo Kĩririkano gĩa gĩkuũ kĩa Jesu gĩkagwo rĩmwe o mwaka mũthenya wa Nisani 14 riũa rĩathũa, kũringana na kalenda ya Bibilia ĩrĩa ĩrũmagĩrĩra mweri.—Thoma Johana 1:29.

 3. Nĩ a magĩrĩirũo kũrĩa mũgate na kũnyua ndibei?

Rĩrĩa Jesu aaneire arũmĩrĩri ake ndibei manyue, oigire ũũ: ‘Gĩkombe gĩkĩ nĩ gĩa kĩrĩkanĩro kĩrĩa kĩerũ.’ (1 Akorintho 11:25) Kĩrĩkanĩro kĩu kĩerũ gĩacokire ithenya rĩa kĩrĩkanĩro kĩa Watho wa Musa, kĩrĩa Ngai eerĩire Aisiraeli atĩ mangĩamwathĩkĩire biũ, mangĩatuĩkire andũ ake. (Thama 19:5, 6) No Aisiraeli matiigana gwathĩkĩra uuge wa Ngai. Kwoguo Jehova akĩheana kĩrĩkanĩro kĩerũ.—Thoma Jeremia 31:31.

Na njĩra ya kĩrĩkanĩro kĩu kĩerũ, Jehova nĩ atũmĩte irathimo ikinyĩre andũ aingĩ kũgerera andũ anini. Nĩ anini marĩ thĩinĩ wa kĩrĩkanĩro kĩu, andũ 144,000 tu. Kũgerera harĩ o, andũ milioni nyingĩ kuuma ndũrĩrĩ ciothe nĩ makaarathimwo na muoyo wa tene na tene thĩinĩ wa paradiso gũkũ thĩ. Amwe arĩa marĩ kĩrĩkanĩro-inĩ kĩu kĩerũ maratungatĩra Jehova oro gũkũ thĩ ũmũthĩ. No o tu magĩrĩire kũrĩa mũgate na kũnyua ndibei tondũ gĩkombe kĩu nĩ “gĩa kĩrĩkanĩro kĩrĩa kĩerũ.”—Thoma Luka 12:32; Kũguũrĩrio 14:1, 3.

4. Kĩririkano kĩu gĩtũgunaga atĩa?

Kĩririkano kĩa o mwaka gĩa gĩkuũ kĩa Jesu nĩ kĩongagĩrĩra ngaatho ciitũ harĩ wendo mũnene wa Jehova. Aatũmire Mũrũwe akue nĩ ũndũ wa mehia maitũ. Kwoguo rĩrĩa twathiĩ Kĩririkano-inĩ, twagĩrĩirũo gwĩcũũrania ũrĩa gĩkuũ kĩa Jesu kiugĩte harĩ ithuĩ. Twagĩrĩirũo gwĩciria ũrĩa tũngĩonania ngaatho nĩ ũrĩa Jehova na Jesu matwĩkĩire.—Thoma Johana 3:16; 2 Akorintho 5:14, 15.

Nĩgetha wone ũhoro makĩria, rora karatathi ka 206-208 thĩinĩ wa ibuku rĩrĩ, rĩrĩa rĩcabĩtwo nĩ Aira a Jehova. Bibilia Ĩrutanaga Atĩa Kũna?