Athomi Aitũ Maroria Atĩrĩ . . .

Hihi Ngai nĩ atindanagĩra kana nĩ hũthagĩra thigara?

▪ Mũndũ mwĩhokeku no orie kĩũria ta kĩu, tondũ hatirĩ watho wa Bibilia ũgwetete thigara na indo ingĩ ta icio. Hihi ũguo nĩ kuuga atĩ nĩ ũndũ mũritũ kũmenya mwĩcirĩrie wa Ngai igũrũ rĩa ũndũ ũcio? Aca.

Bibilia yugaga atĩ “ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki.” (2 Timotheo 3:16) Maandĩko nĩ maguũragia wega ũrĩa Ngai endaga tũrũmbũiye ũgima witũ wa mwĩrĩ. Reke twambe tuone maũndũ marĩa athuthuria mamenyete megiĩ ũrĩa thigara ithũkagia ũgima wa mwĩrĩ. Tũcoke twĩcirie ũrĩa mawatho ma Bibilia moigaga igũrũ rĩa maũndũ macio.

Thigara nĩ ithũkagia ũgima wa mwĩrĩ na ikarehe ikuũ nyingĩ ingĩgirĩrĩrio. Thĩinĩ wa bũrũri wa Amerika (U.S.), harĩ ikuũ cia andũ 5 mũndũ 1 oragagwo nĩ thigara. Riboti ĩmwe ya National Institute on Drug Abuse yugaga atĩ, thĩinĩ wa bũrũri ũcio, thigara nĩ ciũragaga andũ aingĩ o mwaka gũkĩra arĩa moragagwo nĩ “njohi, ndawa cia ũrĩu, njũragano, mogwati ma ngari, na mũrimũ wa mũkingo matukanĩirũo.”

Andũ arĩa mahũthagĩra thigara nĩ mathũkagia andũ arĩa angĩ. O na gatogo kanini mũno ga thigara no gathũkie mũndũ. Arĩa matanyuaga thigara no nĩ mahuhagia ndogo ĩyo nĩ mongagĩrĩra na gĩcunjĩ kĩa 30 harĩ igana ũgwati wa kũnyitwo nĩ mũrimũ wa kansa na mũrimũ wa ngoro. Mĩaka ya ica ikuhĩ, ndagĩtarĩ nĩ mamenyete ũgwati ũngĩ ũrĩa ũrahutia andũ. Umanaga na matigari ma ndogo ya thigara ĩrĩa ĩtigagwo kwa ihinda iraya nguo-inĩ, mĩgeka-inĩ, na kũndũ kũngĩ thutha wa ndogo ĩrĩa yonekaga gũthira. Thumu ũcio nĩ ũthũkagia ũgima wa mwĩrĩ wa ciana na no ũhotomie ũhoti wao wa kwĩruta maũndũ.

Thigara nĩ itũmaga mũndũ atuĩke ngombo yacio. Itũmaga ũrĩa ũracihũthĩra atuĩke ngombo ya mũtugo ũcio mũru. Ũhoro wa ma nĩ atĩ, athuthuria metĩkĩtie atĩ kũmenyera ndawa ĩrĩa ĩkĩragwo thigara-inĩ, nicotine, nĩ ũmwe wa maũndũ marĩa maritũ mũno mũndũ gũtiga.

Mawatho ma Bibilia moigaga atĩa igũrũ rĩa maũndũ macio? Rora maũndũ maya:

Ngai endaga tũtĩe muoyo. Watho-inĩ ũrĩa Ngai aaheire rũrĩrĩ rwa Aisiraeli, onanirie atĩ arĩa mangĩenda kũmũkenia, no mũhaka matĩe muoyo. (Gũcokerithia Maathani 5:17) Aisiraeli no mũhaka maangĩakire rũirigo, rwa gũthiũrũrũkĩria nyũmba ciao igũrũ. Nĩkĩ? Nyũmba igũrũ kwarĩ kwaraganu na andũ nĩ maaikaraga kuo. Rũirigo rũu rwagitagĩra andũ a famĩlĩ na andũ angĩ matikagwe magurario kana makue. (Gũcokerithia Maathani 22:8) Makĩria ma ũguo, Aisiraeli maagĩrĩirũo gũtigĩrĩra atĩ nyamũ ciao itiaguraragia andũ angĩ. (Thama 21:28, 29) Mũndũ ũhũthagĩra thigara oinaga mawatho ma Bibilia marĩa makuuĩte mawatho macio. Athũkagia ũgima wake wa mwĩrĩ eyendeire. Makĩria ma ũguo, ũhũthĩri wake wa thigara nĩ ũthũkagia andũ arĩa angĩ marĩ hakuhĩ nake.

Ngai erĩgagĩrĩra tũmwende na twende andũ arĩa angĩ. Jesu oigire atĩ arũmĩrĩri ake magĩrĩire gwathĩkĩra maathani merĩ marĩa manene. No mũhaka mende Ngai na ngoro yao yothe, muoyo wao wothe, gwĩciria kwao guothe, hinya wao wothe na mende mũndũ ũrĩa ũngĩ o ta ũrĩa meyendete o ene. (Mariko 12:28-31) Tondũ muoyo nĩ kĩheo kuuma kũrĩ Ngai, mũndũ ũrĩa ũnyuaga thigara onanagia ndaheete muoyo gĩtĩo na kwoguo ndendete Ngai. (Atũmwo 17:26-28) Mũtugo wa mũndũ ũcio no ũthũkie arĩa angĩ, na kwoguo nĩ kũheenania angĩheenania angiuga atĩ nĩ endete andũ arĩa angĩ.

Ngai endaga twĩtheme mĩtugo ĩtarĩ mĩtheru. Bibilia ĩraga Akristiano metheragie “ũndũ o wothe ũrĩa ũthũkagia mũndũ mwĩrĩ o na kana roho.” (2 Akorintho 7:1) Hatarĩ nganja kũhũthĩra thigara nĩ kũhakaga mũndũ gĩko. Arĩa marenda gũtiga thigara nĩguo makenie Ngai nĩ makoragwo na ũndũ mũritũ. No marĩ na ũteithio wa Ngai no mahote gũtiga mũtugo ũcio mũru.