Ndakũrĩire kũndũ gũtaarĩ na ũtonga mũnene taũni-inĩ ya Turku ĩrĩa arĩ gĩcukĩro kĩa meri. Baba aarĩ mũrũi njorua wa ngundi, o na niĩ na mũrũ wa maitũ ũrĩa mũnyinyi nĩ tweingĩririe ũrũi-inĩ wa ngundi. Rĩrĩa ndaarĩ cukuru, ingĩacogothirũo, ndietigagĩra kũrũa. Ndĩ tinĩnja, nĩ ndeingĩranirie na gĩkundi kĩarĩ na mĩtugo mĩũru, gĩgĩtũma ndonyerere maũndũ-inĩ ma ũhinya makĩria. Hamwe na ũguo, ngĩmenya ũini wa nyĩmbo irĩ na mĩgambo mĩritũ, na ngĩambĩrĩria gwĩciria ũrĩa ingĩtuĩka mũini njorua.

Nĩ ndagũrire ndarama cigana ũna, ngĩthondeka gĩkundi gĩa kũina na thutha wa ihinda ngĩtuĩka wa gũtongoragia nyĩmbo gĩkundi-inĩ kĩu. Ndendete gwĩka maũndũ itekwĩgirĩrĩria ndĩ mbere ya andũ. Gĩkundi gitũ nĩ kĩagĩire na igweta mũno tondũ tuonekaga ta tũgũrũkĩte. Tũkĩambĩrĩria kũina mbere ya andũ aingĩ na tũkĩruta nyĩmbo cigana ũna, na imwe ciacio ikĩgathĩrĩrio mũno. Mũthia-inĩ wa mĩaka ya 1980, nĩ twathire Amerika (U.S.) kũgathĩrĩria gĩkundi gitũ. Tũkĩina taũni-inĩ ya New York na Los Angeles maita maigana ũna, na tũkĩmenyana na andũ marĩ na ũmenyeru ũini-inĩ tũtanacoka Finland.

O na gũtuĩka nĩ ndakenagĩra gũkorũo gĩkundi-inĩ kĩu, nĩ nderiragĩria gũkorũo na ũtũũro ũrĩ na muoroto. Ngĩambĩrĩria gũthũra mwerekera ũtagĩrĩire wa gũcindana ũrĩa ũkoragwo na aini na ngĩigua ndanogio nĩ mũtũũrĩre wakwa mũũru. Ndeyonaga ndĩ mũndũ mũũru, na nĩ ndetigagĩra gũgacinwo na mwaki wa tene na tene. Nĩ ndageririe gwetha ũrĩa ingĩgĩa na ũtũũro wĩna muoroto mabuku-inĩ o mothe ma kĩndini, na nĩ ndahoyaga Ngai mũno andeithie, o na gũtuĩka ndeyonaga ta gũtarĩ hĩndĩ ngetĩkĩrĩka nĩwe.

Nĩguo hingagie mabataro makwa, ndaarutaga wĩra bothita ya gwitũ. Mũthenya ũmwe, nĩ ndamenyire atĩ mũndũ ũmwe twarutithanagia wĩra nake aarĩ Mũira wa Jehova. Nĩ ndaamũririe ciũria kĩrũmanĩrĩrio. Macokio make magĩrĩru, moimĩte  Maandĩko-inĩ nĩ maangenirie, nĩ ũndũ ũcio ngĩtĩkĩra andute Bibilia. Ciumia nini thutha wakwa kwambĩrĩria kwĩruta, gĩkundi gitũ kĩa ũini nĩ kĩaheirũo wĩra mũnene ũrĩa warĩ na ũhotekeku wa kũruta mũkwa wa nyĩmbo bũrũri-inĩ wa Amerika (U.S.). Ndonire ũrĩ mweke ũtangĩoneka hĩndĩ ĩngĩ.

Ngĩra ũrĩa wandutaga Bibilia atĩ ndendaga kwamba kũruta mũkwa ũngĩ ũmwe na thutha ũcio nyambĩrĩrie kũhũthĩra ũtaaro wa Bibilia mũtũũrĩre-inĩ wakwa itarĩ na itherũ. Ndaaheire mawoni make; no kũnjĩra aanjĩrire thome ciugo cia Jesu iria irĩ Mathayo 6:24. Ciugaga ũũ: “Gũtirĩ mũndũ ũngĩhota gũtungatĩra aathani erĩ.” Nĩ ndaagegire rĩrĩa ndaamenyire ũrĩa ciugo icio cia Jesu ciugĩte. No thutha wa thikũ nini, rĩarĩ ihinda rĩa mwarimũ wakwa wa Bibilia kũgega! Ndamwĩrire atĩ tondũ wa kwenda kũrũmĩrĩra Jesu, nĩ nyumĩte gĩkundi-inĩ kĩu!

O ta gĩcicio, Bibilia nĩ yanyonirie mahĩtia makwa. (Jakubu 1:22-25) Ndeyonire ndĩ mũndũ mũũru: Ndaarĩ mwĩtĩi na mwendi maũndũ manene. Ndahũthagĩra ciugo thũku, nĩ ndarũaga, nganyua thigara, na nganyua njohi gũkĩria gĩthimi. Rĩrĩa ndonire ũrĩa mũtũũrĩre wakwa wareganĩte na ũrutani wa Bibilia, ndaiguire ndemena mũno. O na kũrĩ ũguo, nĩ ndeharĩirie kũgarũrĩra.—Aefeso 4:22-24.

Kĩambĩrĩria-inĩ nĩ ndaiguaga nditũhĩirũo mũno nĩ kĩeha nĩ ũndũ wa mahĩtia makwa ma hau kabere. No Mũira wa Jehova ũrĩa nderutaga nake Bibilia nĩ aandeithirie mũno. Aanyonirie ũrĩa Bibilia yugĩte thĩinĩ wa Isaia 1:18: “O na harĩa mehia manyu matunĩhĩte ta gakarakũ-rĩ, nĩmagathera o ta ira.” Rĩandĩko rĩu na mangĩ, nĩ maanyonirie atĩ Ithe witũ wa igũrũ nĩ arĩ tha na nĩ endaga kũhonia ironda cia arĩa merirĩte mehia mao.

Rĩrĩa ndamenyire Jehova na ngĩmwenda, nĩ ndendire kũmwĩyamũrĩra. (Thaburi 40:8) Ndabatithirio 1992 kĩrũrũngano-inĩ gĩa kĩĩmabũrũri kĩrĩa gĩekĩirũo St. Petersburg, Russia.

Nĩ ngĩte na arata aingĩ ega gatagatĩ-inĩ ka athathaiya a Jehova. Rĩmwe na rĩmwe nĩ tũcemanagia, tũkaina nyĩmbo iria ciagĩrĩire na tũgakenera kĩheo kĩu kiumĩte kũrĩ Ngai. (Jakubu 1:17) Kĩrathimo kĩa mwanya nĩ kũhikania na mũtumia wakwa nyendete, Kristina. Nĩ ndĩmwĩraga maũndũ makwa maingĩ ma gĩkeno, moritũ ma mũtũũrĩre o na maũndũ marĩa me ngoro yakwa thĩinĩ.

Korũo ndiatuĩkire Mũira wa Jehova, no kũhoteke ingĩakuire tene. Tene nĩ ndekoraga mathĩna-inĩ kaingĩ, no rĩu nĩ ngoragwo na muoroto ũtũũro-inĩ.