O TA ũrĩa tuonire gĩcunjĩ-inĩ kĩrĩa kĩhĩtũku, Jesu aarĩ na ũtũũro ũrĩ na muoroto. Kwoguo angĩkorũo nĩ tũrenda ũtũũro witũ ũkorũo na muoroto, nĩ tũbatiĩ kũrũmĩrĩra kĩonereria gĩake na tũthikĩrĩrie ũtaaro wake.

Ma nĩ atĩ, ũguo nĩguo Jehova endaga twĩke, o ta ũrĩa rĩandĩko rĩrĩa rĩrĩ hau igũrũ rĩonanĩtie. Kũgĩa na mĩthiĩre ta ĩrĩa Jesu aarĩ nayo nĩ hamwe na kwĩgerekania nake na kũrũmĩrĩra morutani make ũtũũro-inĩ witũ. Gwĩka ũguo nĩ gũgũtũteithia gwĩtĩkĩrĩka harĩ Ngai na kũgĩa na ũtũũro ũrĩ na muoroto.

Ũrutani wa Jesu nĩ hamwe na motaaro marĩa mangĩtũteithia kũgĩa na mĩthiĩre ta ĩrĩa we aarĩ nayo. Mamwe mamo no moneke Mahunjio-inĩ make marĩa marĩ ngumo ma Kĩrĩma-inĩ. Rekei twarĩrĩrie morutani mamwe na ũrĩa tũngĩmahũthĩra ũtũũro-inĩ witũ.

ŨRĨA ŨRUTANI ŨCIO ŨTEITHAGĨRĨRIA HARĨ KŨGĨA NA ŨTŨŨRO ŨRĨ NA MUOROTO:

Jesu oigire atĩ andũ nĩ makoragwo na wendi wa kũmenya Ngai thĩinĩ wao. Nĩ twĩriragĩria kũmenya macokio ma ciũria ta ici: Gĩtũmi gĩa tũkorũo kuo nĩ kĩrĩkũ? Thĩ ĩiyũire mĩnyamaro nĩkĩ? Hihi Ngai nĩ atũrũmbũyagia kũna? Hihi nĩ harĩ ũtũũro ũngĩ thutha wa mũndũ gũkua? Nĩ tũbatiĩ kũmenya macokio ma ciũria ta icio nĩguo tũkorũo na ũtũũro ũrĩ na muoroto. Jesu nĩ aamenyaga atĩ Kiugo kĩa Ngai nokĩo kĩngĩheana macokio ma ma megiĩ ciũria icio. Jesu eerire Ithe ũũ mahoya-inĩ: “Ũhoro waku nĩguo ũhoro-ũrĩa-wa-ma.” (Johana 17:17) Hihi Kiugo kĩa Ngai kũna no gĩtũteithie kũhingia mabataro maitũ ma kĩĩroho?

NGEREKANO YA ŨNDŨ WĨYONEIRŨO:

Esa, ũrĩa watongoragia gĩkundi kĩa aini kĩarĩ ngumo, aarorete gũtuĩka njorua ya ũini. O na kũrĩ ũguo, Esa nĩ aaiguaga nĩ harĩ ũndũ aagaga. Oigaga, “O na gũtuĩka nĩ ndakenagĩra gũkorũo gĩkundi-inĩ kĩu, nĩ nderiragĩria gũkorũo na ũtũũro ũrĩ na muoroto.” Thutha wa kahinda, Esa nĩ aacemanirie na Mũira wa Jehova. Oigaga ũũ: “Nĩ ndaamũririe ciũria kĩrũmanĩrĩrio. Macokio make magĩrĩru, moimĩte Maandĩko-inĩ nĩ maangenirie, nĩ ũndũ ũcio ngĩtĩkĩra andute Bibilia.” Maũndũ marĩa Esa eerutire kuumana na wĩruti wake wa Bibilia nĩ maamũhutirie na magĩtũma eyamũrĩre Jehova. Oigaga atĩ, “Tene nĩ ndekoraga mathĩna-inĩ kaingĩ, no rĩu nĩ ngoragwo na muoroto ũtũũro-inĩ.” *

ŨRĨA ŨRUTANI ŨCIO ŨTEITHAGĨRĨRIA HARĨ KŨGĨA NA ŨTŨŨRO ŨRĨ NA MUOROTO:

Kuonia andũ tha nĩ hamwe na kũmeka maũndũ ma ũtugi na kũmarũmbũiya. Jesu nĩ onanagia tha harĩ andũ arĩa maarĩ na mathĩna. Nĩ eeheragĩria andũ mĩnyamaro yao nĩ ũndũ wa tha nyingĩ kũmerekera. (Mathayo 14:14; 20:30-34) Rĩrĩa twegerekania na Jesu harĩ kuonania tha, nĩ tũtũmaga ũtũũro witũ wagagĩre, amu arĩa monanagia tha nĩ magĩaga na gĩkeno. (Atũmwo 20:35) No tuonie arĩa angĩ tha kũgerera ciugo na ciĩko citũ cia ũtugi, na njĩra ĩyo tũkahooreria arĩa marabatara ũteithio witũ. Hihi kũna kuonania tha no kwagagĩrie ũtũũro witũ?

NGEREKANO YA ŨNDŨ WĨYONEIRŨO:

Maria na mũthuri wake Carlos, nĩ ngerekano njega cia kuonania tha. Ithe wa Maria nĩ aakuĩrĩirũo nĩ mũtumia wake, na akoretwo arĩ mũrwaru mũno mĩaka-inĩ ya ica ikuhĩ. Maria na Carlos nĩ maamuoire maikarage nake na nĩ mamũheaga mabataro make mothe. Kaingĩ nĩ magaga toro, o na makamũhanyũkia thibitarĩ  rĩrĩa atoorio nĩ mũrimũ wa cukari. Moigaga atĩ rĩmwe nĩ manogaga mũno. No nĩ makoragwo na gĩkeno, o ta ũrĩa Jesu oigire, tondũ nĩ maiguaga maiganĩire mũno nĩ kũmenya atĩ nĩ maheaga ithe wa Maria ũteithio ũrĩa arabatara.

ŨRĨA ŨRUTANI ŨCIO ŨTEITHAGĨRĨRIA HARĨ KŨGĨA NA ŨTŨŨRO ŨRĨ NA MUOROTO:

Gũkorũo tũrĩ andũ maigaga thayũ kũngĩagagĩria ũtũũro atĩa? Ũndũ ũmwe nĩ atĩ, nĩ tũkenagĩra ũkuruhanu mwega makĩria hamwe na andũ. Nĩ wega twathĩkĩre ũtaaro ũyũ wa Bibilia: “Inyuĩ hanyu-rĩ, kũngĩhoteka, geragiai gũikarania na andũ othe mwĩ thayũ.” (Aroma 12:18) “Andũ othe” nĩ hamwe na andũ aitũ a famĩlĩ na angĩ arĩa mangĩkorũo matarĩ na wĩtĩkio ta witũ. Hihi kũna gũikarania na “andũ othe” tũrĩ na thayũ no kuongerere gĩkeno ũtũũro-inĩ witũ?

NGEREKANO YA ŨNDŨ WĨYONEIRŨO:

Ta wĩcirie ũhoro wa mũtumia wĩtagwo Nair. Kwa ihinda iraya, akoretwo agĩcemania na hatĩka nyingĩ iria igeretie ũhoti wake wa kũiga thayũ, makĩria thĩinĩ wa famĩlĩ yake. Kuuma rĩrĩa mũthuriwe aamũtiganĩirie mĩaka ta 15 mĩhĩtũku, akoretwo akĩrera ciana ciake arĩ wiki. Mũrũ wake ũmwe nĩ aahũthagĩra ndawa cia ũrĩu na kaingĩ nĩ aamwagithagia thayũ hamwe na mwarĩ wake. Nair oigaga atĩ maũndũ marĩa erutĩte Bibilia-inĩ nĩmo mamũhotithĩtie kũiga thayũ, o na hĩndĩ ya magerio ta macio. Nĩ ageragia kwaga gũkararanĩria maũndũ. Nĩ erutanagĩria gũtuga andũ arĩa angĩ, kũmonia tha, na kũmarũmbũiya. (Aefeso 4:31, 32) Etĩkĩtie atĩ kwĩruta gũkorũo arĩ mũigi thayũ nĩ kũmũteithĩtie kũgĩa na ũkuruhanu ũrĩa mwega mũno ũngĩoneka hamwe na andũ a famĩlĩ na andũ angĩ.

Tũngĩrũmĩrĩra ũtaaro wa ũũgĩ wa Jesu, nĩ tũrĩgĩaga na gĩkeno na tũkaigua tũiganĩire ũtũũro-inĩ. No nĩ getha tũkorũo na ũtũũro ũrĩ na muoroto kũna, ningĩ nĩ tũbatiĩ kũmenya maũndũ marĩa marĩ mbere. Hihi ũtũũro no ũkorũo na muoroto angĩkorũo ũndũ ũrĩa tũũĩ no atĩ macũngĩrĩro-inĩ nĩ tũgakũra, tũrware, na tũkue? Ũrĩa kũrĩ nĩ atĩ, ũguo nĩguo ũtũũro ũhaana thĩinĩ wa thĩ ĩno.

O na kũrĩ ũguo, nĩ harĩ ũhoro mwega! Jehova nĩ aigĩte irathimo nyingĩ iria akaahe arĩa othe merutanagĩria ‘kũgĩa na mĩthiĩre ta ĩrĩa Jesu aarĩ nayo.’ Jehova nĩ eranĩire atĩ ica ikuhĩ nĩ ekũrehe thĩ njerũ ĩrĩ na ũthingu, kũrĩa andũ ehokeku magatũũra ta ũrĩa aatanyĩte matũũre—tene na tene marĩ na ũgima mũkinyanĩru wa mwĩrĩ. Kiugo gĩake kiugaga ũũ: “Atĩrĩrĩ, gĩikaro kĩa Ngai kĩĩ hamwe na andũ, nake nĩegũikarania nao, nao matuĩke andũ ake, nake Ngai we mwene agĩage o hamwe nao, [e Ngai wao]; nake nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.”—Kũguũrĩrio 21:3, 4.

Maria, mũtumia wa mĩaka 84 ũrĩa ũgwetetwo gĩcunjĩ-inĩ kĩa mbere, nĩ akenagĩra kĩĩrĩgĩrĩro gĩa gũkona ciugo icio ikĩhinga. Ĩ wee nawe? Hihi no wende kũmenya ũhoro makĩria wĩgiĩ “muoyo ũrĩa muoyo ma”—ũrĩa ũgoka hĩndĩ ya Ũthamaki wa Ngai? (1 Timotheo 6:19) Angĩkorũo no wende, no ũrie Aira a Jehova a kwanyu kana wandĩke marũa kũrĩ acabi a ngathĩti ĩno. *