NDEERETI HAMWE NA MŨIRA WA JEHOVA

Hihi Ngai nĩ Arũmbũyanagia na Mathĩna Maitũ?

Gĩcunjĩ gĩkĩ nĩ kĩonereria kĩa ndeereti ĩrĩa Mũira wa Jehova angĩkorũo nayo hamwe na mũndũ ũngĩ. ta reke tũtue atĩ Mũira wa Jehova wĩtagwo Wanja nĩ aaceera mũciĩ wa mũtumia wĩtagwo Njoki.

NGAI ETĨKĨRĨTIE MĨNYAMARO NĨKĨ?

Wanja: Wĩ mwega? Njĩtagwo Wanja.

Njoki: Na niĩ njĩtagwo Njoki kana nyina wa Njeri.

Wanja: Nĩ ndakena mũno nĩ gũkũmenya nyina wa Njeri.

Njoki: O na niĩ nĩ ndakena?

Wanja: Ũmũthĩ tũratigĩra andũ kabuku gaka itũũra-inĩ rĩrĩ. Getagwo Wee No Wende Kũmenya Ma? Gaka nĩ gaku.

Njoki: Kaĩ arĩ ka ndini?

Wanja: Ĩĩ, nĩ ka ndini. Ta rora ciũria ici ithathatũ cionanĩtio haha. Harĩ ciũria ici-rĩ, nĩ kĩrĩkũ—

Njoki: Ta reke ngũtinie na mĩario. Ti wega ũte mahinda maku ũkĩgeria kwaria na niĩ.

Wanja: Nĩkĩ gĩatũma uuge ũguo?

Njoki: Tondũ, niĩ o na wanyona haha ndiĩtĩkĩtie Ngai.

Wanja: Nĩ weka wega mũno nĩ kwĩyaria. Reke ngũrie atĩrĩrĩ, Hihi ũkoretwo na mawoni macio kuuma tene?

Njoki: Aca, ndatũire thiaga kanitha-inĩ kuuma ndĩ mũnini. No he handũ hakinyire ngĩtiga gũthiaga.

Wanja: Ndinoka gũkũringĩrĩria wĩtĩkio wakwa, nyina wa Njeri. Ĩndĩ no nyende kũmenya kana hihi harĩ ũndũ waatũmire waage gwĩtĩkia Ngai?

Njoki: Ĩĩ, nĩ harĩ. Mami nĩ aagũire na ngari mĩaka 17 mĩthiru.

Wanja: Ũndũ ũcio nĩ wanjĩkĩra kĩeha mũno. Hihi nĩ aaguraririo?

Njoki: Mũno, tondũ o na nĩ onjire.

Wanja: Ũndũ ũcio nĩ wa kĩeha. No nginya ũkorũo nĩ ũgũtuuraga mũno.

Njoki: Ĩĩ, nĩ ũnduuraga mũno. Nĩkĩo ndĩyũragia atĩrĩ, Angĩkorũo Ngai arĩ kuo-rĩ aarekereirie ũndũ ta ũcio nĩkĩ? Nĩ kĩĩ gĩtũmaga Ngai areke tũthĩnĩke ũũ?

HIHI NĨ ŨŨRU KŨŨRIA NGAI KĨŨRIA?

Wanja: Ti ũũru o na hanini kwĩyũria ũguo. Rĩrĩa tũranyamarĩka kaingĩ nĩ twĩyũragia kĩrĩa kĩratũma tũnyamarĩke. Ma nĩ atĩ, o na andũ amwe ehokeku arĩa magwetetwo thĩinĩ wa Bibilia nĩ meeyũragia ciũria ta icio!

Njoki: Nĩguo?

Wanja: Ĩĩ, nĩguo. No wende nguonie Bibilia-inĩ mũndũ ũmwe weyũririe ũguo?

Njoki: No nyende kuona.

Wanja: Ta rora wone ũrĩa Habakuku mũnabii mũthingu oririe Ngai, ta ũrĩa handĩkĩtwo thĩinĩ wa Habakuku mũrango wa 1, mũhari wa 2 na wa 3, oririe ũũ: “Ĩ Jehova, nĩ nginya hĩndĩ ĩ ngũtũũra ngũkayagĩra na ndũnjigue? Ndũire ngũkayagĩra nĩ ũndũ wa maũndũ ma ũhinya, nawe ũkaaga kũhonokania. Ũtũmaga ndĩonere gũgĩĩkwo ũũru, na ũkandekereria nyonage maũndũ ma ũremi nĩ ũndũ kĩ?” Ciũria icio hihi nĩ ta iria wĩyũragia?

Njoki: Ĩĩ, nĩ ta cio.

Wanja: Ngai ndaagũthũkĩire Habakuku nĩ ũndũ wa kũmũria ciũria icio, o na ndaigana kũmwĩra atĩ nĩ aabataraga gũkorũo na wĩtĩkio makĩria.

Njoki: Ndirĩ ndeciria ũguo.

JEHOVA NĨ ATHŨIRE KUONA TŨKĨNYAMARĨKA

Wanja: Bibilia ĩrutanaga atĩ Ngai nĩ onaga rĩrĩa tũranyamarĩka na atĩ nĩ atwĩciragia.

Njoki: Atĩ nĩ atwĩciragia?

Wanja: Ta reke nguonie ngerekano ĩmwe thĩinĩ wa Thama 3:7. No wende gũthoma?

 Njoki: Ĩĩ, no thome. Ĩroiga ũũ: “Nake Jehova akiuga atĩrĩ, Ti-itherũ nĩnyonete mĩnyarirĩko ya andũ akwa arĩa marĩ Misiri, na ngaigua kĩrĩro kĩao nĩ ũndũ wa akaburũ akuo, tondũ nĩnjũĩ maruo marĩa marĩ namo.”

Wanja: Nĩ ngatho. Kũringana na rĩandĩko rĩu-rĩ, hihi Ngai nĩ onaga rĩrĩa andũ ake maranyamarĩka?

Njoki: Ĩĩ, haroneka ta arĩ guo.

Wanja: Na to kuona onaga rĩrĩa tũranyamarĩka. Ta rora rĩngĩ mũhari ũcio ũgĩthiĩ gũthira ũrĩa ũroiga. Ngai aroiga ũũ: “Nĩnjũĩ maruo marĩa marĩ namo.” Hihi ciugo icio nĩ cia Ngai ũtaiguaga tha na ũtarũmbũyanagia na mathĩna ma andũ?

Njoki: Aca tiguo.

Wanja: Ũhoro wa ma nĩ atĩ Ngai nĩ onaga rĩrĩa tũranyamarĩka na ũndũ ũcio ũkamũthĩnia mũno.

Njoki: Ũcio nĩ ũhoro wa ma.

Wanja: Tũrĩ o hau, ta reke tũthome ngerekano ĩngĩ yonanagia hĩndĩ andũ a Ngai manyamarĩkaga. Ĩrĩ thĩinĩ wa Isaia 63:9. Gĩcunjĩ kĩa mbere kĩa rĩandĩko rĩu kiugaga ũũ: “Mathĩna-inĩ mao mothe-rĩ, o nake nĩaathĩnĩkire.” Ũkuona atĩa, hihi Ngai nĩ aaturirũo nĩ kuona andũ ake makĩnyamarĩka?

Njoki: Ĩĩ, haroneka nĩ aatuurirũo mũno.

Wanja: Ũhoro wa ma nyina wa Njeri nĩ atĩ, Ngai nĩ atũrũmbũyagia mũno, na nĩ athũire kuona tũgĩthĩnĩka. Nĩ atuuragwo rĩrĩa tũranyamarĩka.

NĨ KĨĨ GĨTŨMĨTE AAGE KŨNIINA MĨNYAMARO?

Wanja: No nyende gũkuonia kaũndũ kangĩ itanathiĩ.

Njoki: Hatirĩ na thĩna.

Wanja: Ta rora ũrĩa Bibilia yugaga ũhoro-inĩ wĩgiĩ hinya wa Ngai. Rĩandĩko rĩrĩa ndĩrenda twĩcirie ũhoro warĩo nĩ Jeremia 10:12. Nĩ ũgũthoma?

Njoki: Ĩĩ, reke thome. Rĩroiga ũũ: ‘Jehova nĩwe wombire thĩ na hinya wake, ningĩ nĩ ũũgĩ wake ũtũmaga ĩikare ĩrũmĩte; ningĩ nĩwe waatambũrũkirie matu-mairũ na ũtaũku ũrĩa ataũkĩirũo nĩguo.’

Wanja: Nĩ ngatho. Ta reke twĩcirie ũhoro wa rĩandĩko rĩu hanini. Hihi nĩ ũkuona ta Ngai aahũthĩrire hinya mũingĩ kũũmba igũrũ na thĩ na indo ciothe iria irĩ kuo?

Njoki: No mũhaka nĩ aahũthĩrire hinya mũingĩ.

Wanja: Kwoguo, angĩkorũo Ngai nĩ aahũthĩrire hinya mũingĩ ũguo kũũmba indo ciothe-rĩ, na githĩ ndakĩrĩ na hinya wa gũcirora?

Njoki: Nĩ ma.

Wanja: Ta wĩcirie ũhoro wa mami wanyu. Nĩ kĩĩ kĩratũma ũigue ruo wona agĩthĩnĩka?

Njoki: Tondũ nĩ mami na nĩ ndĩmwendete mũno.

Wanja: Ĩ ũngĩkorũo na ũhoti wa kũmũhonia-rĩ, hihi no ũmũhonie?

Njoki: Ĩĩni mũno!

Wanja: Ta reke twĩcirie ũhoro ũcio hanini. Bibilia ĩrutanaga atĩ Ngai nĩ oĩ mathĩna maitũ, nĩ athĩnĩkaga rĩrĩa tũranyamarĩka, na arĩ na hinya mũingĩ mũno. Ndiũĩ kana nĩ wona atĩ Ngai nĩ kwĩgirĩrĩria akoragwo egirĩrĩirie mũno kwaga kũingĩrĩra nĩguo aniine mĩnyamaro itũ o rĩmwe?

Njoki: Ndirĩ ndeciria ũguo.

Wanja: Hihi nĩ ũkuona ta akoragwo na gĩtũmi kĩega gĩa kwaga kuoya ikinya nĩgetha aniine mathĩna maitũ? *

Njoki: Hmm, ngwĩciria nĩ arĩ.

Wanja: Haiya! Ndaigua ta mwana waku ararĩra, reke ngoka rĩngĩ, nĩguo twarĩrĩrie ũndũ ũcio makĩria.

Njoki: Nĩ wega mũno. Thiĩ ũgoka. *

Hihi nĩ harĩ kĩũria kĩgiĩ Bibilia waneyũria? Kana hihi no wende kũmenya kĩrĩa gĩtũmaga Aira a Jehova metĩkie kana gwĩka ũndũ mũna? Angĩkorũo nĩguo, ũria Mũira wa Jehova o wothe agũtaarĩrie. Nĩ egũkena mũno kwaranĩria nawe.

[Ũhoro wa magũrũ-inĩ]

[Mbica karatathi ka 14]