Hihi No Wĩhoke Ndini Ũhoro-inĩ Wĩgiĩ Mbeca?
Hihi No Wĩhoke Ndini Ũhoro-inĩ Wĩgiĩ Mbeca?
Estelle * nĩ aathiaga kanitha-inĩ na ciana ciake cigana ũna ategũtĩrĩria. Oigire ũũ: “Nderire mũtongoria ũmwe wa kanitha atĩ nĩ ngwenda kwĩruta Bibilia.” No mũtongoria ũcio ndaigana kũmũruta. Macũngĩrĩro-inĩ Estelle agĩtiga gũthiaga kanitha. Aacokire akiuga ũũ: “Atongoria a kanitha maanyandĩkĩire marũa makĩnjĩra atĩ o na ndaga gũthiaga ndĩmatũmagĩre mbeca. Ngĩmenya ũũ: ‘Matiendaga kũmenya kana nĩ ngũthiĩ kanitha; ũndũ ũrĩa meciragia ũhoro waguo no mbeca ciakwa.’”
Nake Angelina, ũrĩa ũkoretwo arĩ mũrũmĩrĩri wa ndini oigire ũũ: “Kanitha-inĩ ũrĩa ndathiaga, maathiũrũrũkagia kĩondo kĩa mũhothi maita matatũ o hĩndĩ ya ithomo rĩa kanitha, na hĩndĩ ciothe twerĩgagĩrĩrũo tũrute mũhothi. Hingo ciothe no mbeca meetagia. Ngĩĩra ũũ: ‘Andũ aya matikoragwo na roho wa Ngai.’”
Hihi ndini cia kũrĩa ũkoragwo nĩ ihũthagĩra njĩra cia ĩmwe kwa ĩmwe kana cia waara gwĩtia andũ mbeca? Na hihi Bibilia ĩrutanaga atĩa?
BIBILIA ĨRUTANAGA ATĨA?
Jesu, o we mwambĩrĩria wa Ũkristiano oigire ũũ: “Mũheetwo o ro tũhũ, heanagai o ro tũhũ.” (Mathayo 10:8) Ndũmĩrĩri ya Bibilia ndĩngĩgũrĩka na yagĩrĩirũo kũheagwo andũ othe arĩa maramĩbatara.
Akristiano a tene-rĩ maarutaga kũ mbeca cia kũrũmbũiya mabataro ma kanitha?
O mũndũ aarutaga ‘o ta ũrĩa acirĩire gwĩka na ngoro yake, na atekũruta kĩndũ ta egũkĩiguĩra ruo, kana ta arĩ kũringĩrĩrio: nĩ gũkorũo Ngai endaga mũndũ ũrĩa ũkũheana aheane akenete.’ (2 Akorintho 9:7) Mũtũmwo Paulo oigire ũũ: “Twarutaga wĩra . . . ũtukũ na mũthenya, hĩndĩ ĩrĩa twamũhunjagĩria Ũhoro-ũrĩa-Mwega wa Ngai, nĩ getha tũtikae kũritũhĩra mũndũ o na ũmwe wanyu.” (1 Athesalonike 2:9) Paulo aarutaga wĩra wa gũtuma mahema nĩguo ahote kwĩrũgamĩrĩra.—Atũmwo 18:2, 3.
Ĩ NAO AIRA A JEHOVA MEKAGA ATĨA?
Aira a Jehova mathomagĩra nyũmba-inĩ itarĩ cia goro mũno iria ciĩtagwo Nyũmba cia Ũthamaki. Hihi marutaga mbeca ciao kũ? Matithiũrũrũkagia ciondo cia mĩhothi, kana makahe andũ mbahaca cia gwĩtia mbeca. Ithenya rĩa ũguo, arĩa othe makenagĩra irio cia kĩĩroho, no maikie mũhothi wao matekwĩyonania ithandũkũ-inĩ rĩa mĩhothi thĩinĩ wa Nyũmba ya Ũthamaki.
Hatarĩ nganja, mbeca nĩ ihũthĩkaga gũcabithia na gũkinyĩria andũ ngathĩti ĩno. Ĩndĩ, ndũrĩ hĩndĩ ũkona kĩmenyithia gĩa kĩĩbiacara kana gĩa gwĩtia mbeca. Ũndũ ũrĩa ĩĩkagĩrĩra mũno nĩ gũkinyĩria andũ ma ya Bibilia.
Wee ũkuona atĩa: Hihi njĩra ĩyo ya kũruta mĩhothi nĩ ĩringaine na ciugo cia Jesu o hamwe na kĩonereria kĩa Akristiano a tene?
[Kohoro ka magũrũ-inĩ]
^ kib. 2 Marĩĩtwa mamwe thĩinĩ wa gĩcunjĩ gĩkĩ nĩ macenjetio.
[Mbica karatathi ka 4]
[Mbica karatathi ka 4]
Ndini ciagĩrĩire kũruta mbeca ciacio kũ?
