Hihi Jehova nĩ akenagio nĩ ũrĩa ndungata ciake irerutanĩria kũmũtungatĩra? Andũ amwe no moige ndakenaga, moige atĩ Ngai ndatindanagĩra na andũ. No mawoni ta macio nĩ mũgarũ mũno na ũrĩa Ngai ahaana. Kiugo gĩake Bibilia, nĩ gĩtũtaaragĩria ũrĩa Ngai atariĩ. Nĩ gĩtwĩraga atĩ Jehova nĩ akenagio nĩ ũrĩa ndungata ciake irerutanĩria kũmũtungatĩra. Ta wĩcirie ciugo ici cia mũtũmwo Paulo thĩinĩ wa Ahibirania 11:6.

Nĩ ũndũ ũrĩkũ ũbataranagia nĩguo mũndũ akenie Jehova? Paulo aandĩkire ũũ: ‘Gũtarĩ na wĩtĩkio gũtingĩhoteka gũkenia Ngai.’ Rora wone Paulo ndaroiga atĩ hatarĩ wĩtĩkio nĩ ũndũ mũritũ gũkenia Ngai. Ithenya rĩa ũguo, oigĩte atĩ gũtingĩhoteka. Ũguo nĩ kuuga, wĩtĩkio nĩ wa bata nĩguo tũkenie Ngai.

Nĩ wĩtĩkio wa mũthemba ũrĩkũ ũkenagia Jehova? Wĩtĩkio witũ harĩ Jehova wagĩrĩirũo gũkorũo ũkuuĩte maũndũ merĩ. Wa mbere, ‘no kinya twĩtĩkie atĩ nĩ atũire ho.’ Bibilia ingĩ ihũthagĩra ciugo, “etĩkie atĩ ti wa gwĩcirĩrio” na ‘etĩkie atĩ kwĩ Ngai.’ Hihi no tũhote gũkenia Ngai angĩkorũo tũtiĩtĩkĩtie atĩ arĩ kuo? Ningĩ, wĩtĩkio wa ma to gwĩtĩkia atĩ Ngai arĩ kuo tondũ o na ndaimono nĩ ciĩtĩkĩtie ũguo. (Jakubu 2:19) Twagĩrĩirũo kuonania atĩ nĩ twĩtĩkĩtie Ngai arĩ kuo kũgerera ciĩko, ũguo nĩ kuuga gũtũũra kũringana na mũtũũrĩre ũrĩa ũmũkenagia.—Jakubu 2:20, 26.

Wa kerĩ, ‘no kinya twĩtĩkie atĩ,’ Ngai “nĩwe ũheaga andũ arĩa mamũcaragia ngerenwa yao.” Mũndũ ũrĩ na wĩtĩkio wa ma, nĩ akoragwo etĩkĩtie biũ atĩ, kĩyo gĩake gĩa gũtũũra kũringana na mũtũũrĩre ũrĩa ũkenagia Ngai ti gĩa tũhũ. (1 Akorintho 15:58) Hihi no tũhote gũkenia Jehova angĩkorũo tuonaga ta atendete na ta atangĩhota gũtũhe ngerenwa itũ? (Jakubu 1:17; 1 Petero 5:7) Mũndũ ũrĩa ugaga atĩ Ngai ti mũtaana, ndarũmbũyagia andũ, na ndakenagio nĩ kĩyo kĩao, ndamũũĩ kũringana na ũrĩa Bibilia ĩmũguũrĩtie.

Jehova aheaga andũ arĩkũ ngerenwa? Paulo oigĩte atĩ, nĩ “arĩa mamũcaragia.” Ibuku rĩmwe rĩhũthagĩrũo nĩ ataũri a Bibilia rĩonanĩtie atĩ, kiugo gĩa Kĩngiriki kĩrĩa gĩtaũrĩtwo “arĩa mamũcaragia,” gĩtiugĩte “gũthiĩ kũmwetha” ĩndĩ, kiugĩte gũka kũrĩ Ngai “kũmũthathaiya.” Ibuku rĩngĩ rĩtaarĩirie atĩ kiugo kĩu gĩa Kĩngiriki ningĩ nĩ kĩonanagia kwĩrutĩra, na kĩyo kĩrĩa mũndũ agĩrĩirũo gũkorũo nakĩo. Ma nĩ atĩ, Jehova nĩ aheaga ngerenwa arĩa wĩtĩkio wao ũmatindĩkaga kũmũtungatĩra na ngoro yao yothe na kĩyo.—Mathayo 22:37.

Nĩ ngerenwa ĩrĩkũ Jehova aheaga ndungata ciake njĩhokeku? Nĩ amerĩire muoyo wa tene na tene thĩinĩ wa thĩ njerũ, ngerenwa ya bata ĩrĩa ĩguũragia wendo na ũtana wake mũingĩ. (Kũguũrĩrio 21:3, 4) O na ũmũthĩ, Jehova nĩ arathimaga na njĩra nene arĩa mamũcaragia na kĩyo. Nĩ magĩaga na mũtũũrĩre ũrĩ na gĩkeno nĩ ũndũ wa gũtongoragio nĩ roho wa Ngai na kũhũthagĩra motaaro ma Kiugo gĩake.—Thaburi 144:15; Mathayo 5:6.

Hatarĩ nganja, Jehova nĩ Ngai ũkenagio nĩ kĩyo kĩa ndungata ciake njĩhokeku. Hihi kũmenya ũguo nĩ gwatũma wende kũmũkuhĩrĩria makĩria? Angĩkorũo nĩguo-rĩ, na githĩ ti wega wĩrute ũrĩa ũngĩgĩa na ũngĩonania wĩtĩkio ũrĩa ũgũtũma Jehova akũhe ngerenwa?