Ndĩ mũnini, twaikaraga na aciari akwa bũrũri-inĩ wa Faranja, na ũtũũro wakwa warĩ mwega mũno. Baba nĩ aathondekeire mũcuuha, na nĩ ndendete mũno gũteng’ateng’era mũganda-inĩ witũ. Kũrĩ mwaka wa 1966, Aira a Jehova nĩ mookire gwitũ na makĩaria mũno na baba. Thutha wa mĩeri mũgwanja tu, baba agĩtuĩka Mũira wa Jehova. Kahinda kanini thutha ũcio, mami o nake agĩtuĩka Mũira wa Jehova, na kwoguo ndaarereirũo famĩlĩ-inĩ yarĩ na gĩkeno.

Mathĩna makwa maambĩrĩirie kahinda kanini twacoka Sipania, kũrĩa aciari akwa moimĩte. Ndaambĩrĩirie kũigua karuo gaceke moko na thũng’wa-inĩ. Thutha wa gwetha ũteithio wa arigitani aingĩ kwa ihinda rĩa mĩaka ĩĩrĩ, nĩ twathiire kũrĩ ndagĩtarĩ wa mũrimũ wa marũngo, agĩtwĩra ũũ: “Ndiũĩ ingĩmũteithia atĩa.” Mami aigua ũguo akĩambĩrĩria kũrĩra. Ndagĩtarĩ ũcio oigire ũũ: “Arĩ na mũrimũ wa marũngo ũrĩa ũnyitaga ciana, na ciĩga cia thĩinĩ cia mwĩrĩ wake irarũa cio nyene.” * O na gũtuĩka ndarĩ na mĩaka ikũmi, nĩ ndamenyire atĩ maũndũ matiarĩ mega.

Ndagĩtarĩ ũcio oigire ndwarũo kũrĩa ciana irĩ na mĩrimũ ta ĩyo ithondekagĩrũo. Twaingĩra nyũmba ĩyo o ũguo, nĩ ndaanyitirũo nĩ kĩguoya, ndona ũrĩa kwaahanaga. Kwarĩ na mawatho marũmu mũno: Mathĩa a kũu, maanyenjire na makĩnjĩkĩra gĩkuo o ũguo. Ndĩ na maithori maingĩ, ngĩyũria ũũ: ‘Hihi nĩ ngũhota gũikara gũkũ?’

Tondũ aciari akwa nĩ maandũtĩte gũthathaiya Jehova, nĩ ndaaregire kũnyitanĩra na maũndũ marĩa mekagwo kũu ma ndini ya Gatoreki. Mathĩa acio matiataũkagĩrũo nĩ kĩrĩa gĩatũmaga njage kũnyitanĩra nao. Nĩ ndathaithire Jehova angitĩre, na ndaandiganĩirie tondũ kahinda kanini thutha ũcio, ndaiguire ta ũrĩa mwana angĩigua ahĩmbĩirio nĩ ithe ũmwendete.

Aciari akwa nĩ meetĩkĩririo maanjeragĩre o Njuuma. Nĩ maandehagĩra mabuku megiĩ Bibilia nĩguo njĩkĩre wĩtĩkio wakwa hinya. Ciana itietĩkĩrĩtio gũkoragwo na mabuku, no niĩ tu ndetĩkĩrĩtio gũkoragwo namo o hamwe na Bibilia ĩrĩa ndaathomaga  o mũthenya. Ningĩ nĩ ndaahunjagĩria airĩtu amwe ũhoro wĩgiĩ kĩĩrĩgĩrĩro gĩa gũgaatũũra tene na tene thĩinĩ wa Paradiso gũkũ thĩ, kũrĩa gũtagaakorũo na mĩrimũ. (Kũguũrĩrio 21:3, 4) O na gũtuĩka rĩmwe nĩ ndaakoragwo na ihooru, nĩ ndaakenaga kuona atĩ wĩtĩkio wakwa harĩ Jehova wathiaga ũgĩte hinya.

Thutha wa mĩeri ĩtandatũ, nĩ ndaheirũo rũtha na ngĩinũka. O na gũtuĩka ndĩahonete, nĩ ndakenire mũno gũcoka mũciĩ kũrĩ aciari akwa. Marũngo makwa mathiire maagĩte hinya, na ndaakoragwo na ruo rũingĩ mũno. Ngĩũka gũtuĩka tinĩja, ndarĩ mũndũ ũtaarĩ na hinya. Ĩndĩ, ndĩna mĩaka 14 nĩ ndabatithirio, na ngĩtua na ngoro yakwa atĩ ngũtungatĩra Jehova o ũrĩa wothe ingĩhota. O na kũrĩ ũguo, no ndaamũragia ciũria. Ndamũũragia ũũ mahoya-inĩ: “Nĩkĩ arĩ o niĩ? Kaĩ ũtangĩhonia tu ndagũthaitha? Kaĩ ũtarona ũrĩa ndĩranyamarĩka?”

Nĩ ndarĩ na ihinda iritũ mũno ngĩũka kũgimara. Warĩ ũndũ mũritũ mũno gwĩtĩkia atĩ ndingĩahonire. Ndaatindaga ngĩĩringithania na arata akwa arĩa mataarĩ na mathĩna ma mwĩrĩ na maakoragwo na gĩkeno. Nĩ ndaiguaga ndĩmenete, na ngenda gũikaraga ndĩ o wiki. O na kũrĩ ũguo, andũ a famĩlĩ na arata nĩ maandeithagia. Nĩ ngũririkana mũirĩtu ũmwe wetagwo Alicia, waangĩrĩte na mĩaka 20, ũrĩa wacokire gũtuĩka mũrata wakwa wa gĩtĩ kĩa mbere. Nĩ aandeithagia mũno kũiga meciria makwa maũndũ-inĩ mangĩ o hamwe na gwĩciragia andũ arĩa angĩ, nĩ ũndũ ũcio ngĩtiga gwĩciragia ũhoro wa mathĩna makwa.

Rĩrĩa ndakinyirie mĩaka 18, nĩ ndacokereirũo nĩ thĩna mũnene wa mwĩrĩ, ũũ atĩ nginya gũthiĩ mĩcemanio-inĩ ya Aira a Jehova gwatũmaga noge mũno. O na kũrĩ ũguo, ndahũthagĩra mahinda maingĩ ndĩ mũciĩ kwĩruta Bibilia na njĩra ndikĩru. Nĩ ndateithirio nĩ ibuku rĩa Ayubu na rĩa Thaburi kũmenya atĩ, o na gũtuĩka Jehova Ngai ndatũgitagĩra hĩndĩ ciothe kĩĩmwĩrĩ, nĩ atũgitagĩra kĩĩroho. Kũhoyaga kaingĩ nĩ gũtũmĩte ngĩe na ‘ũhoti ũrĩa ũkĩrĩrĩirie’ na “thayũ wa Ngai, ũrĩa ũtangĩmenyeka ũrĩa ũtariĩ.”—2 Akorintho 4:7; Afilipi 4:6, 7.

Ndakinyia mĩaka 22, ngĩambĩrĩria gũthiaga na gakaari ka arũaru. Nĩ ndaamakaga andũ matikanyone ta ndĩ o mũtumia mũrũaru ũtarehota ũrĩ gakaari-inĩ. O na kũrĩ ũguo, gakaari kau nĩ gaatũmire hote kwĩĩkĩra maũndũ mamwe, na nĩ kandeithĩtie mũno. Mũrata ũngĩ wakwa wĩtagwo Isabel, nĩ aanjũririe kana no hũthĩre mathaa 60 kũhunjia, nĩguo tũhunjie nake mweri ũmwe.

Ndionaga ta ũndũ ũcio ũngĩahotekire. Thutha wa kũhoya Jehova andeithie, na kũnyitwo mbaru nĩ arata na andũ a famĩlĩ, nĩ ndaahotire. O na gũtuĩka kũhunjia na gakaari kau ndwarĩ ũndũ mũhũthũ, ndonire mweri ũcio wathira na ihenya, na ngĩhota gũtooria guoya na thoni. Ũndũ ũcio nĩ wangenirie mũno, kwoguo mwaka wa 1996 ngĩambĩrĩria kũhunjagia mathaa maingĩ o mweri ndĩ painia wa mahinda mothe. Itua rĩu nĩ rĩmwe rĩa matua marĩa ma bata mũno ndaanatua. Ngĩĩte na ũrata wa hakuhĩ na Ngai o na ngagĩa na hinya wa mwĩrĩ. Kũhunjagia kaingĩ, nĩ kũndeithĩtie menyithie andũ aingĩ ũhoro wĩgiĩ wĩtĩkio wakwa, o na ngateithia amwe gũtuĩka arata a Ngai.

Kũrĩ mwaka wa 2001, nĩ ndaacemanirie na ũgwati mũũru mũno wa barabara, na ngiunĩka magũrũ makwa merĩ. Ngomete thibitarĩ ndĩ na ruo rũingĩ, nĩ ndaahoire Jehova na ngoro ngĩmwĩra ũũ: “Ndagũthaitha Jehova ndũkaandiganĩrie!” O hĩndĩ ĩyo, mũtumia twariganĩtie nake thibitarĩ akĩnjũria, “Kaĩ ũrĩ Mũira wa Jehova?” Ndiarĩ na hinya wa kwaria, kwoguo ndainainirie mũtwe ngĩmwĩra, “Ĩĩ.” Akĩnjĩra ũũ: “Nĩ njũĩ Aira a Jehova, na nĩ thomaga ngathĩti cianyu kaingĩ.” Ciugo icio nĩ cianyũmĩrĩirie mũno. Ndonire kĩu kĩrĩ gĩtĩo kĩnene mũno, tondũ, o na ndĩna ruo rũu ruothe, no ndaahotire kũhunjia!

Ndaigua wegega, nĩ ndambĩrĩirie kũhunjĩria arũaru arĩa angĩ. Nĩguo hote kũhunjia, mami nĩ aathiũrũrũkagia kũu thibitarĩ ndĩ gakaari-inĩ, ndĩ na plasta magũrũ merĩ. Twathiaga kũrĩ arũaru o mũthenya, tũkamoria ũrĩa maraigua, tũgacoka tũkamatigĩra mabuku maitũ. Ũndũ ũcio ndwarĩ mũhũthũ, ĩndĩ, Jehova nĩ aaheaga hinya.

 Mĩaka ĩigana ũna mĩthiru, ruo rwakwa nĩ rũthiĩte rũingĩhĩte, na makĩria thutha wa baba gũkua. Ĩndĩ, no ngeragia kuona maũndũ na njĩra ĩrĩa yagĩrĩire. Ngeragia o ũrĩa wothe ingĩhota, gũkorũo hamwe na arata na andũ a famĩlĩ, na ũndũ ũcio nĩ ũndeithĩtie kũriganĩrũo nĩ mathĩna makwa. Rĩrĩa ndĩ nyiki, thomaga na ngeeruta Bibilia, na ngahunjĩria arĩa angĩ kũgerera thimũ.

Ningĩ nĩ ngenagĩra gwĩka tũũndũ tũmwe nyendete ta, gũikara nja ngahũũrũo nĩ karũhuho, na kwĩrorera mahũa. Maũndũ macio nĩ matũmaga njokerie Jehova ngatho. Gũkenagĩra tũũndũ twa mathekania ningĩ nĩ kũndeithĩtie mũno. Mũthenya ũmwe tũkĩhunjia ndindĩkĩtwo nĩ mũrata wakwa, nĩ aarũgamire handũ haikũrũkĩrĩru nĩguo aandĩke kaũndũ. O rĩmwe gakaari gakwa gagĩikũrũka na ngĩgũtha ngaari yaigĩtwo handũ. Ithuerĩ nĩ twaamakire mũno, no rĩrĩa tuonire hatirĩ ũndũ mũũru wahanĩka tũkĩĩng’aũrĩra na mĩtheko.

Harĩ maũndũ maingĩ itangĩhota kwĩĩkĩra. Ĩndĩ, njugaga no ngaameka hĩndĩ ĩmwe. Rĩmwe nĩ hingaga maitho “ngacũũthĩrĩria” maũndũ marĩa magaakorũo kuo thĩinĩ wa thĩ njerũ ĩrĩa Ngai eranĩire. (2 Petero 3:13) Ndĩyonaga ngĩĩtwara na magũrũ makwa, na ngĩkenera ũtũũro. Ciugo ici cia Mũthamaki Daudi nĩ cinjĩkĩraga ngoro mũno: “Eterera o Jehova: gĩa na hinya, na wĩũmĩrĩrie ngoro: ĩĩ-ni, no gĩeterere Jehova.” (Thaburi 27:14) O na gũtuĩka mwĩrĩ wakwa ũrathiĩ o wagĩte hinya, Jehova nĩ aheaga hinya ũngĩ. O ũrĩa thiaga njagĩte hinya, noguo ngĩaga na hinya ũngĩ.