Mĩaka-inĩ yakwa ya unyinyi, famĩlĩ itũ yaikaraga hakuhĩ na taũni ya Leipzig, mwena wa irathĩro wa Njĩrĩmani. Ndĩ na mĩaka ĩtandatũ, nĩ twathamĩire bũrũri wa Brazil na thutha ũcio Ecuador nĩ ũndũ wa wĩra ũrĩa baba aarutaga.

Ndĩ na mĩaka 14, nĩ ndaathire cukuru wa gũkoma bũrũri-inĩ wa Njĩrĩmani. Tondũ aciari akwa maaikaraga kũraya na niĩ Amerika ya Mũhuro, matingĩahotire kũndora. Ngĩtuĩka mũndũ mwĩyathi. Ndieciragia mũno ũrĩa ciĩko ciakwa ingĩahutirie arĩa angĩ.

Ndĩ na mĩaka 17, aciari akwa nĩ macokire Njĩrĩmani. Kĩambĩrĩria-inĩ nĩ ndaikarire mũciĩ twĩ hamwe nao. No mwerekera wakwa wa kwĩyatha nĩ watũmaga ũkorũo ũrĩ ũndũ mũritũ gũikara rungu rwa watho wa aciari akwa. Ndĩ na mĩaka 18 nĩ ndoimire mũciĩ.

Nĩ ndaiguaga itaiganĩire na ngĩambĩrĩria kwĩyũria bata wa ũtũũro nĩ ũrĩkũ. Thutha wa gũthuthuria mĩikarĩre ya andũ na ikundi itiganĩte iria itetagĩra thĩ ndĩkanangwo, ngĩona ũndũ ũrĩa ingĩka ũtũũro-inĩ wakwa nĩ gũceera na kwĩrorera thĩ mbere ya andũ mamĩanangĩte.

Nĩ ndoimire Njĩrĩmani, ngĩgũra nduthi na ngĩthiĩ Afrika. Thutha wa kahinda, nduthi yakwa nĩ ya thũkire na ngĩcoka Njĩrĩmani kũmĩgũrĩra indo imwe iria yabataraga. Ndĩ kũu nĩ ndekorire gĩcũa-inĩ kĩmwe bũrũri-inĩ wa Portugal. Ngĩciria ndigane na nduthi na ngĩetha gatarũ ga gũthiĩ kũrĩa ndendaga.

Ngĩnyitanĩra na gĩkundi kĩmwe kĩa andũ ethĩ arĩa meeharagĩria kũringa Iria rĩa Atlantic. Ũmwe wao arĩ mũirĩtu wetagwo Laurie ũrĩa twacokire kũhikania nake. Twambire gũthiĩ gĩcigĩrĩra gĩa Caribbean. Thutha wa gũikara gwa kahinda kanini gĩcigĩrĩra-inĩ gĩa Puerto Rico tũgĩcoka Njĩrĩmani rĩngĩ. Nĩ twatanyaga kuona gatarũ karĩa tũngĩatuire nyũmba itũ. No thutha wa gũkorũo tũgĩcaria gatarũ kau kwa ihinda rĩa mĩeri ĩtatũ, nĩguokire ũndũ ũterĩgĩrĩirũo, ngĩingĩra mbũtũ-inĩ ya Njĩrĩmani.

Ndatungatire mwaka ũmwe na mĩeri ĩtatũ mbũtũ-inĩ ya Njĩrĩmani. Ihinda-inĩ rĩu, nĩ twahikanirie na Laurie, na tũkĩhaarĩria ũrĩa tũngĩthiĩ na mbere na mũtũũrire witũ wa gũceeraga kũndũ gũtiganĩte. Kahinda kanini itanaingĩra mbũtũ-inĩ ya  mbirarũ nĩ twagũrĩte gatarũ. Ndĩ o mbũtũ-inĩ ya mbirarũ, nĩ twathondekire gatarũ gaitũ o kahora, ũndũ tũngĩakahũthĩrire karĩ nyũmba itũ rĩrĩa tũracera. Twabangaga gũikara gatarũ-inĩ kau na tũcerage kũndũ gũtiganĩte tũkĩĩroragĩra thĩ. No thutha wa kuuma mbũtũ-inĩ ya mbirarũ, o ngĩthondekaga gatarũ kau, nĩ ndacereirũo nĩ Aira a Jehova na ngĩambĩrĩria kwĩruta Bibilia nao.

Kĩambĩrĩria-inĩ ndionaga harĩ na bata gũcenjia mũtũũrĩre wakwa. Nĩ twahikanĩtie na nĩ ndaatigĩte kũnyua thigara. (Aefeso 5:5) Ha ũhoro wa mĩbango itũ ya gũceera na gatarũ, ndoonaga atĩ kũhũthĩra ũtũũro witũ kwĩrorera magegania ma ũũmbi wa Ngai warĩ ũndũ wa bata.

O na kũrĩ ũguo, nĩ ndabataraga gwĩka ũgarũrũku makĩria ũmũndũ-inĩ wakwa. Tondũ ndaarĩ mwĩtĩi mũno na ndekaga ũrĩa ngwenda, nĩ ndeciragia mũno igũrũ rĩgiĩ ũhoti wakwa na maũndũ marĩa ndahingĩtie ũtũũro-inĩ. Ndeciragia o ũhoro wakwa tu.

Mũthenya ũmwe nĩ ndaathomire igũrũ rĩgiĩ Mahunjio ma Jesu ma Kĩrĩma-inĩ. (Mathayo, mũrango wa 5-7) Kĩambĩrĩrĩa-inĩ, ndiataũkĩirũo wega nĩ ũrĩa Jesu aarutanire igũrũ rĩgiĩ gĩkeno. Kwa ngerekano, oigire atĩ gũkena nĩ arĩa anyotu na ahũtu. (Mathayo 5:6) Nĩ ndaarigirũo nĩ ũrĩa gũkorũo na ũbataro kũngĩtũma mũndũ agĩe na gĩkeno. O ũrĩa ndaathire na mbere kwĩruta, nĩ ndaamenyire atĩ ithuothe nĩ tũkoragwo na ũbataro wa kĩĩroho ĩndĩ no mũhaka twĩnyihie na twĩtĩkĩre atĩ nĩ tũrabatara ũteithio nĩguo ũbataro ũcio ũhingio. O ta ũrĩa Jesu oigire, “Gũkena-rĩ, nĩ arĩa mahũtagĩra maũndũ marĩa ma ũthingu, na makamanyotera, nĩ gũkorũo nĩ makahũnio.”—Mathayo 5:6.

Twaambĩrĩria kwĩruta Bibilia tũrĩ bũrũri wa Njĩrĩmani tũrĩ na Laurie, nĩ twathaamĩire Faranja na thutha-inĩ ũcio Italy. O kũrĩa guothe twathiaga nĩ twakoraga Aira a Jehova. Nĩ ndagucĩrĩirio mũno nĩ wendo wao wa kuuma ngoro-inĩ, o hamwe na ũrũmwe wao. Nĩ ndonire atĩ Aira a Jehova makoragwo marĩ aarĩ na ariũ a Ithe witũ a thĩ yothe. (Johana 13:34, 35) Thutha wa ihinda tũrĩ na Laurie nĩ twabatithirio.

Thutha wa kũbatithio, nĩ ndaathire na mbere gwĩka ũgarũrũku ũmũndũ-inĩ wakwa. Tũrĩ na Laurie twabangĩte gũceera tũgerete iria-inĩ tũikũrũke Afrika tũcoke tũtuĩkanie Iria rĩa Atlantic nginya Amerika ya (US). Hĩndĩ ĩyo tũrĩ iria-inĩ na Laurie gatarũ-inĩ gaitũ ndaikia maitho makwa mbere, ngĩona tũrigicĩirio nĩ iria inene mũno, hau nĩho ndonire ũrĩa itarĩ kĩene ngĩringithanio na Mũũmbi witũ mũnene. Tondũ ndaarĩ na mahinda maingĩ tũrĩ iria-inĩ nĩ ndeerutanĩirie biũ gũthoma Bibilia. Nĩ ndeekĩrirũo ngoro mũno nĩ rũgano rwa ũtũũro wa Jesu rĩrĩa aarĩ gũkũ thĩ. Aarĩ mũndũ mũkinyanĩru, na warĩ na ũhoti mũnene wa gwĩka maũndũ no ndarĩ hĩndĩ eetũgĩririe. Ũtũũro-inĩ wake ndeciragia ũhoro wake tu ĩndĩ eeciragia ũrĩa angĩkenia Ithe wake wa igũrũ.

Ndeecũrania igũrũ rĩa kĩonereria kĩa Jesu, nĩ ndonire atĩ nĩ ndabataraga kũiga Ũthamaki wa Ngai mbere ũtũũro-inĩ wakwa handũ ha kũũthinĩkĩrĩria maũndũ-inĩ matiganĩte marĩa ndendaga gwĩka. (Mathayo 6:33) Rĩrĩa twakinyire bũrũri-inĩ wa Amerika ya (US) nĩ twatuire itua rĩa gũikara kuo, nĩguo tũthingate maũndũ ma Ũthamaki.

Mũtũũrĩre wakwa wa hau kabere wa gũkorũo itekũingĩranwo na andũ mũno nĩ watũmaga ngorũo itarĩ na ma igũrũ rĩgiĩ matua maingĩ marĩa ndekaga. O na kũrĩ ũguo, rĩu nĩ nyonete kĩhumo kĩa ũũgĩ ũrĩa wa ma gĩa kũndongoragia. (Isaia 48:17, 18) Ningĩ nĩ menyete muoroto wa ũtũũro ũrĩa itaramenyete hau kabere na nĩguo gũthathaiya Ngai na gũteithia andũ arĩa angĩ mamũmenye.

Nĩ ũndũ wa kũhũthĩra motaaro ma Bibilia, nĩ tũhotete kũgaacĩrithia kĩhiko giitũ na njĩra nene. Ningĩ nĩ tũrathimĩtwo na mwana wa kairĩtu ũrĩa ũmenyete na akenda Jehova mũno.

O na kũrĩ ũguo, ti kuuga atĩ ũtũũro witũ ũkoretwo ũtarĩ na mathĩna. Indĩ nĩ ũndũ wa ũteithio wa Jehova nĩ twĩhotorete gũthiĩ na mbere ũtungata-inĩ, o tũkĩhokaga Jehova.—Thimo 3:5, 6.