Bibilia ĩtwĩraga atĩ hĩndĩ ya ithirĩro nĩ gũgaakorũo mwanangĩko: “Hĩndĩ ĩo nĩgũkagĩa thĩna mũnene ũtarĩ wonwo taguo gwata kĩambĩrĩria gĩa thĩ nginya rĩu . . . Na tiga matukũ macio maakuhĩhirio, gũtirĩ mũndũ ũngĩkahonoka.” (Mathayo 24:​21, 22) No Ngai nĩ eranĩire atĩ andũ aingĩ nĩ makaahonoka: “Thĩ nĩ gũthira ĩrathira, . . .  no rĩrĩ, ũrĩa wĩkaga ũrĩa Ngai endaga, ũcio nĩ wa gũtũũra nginya tene o na tene.”​—1 Johana 2:17.

Angĩkorũo no wende gũkaahonoka hĩndĩ ya ithirĩro na ‘ũtũũre nginya tene o na tene’ wagĩrĩirũo gwĩka atĩa? Hihi wagĩrĩirũo nĩ kwambĩrĩria kwĩigĩra indo kana gwetha ũrĩa ũngĩĩgitĩra kĩĩmwĩrĩ? Aca. Bibilia ĩtwĩkĩraga ngoro twĩke maũndũ ngũrani na macio. Tũthomaga ũũ: “Kuona atĩ indo icio ciothe itirĩ hingo itagathira ũguo-rĩ, inyuĩ mwagĩrĩirũo nĩ gũikara na mĩikarĩre ĩtariĩ atĩa, ũhoro-inĩ wa mĩtũũrĩre ya ũtheru, na ya kwĩamũrĩra Ngai, mũgĩtanyaga na mũkĩĩriragĩria mũno mũthenya ũcio wa Ngai ũgĩgakinya?” (2 Petero 3:​10-12) Mĩhari ĩrĩa ĩrigicĩirie rĩandĩko rĩu ĩronania atĩ “Indo icio ciothe” igaathira nĩ hamwe na thirikari cia thĩ ĩno, o hamwe na mathondeka ma cio na arĩa othe mathuuraga wathani wa cio handũ ha wa Ngai. Hatarĩ nganja, o na tũngĩigĩra indo, itingĩtũhonokia hĩndĩ ya ithirĩro.

Ma nĩ atĩ, kũhonoka gwitũ kwĩhocetie harĩ kwĩyamũrĩra Jehova Ngai o hamwe na kũmenya mĩthiĩre ĩrĩa ĩmũkenagia. (Zefania 2:3) Handũ ha kũrũmĩrĩra mũingĩ na kwaga gũtindanĩra na maũndũ marĩa maronania wega atĩ tũratũũra mahinda ma mwanya, tũbatiĩ gũikara ‘tũgĩtanyaga na tũkĩĩriragĩria mũno mũthenya ũcio wa Ngai.’ Aira a Jehova no makuonie kuuma Bibilia-inĩ ũrĩa ũngĩka nĩguo ũkaahonoka mũthenya ũcio ũroka.