Paul, mũthuri wĩna ciana igĩrĩ, oigire ũũ: “Thutha wa bũrũri witũ kũgũmĩrũo nĩ thĩna wa mbeca kwaga kĩene, irio nĩ ciagĩire goro na ikĩnyiha. Twaaraga raini mathaa maingĩ, no kaingĩ irio ciathiraga tũtakinyĩrĩirũo. Andũ nĩ maahĩnjĩte mũno kuumana na nga’ragu, o na amwe maaringĩkaga kũu bara-inĩ. Thogora wa indo cia o mũhaka wahaicire ũgĩkinya mamilioni, na mabilioni. Macũngĩrĩro-inĩ mbeca ikĩaga kĩene. Mbeca ciakwa iria ciarĩ bengi, marĩhi ma kũrũgamĩrĩra ũndũ ũterĩgĩrĩirũo (Insurance), na mbeca iria mũndũ arĩhagwo ũkũrũ-inĩ ikĩũrĩra.”

Paul nĩ amenyaga atĩ, nĩguo famĩlĩ yake ĩthiĩ na mbere na gũtũũra, no mũhaka angĩahũthĩrire “ũũgĩ ũrĩa mũkinyanĩru.” (Thimo 3:21) Ataarĩirie ũũ: “Ndaarĩ bundi wa thitima, no nĩ ndeetĩkagĩra kũruta wĩra o wothe ũrĩa ũngĩonekire, o na ũrĩ wa mbeca nyinyi. Amwe maandĩhaga na irio kana indo cia nyũmba. Ingĩarĩhirũo na mĩtĩ ĩna ya thabuni, ndaahũthagĩra ĩrĩ, ngendia ĩyo ĩngĩ. Thutha ũcio ngĩgĩa na tũcui 40. Rĩrĩa twanenehire, nĩ ndaatwendirie na ngĩgũra tũngĩ 300. Thutha-inĩ ngĩkũũrania ngũkũ 50 na mũtu wa ngima kilo 50. Mũtu ũcio nĩ warĩirũo nĩ famĩlĩ yakwa hamwe na famĩlĩ ĩngĩ gwa kahinda karaihu.”

Paul ningĩ nĩ aamenyaga atĩ ũndũ ũrĩa wa ũũgĩ makĩria mũndũ angĩka nĩ kwĩhoka Ngai. Tũngĩĩka ũrĩa Ngai atwathaga twĩke, nĩ atũteithagia. Ũhoro-inĩ wa gwetha indo cia o mũhaka ũtũũro-inĩ, Jesu oigire ũũ; “Mũtigatuĩke andũ a mathangania. . . . Ithe wanyu nĩoĩ atĩ nĩ mũbataragio nĩ indo icio.”—Luka 12:29-31.

Ũndũ wa kĩeha nĩ atĩ, thũ nene ya Ngai, Shaitani, nĩ ahenereirie andũ aingĩ, ũtũũro-inĩ wao magakorũo makĩrũmbũyania na maũndũ ma kĩĩmwĩrĩ tu. Andũ nĩ matangĩkaga mũno nĩ ũndũ wa mabataro mao, ma o mũhaka na mangĩ ma gwĩcirĩrio, na magatangĩka makĩgeria kũgĩa na indo matarabatara. Aingĩ meingagĩria mathirĩ-inĩ, makoona ũũma wa ciugo ici,  “ũrĩa ũkombaga atũũraga e ngombo ya mũmũkomberi.”—Thimo 22:7, The Holy Bible in Gĩkũyũ Language.

Andũ amwe matuaga matua matarĩ mega o na hanini. Paul ataarĩirie ũũ: “Andũ aingĩ arĩa twariganĩtie nao nĩ maatigire famĩlĩ ciao na arata, magĩthiĩ gũcaria ‘ũtũũro mwega’ rũraya. Amwe maathire matarĩ na maratathi marĩa maheanagwo nĩ thirikari ma gwĩtĩkĩria mũndũ gũthamĩra bũrũri ũngĩ, no mationire wĩra. Kaingĩ meekoraga makĩũrĩra borithi na makararaga ithaku-ini cia nduka. Matiaheire Ngai mweke wa kũmateithia. No twatuire itua rĩa kũhiũrania na mathĩna ma mbeca tũrĩ hamwe ta famĩlĩ, tũgĩteithio nĩ Ngai.”

Paul athiĩte na mbere kuuga ũũ: “Jesu oigire: ‘Tigagai gwĩtanga nĩ ũndũ wa rũciũ: nĩgũkorũo rũciũ nĩrũgetangĩkĩra ruo rũene. O mũthenya nĩũiganagwo nĩ ũũru waguo mwene.’ Kwoguo mahoya makwa ma o mũthenya maarĩ atĩ Ngai ‘atũhe ũmũthĩ irio citũ cia gũtũigana’ nĩgetha tũthiĩ na mbere na gũtũũra. Na nĩ aatũteithirie, o ta ũrĩa Jesu eeranĩire. Ti hĩndĩ ciothe tuonaga kĩrĩa tweriragĩria. Hĩndĩ ĩmwe nĩ ndaarire raini ya kũgũra irio itekũmenya kĩrĩa kĩendagio. Ndaakinyĩrĩirũo-rĩ, ngĩkora nĩ yogurt yendagio. Niĩ ndimĩendete. No tondũ ona yogurt no irio-rĩ, ũtukũ ũcio nĩyo twanyuire. Nĩ njokagĩria Ngai ngatho tondũ ihinda rĩu rĩothe andũ akwa matioimire mararĩire.” *

“Rĩu maũndũ ti maritũ mũno kĩĩmbeca. No kũgerera maũndũ marĩa twĩyoneire, nĩ twĩrutĩte atĩ kwĩhoka Ngai nĩyo ndawa ĩrĩa njega ya mĩtangĩko. Jehova * nĩ arĩtũteithagia twathiĩ na mbere gwĩka wendi wake. Nĩ tuonete ũũma wa ciugo ici cia Thaburi 34:8: ‘Ĩ camai muone atĩ Jehova nĩ mwega: gũkena-rĩ, nĩ mũndũ ũrĩa ũrahĩire harĩ we.’ Nĩ ũndũ ũcio, tũtiĩtigagĩra kũhiũrania na mahinda maritũ kĩĩmbeca rĩngĩ.”

“Rĩu nĩ tũtaũkĩirũo wega biũ atĩ kĩrĩa andũ mabataraga nĩguo matũũre, ti wĩra kana mbeca, no nĩ irio. Twetereire mũno rĩrĩa kĩĩranĩro gĩkĩ kĩa Ngai gĩkaahingio: ‘Bũrũri ũrogĩaga na bũthi wa ngano.’ Kwa ihinda rĩrĩ, ‘tũngĩgĩa na irio na nguo-rĩ, no tũiganũo nĩcio.’ Nĩ tũũmagĩrĩrio nĩ ciugo ici cia Bibilia: ‘Mĩikarĩre-inĩ yanyu-rĩ, ikaragai mũtegũkorokera mbia; na mũiganagwo nĩ indo iria mwĩ nacio: amu Ngai we mwene nĩoigĩte atĩrĩ, Ndirĩ hĩndĩ ngagũtigĩrĩra, kana ndigane nawe o na atĩa. Tondũ ũcio nĩtwetaga kuuga, tũũmĩrĩirie, atĩrĩ: Mwathani nĩwe mũndeithia; ndigetigĩra.’” *

Nĩ habataranagia wĩtĩkio ‘gũtwarana na Ngai’ ta ũrĩa Paul na famĩlĩ yake mareeka. (Kĩambĩrĩria 6:9, Holy Bible in Gĩkũyũ-Biblica) Kĩonereria kĩa Paul kĩa wĩtĩkio na ũũgĩ, no gĩtũteithie kwĩruta maũndũ ma bata angĩkorũo nĩ tũragerera moritũ ma mbeca rĩu, kana hihi ihinda rĩrĩũka.

Ĩ angĩkorũo mathĩna ma famĩlĩ nĩmo maratũma tũtangĩke?