Mweri-inĩ wa Julaĩ 2022, nĩ kwarĩ na riboti nyingĩ ciĩgiĩ kuongerereka kwa ũrugarĩ thĩinĩ wa thĩ yothe:

•   “Anene a bũrũri wa China nĩ maheete andũ mũkaana riita rĩa kerĩ mweri-inĩ ũyũ, atĩ nĩ gũgũkorũo na ũrugarĩ ũkĩrĩtie njano hakuhĩ matũũra-inĩ 70.”—Julaĩ 25, 2022, CNN Wire Service.

•   “Kũrĩ na mĩaki mĩingĩ ya mĩtitũ mabũrũri-inĩ maingĩ ma Rũraya nĩ ũndũ wa ũrugarĩ ũkĩrĩtie njano.”—Julaĩ 17, 2022, The Guardian.

•   “Taũni-inĩ nyingĩ thĩinĩ wa Amerika (US) nĩ kwarĩ na ũrugarĩ mũingĩ mũthenya wa Kiumia, kuumana na ũrugarĩ ũkĩrĩtie njano ũrĩa ũtheremete gĩcigo-inĩ kĩa Irathĩro na icunjĩ imwe cia gĩcigo kĩa Mũhuro na kĩa Ithũĩro rĩa mwena wa rũgongo.”—Julaĩ 24, 2022, The New York Times.

 Maũndũ macio maronania atĩa? Hihi mũthia-inĩ thĩ nĩ ĩkaarema gũikarĩka? Bibilia yugaga atĩa?

 Ĩĩ. Ũrugarĩ ũkĩrĩtie njano nĩ ũringanaga na maũndũ marĩa Bibilia yarathĩte megiĩ mahinda maitũ. Kwa ngerekano, Jesu nĩ aarathĩte atĩ nĩ tũngĩkona “maũndũ ma kũmakania.” (Luka 21:11) Kuongerereka kwa ũrugarĩ thĩinĩ wa thĩ nĩ kũmakĩtie andũ aingĩ na mageciria atĩ ciĩko cia andũ nĩ ikũniina thĩ.

 Aca. Ngai oombire thĩ ĩtũũragwo nĩ andũ tene na tene. (Thaburi 115:16; Kohelethu 1:4) Ndakaarekereria andũ manange thĩ. Handũ ha ũguo, “[akaananga] arĩa manangaga thĩ” o ta ũrĩa eranĩire.—Kũguũrĩrio 11:18.

 Ta wĩcirie morathi maya merĩ marĩa monanagia ũndũ ũngĩ Ngai eranĩire:

•   “Werũ na bũrũri ũrĩa mũngʼaru nĩ igaakena mũno, werũ ũrĩa mwaraganu nĩ ũgaakena na ũcanũke ta mahũa ma nyeki-inĩ.” (Isaia 35:1) Ngai ndakaareka thĩ ĩtuĩke ta werũ ũtangĩikarĩka, no nĩ gũthondeka agaathondeka kũrĩa ĩthũkangĩtio.

•   “Wee nĩ ũrũmbũyagia thĩ, ũgatũma ĩciare mũno na ĩkorũo ĩrĩ noru.” (Thaburi 65:9) Ngai nĩ akaarathima thĩ na amĩtue paradiso.

 Nĩguo wĩrute makĩria ũrĩa gũcenjia kwa rĩera kũhingĩtie ũrathi wa Bibilia, thoma gĩcunjĩ kĩrĩ na kĩongo, “Biblia Inasema Nini Kuhusu Mabadiliko ya Hali ya Hewa na Wakati Wetu Ujao?”

 Nĩguo wĩrute makĩria ũhoro wĩgiĩ kĩĩranĩro kĩa Bibilia kĩa atĩ thĩ nĩ ĩgaathondekwo kũrĩa ĩthũkangĩtio, rora gĩcunjĩ kĩrĩ na kĩongo, “Ni Nani Atakayeiokoa Dunia?”