“Ihinda rĩtarĩ kũraihu, tũtingĩageririe gwĩciria ũrĩa tũngĩamũkĩrire irio cia kĩĩroho kũgerera Intaneti.” Hihi nĩ ũretĩkania na ciugo icio? Ciagwetirũo nĩ mũrũ wa Ithe witũ Geoffrey Jackson mĩario-inĩ ya gwĩkĩra ngoro thĩinĩ wa Riboti ya 6 ya Kĩama Kĩrĩa Gĩtongoragia ya 2020. Aathiire na mbere kuuga: “No rĩu, no gũkorũo tũreyũria tũngĩrahota atĩa kũhiũrania na mũrimũ ũyũ ũrĩ kuo tũtarĩ na indo ta JW Library. Jehova akoretwo agĩtũhaarĩria kwa ihinda rĩa mĩaka mĩingĩ nĩ ũndũ wa ũndũ ta ũyũ.”

 Jehova akoretwo agĩtũhaarĩria atĩa? Nĩ wĩra ũrĩkũ warutirũo nĩgetha JW Library ĩthondekwo, na nĩ kĩĩ kĩbataranagia nĩguo yagagĩrio makĩria?

 Kũrĩ Mĩĩ 2013, Kĩama Kĩrĩa Gĩtongoragia nĩ kĩoririe rũhonge rwa MEPS Programming rwa wabici nene ya Aira a Jehova rũthondeke mũtambo wĩ na Bibilia ĩĩkĩtwo mogarũrũku ya New World Translation. Paul Willies, ũrĩa ũrutaga wĩra na MEPS Programming, aaugire ũũ: “Mbere ya hĩndĩ ĩyo, tũtiaumĩte tũthondekete mũtambo ta ũcio wa kũhũthĩrũo thimũ-inĩ. No nĩ twacokanĩrĩirie andũ a kũruta wĩra ũcio, tũkĩrũgamia mawĩra mamwe, na tũkĩrutithania wĩra na honge ingĩ nĩguo tũhaarĩrie mũtambo ũcio na indo cia gwĩkĩrũo thĩinĩ waguo. Nĩ twahoyaga kaingĩ, na kũgerera ũteithio wa Jehova, mũtambo ũcio nĩ warutirũo mũcemanio-inĩ wa o mwaka mĩeri ĩtano thutha ũcio.”

 Wĩra ũngĩ mũritũ twabataraga kũruta nĩ kuongerera mabuku mangĩ na thiomi ingĩ. Gũkinyĩria Janũarĩ 2015, mabuku maingĩ ma ica ikuhĩ ma Gĩthũngũ nĩ moonekaga mũtambo-inĩ ũcio, na mĩeri ĩtandatũ thutha ũcio, andũ nĩ mangĩahotire kũruta mabuku macio na thiomi magana maingĩ.

 Kuuma hĩndĩ ĩyo, ariũ a Ithe witũ nĩ magagĩrĩtie mũtambo ũcio na njĩra itiganĩte, makongerera video, magacokanĩrĩria indo cia kũhũthĩrũo mĩcemanio-inĩ ya kĩũngano handũ hamwe, na magatũma andũ mahote kuona mabuku marĩa marĩ thĩinĩ wa Ũteithio wa Ũthuthuria kuuma mũhari-inĩ mũna wa Bibilia.

 JW Library ĩhingũragĩrũo indo-inĩ ta thimũ na kompiuta ta milioni 8 o mũthenya na indo-inĩ ta icio makĩria ma milioni 15 o mweri! Nĩ kĩĩ kĩbataranagia nĩgetha ĩthiĩ na mbere kũruta wĩra indo-inĩ icio? Mũrũ wa Ithe witũ Willies aaugire ũũ: “Mũtambo wa kũhũthĩrũo thimũ-inĩ ndũtigaga kwagagĩrio. Tũikaraga tũkĩongagĩrĩra icunjĩ njerũ na tũkamĩthondeka ũndũ ĩgũkorũo ĩrĩ hũthũ makĩria kũhũthĩra. Tondũ mĩtambo ĩrĩa ĩhũthagĩrũo nĩ kambuni gũthondeka indo ta thimũ ĩikaraga ĩgĩcenjagia, o na ithuĩ tũikaraga tũgĩcenjagia JW Library nĩgetha ĩhote kũruta wĩra indo-inĩ icio. Ningĩ nĩ tũikaraga tũkĩagĩragia ũrĩa ĩraruta wĩra, o ũrĩa mabuku na indo cia gũthikĩrĩria irathiĩ ikĩongagĩrĩrũo.” Tũngĩtara indo cia thiomi ciothe, ihinda-inĩ rĩrĩ kwĩ na mabuku ta 200,000 na video hamwe na indo cia gũthikĩrĩria makĩria ma 600,000 thĩinĩ wa JW Library!

 Nĩgetha mũtambo wa JW Library ũthiĩ na mbere kũruta wĩra, to kompiuta tu ibataranagia. Nĩ harĩ programu imwe cia kompiuta ibataraga kũrĩhĩrũo. Programu ĩmwe ĩrĩhagĩrũo dola 1,500 cia Amerika o mwaka. Makĩria ma ũguo, rũhonge rwa MEPS Programming rũhũthagĩra kĩndũ dola 10,000 cia Amerika o mwaka kũrĩhĩra indo iria ithondekagwo nĩ kambuni itiganĩte, nĩguo matigĩrĩre atĩ nĩ ĩgũthiĩ na mbere kũruta wĩra wega thĩinĩ wa kompiuta, tablet, na thimũ njerũ.

 JW Library nĩ ĩteithĩtie mũno kũhonokia mbeca iria ihũthagĩrũo gũcaba, kũnyitithania, na gũtwarĩra andũ mabuku. Kwa ngerekano, ta wĩcirie ũhoro wa kabuku ga Gũthuthuria Maandĩko O Mũthenya. Twacabire hakuhĩ kobĩ milioni 12 cia kabuku ga Gũthuthuria Maandĩko O Mũthenya ka 2013. No mwaka wa 2020, twacabire o tũbuku milioni ithano, o na gũtuĩka kwarĩ na ahunjia angĩ ta 700,000 arĩa mongererekete thĩinĩ wa thĩ yothe. Ũgarũrũku ũcio wekirũo nĩkĩ? Rĩu aarĩ na ariũ a Ithe witũ aingĩ mathomaga rĩandĩko rĩa o mũthenya thĩinĩ wa JW Library. a

 Ningĩ JW Library nĩ ĩteithagia andũ arĩa mamĩhũthagĩra na njĩra nyingĩ. Geneviève, ũrĩa ũikaraga Canada, aaugire atĩ nĩ ĩmũteithĩtie gũkoragwo na wĩruti wake ategũtĩrĩria. Aaugire ũũ: “Korũo bataraga gũcokanĩrĩria mabuku marĩa mothe ndĩrabatara nĩguo thome, ndigwĩciria nĩ ingĩhotaga gũthoma o rũcinĩ. No tondũ ndĩ na JW Library, njoyaga tablet yakwa ngakorũo na kĩrĩa gĩothe ndĩrenda. Gũthoma itegũtĩrĩria nĩ gũteithĩtie wĩtĩkio wakwa gũkorũo na hinya na ngakũra kĩĩroho.”

 JW Library nĩ ĩkoretwo ĩrĩ ũteithio mũnene ihinda-inĩ rĩrĩ kũrĩ na mũrimũ wa COVID-19. Charlyn, ũrĩa ũikaraga Amerika (US), aaugire ũũ: “Nĩ ũndũ wa ũrĩa mũrimũ wa COVID-19 ũtheremete thĩinĩ wa thĩ yothe, ndionete mabuku macabe marĩa marutĩtwo ihinda-inĩ rĩa makĩria ma mwaka ũmwe. No JW Library nĩ ĩtũteithĩtie kuona irio cia kĩĩroho, na nĩ njokagĩria Jehova ngatho nĩ ũndũ wa wendo ũrĩa atuonetie, agatũma tũkorũo nayo.”

 Andũ aingĩ nĩ maiguaga ta Faye, ũrĩa ũikaraga Philippines. Aaugire ũũ: “Hũthagĩra JW Library gwĩka maũndũ makwa mothe ma kĩĩroho. Nĩyo nyambaga gũthoma ndokĩra rũcinĩ. Nĩyo thikagĩrĩria rĩrĩa ndĩraruta mawĩra ma nyũmba. Nĩyo hũthagĩra kũhaarĩria mĩcemanio. Nĩyo hũthagĩra kũhaarĩria harĩa tũgũthoma na mũndũ Bibilia. Nĩ ndĩĩroragĩra video iria irĩ thĩinĩ wayo rĩrĩa ndona mahinda. Nĩ thomaga icunjĩ kana Bibilia rĩrĩa njetereire handũ raini-inĩ. Nĩ ya mwanya mũno.”

 Ningĩ JW Library nĩ ĩkoretwo ĩrĩ ũteithio mũnene mũno ũtungata-inĩ. Kwa ngerekano, mwarĩ wa Ithe witũ ũmwe ũikaraga Cameroon akĩhunjia, nĩ eendaga kũhũthĩra rĩandĩko oonete mwarĩ wa Ithe witũ ũngĩ ahũthĩrĩte ciumia cigana ũna mbere ĩyo. No ndaaririkanaga mũhari ũcio. Aaugire ũũ: “Ũndũ mwega nĩ atĩ nĩ ndaaririkanire ciugo imwe cia mũhari ũcio. Ndahingũrire JW Library, ngĩthiĩ harĩ Bibilia, ngĩetha ciugo icio, na ngĩona mũhari ũcio ndeendaga. Nĩ ĩndeithagia kuona mĩhari mĩingĩ ĩrĩa ndiganagĩrũo rĩmwe.”

 Mĩhothi ĩrĩa mũrutaga kũgerera njĩra iria cionanĩtio thĩinĩ wa donate.dan124.com nĩyo ĩtũmĩte tũhote gũthondeka JW Library, kũmĩagagĩria, na kũmĩteithia ĩthiĩ na mbere kũruta wĩra nĩguo ĩteithie aarĩ na ariũ a Ithe witũ kũndũ guothe thĩinĩ wa thĩ. Nĩ ngatho mũno nĩ ũndũ wa ũtaana wanyu.

1. Oktomba 2013—JW Library nĩ yarutirũo ĩrĩ na Bibilia ya New World Translation ĩkĩtwo mogarũrũku.

2. Janũarĩ 2015—Mabuku mangĩ ma Gĩthũngũ nĩ moongereirũo, na thutha ũcio gũkĩongererũo ma thiomi ingĩ magana maingĩ

3. Novemba 2015—Nĩ yathondekirũo ũndũ mũndũ angĩhota gũkururĩra na tũmarangi

4. Mĩĩ 2016—Gĩcunjĩ kĩa mĩcemanio nĩ kĩoongereirũo

5. Mĩĩ 2017—Gacunjĩ ga kuongerera kohoro nĩ koongereirũo

6. Dicemba 2017—Ĩgĩthondekwo ũndũ ĩngĩhota kũhingũra Bibilia ya Wĩruti

7. Machi 2019—Ĩgĩthondekwo ũndũ mũndũ angĩhota kũruta indo cia gũthikĩrĩria, gũthaaka video ĩmwe kwa ĩmwe mũndũ atekũbatara kũruta, na kuona ũhoro ũrĩa ũkoragwo thĩinĩ wa Ũteithio wa Ũthuthuria

8. Janũarĩ 2021—Maũndũ ma kũhotithia ibuku rĩa Kenera Ũtũũro Tene na Tene! kũhingũka magĩkĩrũo