Mwaka wa 2020 kwarĩ na icanjama nyingĩ cia ndũire, na norĩo mũrimũ wa COVID-19 watuthũkire thĩinĩ wa thĩ yothe. Aira a Jehova mateithĩtie atĩa arĩa mahutĩtio nĩ icanjama icio?

 Mwaka-inĩ wa ũtungata wa 2020, a Kamĩtĩ ya Atabarĩri ya Kĩama Kĩrĩa Gĩtongoragia nĩ yetĩkĩririe kũhũthĩrũo dola b milioni 28 wĩra-inĩ wa kũheana ũteithio hĩndĩ ya icanjama. Nĩ ciateithirie andũ maahutirio nĩ icanjama makĩria ma 200, nginya mũrimũ wa COVID-19, ihuhũkanio nyingĩ nene, mĩiyũro thĩinĩ wa Afrika, ũnyihu wa irio bũrũri-inĩ wa Venezuela, na ngʼaragu bũrũri-inĩ wa Zimbabwe. Mbeca iria ciahothirũo nĩ ciateithĩrĩirie kũrĩhĩra irio, maĩ, kũndũ gwa gũikara, nguo, ũrigitani, kũgũra indo cia gwĩka ũtheru, gũthondeka kũrĩa gwathũkĩte, na gwaka nyũmba ingĩ. Rora wone ngerekano cigana ũna ciĩgiĩ wĩra ũcio wa kũheana ũteithio.

 COVID-19. Thĩinĩ wa thĩ yothe, mũrimũ wa corona nĩ wahutirie aarĩ na ariũ a Ithe witũ kĩĩmwĩrĩ, kĩĩmeciria, na kĩĩmbeca. Nĩguo mateithĩrĩrio, nĩ gwathondekirũo Kamĩtĩ cia Gũteithĩrĩria Hĩndĩ ya Icanjama makĩria ma 800 thĩinĩ wa thĩ yothe. Kamĩtĩ icio ciaikaraga ikĩroraga mabataro marĩa aarĩ na ariũ a Ithe witũ marĩ namo, na ikaheana riboti o na ihenya kũrĩ Kamĩtĩ ya Atabarĩri nĩgetha ĩmenye njĩra njega ya kũheana ũteithio.

 Mwaka-inĩ ũcio wothe, kamĩtĩ icio nĩ ciateithirie andũ aingĩ kuona irio, maĩ, indo cia gwĩka ũtheru, na ndawa. Icigo-inĩ imwe, kamĩtĩ icio nĩ ciarutithanirie wĩra na athuri a ciũngano cia kũu nĩguo aarĩ na ariũ a Ithe witũ mahote kwamũkĩra ũteithio wa thirikari.

 Andũ matarĩ Aira a Jehova nĩ monete wĩra witũ wa kũheana ũteithio. Kwa ngerekano, mũnene ũmwe wĩtagwo Field Simwinga wa gĩcigo kĩa Nakonde bũrũri-inĩ wa Zambia, eerire ariũ a Ithe witũ ũũ: “Nĩ tũramũcokeria ngatho mũno nĩ ũndũ wa kũheana ũteithio wa ihinda rĩrĩa rĩagĩrĩire kũrĩ famĩlĩ iria ihutĩtio.”

 Ũnyihu wa Irio Bũrũri-inĩ wa Angola. Mũrimũ wa COVID-19 nĩ watũmire kũgĩe ũnyihu wa irio bũrũri-inĩ wa Angola na ikĩgĩa goro mũno. Warĩ ũndũ mũritũ harĩ aarĩ na ariũ a Ithe witũ aingĩ kũgũra irio.

 Wabici ya rũhonge ya Brazil nĩ yoririo ĩteithĩrĩrie na njĩra ya gũtũmĩra aarĩ na ariũ a Ithe witũ a Angola irio. Nĩguo mbeca cia kũheana ũteithio ihũthĩrũo wega, nĩ gwathuthuririo njĩra ĩrĩa njega ya kũgũra na gũtũma irio, na ikĩgũrũo irĩ nyingĩ. Nĩ ũndũ ũcio, mũrigo ũmwe wahũthĩrire dola ta 22 kũgũra na gũtũma, no warĩ na hakuhĩ kilo 20 cia irio ta mũcere, mboco, na maguta ma kũruga. Gũkinyĩria rĩu, mĩrigo 33,544 nĩ ĩtũmĩtwo, na yothe ĩrĩ na ũritũ wa tani 654. Hamwe na irio iria ciagũrirũo nĩ wabici ya Angola, indo icio nĩ ciateithirie andũ makĩria ma 50,000 kuona irio!

 Aarĩ na ariũ a Ithe witũ maiguaga atĩa nĩ ũndũ wa ũteithio ũcio? Alexandre, ũrĩa ũikaraga gĩcigo kĩmwe kĩrĩ kũraihu bũrũri-inĩ wa Angola aaugire ũũ: “Ũndũ ũyũ nĩ ũnyonetie atĩ Jehova arĩ hamwe na niĩ na atĩ ndirĩ wiki. Ithondeka rĩa Jehova nĩ rĩnyonaga ndĩ wa bata!” Nake mũtumia wĩtagwo Mariza, ũrĩa ũreraga ciana arĩ wiki aaugire ũũ: “Jehova nĩ aiguĩte kĩrĩro gĩakwa. Nĩ ndĩramũcokeria ngatho hamwe na ithondeka rĩake!”

 Kũheana Ũteithio Hĩndĩ ya Ngʼaragu Bũrũri-inĩ wa Zimbabwe. Mwaka-inĩ wa ũtungata wa 2020, nĩ kwagĩire ngʼaragu nene Zimbabwe, na andũ milioni nyingĩ matiarĩ na irio. Aira a Jehova ngiri nyingĩ bũrũri-inĩ ũcio matiarĩ na irio cia kũigana.

 Nĩ gwathondekirũo kamĩtĩ ithano cia kũheana ũteithio kũrĩ aarĩ na ariũ a Ithe witũ. Aarĩ na ariũ a Ithe witũ aingĩ nĩ maateithĩrĩirie na njĩra ya kũbanga irio, gwĩkĩra indo ngaari-inĩ, kana kũheana ngaari ciao. c Mwaka-inĩ wa ũtungata wa 2020, kwahũthĩrirũo dola 691,561 gũteithia andũ makĩria ma 22,700 kuona irio!

 Kũndũ kũmwe, aarĩ na ariũ a Ithe witũ nĩ maaniinĩte irio iria maarĩ nacio gũkinyĩria rĩrĩa ũteithio wakinyaga. Rĩrĩa irio ciakinyire nĩ maagoocire Jehova. Amwe ao o na nĩ maambĩrĩirie kũina nyĩmbo cia Ũthamaki.

 Gĩcigo-inĩ kĩmwe, aarĩ a Ithe witũ erĩ a ndigwa nĩ maathiire mũcemanio-inĩ wa itũũra, ũrĩa wabangĩtwo nĩguo kwarĩrĩrio irio ciaheanagwo nĩ gĩkundi kĩmwe gĩtarĩ gĩa thirikari. No maũndũ ma ũteti nĩ maaingĩhire mũcemanio-inĩ ũcio, na aarĩ a Ithe witũ matietĩkanirie na maũndũ marĩa mũndũ aabataraga gwĩka nĩguo aheo irio. Rĩrĩa maaumaga mũcemanio-inĩ ũcio, maanyũrũririo na makĩrũo: “Mũtigoke gũtũhoya irio!” No ciumia igĩrĩ thutha ũcio, o na mbere ya irio iria ciaheanagwo nĩ gĩkundi kĩu ikinyĩte, ariũ a Ithe witũ nĩ maakinyire gĩcigo-inĩ kĩu na makĩhe aarĩ a Ithe witũ acio irio!

 Wĩra wa kũheana ũteithio bũrũri-inĩ wa Zimbabwe o naguo nĩ ũkoretwo na maumĩrĩra mega. Ngerekano ĩmwe nĩ ya Prisca, ũrĩa ũikaraga gĩcagi-inĩ kĩmwe kĩnini. O na kũrĩ na moritũ marĩa maarehirũo nĩ ngʼaragu, o mũthenya wa Njumatano na Njumaa, Prisca aahũthagĩra mahinda make ũtungata-inĩ, nginya hĩndĩ ya kũrĩma. Andũ a gĩcagi kĩao maamũnyũrũragia makamwĩra ũũ: “Famĩlĩ yaku ĩgũkua nĩ ngʼaragu o ũkĩhunjagia.” Nake aameeraga: “Jehova ndarĩ atiganĩria ndungata ciake.” Kahinda kanini thutha ũcio nĩ aamũkĩrire ũteithio kuuma kũrĩ ithondeka ritũ. Ũndũ ũcio nĩ wakenirie andũ amwe a gĩcagi kĩao nginya makĩmwĩra: “Ngai ndarĩ agũtiganĩria, kwoguo no twende kũmũmenya makĩria.” Andũ mũgwanja a gĩcagi kĩu rĩu nĩ mathikagĩrĩria mĩcemanio ya kĩũngano ĩrĩa ĩmemerekagio redio-inĩ.

 O ũrĩa tũrakuhĩrĩria mũico, nĩ tũgũthiĩ na mbere kũhutio nĩ icanjama cia ndũire. (Mathayo 24:3, 7) Nĩ ngatho mũno nĩ ũndũ wa mĩhothi ĩrĩa ũrutaga na ũtaana kũgerera njĩra itiganĩte iria irĩ thĩinĩ wa donate.dan124.com. Nĩ ĩhũthagĩrũo wega kũheana ũteithio ihinda rĩrĩa rĩagĩrĩire.