Mũtũmwo Paulo aandĩkire: “Rĩrĩa ndĩrenda gwĩka ũndũ ũrĩa wagĩrĩire, ũndũ ũrĩa mũũru ũkoragwo hamwe na niĩ.” (Aroma 7:21) Hihi nĩ ũrĩ waigua ũguo? Angĩkorũo wanaigua ũguo, gĩcunjĩ gĩkĩ nĩ gĩgũgũteithia kũregana na magerio.

•  Maũndũ marĩa wagĩrĩirũo kũmenya

•  Ũrĩa ũngĩka

•  Ũrĩa andũ a riika rĩaku maroiga

 Rĩrĩa wahatĩkwo nĩ andũ a riika rĩaku kaingĩ ũkoragwo ũrĩ ũndũ mũhũthũ kũgwa magerio-ĩni. Bibilia yugaga ũũ: “Thiritũ njũru nĩ ithũkagia mĩtugo mĩega.” (1 Akorintho 15:33) Hatĩka kuuma kũrĩ andũ arĩa angĩ kana kuuma kũrĩ nyũmba cia mohoro no itũme ũkũrie merirĩria ngoro-inĩ yaku marĩa mangĩtũma wĩke maũndũ matagĩrĩire kana itũme “ũrũmanĩrĩre na mũingĩ gwĩka ũũru.”​—Thama 23:2.

 “Hatĩka cia kwenda kwendwo na gwĩtĩkĩrĩka no itũme wĩke maũndũ marĩa andũ arĩa angĩ mareka nĩguo wĩtĩkĩrĩke nĩo.”​—Jeremy.

 Ũndũ wa gwĩciria: Nĩkĩ no ũkorũo ũrĩ ũndũ mũritũ makĩria kũregana na igerio angĩkorũo nĩ ũreciria mũno ũrĩa andũ arĩa angĩ marakuona?​—Thimo 29:25.

 Ririkana: Ndũkareke hatĩka kuuma kũrĩ andũ a riika rĩaku itume wĩke maũndũ matagĩrĩire.

 Korũo na ma na maũndũ marĩa wĩtĩkĩtie. Angĩkorũo ndũrĩ na ma na maũndũ marĩa wĩtĩkĩtie, no ũkorũo ũhaana kandori arĩa angĩ mathaakage nawe ũrĩa mekwenda. Nĩ harĩ bata kũrũmĩrĩra ũtaaro ũyũ wa Bibilia: “Thuthuragiai maũndũ mothe; rũmagiai maũndũ marĩa mega.” (1 Athesalonike 5:21) O ũrĩa ũgũtaũkĩrũo nĩ maũndũ marĩa wĩtĩkĩtie, noguo ũgũkorũo ũrĩ ũndũ mũhũthũ kũmarũmĩrĩra na kũregana na maũndũ marĩa mataratwarana na wĩtĩkio waku.

 Ũndũ wa gwĩciria: Nĩ kĩĩ gĩtũmaga wĩtĩkie atĩ motaaro ma Ngai nĩ makoragwo na ũguni harĩ we?

 “Nĩ nyonete atĩ hingo ciothe rĩrĩa ndarũmĩrĩra kĩrĩa njĩtĩkĩtie na ngaregana na magerio, andũ arĩa angĩ nĩ maheaga gĩtĩo makĩria.”​—Kimberly.

 Mũndũ warĩ kĩonereria kĩega ũgwetetwo Bibilia-inĩ: Danieli. No kũhoteke rĩrĩa Danieli aarĩ mũndũ mwĩthĩ ‘aatuire itua ngoro-inĩ yake’ atĩ nĩ arĩathĩkagĩra mawatho ma Ngai.​—Danieli 1:8.

 Menya mawathe maku. Bibilia nĩ yaragia ũhoro wĩgiĩ “merirĩria ma wĩthĩ,” na ũguo nĩ kuuga maũndũ marĩa makoragwo na hinya mũno mũndũ arĩ mwĩthĩ. (2 Timotheo 2:22) Maũndũ macio nĩ ta merirĩria ma ngomanio, kwenda gwĩtĩkĩrĩka, na kwenda gwĩtuĩra matua ihinda rĩrĩa rĩagĩrĩire rĩtakinyĩte.

 Ũndũ wa gwĩciria: Bibilia yugaga atĩ “o mũndũ ageragio na njĩra ya kũgucĩrĩrio na kũheenererio nĩ merirĩria make mwene.” (Jakubu 1:14) Nĩ merirĩria marĩkũ wee ũgucagĩrĩrio nĩmo mũno?

 “Menya wega nĩ magerio marĩkũ mangĩkorũo marĩ maritũ harĩ wee gwĩtiiria. Ĩka ũthuthuria wone ũrĩa ũngĩrũa na magerio macio na wandĩke maũndũ marĩa mangĩgũteithia gwĩka ũguo. Ũngĩka ũguo no ũhote kũmenya ũrĩa ũngĩregana na igerio rĩu ũngĩcemania narĩo hĩndĩ ĩngĩ.”​—Sylvia.

 Mũndũ warĩ kĩonereria kĩega ũgwetetwo Bibilia-inĩ: Daudi. Rĩmwe na rĩmwe na eehagia nĩ tondũ wa kũhatĩkwo nĩ merirĩria make mwene na kũhatĩkwo nĩ andũ arĩa angĩ. No Daudi nĩ eerutaga na mahĩtia make na akagarũrĩra. Aahoire Jehova akĩmwĩra “nyũmbĩra ngoro theru, na wĩkĩre thĩinĩ wakwa roho mwerũ, mũrũmu.”​—Thaburi 51:10.

 Wĩgirĩrĩrie. Bibilia yugaga: “Ndũkanareke ũũru ũgũtoorie.” (Aroma 12:21) Ũguo nĩ kuuga to mũhaka ũtoorio nĩ igerio. No ũthuure gwĩka ũndũ ũrĩa wagĩrĩire.

 Ũndũ wa gwĩciria: Ũngĩgirĩrĩria atĩa na wĩke ũrĩa kwagĩrĩire hĩndĩ ĩrĩa ũragerio wĩke ũndũ mũũru?

 “Nĩ ngeragia gwĩciria ũrĩa ngũigua thutha wa gwĩka ũndũ ũrĩa ndĩragerio naguo. Hihi ũgũtũma njigue wega? No gũkorũo nĩguo no hihi no gwa kahinda kanini. Hihi thutha wa ihinda iraihu nĩ ngakorũo ngĩkenera ũndũ ũcio? Aca, ndĩrĩiguaga o ũũru. Hihi nĩ wega njĩke ũndũ ũyũ? Aca!”​—Sophia.

 Mũndũ warĩ kĩonereria kĩega ũgwetetwo Bibilia-inĩ: Paulo. O na gũtuĩka Paulo nĩ eetĩkĩrire nĩ aarĩ na mĩerekera ĩtaarĩ mĩega, nĩ eegirĩrĩirie. Aandĩkire: “Nĩ kũherithia herithagia mwĩrĩ wakwa na ngaũtongoria ta ngombo.”​—1 Akorintho 9:27, kohoro ka magũrũ-inĩ.

 Ririkana: Ũtariĩ ta ndereba wa ngaari na njĩra ya atĩ nĩwe ũgwĩtuĩra ũrĩa ũkũhiũrania na magerio.

 Ririkana magerio no ma ihinda. Melissa ũrĩa ũrĩ na mĩaka 20 ooigire: “Maũndũ marĩa ndonaga marĩ magerio manene rĩrĩa ndarĩ cukuru rĩu ndionaga ta arĩ magerio. Gwĩcũrania ũndũ ũcio nĩ kũheaga ũũma wa atĩ o na magerio marĩa ndĩracemania namo ihinda-inĩ rĩrĩ nĩ magaathira, na rĩrĩa ngacokia meciria na thutha nĩ ngamenya atĩ nĩ ndaatuire itua rĩega rĩa kũregana namo.”