Bibilia ĩgwetete gwĩkĩra marũũri mwĩrĩ-inĩ (tattoo) rita rĩmwe tu, thĩinĩ wa Maũndũ ma Alawii 19:28 harĩa yugaga ũũ: ‘Mũtikanekĩre marũũri mĩĩrĩ-inĩ yanyu.’ (Biblica-Holy Bible in Gĩkũyũ) Ngai aaheire ciana cia Isiraeli watho ũcio nĩguo makorũo marĩ ngũrani na andũ arĩa maamathiũrũrũkĩirie arĩa meecoraga mĩĩrĩ yao na marĩĩtwa kana mbica cia ngai ciao. (Gũcokerithia Maathani 14:2) O na gũtuĩka Akristiano matirĩ rungu rwa Watho ũcio, nĩ wega gwĩciria na njĩra ndikĩru ũtaaro ũrĩa ũnyitĩte mbaru watho ũcio.

Hihi Mũkristiano nĩ agĩrĩirũo gwĩkĩrũo marũũri kana gũcorũo mwĩrĩ?

 Mĩhari ĩno ĩrũmĩrĩire ya Bibilia no ĩgũteithie gwĩcũrania ũndũ-inĩ ũcio:

•   “Atumia magĩrĩirũo nĩ kwĩgemagia na njĩra . . . itakĩrĩtie njano.” (1 Timotheo 2:9) Ũtaaro ũcio wagĩrĩirũo kũhũthĩrũo nĩ andũ othe. Nĩ twagĩrĩirũo gũtĩa andũ arĩa angĩ na tũtikeĩcirie gũkĩria njano.

•   Andũ amwe mekĩragwo marũũri mwĩrĩ-inĩ nĩguo makũũrĩkane, nao angĩ mendaga kuonania atĩ marĩ na kĩhooto gĩa kũhũthĩra mĩĩrĩ yao ũrĩa mekwenda. O na kũrĩ ũguo, Bibilia ĩkĩraga Akristiano ngoro ũũ: “Mũrute mĩĩrĩ yanyu ĩrĩ igongona rĩrĩ muoyo, itheru na rĩretĩkĩrĩka nĩ Ngai, ũguo nĩ kuuga mũrutage ũtungata mũtheru mũkĩhũthĩra ũhoti wanyu wa gwĩciria.” (Aroma 12:1) Hũthĩra ‘ũhoti waku wa gwĩciria’ nĩguo ũmenye ũrenda gwĩkĩrũo rũũri mwĩrĩ-inĩ nĩkĩ. Angĩkorũo ũrenda gwĩkĩrũo rũũri tondũ nĩguo ũndũ wa kĩĩrĩu kana nĩguo wĩtĩkĩrĩke gĩkundi-inĩ kĩna, ririkana atĩ thutha wa ihinda no ũcenjie meciria no rũũri rũu rũtingĩrutwo na njĩra hũthũ. Gwĩciria muoroto waku no gũgũteithie gũtua itua rĩa ũũgĩ.—Thimo 4:7.

•   “Itaranio cia ũrĩa wĩ kĩyo irehithagie o ũthegei, ĩndĩ mũndũ o wothe wa mũhiũhũko, kĩrĩa onaga no ũnyamari.” (Thimo 21:5) Kaingĩ itua rĩa gwĩkĩrũo marũũri rĩtuagwo na ihenya, no ũndũ ũcio no ũkorũo na moimĩrĩro ma gũtũũra harĩ ũrata waku na andũ arĩa angĩ na ũgĩetha wĩra. Ningĩ kũrutwo marũũri macio no kũbatare mbeca nyingĩ na gũkorũo na ruo rũnene. Ũthuthuria ũrĩa wĩkĩtwo o hamwe na biacara ĩrĩa ĩrathiĩ na mbere ya kũruta marũũri ta macio mwĩrĩ-inĩ cionanagia atĩ andũ aingĩ arĩa mekĩragwo nĩ macokaga kwĩrira kaba matangĩekĩrĩtwo.