Mũcukani na ndaimono nĩ makoragwo na ũgucania mũnene mũno harĩ andũ ũũ atĩ Bibilia yugaga, “thĩ yothe ĩtongoragio nĩ ũrĩa mũru.” (1 Johana 5:19) Bibilia nĩ ĩguũragia njĩra iria Mũcukani ahũthagĩra nĩguo akorũo na ũgucania harĩ andũ.

•   Maheeni. Bibilia ĩkĩraga ngoro Akristiano metirie “mawara ma Mũcukani.” (Aefeso 6:11) Wara ũmwe wake nĩ kũhenereria andũ metĩkie atĩ ndungata ciake nĩ ndungata cia Ngai.—2 Akorintho 11:13-15.

•   Kũrongoria ndaimono. Mũcukani ahĩtithagia andũ kũgerera ahoi ngoma ũhoro, ago na aragũri, kana athomi a njata. (Gũcokerithia Maathani 18:10-12) Kũhũthĩra ndawa cia kũrebia, gũtumumario meciria, na kũhũthĩra njĩra cia gwĩcũrania iria itharagia maũndũ mothe meciria-inĩ ma mũndũ, no kũhingũre mweke wa mũndũ kĩhũthĩrũo nĩ ndaimono.—Luka 11:24-26.

•   Ndini cia maheeni. Ndini iria irutanaga mawĩtĩkio mahĩtanu ihĩtithagia andũ makaaga gwathĩkĩra Ngai. (1 Akorintho 10:20) Bibilia ĩtaga mawĩtĩkio ta macio “morutani ma ndaimono.”—1 Timotheo 4:1.

•   Ndaimono. Bibilia nĩ ĩgwetete andũ manahũthĩrũo nĩ ndaimono. Rĩmwe ndaimono icio nĩ ciatũmaga andũ matuĩke atumumu, bubu, o na kana metihangie.—Mathayo 12:22; Mariko 5:2-5.

Ũrĩa ũngĩĩthema ũgucania wa Mũcukani

 Ndwagĩrĩirũo gwĩtigĩra ũgucania wa ndaimono, tondũ Bibilia nĩ yonanagia ũrĩa ũngĩhota kũregana na Mũcukani:

•   Wĩrute ũrĩa ũngĩkũrana mawara ma Mũcukani ‘nĩguo ndũkanahootwo nĩ Shaitani.’—2 Akorintho 2:11.

•   Wĩrute Bibilia na wĩkage ũrĩa yugaga. Kũhũthĩra motaaro ma Bibilia nĩ kũrĩkũgitagĩra kuumana na ũgucania wa Mũcukani.—Aefeso 6:11-18.

•   Ũte indo ciothe iria ihutanĩtie na maũndũ ma ndaimono. (Atũmwo 19:19) Indo icio nĩ ta nyĩmbo, mabuku, ngathĩti, mbica, na thenema iria igucagĩrĩria andũ maũndũ-inĩ ma ndaimono.