Ĩĩ, Bibilia nĩ ĩtũheaga ũira wa kũigana wa kuonania atĩ Ngai arĩ kuo. Nĩ ĩtũteithagia kũgĩa na wĩtĩkio harĩ Ngai, na ti na njĩra ya gwĩtĩkia tũtarĩ na mũthingi ũndũ o wothe ndini irutanaga, no nĩ kũgerera kũhũthĩra ‘ũhoti witũ wa gwĩciria’ na ‘gũthuthuragia maũndũ mothe.’ (Aroma 12:1; 1 Athesalonike 5:21) Ta wĩcirie ũhoro wa maũndũ maya matano kuuma Bibilia-inĩ marĩa matũheaga ũira wa ũndũ ũcio:

•   Gũkorũo kuo gwa thĩ na igũrũ iria ikoragwo na mũbango mwega o hamwe na indo iria irĩ muoyo thĩinĩ wacio kuonanagia atĩ nĩ kũrĩ Mũũmbi. Bibilia yugaga ũũ: “Ma nĩ atĩ, nyũmba o yothe nĩ ĩrĩ ũrĩa wamĩakire, no ũrĩa waakire indo ciothe nĩ Ngai.” (Ahibirania 3:4) O na gũtuĩka ũndũ ũcio ti mũritũ gũtaũkĩrũo, andũ aingĩ athomu nĩ monaga atĩ ciugo icio itingĩkararĩka. a

•   Nĩ tũkoragwo na wendi wa gũtaũkĩrũo nĩ muoroto wa ũtũũro. O na tũngĩkorũo na indo iria ciothe tũrabatara nĩguo tũtũũre, tũtingĩiganĩra tũngĩaga kũmenya muoroto wa ũtũũro. Ũcio nĩ ũndũ ũmwe wa kĩrĩa Bibilia ĩtaga ‘mabataro maitũ ma kĩĩroho,’ na nĩ hamwe na wendi wa kũmenya na gũthathaiya Ngai. (Mathayo 5:3; Kũguũrĩrio 4:11) Gũkorũo atĩ Ngai aatũũmbire tũrĩ na wendi wa kũmũmenya na kũmũthathaiya kuonanagia atĩ arĩ kuo na atĩ nĩ atwendete na nĩ endaga tũtuĩke arata ake.—Mathayo 4:4.

•   Morathi ma Bibilia, marĩa makoragwo mataarĩirio na njĩra ndikĩru, maandĩkirũo mĩaka magana maingĩ mbere ya gwĩkĩka na makĩhinga o ta ũrĩa maarathĩtwo. Kũhinga kwa morathi macio o ta ũrĩa maarathĩtwo, na gũtaarĩrio na njĩra ndikĩru, kuonanagia atĩ mooimanire na kĩhumo kĩrĩ na hinya mũnene gũkĩra wa andũ.—2 Petero 1:21.

•   Andĩki a Bibilia maarĩ na ũmenyo mũnene wa maũndũ megiĩ sayansi gũkĩra andũ arĩa matũũraga ihinda rĩmwe nao. Kwa ngerekano, mahinda-inĩ ma tene, andũ aingĩ meetĩkĩtie atĩ thĩ ĩkoragwo ĩnyitĩrĩirũo nĩ nyamũ ta njogu, ngũrũwe, kana ndegwa. Mũgarũ na ũguo, Bibilia yugaga atĩ “thĩ hatirĩ kĩndũ [Ngai] amĩcunjurĩtie nakĩo.” (Ayubu 26:7) Ningĩ Bibilia nĩ yugaga ĩtekũhĩtia atĩ thĩ nĩ “gĩthiũrũrĩ.” (Isaia 40:22) Andũ aingĩ nĩ monaga atĩ no mũhaka akorũo andĩki a Bibilia maaheagwo ũhoro ũcio nĩ Ngai.

•   Bibilia nĩ ĩcokagia ciũria nyingĩ nditũ, iria ingĩaga gũcokio na njĩra njega no itũme mũndũ age gwĩtĩkia atĩ nĩ kũrĩ Ngai. Kwa ngerekano: Angĩkorũo Ngai nĩ arĩ wendo na nĩ mwene hinya wothe-rĩ, nĩ kĩĩ gĩtũmaga gũkorũo na mathĩna na maũndũ moru thĩinĩ wa thĩ? Nĩ kĩĩ gĩtũmaga kaingĩ ndini itũme andũ meke maũndũ moru handũ ha maũndũ mega?—Tito 1:16.