‘Ibuku rĩa muoyo,’ na no rĩo rĩĩtagwo “gĩkũnjo kĩa muoyo” kana ‘ibuku rĩandĩkĩtwo rĩa gũtũma andũ matũũre maririkanagwo,’ rĩkoragwo na marĩĩtwa ma andũ arĩa marĩ na kĩĩrĩgĩrĩro gĩa gũkaaheo muoyo wa tene na tene. (Kũguũrĩrio 3:5; 20:12; Malaki 3:16) Ngai atuaga marĩĩtwa macio kũringana na wĩhokeku na wĩtĩkio wa mũndũ harĩ we.—Johana 3:16; 1 Johana 5:3.

 “Kuuma o kĩambĩrĩria gĩa thĩ,” Ngai nĩ aigaga marĩĩtwa ma ndungata ciake ciothe njĩhokeku kĩririkano-inĩ gĩake, o ta arĩ kwandĩka andĩkĩte marĩĩtwa ma cio ibuku-inĩ. (Kũguũrĩrio 17:8) Mũndũ wa mbere kwandĩkwo ibuku-inĩ rĩa muoyo aarĩ Habili tondũ aarĩ mwĩhokeku. (Ahibirania 11:4) To marĩĩtwa tu mandĩkĩtwo, ĩndĩ ibuku rĩu rĩa muoyo nĩ rĩtuonagia atĩ Jehova nĩ Ngai ũrĩ wendo na “nĩ oĩ arĩa ake mwene.”—2 Timotheo 2:19; 1 Johana 4:8.

Hihi rĩĩtwa no rĩthario ibuku-inĩ rĩa muoyo?

 Ĩĩ no rĩthario. Ngai oigire ũũ igũrũ rĩgiĩ Aisiraeli a tene arĩa mataarĩ athĩki: “Mũndũ ũrĩa wothe ũnjĩhĩtie-rĩ, ũcio nĩwe ngũhuura rĩĩtwa rĩake ndĩmweherie ibuku-inĩ rĩakwa.” (Thama 32:33) No tũngĩtũũra tũrĩ ehokeku, rĩĩtwa ritũ rĩgũtũũra thĩinĩ wa “gĩkũnjo kĩa muoyo.”—Kũguũrĩrio 20:12.