Bibilia ndĩaragia ĩmwe kwa ĩmwe ũhoro wa kũhanyũkia gĩkuũ kĩa mũndũ ũroneka ndangĩhona. a O na kũrĩ ũguo, maũndũ marĩa yugaga igũrũ rĩgiĩ muoyo na gĩkuũ nĩ matũheaga mawoni maigananĩru. Kũũragana ti ũndũ mwĩtĩkĩrĩku, no gũtirĩ watho wa kũgeria gũkĩria njano kuongongerera ũtũũro wa mũndũ ũrakua.

 Bibilia yonanagia atĩ Ngai nĩwe Mũũmbi witũ, o we “kĩhumo kĩa muoyo.” (Thaburi 36:9; Atũmwo 17:28) Ngai onaga muoyo ũrĩ wa goro mũno. Nĩkĩo akaananĩtie kũũragana na kwĩyũraga. (Thama 20:13; 1 Johana 3:15) Makĩria ma ũguo, Bibilia yonanagia atĩ nĩ twagĩrĩirũo kwĩrutanĩria kũgitĩra muoyo witũ o na mĩoyo ya andũ arĩa angĩ. (Gũcokerithia Maathani 22:8) Hatarĩ nganja, Ngai nĩ endaga tuone kĩheo kĩa muoyo kĩrĩ kĩa bata.

Ĩ mũndũ angĩkorũo arwarĩte ũndũ atangĩhona?

 Bibilia ndĩtĩkĩrĩtie kũruta mũndũ muoyo o na angĩkorũo aroneka biũ atĩ nĩ egũkua. Ngerekano ya Mũthamaki Saulu wa Isiraeli nĩ ĩnyitaga mbaru ũndũ ũcio. Rĩrĩa aagurarĩtio mũno arĩ mbaara-inĩ agakuhĩrĩria gũkua, eerire ndungata yake ĩmũteithie kũniina muoyo wake. (1 Samueli 31:3, 4) No ndungata ĩyo ya Saulu ĩkĩrega. O na kũrĩ ũguo, thutha-inĩ mũndũ ũngĩ nĩ aaheenanirie atĩ nĩ aahingĩtie wendi ũcio wa Saulu. Daudi nĩ oonanirie mwĩcirĩrie wa Ngai ũndũ-inĩ ũcio, kwoguo agĩtuĩra mũndũ ũcio atĩ aarĩ na mahĩtia ma gũita thakame.—2 Samueli 1:6-16.

Hihi no mũhaka gwĩkwo ũrĩa wothe kũngĩkwo nĩguo ũtũũro wa mũndũ wongongererũo?

 Kũngĩoneka biũ atĩ mũndũ nĩ egũkua, Bibilia ndĩathanĩte atĩ ihinda rĩu rĩa gũkua nĩ rĩagĩrĩire kũraihio. Handũ ha ũguo, Bibilia ĩkoragwo na mawoni maigananĩru. Gĩkuũ nĩ thũ itũ nene, tondũ nĩkĩo moimĩrĩro ma kwaga gũkinyanĩra gwitũ. (Aroma 5:12; 1 Akorintho 15:26) O na gũtuĩka gĩkuũ ti gĩa kwĩrirĩrio, gĩtiagĩrĩire gwĩtigĩrũo tondũ Ngai nĩ eranĩire atĩ nĩ akaariũkia arĩa makuĩte. (Johana 6:39, 40) Mũndũ ũtĩĩte muoyo acaragia ũrigitani ũrĩa mwega biũ ũngĩoneka. Ĩndĩ gwĩka ũguo ti kuuga athuure njĩra cia ũrigitani iria iraihagia ihinda rĩa gũkua rĩa mũndũ ũtigĩtie hanini atuĩkane.

Hihi kwĩyũraga nĩ mehia matangĩohanĩrũo?

 Aca, Bibilia ndiugaga atĩ kwĩyũraga nĩ mehia matangĩohanĩrũo. O na gũtuĩka kwĩyũraga nĩ mehia maritũ, b Ngai nĩ ataũkagĩrũo biũ nĩ maũndũ ta thĩna wa meciria, gũtangĩka mũno, o na kana mathĩna ma gũtiganĩrũo famĩlĩ-inĩ marĩa mangĩtũma mũndũ aigue akĩenda kwĩyũraga. (Thaburi 103:13, 14) Kũgerera Bibilia, nĩ omagĩrĩria arĩa maratangĩka. Makĩria ma ũguo, Bibilia yugaga atĩ “nĩ gũkaariũkio andũ arĩa athingu na arĩa matarĩ athingu.” (Atũmwo 24:15) Ũndũ ũcio ũronania atĩ no twĩrĩgĩrĩre andũ arĩa mekĩte mehia maritũ ta kwĩyũraga nĩ makaariũkio.