Bibilia ndĩhũthĩrĩte ciugo “kũruta nda” ĩkĩaria igũrũ rĩgiĩ kũruta kaana gatakinyĩtie ihinda rĩa gũciarũo. O na kũrĩ ũguo, mĩhari mĩingĩ ya Bibilia nĩ yonanĩtie mawoni ma Ngai megiĩ muoyo wa mũndũ, nginya wa mwana ũtarĩ mũciare.

 Muoyo nĩ kĩheo kuuma kũrĩ Ngai. (Kĩambĩrĩria 9:6; Thaburi 36:9) Onaga muoyo wa andũ othe ũrĩ wa bata, nginya muoyo wa mwana ũrĩ thĩinĩ wa nda ya nyina. Kwoguo mũndũ angĩũraga mwana ũtarĩ mũciare akĩendaga, ũcio nĩ ũragani.

 Watho ũrĩa Ngai aaheete Aisiraeli woigĩte ũũ: “Andũ mangĩkorũo makĩrũa na magurarie mũtumia ũrĩ na nda na aciare kaana gatarĩ gakinyu ĩndĩ mũtumia ũcio na kaana kau mage gũkua, mũndũ ũcio wamũguraria no mũhaka arĩhe kĩrĩa egwĩtio nĩ mũthuri wa mũtumia ũcio; na no mũhaka arĩhe mũigana ũrĩa ũgũtuwo nĩ atuanĩri ciira. No ũmwe wao angĩkua, hĩndĩ ĩyo muoyo no mũhaka ũkarĩhwo na muoyo.”—Thama 21:22, 23. a

•  Muoyo wa mũndũ wambagĩrĩria rĩ?

•  Hihi Ngai no ohere mũndũ ũrutĩte nda?

•  Hihi nĩ ũũru kũruta nda angĩkorũo muoyo wa mwana kana wa nyina ũrĩ ũgwati-inĩ?

 Kũringana na mawoni ma Ngai, muoyo wa mũndũ wambagĩrĩria rĩrĩa mũtumia oha nda. Ngai nĩ onanĩtie kaingĩ thĩinĩ wa Kiugo gĩake, Bibilia, atĩ mwana ũtarĩ mũciare o nake nĩ mũndũ. Wĩcũranie ngerekano imwe iria ironania atĩ Ngai onaga muoyo wa mwana ũrĩ thĩinĩ wa nda ya nyina ũrĩ ũndũ ũmwe na wa mwana ũrĩa mũciare.

•   Mũthamaki Daudi eerire Ngai ũũ atongoretio nĩ roho: “Maitho maku o na nĩ maanyonire ndĩ nda ya maitũ.” (Thaburi 139:16) O na Daudi atanaciarũo, Ngai aamuonaga arĩ mũndũ.

•   Ningĩ, Ngai nĩ aamenyaga atĩ nĩ angĩaheire mũnabii Jeremia wĩra wa mwanya, o na Jeremia atarĩ mũciare. Ngai aamwĩrire ũũ: “Mbere ya gũkũũmba thĩinĩ wa nda ya maitũguo-rĩ, nĩ ndakũĩ, na ũtanaciarũo nĩ ndakwamũrire. Nĩ ndagũtuire mũnabii harĩ ndũrĩrĩ.”—Jeremia 1:5.

•   Luka, mwandĩki wa Bibilia ũrĩa warĩ ndagĩtarĩ, aahũthĩrire kiugo kĩmwe gĩa Kĩngiriki kwarĩrĩria ũhoro wa mwana ũtarĩ mũciare na ũrĩa mũciare.—Luka 1:41; 2:12, 16.

 Andũ arĩa manaruta nda no moherũo nĩ Ngai. Angĩkorũo rĩu nĩ metĩkĩrĩte mawoni ma Ngai megiĩ muoyo, matiagĩrĩirũo kũigua maritũhĩirũo nĩ mahĩtia macio. “Jehova nĩ mũigua tha na mũcayanĩri . . . O ta ũrĩa irathĩro kũraihanĩrĩirie na ithũĩro, no taguo aigĩte mehia maitũ kũraya na ithuĩ.” b (Thaburi 103:8-12) Jehova nĩ ohagĩra arĩa othe meriraga mehia mao kuuma ngoro, nginya ma kũruta nda.—Thaburi 86:5.

 Kũringana na ũguo Bibilia yugĩte igũrũ rĩgiĩ muoyo wa mwana ũtarĩ mũciare, mũndũ ndarĩ na kĩhooto gĩa kũruta nda nĩ ũndũ wa kuona ta ũgima wa mwĩrĩ wa mwana kana wa nyina ũrĩ ũgwati-inĩ.

 Ĩ narĩo hĩndĩ ya kũgĩa mwana kũngiumĩra ũndũ ũterĩgĩrĩirũo ũtũme kũbataranie gũthuura kana nĩ muoyo wa mwana ũkũhonokio kana nĩ wa nyina? Ũndũ ta ũcio ũngiumĩra, arĩa mahutĩtio nĩ ũndũ ũcio magĩrĩirũo gwĩtuĩra itua o ene nĩ muoyo wa ũ mekũgeria kũhonokia.