Bibilia yugaga atĩ Ngai endaga tũkorũo na “ihinda rĩega rĩũkĩte . . . na kĩĩrĩgĩrĩro.” a (Jeremia 29:11) O na gĩtũmi kĩmwe kĩrĩa gĩtũmĩte Ngai atũhe Bibilia nĩ atĩ, “kũgerera kũũmĩrĩrio nĩ Maandĩko tũgĩe na kĩĩrĩgĩrĩro.” (Aroma 15:4) O ta ũrĩa tũkuona, motaaro mega ma Bibilia no matũme tũkorũo na muonere ũrĩa wagĩrĩire, na njĩra ya gũtũteithia kũhiũrania na mathĩna marĩa tũcemanagia namo o mũthenya, na gũtũhe kĩĩrĩgĩrĩro kĩega kĩa ihinda rĩũkĩte.

Maũndũ marĩa tũkwarĩrĩria

•  Bibilia ĩtũteithagia atĩa kũgĩa na muonere ũrĩa wagĩrĩire?

•  Bibilia ĩheaga andũ othe kĩĩrĩgĩrĩro kĩrĩkũ?

•  Mĩhari ya Bibilia ĩgiĩ kĩĩrĩgĩrĩro

 Bibilia no ĩtũteithie kũgĩa na muonere ũrĩa wagĩrĩire, na njĩra ya gũtuonia maũndũ tũngĩka nĩguo twagagĩrie ũtũũro witũ. Reke tuone mamwe mamo.

•   Caragia motaaro mangĩgũteithia kuuma Bibilia-inĩ. Thaburi 119:105 yugaga ũũ: “Kiugo gĩaku nĩ tawa wa kũgũrũ gwakwa, na ũtheri wa njĩra yakwa.” Ũtheri ũrona wega no wĩke maũndũ merĩ. No ũtũteithie kuona kĩndũ kĩrĩ hakuhĩ na kĩndũ kĩrĩ haraihu. O ũndũ ũmwe na ũcio, motaaro ma Bibilia no matũteithie kũhiũrania na njĩra njega na mathĩna marĩa tũcemanagia namo o mũthenya na ũndũ ũcio ũtũme tũgĩe na muonere ũrĩa wagĩrĩire. Morutani ma Bibilia no matũme tũcokwo nĩ hinya, na matũme “ngoro ĩkene.” (Thaburi 19:7, 8) Ningĩ Bibilia nĩ ĩtwĩraga ũhoro wa muoroto mwega wa ihinda rĩũkĩte ũrĩa Ngai akoragwo naguo harĩ andũ na harĩ thĩ. Kĩĩrĩgĩrĩro kĩu no gĩtũme tũiganĩre na tũgĩe na gĩkeno gĩa gũtũũra.

•   Ĩtĩkagĩra gũteithio nĩ andũ arĩa angĩ. Rĩrĩa tuona ta tũtarĩ na mwĩhoko, twahota gwĩciria kwĩyamũrania na andũ a famĩlĩ kana arata. Bibilia ĩtwĩraga atĩ ti ũndũ wa ũũgĩ gwĩka ũguo, tondũ ũndũ ũcio no ũtũme tũtue matua matarĩ ma ũũgĩ na twĩke ciĩko itarĩ cia ũũgĩ. (Thimo 18:1) Andũ arĩa matwendete no matũteithie gũtũũria muonere ũrĩa wagĩrĩire. Ningĩ no matũhe motaaro mangĩtũteithia kũhiũrania na ũndũ mũritũ ũrĩa tũragerera. (Thimo 11:14) O na mangĩremwo nĩ gwĩka maũndũ maingĩ, no matũũmĩrĩrie na matũcanjamũre, matũme tũgĩe na hinya wa gũkirĩrĩria nginya rĩrĩa maũndũ marĩagagĩra.—Thimo 12:25.

•   Hoyaga Ngai. Bibilia yugaga ũũ: “Ikagĩria Jehova mũrigo waku, na nĩ arĩgũtiiragĩrĩra. Gũtirĩ hĩndĩ akaareka mũndũ ũrĩa mũthingu agwe.” b (Thaburi 55:22) Jehova nĩ etagwo “Ngai ũrĩa ũheanaga kĩĩrĩgĩrĩro.” (Aroma 15:13) No ũmũhoe igũrũ rĩgiĩ ‘mĩtangĩko yaku yothe’ ũrĩ na ma atĩ nĩ akũrũmbũyagia. (1 Petero 5:7) O na Bibilia yugaga ũũ: “Nĩ egũtũma mũrũme, nĩ ekũmwĩkĩra hinya, na nĩ egũtũma mwĩhande wega. —1 Petero 5:10.

•   Rekaga magerio mekĩre hinya kĩĩrĩgĩrĩro gĩaku. Bibilia ĩranĩire ũũ: “Mũndũ ũrĩa ũnjiguaga arĩikaraga arĩ na ũgitĩri na ahooreire ategwĩtigĩra ũndũ mũũru.” (Thimo 1:33) Mũtumia ũmwe wĩtagwo Margaret kuuma Australia nĩ oorirũo nĩ indo nyingĩ rĩrĩa kĩhuhũkanio kĩnene kĩahũũrire nyũmba yake. No handũ ha gũkua ngoro, nĩ eerutire ũndũ wa bata—atĩ indo cia kĩĩmwĩrĩ no ithire na ihenya mũno. Thutha ũcio, nĩ aatuire itua irũmu o na makĩria rĩa kũiga meciria make harĩ maũndũ marĩa ma bata makĩria—famĩlĩ yake na arata, ũrata wake hamwe na Ngai, na kĩĩrĩgĩrĩro kĩrĩa Bibilia ĩtũheaga.—Thaburi 37:34; Jakubu 4:8.

 Bibilia nĩ ĩranĩire ihinda rĩega rĩũkĩte harĩ andũ na harĩ thĩ. Na kĩĩranĩro kĩu kĩrĩ hakuhĩ kũhinga. Ma nĩ atĩ, mathĩna marĩa andũ maracemania namo ũmũthĩ maronania atĩ tũratũũra “matukũ-inĩ ma kũrigĩrĩria” ma thĩ ĩno. (2 Timotheo 3:1-5) Ica ikuhĩ, Ngai nĩ ekwambĩrĩria gũtongoria maũndũ mothe thĩinĩ wa thĩ na eherie wagi wa kĩhooto na mĩnyamaro. Ageka ũguo akĩhũthĩra thirikari ya thĩ yothe ĩtagwo Ũthamaki wa Ngai. (Danieli 2:44; Kũguũrĩrio 11:15) Jesu aaragĩrĩria ũhoro wa thirikari ĩyo ya igũrũ rĩrĩa aaugire ũũ ihoya-inĩ rĩake rĩa kĩonereria: “Ũthamaki waku nĩ ũũke. Wendi waku nĩ wĩkwo gũkũ thĩ.”—Mathayo 6:9, 10.

 Wendi wa Ngai harĩ andũ nĩ wonanĩtio wega thĩinĩ wa Bibilia. Reke tuone mathĩna mamwe marĩa Ũthamaki wa Ngai ũkeheria:

•   Gũtigaakorũo na ngʼaragu rĩngĩ. “Thĩ nĩ ĩkaaruta maciaro mayo.”—Thaburi 67:6.

•   Gũtigaakorũo na mĩrimũ rĩngĩ. “Gũtirĩ mũndũ ũtũũraga kuo ũkoiga: “Ndĩ mũrwaru.”—Isaia 33:24, kohoro ka magũrũ-inĩ.

•   Gũtigaakorũo na gĩkuũ rĩngĩ. Ngai nĩ ekũgiria andũ “maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo. Maũndũ marĩa ma tene nĩ mathiru.”—Kũguũrĩrio 21:3, 4.