Hihi Ngai Akoragwo Kũndũ Guothe?

THAAKA

Macokio ma Bibilia

Ngai no ahote kuona ũndũ o wothe, na no ahote gwĩka maũndũ handũ o hothe angĩenda. (Thimo 15:3; Ahibirania 4:13) O na kũrĩ ũguo, Bibilia ndĩrutanaga atĩ Ngai akoragwo kũndũ guothe kana indo-inĩ ciothe. No yonanagia atĩ Ngai nĩ arĩ gĩikaro gĩake.

Ũrĩa Ngai atariĩ: Ngai akoragwo na mwĩrĩ wa roho. (Johana 4:24) Andũ matingĩhota kũmuona. (Johana 1:18) Cioneki ciĩgiĩ Ngai iria ciandĩkĩtwo Bibilia-inĩ cionanagia atĩ Ngai nĩ arĩ kũrĩa aikaraga. Gũtirĩ handũ honanagia ta Ngai akoragwo kũndũ guothe.—Isaia 6:1, 2; Kũguũrĩrio 4:2, 3, 8.
Ngai aikaraga kũ? Bibilia yugaga atĩ Ngai nĩ akoragwo na ‘gĩikaro gĩake kũrĩa igũrũ.’ (1 Athamaki 8:30) Ũguo nĩ kuuga atĩ Ngai ndaikaraga gũkũ thĩ na ndaikaraga thĩinĩ wa thĩ iria ingĩ ombĩte, no aikaraga igũrũ. Bibilia nĩ ĩgwetaga hĩndĩ ciũmbe cia roho ‘ciatonyire nĩguo irũgame mbere ya Jehova,’ a ũndũ ũrĩa wonanagia atĩ Ngai nĩ arĩ kũrĩa aikaraga.—Ayubu 1:6.

Angĩkorũo Ngai ndakoragwo kũndũ guothe-rĩ, hihi no ahote kũnũmbũiya niĩ mwene?

Ĩĩ no ahote. Ngai nĩ arũmbũyagia andũ mũno marĩ mũndũ ũmwe ũmwe. O na gũtuĩka Ngai aikaraga igũrũ, nĩ onaga andũ arĩa marĩ gũkũ thĩ arĩa merutanagĩria kũmũkenia, na nĩ amateithagia. (1 Athamaki 8:39; 2 Maũndũ ma Matukũ ma Tene 16:9) Reke tuone ũrĩa Jehova onanagia atĩ nĩ arũmbũyagia arĩa mamũthathayagia kuuma ngoro:

Rĩrĩa ũrahoya: Jehova no aigue mahoya maku o ihinda-inĩ rĩrĩa wamũhoya.—2 Maũndũ ma Matukũ ma Tene 18:31.
Rĩrĩa ũthuthĩkĩte ngoro: “Jehova akoragwo hakuhĩ na arĩa mathuthĩkĩte ngoro; nĩ ahonokagia arĩa mahehenjekete roho.”—Thaburi 34:18.
Rĩrĩa ũrabatara ũtongoria: Jehova nĩ ‘arĩkũheaga ũtaũku na agakũruta’ kũgerera Kiugo gĩake, Bibilia.—Thaburi 32:8.

Mawoni mahĩtanu megiĩ Ngai gũkorũo arĩ kũndũ guothe

Mawoni mahĩtanu: Ngai akoragwo kũndũ guothe ũũmbi-inĩ wake.

Ũrĩa kũrĩ: Ngai ndaikaraga gũkũ thĩ, o na kana kũndũ kũngĩ thĩinĩ wa thĩ iria ingĩ ombĩte. (1 Athamaki 8:27) Nĩ ma atĩ njata o hamwe na indo iria ingĩ ombĩte nĩ “[imenyithanagia] riri wa Ngai.” (Thaburi 19:1) No o ta ũrĩa mũcori ataikaraga thĩinĩ wa mbica ĩrĩa acorete, noguo Ngai ataikaraga thĩinĩ wa ũũmbi wake. O na kũrĩ ũguo, mbica no ĩtũteithie kũmenya ũhoro wĩgiĩ mũndũ ũrĩa wamĩcorire. Ũndũ ũmwe na ũcio, indo iria ciũmbĩtwo kũrĩa igũrũ na gũkũ thĩ no itũteithie kũmenya “ngumo [cia Mũũmbi witũ] iria itonekaga na maitho,” ta hinya wake, ũũgĩ, na wendo wake.—Aroma 1:20.

Mawoni mahĩtanu: No mũhaka Ngai akorũo arĩ kũndũ guothe nĩguo ahote kũmenya maũndũ mothe na akorũo arĩ mwene-hinya-wothe.

Ũrĩa kũrĩ: Roho mũtheru nĩ hinya ũrĩa Ngai ahũthagĩra gwĩka maũndũ. Ngai ahũthagĩra roho ũcio wake mũtheru kũmenya maũndũ, na gwĩka ũndũ o wothe handũ o hothe, hĩndĩ o yothe, atekũbatara gũthiĩ ho we mwene.—Thaburi 139:7.

Mawoni mahĩtanu: Rĩandĩko rĩa Thaburi 139:8 rĩrutanaga atĩ Ngai akoragwo kũndũ guothe, tondũ riugaga ũũ: “Ingĩambata igũrũ, ũngĩkorũo kuo, na ingĩara ũrĩrĩ wakwa thĩinĩ wa Mbĩrĩra, ũngĩkorũo o kuo.”

Ũrĩa kũrĩ: Rĩandĩko rĩrĩ rĩtikoragwo rĩkĩarĩrĩria kũrĩa Ngai akoragwo. Ũcio nĩ ũhoro wandĩkĩtwo na njĩra ya irebeta gũtũruta atĩ Ngai no ahote gũtũteithia gũtekũmakania kũrĩa tũrĩ.

a Jehova nĩrĩo rĩĩtwa rĩa Ngai ta ũrĩa rĩguũrĩtio thĩinĩ wa Bibilia.