Ovo va ninginifwa ve li Eendombwedi daJehova ndele ihava udifile vali vamwe, tashi dulika va efa po okweendafana novaitaveli vakwao, ihava henukwa. Ohatu i kuvo nokukendabala oku va kwafela va kale vali ve na ohokwe moinima yopamhepo.

 Ihatu kondo mo ashike ngahenya omunhu oo a nyona enyono la kwata moiti. Ndele ngeenge Ondombwedi ya ninginifwa oi na onghedindjikilile yokunyona omafinamhango Ombibeli opaenghedi, ndele inai livela ombedi, oi na okuhenukwa ile okukondwa mo. Ombibeli oya popya sha yela ya ti: “Kondeni mo ou mwii womokati keni.”—1 Ovakorinto 5:13.

 Ongahelipi shi na sha nomulumenhu oo a kondwa ndele omukulukadi waye nounona ove li natango Eendombwedi daJehova? Ekwatafano lopalongelokalunga olo a kala e na navo ohali lunduluka, ndele loupambele ihali lunduluka. Ekwatafano lopahombo nosho yo ohole youkwaneumbo noinima yakwalukeshe otai twikile.

 Oohandimwe ovo va kondwa mo otava dulu okuuya kokwoongala kwetu. Ngeenge ova hala, otava dulu yo okupewa omayele opamhepo kovakulunhuongalo. Elalakano olo okukwafela keshe umwe pauhandimwe a kale a wana okukala vali umwe womEendombwedi daJehova. Ovanhu ovo va kondwa ndele ova efa po elihumbato inali koshoka nova ulika kutya ova hala shili okukala metwokumwe nomafinamhango Ombibeli ohava tambulwa ko va kale vali oilyo yeongalo.