Eendombwedi daJehova ohadi longifa onghedi hai pondola, opo u lihonge osho Ombiibeli tai hongo. Ekonakonombiibeli olo hatu ningi otali dulu oku ku kwafela:

•   U kale nonghalamwenyo ihafifa

•   U ninge kaume kaKalunga

•   U lihonge osho Ombiibeli ya udaneka shi na sha nonakwiiwa

Pepandja eli

•  Oshike hashi ningwa pekonakonombiibeli?

•  Mbela ondi na okufuta ekonakonombiibeli?

•  Ohali kwata efimbo li fike peni?

•  Ondi na okuhovela ngahelipi?

•  Mbela ohandi dulu tete okuninga omalolelo ekonakonombiibeli?

•  Ngeenge onda tambula ko ekonakonombiibeli, mbela ohandi ka fininikwa ndi ninge Ondombwedi Jehova?

•  Ohandi dulu ngoo okulongifa Ombiibeli yange mwene?

•  Ohandi dulu ngoo okushiva vamwe va waimine nge pekonakonombiibeli?

•  Ongahelipi ngeenge onda li nale handi konakona Ombiibeli nEendombwedi daJehova? Mbela ohandi dulu ngoo vali okukonakona?

•  Mbela omunhu ota dulu okuhoolola okukonakona kuye mwene nopehe na omuhongi waye?

 Omuhongi woye ota dulu oku ku kwafela u shiive Ombiibeli, mokukundafana oikundafanwa kooshimwe. Ngeenge owa longifa embo Nghee to dulu okuhafela onghalamwenyo fiyo alushe! oto ka twikila okulihonga osho Ombiibeli tai hongo nosho yo nghee tai dulu oku ku kwafela. Opo u lihonge shihapu, tala okavidio aka.

 Ahawe. Eendombwedi daJehova ohadi shikula elombwelo olo Jesus a pa ovahongwa vaye, tali ti: “Omwa pewa oshali, yandjeni yo oshali.” (Mateus 10:8) Shikwao vali, ito pulwa u futile oinima oyo tamu longifa, mwa kwatelwa Ombiibeli nosho yo oshishangomwa Nghee to dulu okuhafela onghalamwenyo fiyo alushe!

 Ekonakonombiibeli le lixwapo oli na oileshwa 60. Onhapo oye likolelela kwoove, ashike ovakonakonimbiibeli vahapu ove hole okumana ko oshileshwa shimwe, ile i dulife po moshivike.

1.  1. Yadeka ofooloma oyo i li kointaneta. Ohatu ka longifa ouyelele wopaumwene oo wa yandja, tu wanife po osho wa pula, naumwe womEendombwedi daJehova ota ka kwatafana naave.

2.  2. Omuhongi ota ka kwatafana naave. Omuhongi woye ota ka yelifa osho to ka mona pekonakonombiibeli loye nota ka nyamukula epulo keshe olo tashi dulika u na.

3.  3. Ove nomuhongi woye otamu ka ninga elongekido. Ekonakonombiibeli otali dulu okuningwa mu li pamwe, ile pangodi, pavidio, panhumwafo, ile pa e-mail. Ekonakonombiibeli ohali kwata ovili lwaapo, ndele otali dulu okukala lixupi, ile lile she likolelela kefimbo loye.

 Heeno. Opo u ninge ngaho, yadeka ofooloma oyo i li kointaneta. Ngeenge omuhongi okwa kwatafana naave, mu shiivifila kutya owa hala okuninga omalolelo ekonakonombiibeli, u tale ngeenge ou li hole. Ote ke ku pa okambo Nghee to dulu okuhafela onghalamwenyo fiyo alushe! oko ke na oileshwa itatu yetwalemo, osho tashi ku kwafele u mone ngeenge oto hafele ngoo ekonakonombiibeli, ile hasho.

 Ahawe. Eendombwedi daJehova odi hole okuhonga ovanhu Ombiibeli, ashike ihatu fininike vamwe ve tu waimine melongelokalunga letu. Ponhele yaasho, ohatu hongo nefimaneko osho Ombiibeli tai ti, tu na momadiladilo kutya keshe umwe oku na oufemba wokuhoolola osho ta itavele. — 1 Pet. 3:15.

 Heeno, oto dulu okulongifa Ombiibeli keshe oyo wa hala. Nonande fye ohatu hafele okulongifa o-New World Translation of the Holy Scriptures, oyo yela noi li paushili, otwa didilika kutya ovanhu vahapu ove hole okulongifa Eembibeli odo ve na nale.

 Heeno. Oto dulu okushiva oukwaneumbo weni aushe, ile keshe umwe oo wa hala a kale po.

 Heeno. Oto dulu okuhafela ekonakonombiibeli paife shi dulife nale, molwaashi ouyelele owa pepalekwa, opo u wapalele eemhumbwe odo ovanhu ve na paife. Ola mwenyopala noli li monghedi yeenghundafana shi dulife omo la li hali ningwa nale.

 Heeno. Nonande ovakonakonimbiibeli vahapu ohave lihongo nawa tava kwafelwa komuhongi, vamwe ove hole tete okukonakona kuvo vene. Opo pe na oilongifo yetu yokukonakona Ombiibeli ope na omusholondodo woilongifo nosho yo oinima ikwao yoshali, oyo tai dulu oku ku kwafela, eshi to konakona Ombiibeli. Apa otapa shikula oilongifo imwe oyo tashi dulika i ku kwafele:

•   Ouvidio vopaMbiibeli. Ouvidio ava va xupi ova yelifa omahongo Ombiibeli a fimana.

•   Omapulo opaMbiibeli a nyamukulwa. Oitukulwa ei ohai yandje omanyamukulo a yoolokafana komapulo opaMbiibeli.

•   Omishangwa da yelifwa. Shiiva eityo leevelise dopaMbiibeli odo hadi longifwa unene nosho yo omautumbulilo.