Eshi o-COVID-19 ya hovela, ovamwatate novamwameme ova li va lundulula eenghedi omo va li hava udifile ovanhu etumwalaka lOmbiibeli noku va hekeleka. Ohava udifa tava denge eengodi nokushanga eenhumwafo, ponhele yokuudifila meenhele daaveshe, ile okuya komaumbo ovanhu. * Vahapu ova pandula eenghendabala odo, na Jehova okwe di nangeka noupuna. (Omayeletumbulo 16:3, 4) Natu ka taleni koshilongo shimwe, osho shi li kokanhunhu.

 Ofimbo omukifi wekomba inau hovela, Helen okwa li ha talele po omukainhu umwe omunyasha pandjikilile noku mu lombwela va kale ha konakona Ombiibeli. Ashike omukainhu oo ka li a dimina ekonakono. Ndele efiku olo la tetekela eendjidikila odo da tulwa po omolwo-COVID-19, Helen okwa li e mu pa Ombiibeli nosho yo embo Oshike hatu lihongo mOmbiibeli? Pefimbo opo pa tulwa eendjidikila, Helen okwa li a lombwela omukainhu oo va konakone Ombiibeli. Okwe mu lombwela kutya otava kala tava konakona okupitila mongodi. Opo nee omukainhu oo okwa li a dimina. Okwa li a hafele eenghundafana nokwa lombwela Helen va kale hava konakona efiku keshe. Omukainhu oo okwa hovela yo okukala hava kala pokwoongala pandjikilile okupitila mongodi. Naashi shihokwifa osheshi kutya iha tula ashike moilonga osho te lihongo, ndele oha lombwele yo vamwe kombinga yasho.

 Eendombwedi dimwe domeongalo limwe oda li nda shangela ovapolifi eenhumwafo dolupandu omolwoilonga yavo, molwaashi okushanga eenhumwafo oku li oshitukulwa shoukalele wado. Ovapolifi ova li va kuminwa eenhumwafo odo. Omupolifi umwe okwa lombwela, omukulunhuongalo, Jefferson, a ti: “Onda li handi diladila kutya Eendombwedi odi li omhinge nopolifi.” Jefferson okwa li a dula oku mu yelifila nawa shi na sha neudeko olo la puka. Ovapolifi ova li va hafela neenghono eenhumwafo odo nove di tulika poshivelo shopolifi. Omupolifi umwe vali okwa ti: “Eenhumwafo odo otashi dulika di ka kwafele vamwe va kale ve na etaleko liwa li na sha nafye.”

 Edna naEdnalyn aveshe ovakokolindjila vondjikilile. * Molwaashi kave na ointaneta, kava li tava dulu okukala pokwoongala okupitila pavidio. Opo nee ova dengela omushiinda shavo, oo ehe fi Ondombwedi, e na o-Wi-Fi noku mu lombwela e va kwafele va kale tave i longifa nokukala tava yandje omayambidido. Omukainhu okwa li e va pa epitikilo, ashike okwa ti itava futu sha. Eshi Edna naEdnalyn ve mu shiva a kale ha kala pokwoongala, okwa li a dimina. Paife omukainhu oo, omonakadona waye umwe nosho yo ovatekulu vavali ohava konakona Ombiibeli nEendombwedi nokukala pokwoongala pandjikilile.

 Ovamwatate novamwameme vomoshitukulwa ohava shivi ovashiinda shavo, ovanailonga pamwe nosho yo ovanhu vakwao koshipopiwa shomoipafi, osho tashi yandjwa okupitila pavidio. Ellaine, oo ha longo moshipangelo shopomudingonoko, okwa li ta ongaonga okushiva ovanailonga pamwe naye. Okwa li ta diladila kutya pamwe eendokotola otadi ka kala di na etaleko lii li na sha nEendombwedi. Opo nee okwa li e di shangela pahole te di shivi kokwoongala. Ashike Ellaine okwa li ta ongaonga okushiva eendokotola mbali, odo da li ovalihomboli. Konima eshi a diladila kombinga yoshinima osho nokwiilikana, okwa li e di tumina etumwalaka. Omukainhu okwa alula a ti: “Tashi ti owa hala ndi waimine elongelokalunga leni?” Ellaine okwa ti okwoongala okwa yeulukila keshe umwe, ndele inaku nuninwa ashike Eendombwedi daJehova odo adike. Mongula kushe, Ellaine okwa li a kumwa, eshi ovalihomboli ovo va konekta kokwoongala kuyele. Ellaine okwa ti: “Ofimbo inatu dimbuka, onda tuminwa etumwalaka kundokotola ou womukulukadi tali ti: ‘Eshi osho oshikando shange shotete handi kala pokwoongala kwEendombwedi daJehova. Okwa enda po nawa. Onde ku tyapula lela. Tangi unene, eshi we tu shiva.’”

 Ellaine okwa li a shiva eendokotola 20 nokwa li a hafa, eshi pokwoongala pa li eendokotola 16. Okwa tofa eendjovo domuyapostoli Paulus a ti: “Onda hafa eshi Kalunga ‘a pa nge ouladi’ ndi dule ‘okuudifila onghundana iwa’ ovanailonga vakwetu.” — 1 Ovatessalonika 2:2

 Omukifi wekomba owe shi ningifa shidjuu kukeshe umwe. Ashike ovamwatate novamwameme ovo ve li koshilongo osho shi li kokanhunhu nosho yo koilongo ikwao ova dula okukaleka po ehafo lavo nove na etaleko liwa, eshi tava ningi ngaashi tava dulu opo va hekeleke ovanhu vakwao noku va kwafela. — Oilonga 20:35.