Kakala iha tondoka ina dengwa. Naame osho onda li ngaho. Onda dalelwa nonda tekulilwa moBarcelona, oshilando oshitivali shinene moSpain. Oukwaneumbo wetu owa li hau di moshitukulwa shedina Somorrostro, osho shi li oshitukulwa shinene shomunghulofuta woshilando. Somorrostro oshi shiivikile oimbuluma nosho yo elongifo loingangamifi.

Otwa dalwa tu li omuwoi; aame oshiveli. Molwaashi otwa li twa hepa, tate okwa kongela nge oilonga kokapale koudano wo-tennis. Onda li ndi na eedula omulongo nonda li handi longo eevili omulongo efiku keshe. Kanda li handi i kofikola ngaashi ounona vakwetu. Eshi nda li ndi na omido 14, onda ka hovela oilonga mofitola yoitenda.

Mo 1975, onda li nda ifanwa ndi waimine etangakwaita laSpain. Molwaashi onda li nda hala okukendabala oshinima shipe monghalamwenyo yange, onda li nde liyamba okuwaimina etangakwaita laSpain olo la li muMelilla, kolundume laAfrika. Eshi nda li oko, onda hovela okulongifa oingangamifi nosho yo oikolwifa.

Eshi nda dja moukwaita, onda shuna koBarcelona nokutota po ongudu yokulonga ominyonena. Otwa li hatu vake keshe osho hatu hange. Notwa li hatu landifa po oinima oyo twa vaka opo tu ka lande oingangamifi. Onda ka hovela okulongifa oingangamifi ya nyika oshiponga nonda ka pikwa koipala, oikolwifa nosho yo kokundobola. Osho osha ka ningifa nge ndi kale ndi hole elongifo leenghono. Onda li alushe handi kala nda homata omukonda, okakuva ile ekatana, nokanda li handi tila oku i longifa ngeenge sha pumbiwa.

Oshikando shimwe otwa li twa vaka otuwa notwa li hatu tewa kopolifi. Osha li ashike sha fa omunhu ta tu ondjodi. Eshi twa shinga otuwa oyo twa vaka oule weekilometa 30, opolifi oya hovela oku tu umba. Otuwa yetu oya li ya kondama, ndele hatu faduka po. Eshi tate eshi uda, okwa ta nge mo meumbo.

Oule womido nhano, onda kala handi di momapandavanda. Onda li handi nangala keshe pamwe, ngaashi momaloli, koipundi yomeeparka nosho yo momaendo. Onda kala yo handi di mekololo oule wefimbo. Onghalamwenyo yange kaya li i na eityo lasha, onda li yo ndi udite kutya okukala nomwenyo ile okufya, ashishe shimwe ashike. Opa li oshikando shimwe nda li nde lilengaula shinyanyalifi komaoko ofimbo nda li koshi yenwefemo loingangamifi. Fiyo okunena eli, ondi na oivadi.

Eshi nda li ndi na omido 28, meme okwe uya okukonga nge, nokupula nge ndi shune keumbo. Onda dimina noku mu udanekela kutya ohandi ka ninga omalunduluko, ashike osha pula efimbo noule okuwanifa po eudaneko lange.

Efiku limwe komatango, Eendombwedi mbali oda li da konghola pomuvelo wetu. Eshi nda li handi pwilikine kudo, tate okwa ingida, ta lombwele nge ndihe di pwilikine. Molwaashi kanda li handi petwa momutwe, kanda li nda yandja elitulemo kwaasho a li ta lombwele nge. Eendombwedi oda pa nge oumbo vatatu, ovo nda tambula ko nolupandu. Onda li nde di pula kutya ohadi ongalele peni, nokonima yomafiku manini, onda li nda ya kOlupale lOuhamba.

Oshinima shotete nda didilika kuvo onghedi omo keshe umwe a li a djala. Onda li ndi na eexwiki dile, eendjedi noikutu yange kaya li monghalo iwa. Onda li ndi wete kutya inandi wana okuya meni, onghee onda kala ashike pondje. Ashike onda li nda kumwa eshi nda mona Juan, oo twa li navo mongudu imwe yokulonga ominyonena, a djala oshuta. Lwanima onda ka uda kutya okwa ninga Ondombwedi yaJehova omudo wa ya. Eshi nde mu mona, osha twa nge omukumo opo ndi ye meni nokukala po pokwoongala. Okudja opo, onda hovela okuninga omalunduluko.

Onda tambula ko ekonakonombiibeli nonda mona diva kutya ngeenge onda hala Kalunga a kale a hokwa nge, ondi na okulundulula onghedi yange yokukalamwenyo inai koshoka nokweefa po ehandu lange. Kasha li shipu okuninga omalunduluko a tya ngaho. Onde lihonga kutya ngeenge onda hala okuhafifa Jehova Kalunga, ondi na ‘okulundulula omadiladilo ange.’ (Ovaroma 12:2) Onda li nda kumwa neenghono konghenda yaKalunga. Nonande onda ninga omapuko mahapu, onda li ndi udite kutya ota pe nge omhito ndi ninge omalunduluko. Osho nde lihonga kombinga yaJehova osha ya lela moule womutima wange. Osha li sha yela kutya oku na Omushiti oo e na ko nasha naame. — 1 Petrus 5:6, 7.

Osho oshe linyengifa nge ndi ninge omalunduluko. Pashihopaenenwa, eshi twa li hatu konakona kombinga yomakaya o-tobacco, onde lipopila nda ti, ‘Ngeenge Jehova Kalunga okwa hala ndi kale nda koshoka noinandi nyata, ondi na oku a efa po.’ (2 Ovakorinto 7:1) Nonda li nde a kupulashi mondoloma!

Onda li yo nda pumbwa okweefa po okulongifa nokulandifa oingangamifi. Osho osha li sha pula efimbo neenghendabala dihapu. Opo ndi pondole, onda li ndi na okweefa po okweendafana naavo ve li meengudu dokulonga ominyonena. Enwefemo lavo kala li tali kwafele nge ndi ninge exumokomesho. Mokweendela ko kwefimbo, onda hovela okulineekela Jehova nosho yo mekwafo lookaume vape ovo nda panga meongalo. Ohole yavo nosho yo okunakonasha kwavo oshinima osho inandi mona nande onale. Hauxuuninwa, onda efa po okulongifa oingangamifi nonda ‘djala omunhu mupe,’ naasho osha kwafela nge ndi kale nda hokiwa kuKalunga. (Ovaefeso 4:​24) Onda ninginifwa ndi li Ondombwedi yaJehova muAuguste 1985.

Ombiibeli oya kwafela nge ndi kale ndi na onghalamwenyo tai ti sha. Oya mangulula nge konghalamwenyo oyo ya li tai hanauna po olutu lange nosho yo eenghedi dange diwa. Shinyikifa oluhodi, vakwetu 30 ovo nda li handi endafana navo ova fya mounyasha wavo komukifi wo-AIDS nosho yo komikifi dimwe di na sha noingangamifi. Onda pandula unene eshi nda dula okutula moilonga omafinamhango Ombiibeli molwaashi osha xupifa nge mo monghalo ya tya ngaho.

Omikonda noukuva ovo nda li handi ende nda homata, paife oi li ondjokonona kwaame. Kape na fiku nde lipulile kutya onandi ka ende nda humbata Ombiibeli nokukwafela vamwe va shiive Kalunga. Kunena, ame nomukulukadi wange otu li ovalongi vefimbo li yadi.

Ovadali vange inava ninga Eendombwedi, ashike ova pandula omauwa oo nda mona eshi nda konakona Ombiibeli. Tate okwa li nokuli ha popile Eendombwedi koilonga yavo. Okwa li a didilika kutya eitavelo lange ola kwafela nge ndi ninge omalunduluko akumwifi. Meme okwa li nokuli ha ti ngeno onda hovelele okukonakona Ombiibeli diva, nohandi tu kumwe lela naye!

Oimoniwa yomonghalamwenyo yange oya honga nge kutya okukonga ehafo moinima yahamakasha, ngaashi moingangamifi nosho yo muimwe i lili, kashi na ekwafo lasha. Paife ohandi mono ehafo lashili mokuhonga vamwe Eendjovo daKalunga odo da xupifa onghalamwenyo yange.