Mbela Kalunga okwa longifa oevolusi opo a shite oinima i na omwenyo ya yoolokafana?
Enyamukulo lopaMbiibeli
Ahowe. Ombiibeli oya popya sha yela kutya Kalunga okwa shita ovanhu nosho yo oinamwenyo noimeno ‘yomaludi’ a yoolokafana. a (Genesis 1:12, 21, 25, 27; Ehololo 4:11) Oya popya yo kutya ovanhu aveshe ova dja muAdam naEva, ovadali vetu votete. (Genesis 3:20; 4:1) Ehokololo lopaMbiibeli itali yambidida ediladilo olo kutya Kalunga okwa longifa oevolusi opo a shite oinima i na omwenyo ya yoolokafana. Ashike, Ombiibeli itai kondjifafana novanongononi ovo tava ti kutya oku na oinamwenyo yomaludi a yoolokafana.
Mbela Kalunga okwa longifa oevolusi?
Ovanhu ovo va itavela kutya Kalunga okwa longifa oevolusi, opo a shite oinima i na omwenyo, ove na omadiladilo a yoolokafana e na sha naasho. O-Encyclopædia Britannica oya popya kutya ovanhu vamwe ova itavela kutya “Kalunga okwa shita oinamwenyo i kale hai lunduluka she likolelela keenghalo.”
Eitavelo la tya ngaho ola kwatela mo yo omadiladilo taa shikula:
Oinamwenyo aishe oya dja moludi limwe loinamwenyo oyo ya li ko nalenale.
Moludi limwe loinamwenyo omwa dja omaludi a yoolokafana oinamwenyo.
Kalunga oye e na okukala a eta po eenghedi omo oinamwenyo hai lunduluka.
Mbela oevolusi otai tu ngoo kumwe nOmbiibeli?
Ovo va itavela kutya oinima oye uya po paevolusi otava ti kutya ehokololo lopaMbiibeli olo tali hangwa muGenesis li na sha neshito ka li li mondjila. Ashike Jesus okwa longifa eendjovo odo di li muGenesis opo a yelife ondjokonona i li paushili. (Genesis 1:26, 27; 2:18-24; Mateus 19:4-6) Ombiibeli oya popya kutya ofimbo Jesus ine uya kombada yedu okwa li meulu pamwe naKalunga, nokwe mu kwafela mokushita “oinima aishe.” (Johannes 1:3) Onghee hano, ediladilo kutya Kalunga okwa longifa oevolusi opo a shite oinima ya yoolokafana i na omwenyo otali kondjifafana naasho Ombiibeli tai hongo.
Mbela ongahelipi shi na sha noimeno nosho yo noinamwenyo oyo hai xupu meenghalo domhepo da yoolokafana?
Ombiibeli inai yelifa nghee moludi keshe tamu dulu okudja oinima yoludi olo tuu olo ya yoolokafana. Noitai kondjifafana yo noushili oo kutya oinamwenyo noimeno yomaludi e lili noku lili oyo ya shitwa kuKalunga ohai kala ya yoolokafana eshi tai lidala nokupita meenghalo da yoolokafana. Nonande vamwe ova tala ko oshinima osho shi li omukalo woevolusi, ihashi etifa po omaludi mape oinamwenyo.
a Ombiibeli oya longifa oshitya ‘oludi,’ osho shi na eityo la mbwalangadja, ponhele yokulongifa oshitya “ongudu” osho hashi longifwa kovanongononi. Omafimbo amwe, shimha ovanongononi va mono oinamwenyo oyo inava mona nale, ohava ti oye uya po paevolusi, ashike paulelalela oinamwenyo ya tya ngaho oi li oludi loinamwenyo oyo ya popiwa muGenesis.
Otashi dulika yo u hafele oikundafanwa ei
OMAHONGO OMBIIBELI A FIMANA
Eshito ole uya po ngahelipi?
Ovanhu vahapu kave udite ko ehokololo olo li li membo olo la popya kombinga yeshito, navamwe ove li tala ko li li eengano. Ohatu dulu ngoo okwiitavela osho Ombiibeli ya popya kombinga yeshito?
OMAPULO OO HAA PULWA LUHAPU
Mbela Eendombwedi daJehova oda itavela mehongo lo-Creationism?
Ou shi shii ngoo kutya omadiladilo amwe e na sha nehongo lo-Creationism otaa kondjifafana nOmbibeli.
KOMBINGA YETU
Pula u talelwe po
Kundafaneni kombinga yepulo lopaMbiibeli, ile u lihonge shihapu kombinga yEendombwedi daJehova.