Heeno, Ombiibeli oi na oumbangi oo tau ulike kutya Kalunga oko e li. Otai tu ladipike tu kale tu na eitavelo muKalunga, hamokwiitavela ashike moinima yomalongelokalunga, ndele ‘omokudiladila pandunge.’ (Ovaroma 12:1; 1 Johannes 5:20) Natu ka taleni komatomheno taa shikula a kanghamena kOmbiibeli:

•   Okuunganekwa kweshito otaku ulike kutya oku na Omushiti. Ombiibeli oya ti: “Eumbo keshe oli na omutungi walo, ndele Kalunga oye a shita oinima aishe.” (Ovaheberi 3:4) Nonande omushangwa oo otau monika wanafangwa, ovahongwanhu vahapu ova popya kutya otau ti sha. a

•   Tu li ovanhu, ohatu kala twa hala okuuda ko eityo nosho yo elalakano longhalamwenyo, oshinima osho hashi kala shidjuu okuuda ko nonande otu wanife po eemhumbwe detu dopalutu. Osho oshi li oshitukulwa ‘shewiliko laKalunga,’ osho sha tumbulwa mOmbiibeli, naasho osha kwatela mo ehalo lokukala twa hala oku mu shiiva noku mu longela. (Mateus 5:3; Ehololo 4:11) Ewiliko la tya ngaho itali ulike ashike kutya Kalunga oko e li, ndele otali ulike yo kutya oku li Omushiti omunahole, oo a hala okuwanifa po omhumbwe yetu yopamhepo. — Mateus 4:4.

•   Ouyelele u na sha nomaxunganeko oo a shangwa mOmbiibeli oule womafelemido otau wanifwa po naanaa ngaashi sha xunganekwa. Ouyelele washili u na sha nomaxunganeko otau ulike filufilu kutya owa dja kodjo i na eenghono di dule dopanhu. — 2 Petrus 1:21.

•   Ovashangi vOmbiibeli ova li va shanga kombinga younongononi, oshinima osho sha li shidjuu kuvo okuuda ko. Pashihopaenenwa, ovanhu vahapu vonale ova li va itavela kutya edu otali yambididwa koinamwenyo, ngaashi kondjaba, konguluve ile kohove. Mepingafano naasho, Ombiibeli oya ti kutya Kalunga okwa “endjelelifa edu ponhele pehe na sha.” (Job 26:7) Sha faafana, Ombiibeli oya popya yo shi na sha nomutungilo wedu kutya oli li ‘ongonga.’ (Jesaja 40:22) Ovanhu vahapu ohava tomhafana nove udite ko kutya ovanhu ovo va shanga Ombiibeli ova pewa ouyelele oo kuKalunga.

•   Ombiibeli oya nyamukula omapulo mahapu madjuu, naamwe omuo otaa dulu okulimbililika omunhu a kale inaa itavela muKalunga ngeenge ina mona enyamukulo tali mbilipaleke. Pashihopaenenwa: Ngeenge Kalunga omunahole noku na eenghono da shiya ko, omolwashike mounyuni mu yadi okumona oixuna nominyonena? Omolwashike omalongelokalunga haa nwefa mo ovanhu va longe owii ponhele yokulonga ouwa? — Titus 1:16.