Ombiibeli oya ti kutya Kalunga okwa hala ovanhu ve “likaleke kokule noluhaelo.” (1 Ovatessaloniki 4:3) Oshitya osho sha longifwa mOmbiibeli “oluhaelo” osha kwatela mo ovanyoni vohombo, omashenge nosho yo okuya momilele kwomulumenhu nomukainhu ovo inava hombola.

•  Mbela osha fimana kuKalunga ovanhu va hombole?

•  Ongahelipi shi na sha nokuya momilele komesho yohombo?

•  Ongahelipi ovalihomboli tava dulu okupameka ohombo yavo?

•   Ohombo oi li elongekido la tulwa po kuKalunga. Okwe i tota po eshi a hombolifa ovanhu votete. (Genesis 2:22-24) Ka li a hala omulumenhu nomukainhu va kale pamwe inava hombola.

•   Kalunga oku shii osho sha denga mbada kovanhu. Okwa tota po ohombo i kalelele pokati komulumenhu nomukainhu opo aveshe va mone ouwa nokwaamena oilyo yavo aishe youkwaneumbo. Natu ka taleni kefaneko li li paunafangwa. Ngaashi ashike okambo komunduluki ke na sha nomalombwelo anghee u na okutula kumwe oshinima shonhumba, Kalunga naye okwe tu pa omalombwelo anghee hatu dulu okupameka ekwatafano letu tu li oukwaneumbo. Aveshe ovo hava tula moilonga omifikamhango daKalunga ohava mono ouwa. — Jesaja 48:17, 18.

•   Okuya momilele kondje yohombo ohashi eta oilanduliko ya kwata moiti. Pashihopaenenwa, otashi dulu okweeta edimo inali halika, omikifi odo hadi tandavele pamilele nosho yo omauyahame opamaliudo. a

•   Kalunga okwa pitika omulumenhu nomukainhu va dalafane okupitila momilele. Kalunga okwa tala ko omwenyo uyapuki, nokudalafana oku li oshali i na ondilo. Kalunga okwa hala tu kale twa fimaneka oshali oyo mokukala twa fimaneka elongekido laye li na sha nohombo. — Ovaheberi 13:4.

 Okukala pamwe inamu hombola efimbo lonhumba, hasho hashi ufa kutya ohombo yeni otai ka pondola. Ponhele yaasho, ekwatafano lovalihomboli ohali kala la pama ngeenge tava longele kumwe nokupongolola po omaupyakadi. b Ohombo ohai pameke ekwatafano. — Mateus 19:6.

 Kape na ohombo ya wanenena. Ndele ovalihomboli otava dulu okupondola mohombo yavo ngeenge ohava tula moilonga omayele Ombiibeli. Apa otapa shikula oihopaenenwa imwe:

•   Kala wa pitifa komesho eemhumbwe dakaume koye kopahombo. — 1 Ovakorinto 7:3-5; Ovafilippi 2:3, 4.

•   Kulikeni ohole nokukala mwa fimanekafana. — Ovaefeso 5:25, 33.

•   Kala ho pangele elaka loye. — Omayeletumbulo 12:18.

•   Kala u na elididimiko noho dimine po diva. — Ovakolossi 3:13, 14.