OMISHANGWA DA YELIFWA
Jeremia 29:11 — “Omadiladilo ange nde e mu diladilila ondi a shii”
“Omadiladilo ange nde e mu diladilila ondi a shii, Omwene osho ta ti, omadiladilo ombili, hao omupya. Ame ohandi mu pe efimbo lokomesho pamwe neteelelo liwa.” — Jeremia 29:11, Ombiibeli yOshikwanyama yomo 2013.
Osho omushangwa waJeremia 29:11 wa hala okutya
Jehova Kalunga okwa udanekela ovashikuli vaye kutya oku va nine onakwiiwa iwa yombili. Nonande eendjovo odo oda li da shangelwa oshiwana shaye shomonakudiwa, natango otadi yelifa omadiladilo aye kunena. Oye ‘Kalunga ou ha yandje eteelelo.’ (Ovaroma 15:13) Okwa shangifa omaudaneko oo mOmbiibeli opo “tu kale tu na eteelelo” li na sha nonakwiiwa. — Ovaroma 15:4.
Oshikalimo shomushangwa waJeremia 29:11
Eendjovo odo odi li oshitukulwa shonhumwafo oyo ya li ya shangelwa Ovaisrael ovo va li moukwatwa waBabilon va dja kuJerusalem. * (Jeremia 29:1) Kalunga okwa li xunganekela eenghwate odo kutya ova li tava ka kala moupika oule wefimbo lile nova li tava ka tunga omaumbo avo, tava ka ninga oikunino nokutekula omaukwaneumbo. (Jeremia 29:4-9) Kalunga okwa weda ko a ti: “Omido 70 domuBabilon nge da xula, Ame ohandi ke mu dimbulukwa noku mu wanifila eudaneko lange liwa, ndi mu alulile [kuJerusalem].” (Jeremia 29:10) Kalunga okwa li e va udanekela kutya ka li te ke va dimbwa, nonokutya eudaneko lavo li na sha nokwaalukila kuJerusalem otali ka wanifwa. — Jeremia 31:16, 17.
Kalunga okwa li a wanifila Ovaisrael eudaneko olo. Babilon osha li sha findwa kohamba yaPersia yedina Kores, ngaashi sha li sha xunganekwa. (Jesaja 45:1, 2; Jeremia 51:30-32) Konima yaasho, Kores okwa li a pitika Ovajuda va shune keduumbo lavo. Ova li va shuna kuJerusalem konima eshi va kala moukwatwa oule womido 70. — 2 Omafimbo 36:20-23; Esra 3:1.
Ewanifo leudaneko olo li muJeremia 29:11 otali shilipaleke aveshe ovo va itavela momaudaneko aKalunga kunena. Omaudaneko oo okwa kwatela mo ombili kombada yedu alishe oyo tai ka etwa kOuhamba waKalunga, oo u li meke laKristus Jesus. — Epsalme 37:10, 11, 29; Jesaja 55:11; Mateus 6:10.
Omutotolombo u na naJeremia 29:11
Omutotolombo: Kalunga okwa “nuna” keshe umwe pauhandimwe.
Oshili: Kalunga okwa efa ovanhu va hoolole ku vovene ondjila oyo va hala okushikula. Eendjovo daye odo di li muJeremia 29:11 oda li da yukifwa kOvaisrael ve li ongudu eshi va li muBabilon, nokwa li a halela ongudu oyo onakwiiwa yombili. (Jeremia 29:4) Ashike, Kalunga okwa pitika keshe umwe a ninge ehoololo a mone ouwa momaudaneko aye ile hasho. (Deuteronomion 30:19, 20; Jeremia 29:32) Ovo va hoolola okukonga Kalunga ohave shi ningi mokwiilikana va mana mo. — Jeremia 29:12, 13.
Omutotolombo: Kalunga ota ka yambapaleka ovalongeli vaye noinima yopamaliko.
Oshili: Outumbulilo “yambapaleka” oo tau hangwa mEembiibeli dimwe muJeremia 29:11 owa tolokwa wa dja koshitya shOshiheberi osho tashi ti “ombili, oukolele nonghalo nawa.” Metwokumwe noshikalimo, Kalunga okwa li a udanekela Ovaisrael ovo va li moukwatwa ombili nonghalo nawa, ndele haupuna. Oshiwana osha li shi na okutwikila okukala moukwatwa, nosha li shi na okushuna kuJerusalem fiku limwe. — Jeremia 29:4-10.
Lesha Jeremia etukulwa 29 pamwe nomashangelo opedu oo a yelifa nosho yo omaulikokwatakanifo.
^ okat. 7 Shi na sha naJeremia 29:11, O-The Expositor’s Bible Commentary oya ti: “Eli olo limwe lomomaudaneko a denga mbada oo ta hangwa mOmbiibeli a ulika olukeno laYahweh [Jehova] li na sha neenghwate odo, nolwanima ola li le va pa etomheno la kola lokukala va hafa nove na eteelelo la twa.” — Embo 7, epandja 360.
Otashi dulika yo u hafele oikundafanwa ei
OMAHONGO OMBIIBELI A FIMANA
Ouhamba waKalunga oshike?
Eshi Jesus a li kombada yedu, okwa li ha udifa unene kombinga yOuhamba waKalunga. Oule womido, ovashikuli vaye ova kala hava ilikana Ouhamba oo u uye.
OMAHONGO OMBIIBELI
Oilongifo yokukonakona Ombiibeli
Hoolola oilongifo yokukonakona Ombiibeli, oyo tai ku kwafele u kale wa halelela okulihonga shihapu.
OMAHONGO OMBIIBELI
Tala nghee eenghundafana detu dopaMbiibeli hadi ningwa
Konakona Ombiibeli naumwe oshali