Pefimbo lefudepo, mbela ounona voye otava ka hoolola okutala ouvidio, ile okulesha? Oshike tava ka hoolola: ongodi, ile embo?

 Oule womido dihapu, ovanhu ova efa po okuyandja elitulemo kokulesha omolwo-TV nosho yo oinima oyo tava dulu okutala nokuninga kointaneta. Jane Healy okwa shanga, membo laye lomo1990 Endangered Minds, a ti: “Mafiku ovanhu otava ka efa po okulesha.”

 Pefimbo olo, otashi dulika u diladile kutya itashi shiiva ovanhu va efe po okulesha. Ashike paife, konima yomido omilongo nhatu, ovahongi ovo ve li moilongo omo hamu longifwa outekinologi, ova ti kutya ovanyasha ihava dulu okulesha va li nawa ngaashi mefimbo lonale.

Moshitukulwa eshi

•  Omolwashike okulesha kwa fimana kounona?

•  Nghee to dulu oku va twa omukumo va leshe

•  Osho ovadali hava ti

•   Okulesha ohaku ku ningifa u faneke momadiladilo. Pashihopaenenwa, ngeenge to lesha ehokololo, ovo va popiwa mo ove na eendaka di li ngahelipi? Otava monika ngahelipi? Omudingonoko ou li ngahelipi? Omushangi oha fatulula ashike oinima yonhumba, ashike omuleshi oye e na okufaneka momadiladilo ehokololo.

   Omudalakadi wedina Laura, okwa ti: “Ngeenge hatu tale ouvidio, otu wete ashike nghee umwe a faneka momadiladilo. Ashike eshi shi hokwifa kombinga yokulesha, oho faneke momadiladilo eshi sha shangwa kuumwe.”

•   Okulesha ohaku kwafele ounona va kulike omaukwatya mawa. Okulesha ohaku kwafele ounona va dule okutomhafana nomaupyakadi nosho yo oku a kandula po. Ohashi pula ounona va yandje elitulemo eshi ta va lesha. Okuninga ngaho, ohava kulike omaukwatya ngaashi, elididimiko, elipangelo nosho yo olukeno.

   Olukeno? Heeno! Ovahongwanhu vamwe ova itavela kutya ngeenge ounona tava lesha ehokololo noukeka tava ende kashona, ohashi va kwafele va diladile kombinga yomaliudo aavo ve li mehokololo. Naasho ohashi va ningifa va ulikile ovanhu ovo ve shii olukeno.

•   Okulesha ohaku xumifa komesho okudiladila moule. Ovo hava lesha noukeka ohava lesha nefimbo lavo, tashi dulika va endulule opo sha pumbiwa, opo va dule okuuda ko osho omushangi a shanga. Ngeenge va ningi ngaho, ohava dulu okudimbulukwa noupu osho va lesha nohava mono mo ouwa. — 1 Timoteus 4:15.

   Omudali wedina Joseph okwa ti: “Ngeenge to lesha, oho dulu okumona noupu eityo letumbulo, to li kwatakanifa naashi u shii noto ka mona kutya oshike to dulu okulihonga mo. Ouvidio nosho yo eemuvi iha di tu ningifa tu diladile moule.”

 Oshidjemo: Nonande ouvidio ove na ongushu yonhumba, ounona voye otava ka kala va kambela sha fimana, ngeenge itava kongo efimbo va leshe.

•   Hovela diva. Chloe, omudalakadi wounona voumati vavali, okwa ti: “Ohatu leshele ounona vetu ofimbo ashike ve li moshidalelo, nohatu twikile oku va leshela konima ngeenge va dalwa. Otwa hafa eshi twa twikila. Moule wefimbo lixupi, okulesha okwa ninga omukalondjikilile wavo.”

   Efinamhango lOmbiibeli: “Nou shii omishangwa diyapuki okudja kounona.” — 2 Timoteus 3:15.

•   Eumbo loye, nali kale onhele iwa nokuleshela. Ninga eumbo loye onhele iwa nokuleshela mokukala u na omambo okulesha. Tamara, omudalakadi wounona vane, okwa ti: “Konga omambo oo ounona voye tava ka hafela, ndele to a tula popepi nombete yavo.”

   Efinamhango lOmbiibeli: “Omona woye omumati, mu ikifa ondjila yaye ya yuka, opo nee ita ka yapuka muyo, eshi a kula.” — Omayeletumbulo 22:6.

•   Ngabeka elongifo lointaneta. Omudali wedina Daniel okwa yandja eetepo lokuhalongifa oikwaelektronika konguloshi. Okwa ti: “Nande onguloshi ashike imwe moshivike, ihatu tale o-TV. Ohatu longifa efimbo olo, opo tu leshe tu li oukwaneumbo, ile pauhandimwe.”

   Efinamhango lOmbiibeli: “Mu shiive oinima oyo ya fimanenena.” — Ovafilippi 1:10.

•   Tula po oshihopaenenwa. Karina, omudalakadi woukadona vavali, okwa ti: “Leshela ounona voye monghedi oyo tai mwenyopaleke ehokololo. Ngeenge ou hole okulesha, ounona voye otava ka shikula oshihopaenenwa shoye.”

   Efinamhango lOmbiibeli: “Twikila okukala ho lesha moipafi.” — 1 Timoteus 4:13.

 Haunona aveshe tava ka kala ve hole okulesha. Ashike etwomukumo loye otali dulu oku va kwafela va kale ve na ehalo lokulesha. David, omudali woukadona vavali, okwa ninga shihapu shi dulife opo. Okwa ti: “Onda li handi lesha osho ovanakadona vange hava lesha, osho osha kwafela nge ndi mone kutya ove na ohokwe mushike noshe tu ningifa tu kale tu na osho hatu dulu okupopya. Otwa li tu na okangudu ketu kokulesha. Otwa li twe shi hafela!”