Carl okwa ti: “Ito dulu okukala wa yooloka ko kukeshe umwe, okuninga shapo to kala uhe na ookaume noiho hafele sha monghalamwenyo. Kape na oo ta ka kala e na ko nasha naave, noto ke likalela.”

Mbela ota popi ta wedele? Otashi dulika. Ashike, ngaashi Carl a popya, ovanhu vamwe ohava ningi keshe shimwe opo va henuke oilanduliko. Mbela naave osho ho ningi ngaho? Oshitukulwa eshi otashi ke ku kwafela u mone onghedi ya denga mbada yokukonga ookaume.

•  Omolwashike ovanhu hava kendabala okukala ve holike?

•  Osho wa pumbwa okushiiva

•  Osho oomakula voye tava ti

• Omolwaashi ohava kala va hala okuhokiwa. Natalie okwa ti: “Onda mona omafano ongudu konhele yomakwatafano opaintaneta, oyo ya li ya ka hafela pamwe nova ninga oinima ndihe po. Osha ningifa nge ndi lipule kutya oshike sha puka shi na sha naame, nonda li handi lipula kutya kave hole nge noinandi wana okukala navo.”

  DILADILA KOMBINGA YAASHI: Mbela ope na efimbo limwe wa li u udite ovanhu vehe na ko nasha naave? Mbela owa li wa ninga po sha, opo ve ku tambule ko?

• Omolwaashi ihava kala va hala okukala va yooloka ko. Mary okwa ti: “Ovadali vange kava li va pitika nge ndi kale nongodi. Eshi ounona vakwetu va pula nge onomola yange yongodi, ndele handi va lombwele kutya nghi na ongodi, ova ti: ‘Oshike? Ou na eedula ngapi?’ Eshi nde va lombwela kutya ondi na eedula 13, ova li va etela nge onghenda.”

  DILADILA KOMBINGA YAASHI: Omangabeko elipi wa tulilwa po kovadali voye tashi dulika hae ku ningifa u kale wa yooloka ko kuvamwe? Mbela oho ungaunga ngahelipi nomangabeko a tya ngaho?

• Omolwaashi ihava kala va hala okushindwa. Olivia okwa ti: “Ounona kofikola kave hole ovanhu ovo hava ningi oinima monghedi i lili, hava popi ile hava longela Kalunga monghedi i lili. Ngeenge iho ningi oinima monghedi oyo tai va wapalele, oho ningi oshihakanwa shavo shokushindwa.”

  DILADILA KOMBINGA YAASHI: Mbela ope na efimbo wa li ho ungaungiwa naave nai molwaashi ito wapalele vakweni? Mbela owa li wa ungaunga ngahelipi nonghalo ya tya ngaho?

• Omolwaashi ihava kala va hala okukanifa ookaume kavo. Rachel okwa ti: “Onda li handi kendabala okuwapalela ongudu keshe omo nda li. Onda li handi hopaenene onghedi yavo yokupopya. Onda li handi yolo nonande oshinima kashi yolifa. Ngeenge ounona vakwetu tava sheke umwe, naame onda li handi va hopaenene nonande onda li ndi shii kutya osha puka.”

  DILADILA KOMBINGA YAASHI: Osha fimana shi fike peni kwoove okukala u holike koomakula voye? Mbela ope na omhito imwe wa li wa lundulula omaukwatya oye opo u va wapalele?

• Omafimbo amwe ngeenge owa hopaenene vamwe opo va kale ve ku hole, ohashi va ningifa ve ku tonde. Omolwashike mbela? Omolwaashi ohava kala ve shi wete kutya oto liningifa. Brian, womido 20, okwa ti: “Pomhito imwe eshi nda li handi liningifa nda fa ovanafikola vakwetu, kanda li nde va wapalela. Onde lihonga kutya oshiwa okukala ashike ngaashi u li, molwaashi ovanhu ohava kala ve shi wete ngeenge to liningifa.”

  OSHO TASHI DULU OKU KU KWAFELA: Diladila kwaasho sha fimanenena kwoove. Ombiibeli oya ti: ‘Shiiveni oinima oyo ya fimanenena.’ (Ovafilippi 1:10) Lipula kutya, ‘Oinima ilipi ya fimanenena oyo hai ningifa nge ndi wapalele ovanhu ovo ve na eenghedi da yooloka ko ku dange, ile hai ningifa nge ndihe liningife?’

  James okwa ti: “Okukendabala okuliningifa wa fa vamwe ihashi kwafa sha. Ihashi linyengifa ovanhu va kale ve ku hole unene, noihashi ku ningifa u kale omunhu e li xwepo.”

• Okukendabala okuwapalela vamwe otashi dulu okunyona po omaukwatya oye. Otashi dulu oku ku ningifa u kale ho ningifa ovanhu va kale ve kufa nove ku tambula ko. Omulumenhu omunyasha wedina Jeremy okwa ti: “Onda kala handi kendabala okuninga keshe shimwe, opo ndi wapalele ongudu yonhumba, nonande osha li tashi nyono po edina lange. Onda li nda efa va nwefe mo onghedi yange yokupopya noyokuninga oinima.”

  OSHO TASHI DULU OKU KU KWAFELA: Shiiva eenghedi doye nokukala metwokumwe nado, ponhele yokukala wa fa fimbi oo haa lundulula omaluvala aye she likolelela komudingonoko. Nomolwaasho Ombiibeli ya ti: “Ino shikula ouhapu weemhunga u longe owii.” — Exodus 23:2.

  Melinda okwa ti: “Onda li handi kendabala okukala ndi hole keshe osho ve hole, ngaashi eengalo, omaudano, oikutu, eemuvi, onghedi yavo yokuliwapeka . . . Onda li handi kendabala okukala nde va fa. Ondi wete kutya ova li ve shii kutya ohandi liningifa. Keshe umwe okwa li e shi liwetele, naame mwene onda li yo ndi shi liwetele. Osha li sha nyemateka nge nonda li ndi udite owike, nokanda li ndi shii kutya onda fikama lela peni. Kanda li vali ndi shii kutya ame omunhu a tya ngahelipi. Onda li nde lihonga kutya hakeshe umwe to ka mona te ku wapalele, ile e ku hole. Osho inashi hala kutya ku na okukonga ookaume, ndele dimbuluka kutya otashi pula efimbo okukonga ookaume nokukula.”

• Okukendabala okuwapalela ovanhu otaku dulu okukuma elihumbato loye. Omunyasha wedina Chris okwa li a mona kutya mumwaina okwa li a ningilwa oshinima osho. Chris okwa ti: “Okwa li a hovela okuninga oinima oyo iha ningi shito opo e va wapalele ngaashi okushila oingangamifi. Okwa li a pikwa filufilu, nokonyala hanga i nyona po onghalamwenyo yaye.”

  OSHO TASHI DULU OKU KU KWAFELA: Henuka okukala novanhu ovo hava ulike okupitila mokupopya nosho yo moilonga kutya ihava diinine omifikamhango. Ombiibeli oya ti: “Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala.” — Omayeletumbulo 13:20.

  Melanie okwa ti: “Omafimbo amwe oshiwa okulitulila po omalalakano opo u wapalele ovanhu. Ashike ino kendabala okuninga oinima yonhumba oyo u shii kutya inai yuka. Ookaume kashili otave ke ku tambula ko, nonande ino kendabala oku va hopaenena.”

  Eetepo: Ngeenge wa shakeneke ookaume vape, ino konga ovanhu ovo ve na ohokwe moinima oyo u hole. Konga ovanhu ovo hava lenga oinima oyo u hole ngaashi oupamhepo woye nosho yo eenghedi doye.