Oshike to ka ninga po meenghalo tadi landula?

1. Omuhongi woye okwe ku hanyena molwaashi wa li ito lihumbata nawa pefimbo leetundi.

   Mbela oto ka yandja ngoo ombili komuhongi woye nonande ou shii kutya okwe shi ninga nehandu?

2. Kaume koye okwa mona kutya owa popya oitya oyo ye mu udifa nai.

   Mbela oto ka yandja ngoo ombili kukaume koye nonande ou wete we shi ninga netomheno li li mondjila?

3. Owa handukifwa kutate woye nowa li to mu nyamukula nai.

   Mbela oto ka yandja ngoo ombili kutate woye nonande ou wete e ku shinda?

   Enyamukulo komapulo aeshe oo opatatu oheeno. Ndele omolwashike u na okuyandja “ombili” nonande haave auke u na ondjo?

•  Omolwashike u na okuyandja ombili?

•  Nghee to dulu okuyandja “ombili”

•  Osho oomakula voye tava ti

• Okuyandja ombili ohaku ulike kutya owa kula. Ngeenge owa dimine kutya ou na epuko moshinima osho wa popya ile wa ninga, oto ulike kutya oto kulike omaukwatya a fimana oo to ka pumbwa ngeenge owa kulu.

  Rachel okwa ti: “Elininipiko nelididimiko otali ke tu kwafela tu yandje ombili nosho yo okupwilikina kwaasho vamwe tava ti.”

• Okuyandja ombili ohaku tu kwafele tu pange ombili. Ovanhu ovo hava yandje ombili, ohava ulike kutya ohave lipula unene nokukaleka po ombili ponhele yokuulika kutya ovo ve li mondjila ofimbo vakwao va puka.

  Miriam okwa ti: “Osho sha fimana okupanga ombili nonande oto diladila kutya haave u na epuko. Ihashi ku pula sha okutya ‘ombili,’ ashike ohashi pameke oukaume.”

• Okuyandja ombili ohashi ku kwafele u kale u udite wa pepelelwa. Okukala u udite ondjo eshi wa yahameka umwe neendjovo ile neenghatu doye ohashi kala omutengi mudjuu okuhumbata. Ngeenge owa yandje ombili, omutengi oo ohau di ko komapepe oye. *

  Nia okwa ti: “Peemhito dimwe okwa li handi dulu okupopya nameme ile natate nopehe na efimaneko. Osha kala hashi udifa nge nai, ashike onda kala handi mono shidjuu okuyandja ombili. Shimha nda yandje ombili, ohashi udifa nge nawa molwaashi ohashi tu kwafele vali tu kale tu na ombili moukwaneumbo.”

Mbela ohashi pula eenghendabala okuyandja ombili? Heeno. Omukainhu omunyasha wedina Dena, oo a li a pumbwa okuyandja ombili lwoikando kumeme waye omolwokupopya naye nopehe na efimaneko, okwa ti: “Kashipu okutya ‘ombili.’ Ohandi kala ndi udite nai neenghono noitandi dulu okupopya sha.”

• Ngeenge otashi shiiva, yandja ombili odikilila. Okuyandja ombili to i komunhu odikilila ohashi kwafele omunhu a mone kutya owe livela ombedi shili. Ndele ngeenge owa yandje ombili okupitila metumwalaka otashi dulika omunhu ehe shi itavele. Nonande owa tuma etumwalaka noufano tava holola omaliudo kutya owe livela ombedi shili, itashi ka ulika lela kutya oya dja komutima.

  Osho to dulu okuninga: Ngeenge ito dulu okuyandja ombili komudidi, kendabala okudenga ongodi ile okushanga okakalata. Kashi nee mbudi kutya oto longifa onghedi ilipi, hoolola nawa oitya yoye.

  Efinamhango lOmbiibeli: “Omutima womuyuki otau diladila osho tau shi nyamukula.” — Omayeletumbulo 15:28.

• Yandja ombili diva. Eshi ngoo tapa piti efimbo lile oupyakadi inau kandulwa po, osho ngoo oupyakadi tau monika wa fa wa kwata moiti, noitamu ka kala mu na ekwatafano nomunhu oo wa nyemateka.

  Osho to dulu okuninga: Litulila po elalakano, pashihopaenenwa, ‘ohandi yandje ombili nena.’ Tala kutya omhito ilipi tai wapalele, opo nee to yandje ombili.

  Efinamhango lOmbiibeli: “Paafaneni diva ombili.” — Mateus 5:25.

• Yandja ombili tashi di komutima. Okupopya kutya ombili eshi u udite ngaho kashi fi okuyandja ombili shili! Omukainhu omunyasha wedina Janelle okwa ti: “Omunhu oo wa udifa nai ote ke ku fimaneka ashike ngeenge okwa mono shili kutya owa yandja ombili tashi di komutima.

  Osho to dulu okuninga: Yandja ombili nopehe na omatomheno okulipopila. Ino tya ohandi ku pe ashike ombili ngeenge naave oto pe nge ombili.

  Efinamhango lOmbiibeli: “Natu lalakanene oinima oyo tai eta ombili.” — Ovaroma 14:19.