Shilipi po shomoitwa tai landula tashi dulu okufaafanifwa neliudo?

• okoompasa

• esipili

• kaume

• omutokoli

Omanyamukulo aeshe ane oku li mondjila. Oshitukulwa eshi otashi ka yelifa kutya omolwashike.

•  Eliudo oshike?

•  Omolwashike u na okudeula eliudo loye?

•  Ongahelipi to dulu okudeula eliudo loye?

•  Osho oomakula voye tava ti

Eliudo olo oukwatya woye womeni wokutongola pokati kaasho shi li mondjila naasho sha puka. Ombiibeli oya ti ola fa ‘omhango oyo ya shangelwa momitima dovanhu.’ (Ovaroma 2:15) Eliudo ohali tu kwafele tu talulule eenghatu odo tu li pokukatuka ile twa katuka nale.

• Eliudo loye ola fa okoompasa. Ohali ku wilike u kale mondjila ya yuka opo u dule okuhenuka omaupyakadi.

• Eliudo loye ola fa esipili. Ohali ku ulikile onghedi omo ho lihumbata, noku ku hololela ounhu woye womeni.

• Eliudo loye ola fa kaume muwa. Ngeenge owa pwilikine kulo, otali ke ku pa omayele mawa notali ke ku kwafela u pondole.

• Eliudo loye ola fa omutokoli. Otali ke ku vela ombedi ngeenge owa ningi sha sha puka.

Oushili oyoo kutya: Eliudo loye olo oshilongifo sha fimana osho tashi dulu oku ku kwafela (1) u ninge omatokolo e li mondjila (2) nou ninge omalunduluko omolwomapuko oye.

Ombiibeli oye tu lombwela tu kale tu na “eliudo liwa.” (1 Petrus 3:16) Osho ohashi kala shidjuu okuninga ngaho ngeenge eliudo letu inali kala la deulwa nale.

Jennifer okwa ti: “Ovadali vange ngeenge tava pula nge apa nda li ohandi va lombwele oipupulu nohandi shi ningi oshiholekwa. Pehovelo, eliudo lange ola li hali vele nge ombedi, ashike mokweendela ko kwefimbo osho osha ka kala sha fa inashi kwata moiti.”

Lwanima, eliudo laJennifer ole ke mu linyengifa a lombwele ovadali vaye oshili, nokweefa po oku va lombwela oipupulu.

Diladila kwaashi: Oposhitwa shilipi pehovelo eliudo laJennifer la li tali mu fininike?

Matthew okwa ti: “Ohashi kala shidjuu noho kala wa wililwa po ngeenge ou na onghalamwenyo yopavali. Eliudo loye ngeenge ole ku pitike u ninge etokolo lihe li mondjila, otashi ka kala shipu okuninga etokolo natango la puka.”

Ovanhu vamwe ohave lipwililikile omaliudo avo. Ombiibeli oya ti: “Ova dina omifikamhango dopaenghedi.” (Ovaefeso 4:19) Ombiibeli yo-Good News Translation oya ti: “Ohava nyono nopehe na ouxwenge.”

Diladila kwaashi: Mbela ovanhu ovo omaliudo avo ihae va vele ombedi ngeenge tava katuka eenghatu da puka ove li xwepo? Omaupyakadi elipi have ke li hanga muo?

Oushili oyoo kutya: Opo u kale u na eliudo liwa, owa pumbwa okukala u na ‘eendunge dokuyoolola da deulwa, opo u dule okutongola ouwa nowii.’ — Ovaheberi 5:14.

Opo u deule eliudo loye, owa pumbwa omifikamhango odo tadi ku kwafele u faafanife eenghatu doye. Ovanhu vamwe ohava shikula omifikamhango odo da tulwa po:

• kovapambele nosho yo omifyuululwakalo

• koomakula vavo

• komanyakwa dingi

Ashike, omifikamhango dokukalamwenyo odo tadi hangwa mOmbiibeli oda denga mbada. Osho itashi kumwifa, molwaashi Ombiibeli oya “nwefwa mo kuKalunga,” oo e tu shita noku shii osho sha denga mbada kufye. — 2 Timoteus 3:16.

Tala koihopaenenwa imwe tai landula.

EFINAMHANGO: ‘Otwa hala okukala ovanashili moinima aishe.’ — Ovaheberi 13:18.

• Ongahelipi efinamhango olo tali dulu okukuma eliudo loye ngeenge to yelekwa u tape otsutsa, ile u lombwele ovadali voye oipupulu, ile u vake?

• Ngeenge eliudo loye ohali ku pitike u kale omunashili moinima aishe, ongahelipi tali ke ku kwafela u mone ouwa paife nosho yo monakwiiwa?

EFINAMHANGO: “Indeni onhapo oluhaelo.” — 1 Ovakorinto 6:18.

•  Ongahelipi efinamhango olo tali dulu oku ku kwafela ngeenge to yelekwa u tale omafano oipala ile uye momilele komesho yohombo?

• Ngeenge eliudo loye ohali ku pitike uye onhapo omilele, ouwa ulipi to dulu okumona paife nosho yo monakwiiwa?

EFINAMHANGO: “Kaleni hamu kenukilafana, hamu filafana onghenda nokudiminafana po nehalo liwa.” — Ovaefeso 4:32.

•  Efinamhango eli ohali ku linyengifa u ninge po shike ngeenge opa holoka okuhaudafana pokati koye nomumwaina woye ile nakaume koye?

• Ouwa ulipi to dulu okumona paife nosho yo monakwiiwa ngeenge eliudo loye ohali ku pitike u kale omunanghenda nomunalukeno?

EFINAMHANGO: ‘Omwene oku tonde ovo ve hole owii.’ — Epsalme 11:5.

•  Ongahelipi efinamhango olo tali dulu oku ku wilika ngeenge tashi uya pokuhoolola eefilima, eeprograma doko-TV nosho yo omaudano ouvidio?

• Ngeenge eliudo loye ihali ku pitike u kufe ombinga momalihafifo oo e na elongifo leenghono, ouwa ulipi to dulu okumona paife nosho yo monakwiiwa?

EHOKOLOLO LASHILI: Jeremy okwa ti: “Onda li handi dana omaudano ouvidio e na sha nelongifo leenghono, ovo ookaume kange hava dana. Opo nee tate okwa lombwela nge kutya inandi va dana vali. Ashike onda li handi va dana ngeenge nda ka talela po ookaume kange. Eshi handi uya keumbo, onda kala ashike handi shi mwenene. Tate okwa li ha pula nge ngeenge ope na oupyakadi washa, ashike onda kala handi mu nyamukula kutya aishe oi li nawa. Efiku limwe, onda li handi lesha Epsalme 11:5, nonda li nda hovela okukala ndi udite nai shi na sha naasho nda li handi ningi. Onda li nda didilika kutya ondi na okweefa po filufilu omaudano ouvidio ovo. Onda li nde va efa po. Oshihopaenenwa shange osha kwafela yo kaume kange umwe naye a efe po okudana omaudano ouvidio ovo.”

Diladila kwaashi: Oposhitwa shilipi eliudo laJeremy la li la hovela okulonga, noposhitwa shilipi a hovela okupwilikina kulo? Oshike we lihonga moshihopaenenwa shaJeremy?

Oushili oyoo kutya: Eliudo loye ohali ku ulikile kutya ove omunhu naanaa a tya ngahelipi, noshike osho wa pitifa komesho. Mbela eliudo loye ohali ku wilike ngoo?