•  Omolwashike ndi na okuninga omadeulo?

•  Oshike hashi imbi nge ndi ninge omadeulo?

•  Ongahelipi handi dulu okumona omadeulo oo nda pumbwa?

•  Kala u na ondjele

•  Osho oomakula voye tava ti

Moilongo imwe, ovanyasha ohava longifa efimbo linini mokuninga omadeulo opalutu, naasho ohashi tula oukolele wavo moshiponga. Omolwetomheno la femba, Ombiibeli oya popya kutya “edeulo lopalutu oli na ekwafo.” (1 Timoteus 4:8) Tala koinima tai shikula:

• Omadeulo ohaa xwepopaleke eholokepo loye. Omadeulo opalutu ohaa kwafele eeholomone di longe nawa molutu, odo hadi kwafele omunhu a kale a pepelelwa nokwa hafa. Vamwe ova tala ko omadeulo haa denge po epolimano.

  Regina okwa ti: “Ngeenge onda ka tondoka ongula, efiku lange ohali endele nge nawa nohali kala li hafifa. Okutondoka ohaku kwafele nge ndi kale nda hafa.”

• Omadeulo ohae ku ningifa u monike nawa. Omadeulo e li pandjele ohae ku kwafele u kale u na eenghono, wa pama, naasho sha fimanenena oho kala u na omukumo.

  Olivia okwa ti: “Paife onda hafa molwaashi ohandi dulu okulileka lwomulongo shi dulife omudo wa dja ko! Osho sha fimanenena oshosho kutya, ohandi file oshisho olutu lange.”

• Omadeulo ohaa lelepeke onghalamwenyo. Omadeulo ohaa kwafele omutima nosho yo omapunga a longe nawa. Omadeulo okulinyengifa olutu ohaa kwafele omunhu aha kwatwe koudu womutima, oo hau dipaa ovalumenhu novakainhu.

  Jessica okwa ti: “Ngeenge otwa kala hatu ningi omadeulo pandjikilile, ohatu ulikile Omushiti wetu kutya otwa lenga omalutu oo e tu pa.”

Oushili oyoo kutya: Omadeulo ohaa kwafele omunhu a kale e na oukolele paife nosho yo monakwiiwa. Omukainhu omunyasha wedina Tonya okwa ti: “Ku na efiku u ke livele ombedi kutya omolwashike nda ka londela komhunda, ile nda ka tondoka. Kandi na efiku nde livelele ombedi molwaashi nda ka ningile omadeulo.”

Natu ka taleni koiimbi imwe yomuyo:

• Etekomukumo. Sophia okwa ti: “Ohandi diladila kutya ovanyasha ovo unene va pumbwa etwomukumo. Oshidjuu okudiladila kutya onava ka kale fiku limwe vehe na oukolele. Ohava diladila kutya okuhe na oukolele ohaku hange ashike ovakulupe.”

• Okuhe na efimbo. Clarissa okwa ti: “Molwaashi ohandi kala nde lipyakidila unene, ohandi kongo efimbo lokuteleka oikulya iwa nosho yo lokukofa, ashike ohashi kala eshongo okukonga efimbo lokulideula.”

• Kandi na okakalata kokonhele yokuningila omadeulo. Gina okwa ti: “Oshi na ondilo okuya monhele yokuningila omadeulo, oo tae ku kwafele u kale wa pama!”

Diladila kwaashi:

Oshike hashi ku imbi unene okuninga omadeulo? Otashi pula eenghendabala okuhenuka osho hashi ku imbi u ninge omadeulo, ashike oshi na ouwa muhapu.

Tala komaetepo manini taa shikula:

• Fila oshisho oukolele woye. — Ovagalati 6:5.

• Henuka okuninga omalipopilo. (Omuudifi 11:4) Pashihopaenenwa, ino pumbwa okuya konhele yokuningila omadeulo opo u hovele okuninga omadeulo. Konga edeulo olo ho hafele, ndele to kala ho li ningi pandjikilile.

• Konga omayele kuvamwe nghee to dulu okuninga omadeulo. — Omayeletumbulo 20:18.

• Litulila po elandulafano lokondadalunde. Litulila po omalalakano, ndele to kala ho didilike osho wa pondola. — Omayeletumbulo 21:5.

• Konga oo to kala ho ningi naye omadeulo. Ngeenge owa mono “kaume,” oo hamu ningi naye omadeulo, ote ke ku kwafela u kale ho a ningi pandjikilile. — Omuudifi 4:9, 10.

• Omafimbo amwe otashi dulika u kale wa teka omukumo, ashike ino sholola. — Omayeletumbulo 24:10.

Ombiibeli oya popya kutya ovalumenhu novakainhu nava kale ve na “ondjele.” (1 Timoteus 3:2, 11) Onghee hano, kala u na ondjele i na sha nomadeulo. Ovanhu ovo hava longo fiyo onakemutwaalele ohave lihange va loloka. Omukainhu omunyasha wedina Julia okwa ti: “Ngeenge omulumenhu oha file oshisho unene eholokepo laye lokombada shi dulife okudiladila kwaye, iha fuula nge.”

Lungamena omayele oo tae ku ningifa u ninge omadeulo a pitilila, oo taa nyono po oukolele woye. Omayele a tya ngaho otaa dulu oku ku ehameka palutu noku ku ningifa uha yandje elitulemo ‘koinima oyo ya fimanenena’ monghalamwenyo. — Ovafilippi 1:10.

Shimwe vali, oinima oyo ovanhu va tala ko tai tu omukumo otashi dulika i va nyemateke. Omukainhu omunyasha wedina Vera okwa ti: “Oukadona vahapu ohava tuvikile omafano ovanhu ovo va hala okukala va fa, nohave a tale ngeenge va teka omukumo. Ashike lwanima ohave lihange tave liyelekanifa navo nohashi va teya omukumo. Oshixwepo okulitulila po elalakano u xwepopaleke oukolele woye, ponhele yeholokepo loye.”