Eehamba dotete 1:1-53
1 Ohamba David oya li ya kulupa neenghono nokaya li vali hai udu oupyu, nonande oi tuvikilwe omakumbafa.
2 Onghee ovapiya vayo ova tya kuyo: “Omwene wange ohamba, napa kongwe okakadona elela ka kale take ku file oshisho. Otaka ka nangala mekolo loye, opo omwene wange ohamba u kale wa pupyalelwa.”
3 Ova konga okakadona kawa moitukulwa aishe yOvaisrael, nova mona mo Abisag Omusunemi, ndele tave mu eta kohamba.
4 Okakadona oka li kawa neenghono, noka kala haka file oshisho ohamba, ashike ohamba inai nangala nako.
5 Adonia, omonamati waHaggit, okwa li te litumbaleke, ta ti: “Ohandi ka ninga ohamba!” Okwe liningila etemba, nokwa li e na ovalondinghambe nosho yo ovalumenhu 50, ovo tave mu pitile komesho.
6 Ashike xe ka li e mu hanyena,* ngeno a tye: “Omolwashike to ningile ngaho?” Adonia naye okwa li muwa neenghono, noye a li a shikula Absalom pakudalwa.
7 Okwa popya naJoab, omonamati waSerua, nosho yo omupristeri Abjatar, ndele tava kwafele Adonia noku mu yambidida.
8 Ashike omupristeri Sadok, Benaia, omonamati waJehoiada, omuprofeti Natan, Simei, Rei novakwaita ovanaenghono vaDavid inava yambidida Adonia.
9 Adonia okwa yambela eedi, eengobe noimuna aishe, oyo ya ondoka, kemanya laSohelet, olo li li popepi naEn-rogel, ndele ta shivi ovamwaina aveshe, ovanamati vohamba nosho yo ovalumenhu aveshe Ovajuda, ovapiya vohamba.
10 Ashike ka li a shiva omuprofeti Natan, Benaia nosho yo ovakwaita ovanaenghono, ile omumwaina Salomo.
11 Natan okwa tya kuBatseba, ina yaSalomo: “Owa uda ngoo kutya Adonia, omonamati waHaggit, okwa ninga ohamba, nomwene wetu David ine shi uda?
12 Alikana, ila ndi ku pe omayele, opo u xupife omwenyo woye nosho yo omwenyo womonamati woye Salomo.
13 Inda kohamba David, ndele to ti kuyo, ‘Omwene wange ohamba, haave wa li wa anena omupiya woye, wa ti: “Omonamati woye Salomo ota ka ninga ohamba, oyo tai shikula nge, noye ta ka kala omutumba kolukalwapangelo lange?” Osha enda ngahelipi, opo Adonia a ninge ohamba?’
14 Ofimbo to popi nohamba, ohandi ke uya mo nohandi ka popila eendjovo doye.”
15 Batseba okwa ya kohamba monduda yayo yokunangala. Ohamba oya li ya kulupa neenghono, na Abisag, Omusunemi, okwa li ta yakula ohamba.
16 Opo nee Batseba okwe linyongamena pedu, ndele ta nangala eombe koshipala shohamba, nohamba oya ti: “Nandi ku ningile shike?”
17 Batseba okwa tya: “Omwene wange, oove wa li wa anena omupiya woye kuJehova, Kalunga koye, kutya, ‘Omonamati woye Salomo ota ka ninga ohamba, oyo tai shikula nge, noye ta ka kala omutumba kolukalwapangelo lange.’
18 Tala, Adonia okwa ninga ohamba, nomwene wange ohamba ke na eshi e shii kombinga yasho.
19 Okwa yamba eengobe deemhedi, oimuna ya ondoka nosho yo eedi dihapu, ndele ta shivi ovanamati aveshe vohamba, omupristeri Abjatar nosho yo Joab, ondjai yetangakwaita, ashike ina shiva omupiya woye Salomo.
20 Omwene wange ohamba, paife Ovaisrael aveshe ova teelela u va lombwele kutya olyelye te ku shikula mouhamba, nokukala omutumba kolukalwapangelo loye, omwene wange ohamba.
21 Diva ngeenge omwene wange ohamba okwa nangekwa pooxekulululwa, fye nomonamati wange, Salomo, ohatu ka talwa ko tu li ovatondi.”
22 Ofimbo natango a li ta popi nohamba, omuprofeti Natan okwe uya mo.
23 Ohamba oya lombwelwa diva kutya: “Omuprofeti Natan oye ou!” Okwe uya koshipala shohamba, ndele ta nangala eombe oshipala shaye sha twa pedu koshipala shohamba.
24 Opo nee Natan okwa tya: “Omwene wange ohamba, owa ti ngoo, ‘Adonia oye ta ka ninga ohamba, oyo tai shikula nge, nota ka kala omutumba kolukalwapangelo lange’?
25 Nena okwa ya a ka yambe eengobe deemhedi, oimuna ya ondoka nosho yo eedi dihapu, ndele ta shivi ovanamati aveshe vohamba, ovakulunhu vomatangakwaita nosho yo omupristeri Abjatar. Oko ve li oko tava li nokunwa pamwe naye, notava popi kutya, ‘Ohamba Adonia, kala nomwenyo mule!’
26 Ashike ame omupiya woye, omupristeri Sadok, Benaia, omonamati waJehoiada, nosho yo omupiya woye Salomo, ine tu shiva.
27 Omwene wange ohamba, oove wa pitika eshi shi ningwe nopehe na okulombwela omupiya woye kutya olyelye te ku shikula nokukala omutumba kolukalwapangelo loye?”
28 Ohamba David oya nyamukula ya ti: “Ifanenei nge Batseba.” Opo nee Batseba okwe uya, ndele ta fikama koshipala shohamba.
29 Ohamba oya ana ya ti: “Ohandi ane kuJehova, Kalunga omunamwenyo, oo a xupifa nge* komaudjuu aeshe,
30 ngaashi ashike nde ku anena kuJehova, Kalunga kaIsrael, nda ti, ‘Omonamati woye Salomo oye ta ka ninga ohamba oyo tai shikula nge, noye ta ka kala omutumba kolukalwapangelo lange ponhele yange!’ Osho osho handi ka ninga nena eli.”
31 Opo nee Batseba okwa twa eengolo oshipala sha twa pedu nokwe linyongamena kohamba, ndele ta ti: “David, omwene wange ohamba, kala nomwenyo mule!”
32 Diva ohamba David oya tya: “Ifanenei nge omupristeri Sadok, omuprofeti Natan naBenaia, omonamati waJehoiada.” Onghee ove uya koshipala shohamba.
33 Ohamba oya tya kuvo: “Indeni pamwe novapiya vomwene weni, ndele tamu londeke omonamati wange Salomo kemwili* lange, nokuya naye kuGihon.
34 Omupristeri Sadok nomuprofeti Natan otave ke mu vaekela oko e li ohamba yOvaisrael. Opo nee nye omu na okushika enghuma, ndele tamu ti, ‘Ohamba Salomo, kala nomwenyo mule!’
35 Mu shikuleni, eshi ta shuna, note ke uya nokukala omutumba kolukalwapangelo lange, nota ka ninga ohamba ponhele yange, nohandi ke mu pa oshinakuwanifwa a ninge omuwiliki waIsrael naJuda.”
36 Diva, Benaia, omonamati waJehoiada, okwa tya kohamba: “Amen! Jehova, Kalunga komwene wange ohamba, ne shi dimine.
37 Ngaashi ashike Jehova a li pamwe nomwene wange ohamba, na kale yo pamwe naSalomo, nolukalwapangelo laye ne li ninge linene li dule olukalwapangelo lomwene wange ohamba David.”
38 Onghee omupristeri Sadok, omuprofeti Natan, Benaia, omonamati waJehoiada, Ovakereti nOvapleti ova ya, nova londeka Salomo kemwili lohamba David, ndele tave mu twala kuGihon.
39 Omupristeri Sadok okwa kufa oluvinga* lomaadi metwali, ndele ta vaeke Salomo. Opo nee ova hovela okushika omanghuma, novanhu aveshe ova hovela okwiingida tava ti: “Ohamba Salomo, kala nomwenyo mule!”
40 Konima yaasho, ovanhu aveshe ove mu shikula tava ende tava shiki eenyalilo va hafa neenghono, nedu ola tenda pokati omolwomaweelelo avo.
41 Adonia nosho yo aveshe ovo a shiva ove shi uda, eshi va mana okulya. Diva ashike eshi Joab a uda enghuma la shikwa, okwa ti: “Omaweelelo oo e li moshilando oashike?”
42 Ofimbo a li natango ta popi, Jonatan, omonamati womupristeri Abjatar, okwe uya. Opo nee Adonia okwa tya: “Ila mo, osheshi ove omulumenhu e li nawa,* ou na okukala u na onghundana iwa.”
43 Jonatan okwa nyamukula Adonia, a ti: “Ahawe! Omwene wetu ohamba David okwa nangeka po Salomo e li ohamba.
44 Ohamba oye mu tuma pamwe nomupristeri Sadok, omuprofeti Natan, Benaia, omonamati waJehoiada, Ovakereti nOvapleti, nove mu londeka kemwili lohamba.
45 Opo nee omupristeri Sadok nomuprofeti Natan ove mu vaeka a ninge ohamba muGihon. Konima yaasho, ova dja ko va hafa, nomoshilando omwa li omaweelelo. Omaweelelo oo, oo wa uda.
46 Xuuninwa, Salomo okwa kala omutumba kolukalwapangelo.
47 Natango, ovapiya vohamba ove uya okupandula omwene wetu, ohamba David, tava ti, ‘Kalunga koye na tumbalekife edina laSalomo shi dulife loye, nokuninga olukalwapangelo laye linene li dule loye!’ Opo nee ohamba oye linyongamena Kalunga kombete.
48 Natango, ohamba oya tya: ‘Jehova, Kalunga kaIsrael, na tangwe, oo a pitika umwe a kale omutumba kolukalwapangelo lange nena, nokwa pitika nge ndi mu mone!’”
49 Aveshe ovo va li va shivwa kuAdonia ova li va tila, nakeshe umwe okwa fikama, ndele ta i nondjila yaye.
50 Adonia naye okwa li a tila omolwaSalomo, onghee okwe likwatelela keembinga odo da li koaltari.
51 Salomo okwa lombwelwa kutya: “Adonia okwa tila ohamba Salomo, nokwe likwatelela keembinga odo di li koaltari, ta ti, ‘Ohamba Salomo nai anene nge tete kutya itai ka dipaa omupiya wayo neongamukonda.’”
52 Salomo okwa nyamukula, a ti: “Ngeenge okwe lihumbata nawa, kape na nande oxwiki yokomutwe waye tai wile pedu, ashike ngeenge muye omwa monika sha shii, oku na okufya.”
53 Ohamba Salomo oya tuma Adonia a ka talwe ko koaltari. Opo nee okwe uya, ndele te linyongamene ohamba Salomo, nolwanima, Salomo okwa tya kuye: “Inda keumbo loye.”
Eshangelo lopedu
^ Ile “ehameka omaliudo aye.”
^ Ile “mangulula omwenyo wange.”
^ Ile “kemwili lekadi.”
^ Ile “oshanga.”
^ Ile “a fimana.”
