Samuel wotete 19:1-24
19 Lwanima, Saul okwa ka popya nomonamati waye, Jonatan, nosho yo novapiya vaye aveshe shi na sha nokudipaa David.
2 Ndele molwaashi omonamati waSaul, Jonatan, okwa li e hole unene David, okwa lombwela David a ti: “Tate okwa hala u dipawe. Alikana, lilongekida efimbo longula, ndele to i konhele ya amenwa u ka hondame.
3 Ohandi i, ndele handi ka kala ofika putate ponhele opo to ka kala. Ohandi ka popya natate shi na sha naave, ndele ngeenge onda udu sha, ohandi ku lombwele.”
4 Onghee Jonatan okwa lombwela xe, Saul, oinima iwa kombinga yaDavid. Okwa tya kuye: “Ohamba, ino ningila omupiya woye David owii, molwaashi ina nyona sha kwoove, naashishe osho e ku ningila oshe ku etela ouwa.
5 Okwa li a tula omwenyo waye moshiponga, opo a dipae Omufilisti, na Jehova okwa etela Ovaisrael aveshe efindano* linene. Owe shi mona, nosha li she ku hafifa. Omolwashike wa hala okunyona mokutilashi ohonde ihe na etimba, eshi wa hala okudipaifa David nopehe na etomheno lasha?”
6 Saul okwa li a pwilikina kuJonatan, ndele ta ane ta ti: “Ohandi ane medina laJehova Kalunga omunamwenyo kutya, ita dipawa.”
7 Lwanima, Jonatan okwa ifana David, ndele te mu lombwele oinima aishe oyo. Onghee Jonatan okwa eta David kuSaul, ndele David ta twikile okulongela Saul ngaashi shito.
8 Mokweendela ko kwefimbo, opa ka holoka vali oita, na David okwa li a ya, ndele ta lwifa Ovafilisti, nokwa li a dipaa vahapu vomuvo, naava va xupa po ove mu faduka po.
9 Jehova okwa li a pitika omhepo ii i ye muSaul,* ofimbo a li e li omutumba meumbo laye e na eonga meke laye, na David okwa li ta shiki okaxumbafeta.
10 Saul okwa li ta kendabala okutwila David neonga kekuma, ashike David okwe mu yepa, ndele eonga tali shimbama mekuma. Opo nee David okwa faduka po oufiku oo.
11 Lwanima, Saul okwa tuma ovatumwa keumbo laDavid ve li nangele nova dipae David ongula. Ashike omukulukadi waDavid, Mikal, okwe mu lombwela a ti: “Ngeenge ino faduka po* oufiku wonena, oto dipawa mongula.”
12 Onghee Mikal okwa pitifa diva David mekende, opo David a dule okufaduka po.
13 Mikal okwa kufa oshihongwafano shaterafim,* ndele te shi tula kombete, nokwa tula komutwe washo elapi la longwa molududi loikombo, ndele te shi uvike nekumbafa.
14 Opo nee Saul okwa tuma ovatumwa va ka tale David, ashike Mikal okwa ti: “Ota vele.”
15 Onghee Saul okwa tuma ovatumwa va ka tale David, nokwe va lombwela a ti: “Mu eteni oku e li kombete yaye e uye a dipawe.”
16 Eshi ovatumwa va ya mo, kombete yaye okwa li oshihongwafano shaterafim,* naapo pa li pe na okukala omutwe waye opa li elapi la longwa molududi loikombo.
17 Saul okwa tya kuMikal: “Omolwashike wa enda nge medu, eshi wa lekela omutondi wange a faduke po?” Mikal okwa nyamukula Saul a ti: “Okwa lombwela nge a ti, ‘Lekele nge, ngeenge hasho, ohandi ku dipaa.’”
18 David okwa faduka po, nokwa ya kuSamuel, kuRama. Opo nee okwa lombwela Samuel oinima aishe oyo a ningilwa kuSaul. Ova ya pamwe naSamuel, nova ka kala hava di muNajot.
19 Mokweendela ko kwefimbo, Saul okwa lombwelwa kutya: “Tala, David oku li kuNajot, muRama.”
20 Onghee Saul okwa tuma ovatumwa va ka kwate po David. Eshi va mona ovakulunhu vovaprofeti tava xunganeke, na Samuel a fikama te va wilike, omhepo yaKalunga oye uya movatumwa vaSaul, ndele navo tava hovele okulihumbata ngaashi ovaprofeti.
21 Eshi ve shi lombwela Saul, okwa tuma diva ovatumwa vamwe, ndele navo tava hovele okulihumbata ngaashi ovaprofeti. Onghee Saul okwa tuma natango ovatumwa vamwe, ongudu onhinhatu, ndele navo tava hovele okulihumbata ngaashi ovaprofeti.
22 Xuuninwa, naye okwa ya kuRama. Eshi a fika pondungu ya kula, oyo i li muSeku, okwa pula a ti: “Samuel naDavid ove li peni?” Ova nyamukula va ti: “Ove li kuNajot, muRama.”
23 Ofimbo Saul a li molweendo a finda kuNajot, muRama, omhepo yaKalunga oye uya yo muye, ndele naye ta ende te lihumbata ngaashi omuprofeti, fiyo osheshi a fika kuNajot, muRama.
24 Naye okwa dula mo oikutu yaye, ndele te lihumbata ngaashi omuprofeti moipafi yaSamuel, nokwa kala a nangala e li hamunghele* omutenya aushe noufiku aushe. Osho osho she va ningifa va pule kutya: “Hano Saul naye oumwe womovaprofeti?”
Eshangelo lopedu
^ Ile “exupifo.”
^ Eln., “Omhepo ii ya dja kuJehova oya li ya ya muSaul.”
^ Ile “ino ka holeka omwenyo woye.”
^ Ile “oshikalunga shomeumbo.”
^ Ile “oshikalunga shomeumbo.”
^ Ile “e li ashike mokambulukweva kokoshi.”
