Eehamba eenhivali 13:1-25
13 Momudo omuti-23 wepangelo laJoas, omonamati waAhasia, ohamba yaJuda, Joahas, omonamati waJehu, okwa ninga ohamba yaIsrael, muSamaria, nokwa pangela oule weedula 17.
2 Okwa twikila okulonga osho shii momesho aJehova, nokwa kala ta nyono ngaashi Jerobeam, omonamati waNebat, oo a ningifa Israel shi nyone. Ina efa po okunyona.
3 Onghee Jehova okwa li a handukila neenghono Ovaisrael, nokwe va yandja momake aHasael, ohamba yaSiria, nomomake aBenhadad, omonamati waHasael, okukalamwenyo kwavo akushe.
4 Mokweendela ko kwefimbo, Joahas okwa indila* Jehova e mu file onghenda, na Jehova okwa li e mu uda, molwaashi okwa mona nghee ohamba yaSiria ya hepeka Ovaisrael.
5 Onghee Jehova okwa tumina Ovaisrael omuxupifi e va mangulule meemhango daSiria, nOvaisrael ova li va dula okukala momaumbo avo ngaashi nale.*
6 (Ashike inava efa po okunyona ngaashi eumbo laJerobeam, oo a ningifa Israel shi nyone. Ova twikila okunyona,* nopala iyapuki* oya kala ya fikama muSamaria.)
7 Joahas okwa li ashike a xupa po netangakwaita lovalondinghambe 50, omatemba 10 novakwaita vokolupadi 10 000, molwaashi ohamba yaSiria oya li ye va hanauna po noye va lyataula ngaashi onhi pefimbo lokuxwa.
8 Ondjokonona aishe yaJoahas, ashishe osho a ninga nosho yo eenghono daye, mbela inai shangwa membo londjokonona yopefimbo leehamba daIsrael?
9 Opo nee Joahas okwa nangekwa pooxekulululwa, nove mu paka muSamaria. Omonamati waye, Joas, okwa ninga ohamba ponhele yaye.
10 Momudo omuti-37 wepangelo laJoas, ohamba yaJuda, Joas, omonamati waJoahas, okwa ninga ohamba yaIsrael, muSamaria, nokwa pangela oule weedula 16.
11 Okwa twikila okuninga osho shii momesho aJehova, noina efa po omanyono aeshe oo Jerobeam, omonamati waNebat, a ningifa Israel shi nyone. Okwa twikila* okunyona.
12 Ondjokonona aishe yaJoas, ashishe osho a ninga nosho yo eenghono daye nanghee a lwifa Amasia, ohamba yaJuda, mbela inai shangwa membo londjokonona yopefimbo leehamba daIsrael?
13 Opo nee Joas okwa nangekwa pooxekulululwa, na Jerobeam* okwa kala omutumba kolukalwapangelo laye. Joas okwa pakwa muSamaria, peehamba daIsrael.
14 Eshi Elisa a li ta ehama omukifi, oo lwanima we ke mu twala mefyo, Joas, ohamba yaIsrael, okwe uya kuye, ndele ta lili moipafi yaye, ta ti: “Tate, Tate! Etemba laIsrael novalondinghambe vaye!”
15 Elisa okwa tya kuye: “Kufa outa noikuti.” Onghee okwa kufa outa noikuti.
16 Opo nee okwa tya kohamba yaIsrael: “Lilongekida okuumba.” Onghee okwe lilongekida okuumba. Konima yaasho, Elisa okwa tenheka omake aye komake ohamba.
17 Opo nee okwa tya: “Patulula ekende olo la taalela koushilo.” Onghee okwe li patulula. Elisa okwa tya: “Umba!” Onghee okwa umba. Okwa tya: “Oshikuti shaJehova shefindano,* oshikuti shefindano shokufinda* Siria. Oto ka finda* Siria puAfek, fiyo osheshi we shi xulifa po.”
18 Okwa twikila ko ta ti: “Kufa oikuti,” nokwe i kufa. Opo nee okwa tya kohamba yaIsrael: “Denga pedu.” Onghee okwa denga pedu lwoikando itatu, ndele ta mwena.
19 Omupiya waKalunga kashili okwa li e mu handukila, ndele ta ti: “Owa li u na okudenga pedu lwoikando itano, ile ihamano! Opo nee ngeno owa dula oku ka finda Siria, fiyo we shi xulifa po, ndele paife oto ka finda ashike Siria lwoikando itatu.”
20 Konima yaasho, Elisa okwa fya nokwa pakwa. Opa li ongudu yovanyeki yOvamoab, oyo ya li hai uya moshilongo pehovelo lodula.*
21 Ofimbo ovalumenhu vamwe va li tava pake omulumenhu umwe, ova mona ongudu yovanyeki, onghee ova endelela nove mu umbila monhele omo mwa pakwa Elisa, ndele tava faduka po. Eshi omulumenhu oo a kuma oipongolo yaElisa, okwa nyumuka, ndele ta kala ofika.
22 Hasael, ohamba yaSiria, okwa hepeka Israel okukalamwenyo kwaJoahas akushe.
23 Ashike Jehova okwe va fila onghenda nokwe va kenukila, nokwa ulika kutya oku na ko nasha navo omolwehangano olo a ninga naAbraham, Isak naJakob. Ka li a hala oku va hanauna po, noine va xulifa* po fiyo okunena.
24 Eshi Hasael, ohamba yaSiria, a fya, omonamati waye, Benhadad, okwa ninga ohamba ponhele yaye.
25 Opo nee Joas, omonamati waJoahas, okwa kufulula Benhadad, omonamati waHasael, oilando oyo a li a kufa xe, Joahas. Joas okwe mu finda* lwoikando itatu, nokwa alula ko oilando yaIsrael.
Eshangelo lopedu
^ Ile “pula ekwafo.”
^ Sha hala okutya, nombili nomeameno.
^ Eln., “okweenda mulo.”
^ Tala Omafatululo oitya.
^ Eln., “enda.”
^ Sha hala okutya, Jerobeam omutivali.
^ Ile “shexupifo.”
^ Ile “shoku va xupifa.”
^ Ile “denga.”
^ Eln., “pokuuya kwodula,” tashi dulika pokwenye.
^ Eln., “koshipala shaye.”
^ Ile “denga.”
