Eehamba eenhivali 17:1-41
17 Momudo omuti-12 wepangelo laAhas, ohamba yaJuda, Hosea, omonamati waEla, okwa ninga ohamba yaIsrael muSamaria, nokwa pangela oule weedula omuwoi.
2 Okwa twikila okulonga osho shii momesho aJehova, ndele hangaashi eehamba daIsrael, odo de mu tetekela.
3 Salmaneser, ohamba yaAssiria, okwe uya oku mu lwifa, na Hosea okwa ninga omupiya waye, nokwa hovela okufuta eemhale* kuye.
4 Ashike ohamba yaAssiria oya uda kutya Hosea naye okwa kufa ombinga momhangela oyo, molwaashi okwa tuma ovatumwa kuSo, ohamba yaEgipiti, noina yandja eemhale kohamba yaAssiria, ngaashi a kala ha ningi eedula da dja ko. Onghee hano, ohamba yaAssiria oya kala ye mu manga, e li modolongo.
5 Ohamba yaAssiria oye uya okuponokela oshilongo ashishe, noye uya kuSamaria, ndele tai shi kondeke oule weedula nhatu.
6 Momudo omutimuwoi wepangelo laHosea, ohamba yaAssiria oya kwata ko Samaria. Opo nee oya twala Ovaisrael moukwatwa kuAssiria, noye va pa va kale hava di muHala nomuHabor, osho shi li pomulonga waGosan nomoilando yOvamedia.
7 Osho osha ningwa, molwaashi Ovaisrael ova nyona kuJehova, Kalunga kavo, oo e va kufa medu laEgipiti, koshi yewiliko laFarao, ohamba yaEgipiti. Ova li hava longele* ookalunga vamwe,
8 va shikula eenghedindjikilile doiwana, oyo Jehova a taataa mo moipafi yOvaisrael, nova shikula eenghedindjikilile odo eehamba daIsrael da li da tula po.
9 Ovaisrael ova li tava lalakanene oinima oyo inai yuka momesho aJehova, Kalunga kavo. Ova twikila okutunga eenhele koikulundudu moilando yavo aishe, okudja koshungongulu fiyo okoilando ya dingililwa komakuma a pama.*
10 Ova kala tave lidikile eengudimanya diyapuki neepala diyapuki* koshikulundudu keshe shile nokoshi yomuti keshe wa kula,
11 nokeenhele adishe dokoikulundudu ohava twimine ko omayambo, ngaashi ashike oiwana, oyo Jehova a twala moukwatwa moipafi yavo, ya kala hai ningi. Ova kala tava longo oilonga ii, opo va nyemateke Jehova.
12 Ova twikila okulongela oikalunga itondifa,* oshinima osho Jehova e va lombwela, a ti: “Inamu i longela.”
13 Jehova okwa kala ta londwele Ovaisrael nOvajuda okupitila movaprofeti vaye aveshe nomovamonikokule aveshe, ta ti: “Efei po okulonga owii weni. Diinineni oipango yange neenghedimhango dange she likolelela keemhango adishe, odo nda lombwela ooxokulululwa, naado nde mu tumina, okupitila movapiya vange, ovaprofeti.”
14 Ashike inava pwilikina, nova kala ovatangalali,* ngaashi ooxekulululwa, ovo va li vehe na eitavelo muJehova, Kalunga kavo.
15 Ova kala tava anye omaufomhango aye nehangano laye, olo a ninga nooxekulululwa, nosho yo omadimbulukifo, oo a yandja, opo e va londwele. Ova twikila okulongela oihongwafano yongaho, ndele navo tava ningi ovanhu vongaho, tava hopaenene oiwana aishe, oyo ye va dingilila, oyo Jehova e va lombwela vaha hopaenene.
16 Ova kala nokweefa po oipango aishe yaJehova, Kalunga kavo, nova ninga oihongwafano yeenhana mbali ya hambulwa moshivela* nosho yo opala iyapuki,* ve linyongamena komatangakwaita aeshe omeulu nova longela Baal.
17 Natango, ova endifa ovanamati vavo novanakadona vavo momundilo, va nyanekela nova tala momukonda. Ova kala tava ningile owina osho shii* momesho aJehova, opo ve mu nyemateke.
18 Jehova okwa li a handukila Ovaisrael neenghono, onghee okwe va taataa po koshipala shaye. Ina xupifa po nande oumwe, kakele ashike kepata laJuda.
19 Ovajuda navo kava li va diinina oipango yaJehova, Kalunga kavo; ova li yo va shikula eenghedindjikilile odo Ovaisrael va li va shikula.
20 Jehova okwa li e liteeka po oludalo alishe lOvaisrael, nokwa li e va fifa ohoni, ndele te va yandje momake ovatondi vavo, fiyo osheshi e va taataa po filufilu koshipala shaye.
21 Okwa taataa mo Ovaisrael meumbo laDavid, nova ninga Jerobeam, omonamati waNebat, ohamba. Ndele Jerobeam okwa ningifa Ovaisrael vaha shikule Jehova, nokwe va ningifa yo va nyone sha kwata moiti.
22 Ovaisrael ova twikila okunyona omanyono aeshe oo Jerobeam a nyona. Inave a efa po,
23 fiyo osheshi Jehova e va taataa po koshipala shaye, ngaashi ashike a li a popya okupitila movapiya vaye aveshe, ovaprofeti. Onghee Ovaisrael ova twalwa moukwatwa kedu lOvaassiria, va dja moshilongo shavo, naako oko va kala fiyo okunena.
24 Opo nee ohamba yaAssiria oya kufa ovanhu muBabilon, muKuta, muAva, muHamat nomuSefarvaim, ndele tai va tula moshilando shaSamaria ponhele yOvaisrael; ova nangala Samaria, nova kala hava di moilando yasho.
25 Potete, eshi va hovela okukala hava di omo, kava li hava tila* Jehova. Onghee Jehova okwa tuma eenghoshi mokati kavo, ndele tadi dipaa vamwe vomuvo.
26 Ohamba yaAssiria oya li ya lombwelwa kutya: “Oiwana oyo wa twala moukwatwa, nowe i tula moilando yaSamaria, kai shii elongelokalunga* laKalunga womoshilongo. Onghee okwa twikila okutuma eenghoshi mokati kavo, odo da li tadi va dipaa, molwaashi kape na umwe womuvo e shii elongelokalunga laKalunga womoshilongo.”
27 Ohamba yaAssiria oya yandja elombwelo ya ti: “Kufeni omupristeri umwe womwaavo mwa twala moukwatwa a shune, opo a ka kale ha di oko, e va honge elongelokalunga laKalunga womoshilongo.”
28 Onghee umwe womovapristeri, ovo va twalwa moukwatwa, va dja muSamaria, okwa shuna, ndele ta ka kala ha di muBetel, nokwa hovela oku va honga nghee ve na okutila* Jehova.
29 Ashike oshiwana keshe osha ninga kalunga* kasho, oo sha tula monhele yokulongela Kalunga, keenhele dokoikulundudu, odo Ovasamaria va ninga; oshiwana keshe osha ninga ngaho moilando yasho omo hashi di.
30 Onghee ovanhu vokuBabilon ova ninga Sukkot-benot, ovanhu vokuKut ova ninga Nergal, ovanhu vokuHamat ova ninga Asima,
31 nOvaavi ova ninga Nibhas naTartak. Ovasefarvaim ohava xwikile ovana vavo momundilo Adrammelek naAnammelek, ookalunga vOvasefarvaim.
32 Nonande ova li hava tila Jehova, ova li va nangeka po ovapristeri keenhele dokoikulundudu, va dja mokati kovanhu, nova li have va yakula konhele yokulongela Kalunga, keenhele dokoikulundudu.
33 Kungaho, ova li hava tila Jehova, ashike ova li hava longele ookalunga kavo, metwokumwe nelongelokalunga* loiwana omo va kufwa.
34 Ohava shikula omalongelokalunga* avo onale fiyo okunena. Kape na umwe womuvo ha longele* Jehova, nokape na umwe ha shikula eenghedimhango daye, omatokolo aye, Omhango yaye nosho yo oipango, oyo Jehova a yandja kovanamati vaJakob, oo a lundulula edina laye li ninge Israel.
35 Eshi Jehova a ninga ehangano navo, okwe va lombwela, a ti: “Inamu kala hamu tila ookalunga vamwe, noinamu kala hamu ve linyongamene, ile mu va longele, ile mu va yambele.
36 Ndele Jehova, oo e mu kufa medu laEgipiti neenghono dinene nosho yo okwooko kwa yeluka, oye mu na okutila, noye mu na okulinyongamena noku mu yambela.
37 Omu na alushe okushikula filufilu omaufomhango, omatokolo, Omhango nosho yo oipango oyo e mu shangela, noinamu kala hamu tila ookalunga vamwe.
38 Inamu dimbwa ehangano olo nda ninga nanye, noinamu kala hamu tila ookalunga vamwe.
39 Ashike Jehova, Kalunga keni, oye mu na okutila, molwaashi oye te mu xupifa momake ovatondi veni aveshe.”
40 Ashike inava dulika, nova shikula elongelokalunga* lavo lonale.
41 Onghee oiwana oyo oya li hai tila Jehova, ndele oya li yo hai longele oihongwafano yayo. Ovanamati vavo novatekulu vavo ova ninga ngaashi ooxekulululwa va ninga fiyo okunena.
Eshangelo lopedu
^ Ile “eefuto odo da li hadi pewa eehamba.”
^ Eln., “tila.”
^ Sha hala okutya, ponhele keshe, kutya nee ope na ovakalimo vanini, ile ope na ovakalimo vahapu.
^ Tala Omafatululo oitya.
^ Oshitya shOshiheberi otashi dulika sha pambafana noshitya “onyata,” nohashi longifwa okuyukifwa koinima itondifa.
^ Eln., “va kukutika eefingo davo, ngaashi eefingo.”
^ Ile “oikalunga ya hemunwa.”
^ Tala Omafatululo oitya.
^ Ile “ve lilandifa po va ninge osho shii.”
^ Ile “longele.”
^ Ile “eenghedindjikilile delongelokalunga.”
^ Ile “okulongela.”
^ Ile “ookalunga.”
^ Ile “neenghedindjikilile domalongelokalunga.”
^ Ile “eenghedindjikilile domalongelokalunga.”
^ Eln., “tila.”
^ Ile “eenghedindjikilile domalongelokalunga.
