Samuel omutivali 11:1-27
11 Pehovelo lodula,* pefimbo opo eehamba da li hadi i kolwoodi, David okwa tuma Joab, ovapiya vaye nosho yo etangakwaita alishe laIsrael, va ka hanaune po Ovaammoni nokuponokela Rabba, ofimbo David a fyaala muJerusalem.
2 Efiku limwe konguloshi,* eshi David a penduka, okwa li ta ende kombada yeumbo.* Ofimbo a li kombada yeumbo, okwa mona omukainhu te likosho, nomukainhu oo okwa li muwa unene.
3 David okwa tuma umwe a ka pulapule kombinga yomukainhu oo, nokwa lombwelwa taku ti: “Oo oBatseba, omonakadona waEliam, omukulukadi waUria, Omuheti.”
4 Opo nee David okwa tuma ovatumwa ve ke mu tale. Onghee okwe uya kuDavid, nokwa nangala naye. (Osho osha ningwa pefimbo opo Batseba a li ta mane okulikoshola.*) Konima yaasho, okwa shuna keumbo laye.
5 Omukainhu okwa ninga oufimba, nokwa tumina David etumwalaka ta ti: “Onda ninga oufimba.”
6 David okwa tumina Joab etumwalaka a ti: “Tumine nge Uria, Omuheti.” Onghee Joab okwa tuma Uria kuDavid.
7 Eshi Uria e uya kuye, David okwe mu pula kutya Joab ote shi endifa ngahelipi, nghee omatangakwaita tae shi endifa nonokutya oita otai ende ngahelipi.
8 David okwa tya kuUria: “Inda keumbo loye, ndele to ka fuda po.”* Eshi Uria a dja mo meumbo lohamba, okwa tuminwa eeshali* da dja kohamba.
9 Ashike Uria okwa nangala poshivelo sheumbo lohamba pamwe novapiya aveshe vomwene waye, noka li a ya keumbo laye.
10 Onghee David okwa lombwelwa taku ti: “Uria ina ya keumbo laye.” Opo nee David okwa tya kuUria: “Hapo ashike wa di molweendo? Omolwashike ino ya keumbo loye?”
11 Uria okwa nyamukula David a ti: “Oshikefa nosho yo omatangakwaita aIsrael naJuda oku li momatwali opakafimbo, nomwene wange Joab nosho yo ovapiya vomwene wange ova onga onhanda kondje yoshilando. Ndele mbela nandi ye keumbo lange ndi ka lye nokunwa nosho yo okunangala nomukulukadi wange? Ohandi ku anene ofimbo u na omwenyo, ame itandi ke shi ninga!”
12 Opo nee David okwa tya kuUria: “Kala yo apa nena, nomongula ohandi ke ku lekela.” Onghee Uria okwa kala muJerusalem mefiku olo nosho yo mefiku la shikula ko.
13 David okwa tuma Uria a ka ifanwe ve uye va lye nokunwa pamwe, nokwe mu kolwifa. Ashike eshi kwa toka, okwa ya a ka nangale opo a li a nangala novapiya vomwene waye, noka li a ya keumbo laye.
14 Ongula David okwa shangela Joab onhumwafo nokwe i tuma i ye naUria.
15 Okwa shanga monhumwafo a ti: “Tula Uria komesho kombinga oko ku na olwoodi la kwata moiti. Mu kaleni konima, ndele tamu shuna monima, opo a dipawe.”
16 Joab okwa kala ta konenene oshilando, nokwa tula Uria apa e shii kutya otapa ka kala ovakwaita ovanaenghono.
17 Eshi ovakwaita vomoshilando ve uya okulwifa Joab, ovapiya vamwe vaDavid ova dipawa, na Uria, Omuheti, oumwe womwaavo va dipawa.
18 Joab okwa hepaululila David ashishe osho sha ningwa molwoodi.
19 Okwa lombwela omutumwa a ti: “Ngeenge wa mane okulombwela ohamba ashishe osho sha ningwa molwoodi,
20 otashi dulika i handuke, ndele tai ti kwoove, ‘Omolwashike mwa ka lwila popepi noshilando? Kamwa li mu shi shii kutya otave ke mu umba ve li kombada yomakuma avo?
21 Olyelye a dipaa Abimelek, omonamati waJerubeset? Mbela ke fi omukainhu oo e mu umbila emanya la kula la dja pombada yekuma noku mu dipaela puTebes? Omolwashike mwa ila popepi nekuma?’ Opo nee mu lombwela kutya, ‘Omupiya woye Uria, Omuheti, naye okwa fya.’”
22 Onghee omutumwa okwa ya, nokwa lombwela David ashishe osho a tumwa kuJoab e mu lombwele.
23 Omutumwa okwa lombwela David a ti: “Ovakwaita vavo ove tu dula eenghono, nove uya oku tu lwifa kondje yoshilando, ashike otwe va taataa fiyo oposhivelo shoshilando.
24 Ova umba ovapiya voye okudja pombada yekuma, novapiya vamwe vohamba ova fya; omupiya woye Uria, Omuheti, naye okwa fya.”
25 David okwa lombwela omutumwa a ti: “Lombwela Joab to ti: ‘Ino efa oshinima eshi shi ku piyaaneke, osheshi keshe umwe ota dulu okufila molwoodi.’ Mu ladipika a lwife oshilando osho a mana mo, ndele te shi kwata ko.”
26 Eshi omukulukadi waUria a uda kutya omushamane waye okwa fya, okwa hovela oku mu lila.
27 Eshi efimbo lokulila eefya la pwa ko, David okwa tuma Batseba a etwe keumbo laye, nokwa ninga omukulukadi waye, ndele te mu dalele okaana okamati. Ashike osho David a ninga osha li sha nyematifa* Jehova.
Eshangelo lopedu
^ Sha hala okutya, konima yokufu.
^ Ile “komatango.”
^ Ile “yombala.”
^ Tashi dulika a li ina koshoka omolwomafimbo aye.
^ Eln., “to ka kosha eemhadi doye.”
^ Tashi dulika tashi ulike koikulya imwe oyo hai tuminwa ovaenda va fimana.
^ Eln., “osha li shii momesho.”
